Panangisuro iti Wagas ti Mangisalakan
Agpannuray a siaannatup iti tunggal maysa kadatayo a mangsurot iti pagwadan ti Maestro ken mangisuro a kas Kenkuana.
Dagiti Naisalsalumina a Mannursuro
Sumagmamano a bulan ti napalabas, maysa a dati a kaklasek iti Overton, Nevada, ti nangisingasing a sangkamaysakami a mangted iti Christmas gift iti kindergarten teachermi, a nangselebrar ti maika 98 a kasangayna itay nabiit. Insurona kadakami ti agbalin a naasi, ti kinapateg ti rumidep, ti rag-o iti gatas ken graham crackers, ken ti agayat iti maysa ken maysa. Agyamanak, Sister Davis, iti kinasayaatmo a mannursuro.
Naaddaannak pay ti sabali a naisangsangayan a teacher bayat ti panagbasak idi iti Ricks College. Agsagsaganaak idi nga agserbi iti mision ket napanunotko a makatulong nga agatendarak iti missionary preparation class. Binalbaliwan ti padasko ti biagko.
Manipud iti umuna nga aldaw ti klase, naamirisko nga addaak iti sango ti maysa a maestro a mannursuro. Ni Brother F. Melvin Hammond ti mannursurok. Ammok nga inayatnak ni Brother Hammond ken ti Apo. Makitak daytoy iti rupana ken mangngegko iti timekna. Idi nangisuro, linawagan ti Espiritu ti panunotko. Insurona ti doktrina, ngem inyawisna kaniak a sursuruek iti bukodko. Tinulongannak dayta nga awis a kitaen a silalawag ti pagrebbengak nga agsursuro iti doktrina ti Apo para iti bagik. Binalbaliwannak dayta a padas iti agnanayon. Agyamanak Brother Hammond, ti panangisurom iti wagas ti Mangisalakan.
Kakabsat, maikari ti tunggal maysa a maaddaan iti kastoy a kita ti padas nga agsursuro iti pagtaengan ken iti simbaan.
Ti pakauna iti Umaykayo, Sumurot Kaniak mangted iti pannirigan no ania ti maipatungpal ti panangisuro a kas ken ni Cristo. “Ti panggep ti panagsursuro ken panangisuro iti ebanghelio“ kunana, “ti mangpatibker iti kumbersiontayo ken ni Jesucristo ken mangtulong nga agbalin a kas Kenkuana. … Ti kita ti panagsursuro iti ebanghelio a mangpapigsa iti pammatitayo ken mangiturong iti milagro ti pannakapasurot ket saan a mapasamak a mamimpinsan. Agtultuloy daytoy iti labes ti siled ti klase iti puso ti tao ken pagtaenganna.”1
Ipakita ti scripture ti panagministerio ti Mangisalakan iti nagkauna nga Amerika a nangapekto ken nagsaknap ta “napasurot dagiti amin a tao iti Apo, iti amin a daga, dagiti Nephite ken Lamanite, ket awan ti nagririri ken nagsisinnuppiat kadakuada, ket nasayaat ti panagkikinnaawatan ti tunggal maysa.”2
Kasano nga adda ti kasta met nga epekto iti panangisurotayo kadagiti ay-ayatentayo? Kasano a makaisurotayo nga ad-adda a kas iti Mangisalakan ken matulongan ti dadduma a mapapigsa ti kumbersionda? Bay-andak a mangted iti sumagmamano a singasing.
Tuladem ti Mangisalakan.
Umuna ken kangrunaan, awatem daytoy iti bagim nga agsursuro iti amin a kabaelam maipapan iti Mismo a Maestro a Mannursuro. Kasano nga impakitana ti ayat iti dadduma? Ania ti nariknada idi nangisuro? Ania ti insurona? Ania ti ninamnamana kadagiti sinuruanna? Kalpasan ti panangutobmo ti saludsod a kas kadagitoy, amirisen ken ibagaymo ti wagas a panangisurom tapno ad-adda nga agbalin a kas iti wagasna.
Mangted ti Simbaan iti adu a resources iti panangisuro iti Gospel Library app ken iti ChurchofJesusChrist.org. Maysa a resource ti maawagan iti Panangisuro iti Wagas ti Mangisalakan. Awisenkayo a mangbasa ken mangadal ti kada balikasna. Tulongannakayto dagitoy a pagbatayan iti panagkagumaanyo nga agbalin nga ad-adda a kas ken Cristo iti panagisuroyo.
Palugodan ti Bileg dagiti Pamilia
Ti sumaruno a singasingko ket mailadawan iti maysa a padasko idi binisitak ti gayyemko sumagmamano a bulan ti napalabas. Mangngegko ti asawana a makisarsarita iti maysa a tao isu a nadaras a nagpakadaak tapno makasubli iti pamiliana.
Maysa nga oras wenno nabaybayag naawatko ti text message manipud iti nasingpet nga asawana: “Brother Newman, agyamanak iti yaaymo. Inawisdaka koma a sumrek, ngem kayatko nga ibinglay no ania ti ar-aramidenmi idi. Manipud iti rugi ti pandemia napaglilinnawaganmi ti Umaykayo, Sumurot Kaniak kadagiti nataengan nga annakmi tunggal Domingo iti Zoom. Talaga a mapaspasamaken dagiti milagro. Panagkunak daytoy ti umuna a gundaway a nagbasa a bukodna ti balasangmi iti Libro ni Mormon. Daydi nga aldaw ti maudi a leksion iti Libro ni Mormon ken malmalpaskamin idi immayka. … Napanunotko nga interesadoka a dumngeg no kasano ti Umaykayo, Sumurot Kaniak, Zoom, ken pandemia a nangipaay ti gundaway iti umno a kanito a mangbalbaliiw iti puso. … Masdaawak no kasano a mapasamak ti adu babassit a milagro iti narikut a panawen.”
Agsaad kaniak daytoy kas pannakaipatungpal ti kari ni Presidente Russell M. Nelson idi Oktubre 2018. Kinunana a ti home-centered, Church-supported a panagadal iti ebanghelio “addaan potensial a mangpalugod ti bileg dagiti pamilia, bayat ti panangsurot iti tunggal pamilia nga agtultuloy a napudno ken naannad tapno agbalin ti pagtaenganda a santuario iti pammati. Ikarik a bayat ti napasnek a panangurnosyo ti pagtaenganyo nga agbalin a sentro a pagsursuruan ti ebanghelio, agbalinto dagiti aldawyo ti Sabbath a pagragsakan. Dagiti annakyo aggagarto nga agsursuro ken agtungpal kadagiti pannursuro ti Mangisalakan. … Makaawis rikna ken masuportaranyonto ti panangbalbaliw ti pamiliayo.”3 Nagpintasen a kari!
Tapno pudno a makapagbalbaliw, nasken a mairaman ti kumbersion ken ni Jesucristo ti sibubukel a kararuatayo ken impluensiaanna amin nga aspeto ti biagtayo. Isu a nasken a nakapokus iti sentro ti biagtayo—ti pagtaengantayo.
Laglagipen a Personal ti Kumbersion
Maudi a singasingko a laglagipenyo a mapasamak ti kumbersion iti kaunggan. Kas nailadawan iti pangngarig ti sangapulo a babbalasang, ditay makaited iti lana ti kumbersiontayo, kayattayo man ngem ditayo kabaelan. Kas iti insuro ni Elder David A. Bednar: “ Magun-od daytoy napateg a lana iti kada saggaysa a tedted … a siaanus ken sipupursigi. Awan pangalistuan a magun-od; madi ti dinadaras a panagsagana.”4
Maibatay tiUmaykayo,Sumurot Kaniak iti dayta a kinapudno. Idiligko iti anghel a nangtulong ken Nephi nga agsursuro maipapan kenJesucristo babaen ti panagkunana, iti “Kitaen!”5 Kas iti dayta nga anghel, awisennatayo ti Umaykayo, Sumurot Kaniak a mangkita iti nasantuan a kasuratan ken dagiti balikas dagiti agdama a propeta tapno mangsapul iti Mangisalakan ken dumngeg Kenkuana. Kas ken Nephi, personal a suruannatayo ti Espiritu bayat ti panagbasa ken panagutob iti balikas ti Dios. TiUmaykayo, Sumurot Kaniak ti springboard a mangpalugod kadatayo a siuuneg a bumatok iti nabiag a danum ti doktrina ni Cristo.
Ti pagrebbengan ti nagannak agpapada iti adu a wagas. Agtawid dagiti annak iti adu a banag manipud iti nagannakda, ngem saan ti pammaneknek. Ditayo makaited iti pammaneknek kadagiti annaktayo a kasta met a ditayo mapilit ti maysa a bukel nga agtubo. Ngem makaitedtayo iti manangpatanor nga aglawlaw, nasayaat a daga, awanan kadagiti siit a “manglapped iti balikas.” Maikarigatantayo ti agparnuay iti nasayaat a kondision tapno dagiti annaktayo—ken dadduma nga ipatpategtayo—makasarakda iti lugar a para iti bukel, “[dumngeg] iti balikas, ken [maawatan] daytoy”6 ket takuatenda para iti bagbagida a “nasayaat dayta a bukel.”7
Sumagmamano a tawen ti napalabas, nagay-ayamkami iti anakko a ni Jack iti golf iti St. Andrews ti Scotland, a nangrugian ti ay-ayam a golf. Gagangay a naragsak daytoy! Idi agsubliak pinadasko nga inlawlawag iti dadduma ti kadakkel ti padas. Ngem diak kabaelan. Saan nga umdas dagiti ladawan, video, ken ti kapintasan a panangiladawak. Naamirisko iti kamaudianan a ti kakaisuna a wagas a mangammo ti kinadayag ti St. Andrews ket ti mangpadas iti daytoy—a mangkita iti nalawa a fairways, sumay-up ken mangrikna iti pul-oy ti angin, ken panagmintis iti tira a mapan iti nadarat a rukib ken naraber a kamasetasan.
Kasta met iti balikas ti Dios. Maisurotayo daytoy, maikasabatayo daytoy, ken mailawlawagtayo daytoy. Mapagsasaritaantayo, mailadawantayo, maipaneknektayo pay daytoy. Ngem agingga a marikna ti tao ti sagrado a balikas ti Dios a kas iti linnaaw nga aggapu iti langit babaen ti bileg ti Espiritu,8 agbalinto a kas iti panangkita iti postcard wenno retrato ti tao iti bakasion. Nasken a mapanka sadiay. Ti kumbersion ket bukod a panagdaliasat—panagdaliasat a maummong.
Amin a mangisuro iti pagtaengan ken iti simbaan mabalin nga idiaya kadagiti dadduma ti gundaway a maaddaan iti bukodda a naespirituan a padas. Babaen itoy a padpadas, umaydanto “ket maammuanda ti kinapudno ti amin a banag” para iti bagbagida.9 Insuro ni Presidente Nelson a, “No addaankayo iti napudno a saludsod maipapan ti ebanghelio wenno ti Simbaan, bayat ti panangpiliyo a mangbay-an nga agballigi ti Dios, maiturongkayonto a mangsarak ken maawatan dagiti naan-anay, agnanayon a kinapudno a mangtarabayto iti biagyo ken mangtulongto kadakayo nga agtalinaed a sititibker iti dana ti katulagan.”10
Naakman a Mapadur-as iti Panangisuro
Awisek dagiti lider ken mannursuro iti tunggal gunglo ti Simbaan nga agbibinnalakad a sangkamaysa kadagiti nagannak ken agtutubo tapno naakman a mapadur-as ti panangisuro iti tunggal tukad—stake, iti ward, ken iti pagtaengan. Nagun-od daytoy babaen ti panangisuro iti doktrina ken panangawis iti napnuan-Espiritu a panaglilinnawag iti kinapudno nga insuro kadatayo ti Espiritu Santo iti naulimek a kanito iti bukodtayo a panagadal.
Patpatgek a gagayyemko ken Cristo, ti pagrebbengan agpannuray a siaannatup iti tunggal maysa kadatayo a mangsurot iti pagwadan ti Maestro ken mangisuro a kas Kenkuana. Ti dalanna ti pudno a dalan! Bayat ti panangsurottayo Kenkuana “tapno inton agparang, agbalintayonto a kas kenkuana, ta makitatayonto met laeng a kas isu; tapno maaddaantayo itoy a namnama; tapno mapatarnawtayo a kas iti kinatarnawna.”11 Iti nagan ti Apo a nagungar, ti Maestro a Mannursuro Mismo, ni Jesucristo, amen.