Nakakaasi nga Ubbing
Iti tunggal ward ken branch, kasapulantayo ti tunggal maysa—dagiti mabalin a napigsa ken nalabit a dagiti marigrigatan. Kasapulan ti amin.
Idi ubingak, malaglagipko ti panaglugluganmi iti kotse ken tatangko ken ti pannakakitkitak kadagiti marigrigatan wenno agkasapulan a tattao iti igid ti kalsada. Kanayon nga ikomento ni tatangko “Pobrecito,,“ a ti kayatna a sawen “nakakaasi nga ubing.”
No dadduma, interesadoak a mangbuybuya ken ni tatangko bayat ti panangtulongna iti tattao, aglalo no agbiahekami idi nga agbisita kada apongko idiay Mexico. Mangkita nukwa iti maysa nga agkasapulan ket sililimed a mangipaay iti tulong a kasapulanda. Natakuatak idi agangay a tultulonganna ida nga ag-enrol iti eskwela, gumatang iti taraon, wenno mangipaay iti no aniaman a pagimabaganda. Agserserbi iti maysa a “nakakaasi nga ubing” a maam-ammona. Kinapudnona, bayat ti panagdakkelko, awan ti malagipko a kanito a saan a nagkasapulan iti pagyanan dagiti nakipagnaed kadakami bayat ti panagbalinda a self-reliant. Nangparnuay kaniak iti iti pudno a kaipapanan ti kinamanangngaasi iti padak a ttatao ken kadagiti agkasapulan ti panangkitkitak kadagitoy a padas.
Iti Preach My Gospel naisurat: “Napalawlawankayo iti tattao. Malabasam ida iti kalsada, mabisitam iti pagtaenganda ken makapagpasiarka kadakuda. Annakda amin iti Dios, kakabsatmo a lallaki ken babbai. … Kaaduan kadagitoy a tattao ti agsapsapul iti panggep ti biag. Maseknanda para iti masakbayan ken pamiliada” (Preach My Gospel: A Guide to Missionary Service [2018], 1).
Bayat ti panagserbik iti Simbaan kadagiti naglabas a tawen, pinadasko ti nangsapul kadagiti agkasapulan iti agpada nga espiritual ken temporal a tulong. Masansan a mangngegak ni tatangko a mangibagbaga,“Pobrecito,,“ nakakaasi nga ubing.
Masarakantayo iti Biblia ti nakaskasdaaw a pagwadan iti panangtaripato ti nakakaasi nga ubing:
“Iti maysa a malem, iti alas tres nga oras ti panagkararag, napan da Pedro ken Juan iti Templo.
“Iti asideg ti ruangan nga aw-awagan dagiti tattao iti Napintas a Ruangan, adda maysa a lalaki a pilay. Nayanak a pilay ket inaldaw a bagkatenda nga ipan sadiay tapno makilimos kadagiti sumrek iti templo;
“Idi makitana da Pedro ken Juan a sumrek iti templo, dinawatna a limosanda.
“Ket, pinerrengda ti lalaki ket kinuna ni Pedro, Kitaennakami.
“Kimmita a dagus kadakuada a namnamaenna nga adda itedda kenkuana.
“Kinuna ni Pedro, Awan kuartak, ngem itedko kenka ti adda kaniak: iti nagan ni Jesucristo a taga-Nazaret, ibilinko a magnaka.
“Iniggamanna ti makannawan nga ima ti pilay sana tinulongan a timmakder. Timmibker a dagus dagiti susuop ti pilay” (Dagiti Aramid 3:1–7; nainayon ti panangyunay-unay).
Idi nabasak daytoy a salaysay, kayatko nga ammuen ti pannakausar ti balikas a panangperreng. Ti kayat a sawen ti panangperreng ket panangiturong iti mata, panunot, wenno napasnek a panangkita iti (kitaen iti “fasten,” Dictionary.com). Bayat ti panangkita ni Pedro iti daytoy a lalaki, nakitana a maiduma isuna iti sabali. Saanna a binigbig ti kinaawan ti kabaelanna a magna ken dagiti pagkapsutanna ket ammona nga umdas ti pammatina a maagasan ken makastrek iti templo a mangawat kadagiti bendision a sapsapulenna.
Nakitak nga iniggamanna ti makannawan nga imana ket tinulonganna a timmakder. Iti panangtulongna iti kastoy a wagas ti lalaki, namilagruan a pinaimbag ti Apo, ket “timmibker a dagus dagiti susuop ti pilay” (Dagiti Aramid 3:7). Ti panagayatna ken ti kalikagumna a mangtulong ti nakaigapuan ti panagpigsa ti kabaelan ken abilidad ti lalaki a nakapsut.
Bayat ti panagserbik a kas Area Seventy, inlatangko ti kada Martes ti rabii para iti ministering visit a kaduak dagiti stake president iti lugar a masakupak. Inawisko ida a makitulag iti oras kadagiti agkasapulan ti ordinansa ti ebanghelio ni Jesucristo wenno dagiti agdama a di agtungtungpal kadagiti katulaganda. Babaen iti kanayon ken nairanta a panagminister, pinadur-as ti Apo dagiti panagkagumaanmi ket nasapulanmi dagiti indibidual ken pamilia nga agkasapulan. Dagitoy ti “nakakaasi nga ubbing” nga agtalinaed iti nadumaduma nga stake a pagserserbianmi.
Iti maysa a gundaway, kinuyogko ni Presidente Bill Whitworth, ti presidente ti Sandy Canyon View Stake, a mapan agministering visit. Managkararag isuna maipapan no asinno ti bisitaenmi, ken padpadasenna a maaddaan iti padas kas ken Neph, nga “imbagnos ti Espiritu, ta dina ammo idi damo dagiti banag a rumbeng nga aramiden[na].” (1 Nephi 4:6). Impakitana a no intayo agminister, nasken a maiturongtayo babaen iti paltiing kadagiti agkasapulan unay, maisupadi kadaytay panangkita lang iti listaan wenno nasayud a panagbisita. Masapul a maiturongtayo babaen iti bileg ti inspirasion.
Malagipko ti panagbisita iti balay ti agassawa a Jeff ken Heather, ken ti anakda a ni Kai. Dimmakkel ni Jeff nga aktibo a miembro ti Simbaan. Nalaing nga atleta ken addaan iti napintas a masakbayan. Nangrugi nga immadayo ti Simbaan bayat ti kina-agtutubona. Idi agangay, naaksidente isuna, daytoy ti nangpabalbaliw ti turong ti biagna. Idi simrekkami iti pagtaenganda ken nakiam-ammokami, sinaludsod ni Jeff no apay a binisitami ti pamiliana. Imbagami nga adda ti agarup 3,000 a miembro nga agnaed iti beddeng ti stake. Sinaludsodko ngarud, “Jeff, iti amin a balay a binisitami ita a rabii, ibagam kadakami no apay nga imbaonnakami ti Apo ditoy.”
Gapu iti dayta, nasagid ti rikna ni Jeff ket imbinglayna dagiti pakadanaganna ken problema a pagpaspasaranda a kas pamilia. Nangibinglaykami iti nadumaduma a pagbatayan ti ebanghelio ni Jesucristo. Inawismi ida nga agaramid iti sumagmamano a banag a nalabit a narigat ti un-unana, ngem ti agangay makaitedto iti naindaklan a ragsak ken rag-o. Nangted ni President Whitworth ti priesthood blessing ken ni Jeff a mangtulong kenkuana kadagiti parikutna. Immanamongda Jeff ken Heather nga aramidenda ti awismi kadakuada.
Kalpasan ti maysa a tawen, naikannak ti pribilehio a makita ti panangbuniag ni Jeff iti asawana a ni Heather, a miembro ti Ti Simbaan ni Jesucristo dagiti Santo iti Ud-udina nga Aldaw. Agsagsaganada itan a sumrek iti templo tapno mailantipda a kas maysa a pamilia para iti panawen ken agnanayon. Ti panagbisitami ti nangbaliw iti turong ti panagbiagda, iti agpada a temporal ken espiritual.
Kinuna ti Apo:
“Gapuna, agtalinaedka a napudno; aramidem dagiti naitudingko kenka a takem; saranayem dagiti nakapsut, itag-aymo dagiti ima dagiti naidasay, ken patibkerem dagiti nalupoy a tumeng” (Doktrina ken Katulagan 81:5).
“Ket iti panangaramidmo kadagitoy a banag aramidemto ti kasayaatan kadagiti padam a nabiag, ket itandudom ti dayagna nga isu ti Apom” (Doktrina ken Katulagan 81:4).
Kakabsat, insuro ni Apostol Pablo ti maysa a kasapulan iti panagministertayo. Insurona a datayo ti “bagi ni Cristo ket kamengna ti tunggal maysa” (1 Taga Corinto 12:27) ket masapul ti tunggal miembro iti bagi tapno mapatalged a natibker ti intero a bagi. Ket insurona ti nabileg a kinapudno a simrek iti kaunggan ti pusok no innak basaen. Kinunana “Awan ti maaramidtayo no awan dagiti paset a kasla nakapkapsut, ad-adda ketdi: a taripatoen dagiti paset nga ipagaruptayo nga awan serserbina, kadagiti naalas a paset ipangpangrunatayo met a taripatoen” (1 Taga-Corinto 12:22–23; nainayon ti panangyunay-unay).
Ngarud, iti kada ward ken branch kasapulantayo ti amin—dagiti man napigsa ken dagiti nalabit a marigrigatan. Kasapulan ken napateg ti amin iti pannakapatibker ti intero a “bagi ni Cristo.” Masansan a mapanunotko dagiti awan iti nadumaduma a kongregasiontayo a mangpapigsa ken mangkumpleto koma kadatayo,
Insuro ni Elder D. Todd Christofferson: “Iti Simbaan ditayo laeng masursuro ti nadiosan a doktrina; mapadasantayo pay ti aplikasionna. Kas bagi ni Cristo, agminister dagiti miembro ti Simbaan iti tunggal maysa iti realidad ti inaldaw a biag. Awan kadatayo ti perpekto … Iti bagi ni Cristo, aglabestayo kadagiti konsepto ken naitan-ok a balikas ken ti pudno a padas ti ‘hands-on’ bayat ti panangadaltayo ti ‘agbiag a sangkamaysa iti ayat’ [Doktrina ken Katulagan 42:45]” (“Why the Church,” Liahona, Nov. 2015, 108–9).
Idi 1849, natagtagainep ni Brigham Young a nakitana ni Propeta Jospeh Smith a kasla mangiturturong iti dakkel a pangen dagiti tupa ken kalding. Daddakel ken napinpintas dagiti sumagmamano kadagiti ayup; dagiti dadduma babassit ken narurugit. Linagip ni Brigham Young ti panangkitana iti mata ni Propeta Joseph Smith ket imbagana, “Joseph, addaanka ti naisangsangayan iti amin a pangen … a nakitak iti panagbiagko, ania ti aramidem kadakuada?” Kasla saan a maapektaran iti daytoy naaliwegweg a pangen ti Propeta ket kinunana, “[Brigham,] nasayaatda amin iti pagnaedanda.”
Idi nakariing ni President Young, naawatanna a bayat ti panangummongto ti Simbaan kadagiti nadumaduma a “tupa ken kalding,” responsibilidadna nga awaten ti amin ken itulok ti tunggal maysa a maamirisda ti naan-anay a potensialda bayat ti panagtalinaedda iti Simbaan. (Naadaw manipud iti Ronald W. Walker, “Brigham Young: Student of the Prophet,” Ensign, Peb. 1998, 56–57.)
Kakabsat, ti nangrugian daytoy a mensahek naggapu iti panangpanpanunotko ti maysa a saan nga aktibo iti agdama iti Simbaan ni Jesucristo. Ket ita kayatko ti agsarita para iti tunggal maysa kadakuada. Insuro ni Elder Neal A. Maxwell a “ti kasta a tao masansan nga agtalinaed nga asideg iti—ngem saan a naan-anay a makitaripnong iti— Simbaan. Saanda nga umay iti uneg ti chapel, ngem saanda met a panawan ti veranda. Dagitoy dagiti makasapul ken masapul ti Simbaan, ngem isuda, ti mabalin a, ‘nagbiag nga awanan iti Dios iti lubong’ [Mosiah 27:31]” (“Why Not Now?,” Ensign, Nob. 1974, 12).
Ulitek ti awis ti patpatgentayo a propeta a ni Presidente Russel M. Nelson iti umuna a pannakisaritana kadagiti miembro ti Simbaan. Kinunana: “Ita, ibagak iti tunggal miembro ti Simbaan, agtalinaed iti dana ti katulagan. Ti panagkumityo a mangsurot iti Mangisalakan babaen ti panagaramid kadagiti katulagan Kenkuana ket kalpasanna ti panagtungpal kadagita a katulagan ket manglukatto iti dalan iti naespirituan a bendision ken pribilehio a sidadaan a magun-od dagiti lallaki, babbai, ken ubbing iti amin a lugar.”
Impakaasina: “Ita, no insardengyon ti nagna iti dalan, awisenkayo iti amin a namnama iti pusok nga agsublikayo koma. Ania man dagiti pakaseknanyo, ania man dagiti pannubokyo, adda lugar para kadakayo ditoy, ti Simbaan ti Apo. Sika ken ti henerasion dagiti saan pay a naipasngay mabedisonanto babaen dagiti aramidmo iti agdama nga agsubli iti dana ti katulagan” “As We Go Forward Together,” wenno Liahona, Abr. 2018, 7; nainayon ti panangyunay-unay).
Iburayko ti pammaneknekko Kenkuana, ni Jesucristo, ti Maestro a Ministro ken ti Mangisalakantayo amin. Awisek ti tunggal maysa kadatayo a mangsapul ti “pobrecitos,” dagiti “nakakaasi nga ubbing” kadatayo nga agkasapulan, Daytoy ti namnamak ken kararagko iti nagan ni Jesucristo, amen.