Madalom sa Aton Tagipusuon

Ni Douglas D. Holmes

Gin-release Sining Karon Lang Bilang Unang Manuglaygay sa Pangkabilugan nga Panguluhan sang Young Men

Ang Ginuo nagatinguha nga buligan kita—tanan kita—nga ipahamtang ang Iya ebanghelyo sing mas madalom sa aton mga tagipusuon.

Mga kauturan, katahum sining tion nga nagakabuhi kita. Samtang aton ginaselebrar ang pagsugod sang Pagpanumbalik, nagakaigo man nga selebrahon naton ang nagapadayon nga Pagpanumbalik nga aton ginasaksihan. Nagakalipay ako upod sa inyo nga magkabuhi sa sining panahon.¹ Ang Ginuo padayon nga nagapahamtang, paagi sa Iya mga propeta, sang tanan nga kinahanglanon agud buligan kita nga maghanda sa pagbaton sa Iya.²

Isa sinang mga kinahanglanon nga butang amo ang bag-o nga inisyatibo sa Kabataan kag Lamharon. Madamo sa inyo ang nakahibalo na sang importansya nga ginahatag sining programa sa pagpahamtang sang mga lalab-uton, bag-o nga mga emblem sang pagkalakip, kag sang For the Strength of Youth nga mga komperensya. Pero indi naton ina pagtugotan nga malipdan ang aton panan-aw sa mga prinsipyo sa diin napasad ang programa kag ang ila katuyoan: nga buligan ang ebanghelyo ni Jesucristo nga mapahamtang sing madalom sa mga tagipusuon sang aton kabataan kag mga lamharon.³

Nagapati ako nga kon mahangpan naton ining mga prinsipyo sing mas maayo, makita naton nga labaw pa ini sa isa lang ka programa para sa mga miyembro nga 8 tubtob 18 anyos. Makita naton kon paano ang Ginuo nagatinguha nga buligan kita—tanan kita—nga ipahamtang ang ebanghelyo sing mas madalom sa aton mga tagipusuon. Kabay nga ang Balaan nga Espiritu magabulig sa aton nga makatuon sing ululupod.

Mga Kaangtanan—“Updi Sila”⁴

Ang una nga prinsipyo amo ang mga kaangtanan. Bangud nga natural nga bahin ang mga ini sa Simbahan ni Jesucristo, kon kis-a nagakalimtan naton ang importansya sang mga kaangtanan sa aton nagapadayon nga pagpanglakaton padulong kay Cristo. Wala ginapaabot nga pangitaon naton ukon lakton ang dalan sang kasugtanan nga nagaisahanon. Kinahanglan naton ang pagpalangga kag suporta sang mga ginikanan, iban pa nga mga miyembro sang pamilya, mga abyan, kag mga lider nga nagalakat man sa dalan.

Ining sahi sang mga kaangtanan nagakinahanglan sang panahon. Panahon nga mag-inupdanay. Panahon nga magkinadlaw, maghinampang, magtuon, kag mag-alagad sing ululupod. Panahon nga mahibal-an ang mga interes kag mga hangkat sang tagsa-tagsa. Panahon nga mangin bukas kag tampad sa tagsa-tagsa sa aton pagtinguha nga mag-uswag sing ululupod. Ang ini nga mga relasyon isa sa mayor nga mga katuyoan sang pagtililipon bilang mga pamilya, mga korum, mga klase, kag mga kongregasyon. Amo ini ang mga pundasyon sang epektibo nga ministering.⁵

Si Elder Dale G. Renlund naghatag sa aton sang yabi sa pagpauswag sining mga kaangtanan sang nagsiling sia: “Agud epektibo nga makaalagad sa iban, kinahanglan tan-awon naton sila … paagi sa mga mata sang Amay nga Langitnon. Sa sina lamang nga masugdan naton nga mahangpan ang matuod-tuod nga bili sang isa ka kalag. Sa sina lamang nga mabatyagan naton ang gugma sang Amay nga Langitnon para sa tanan Niya nga mga anak.”⁶

Ang tulukon ang iban pareho sang panulok sang Dios isa ka regalo. Ginaagda ko ang tagsa sa aton nga pangitaon ining regalo. Kon bukas ang aton mga mata nga makakita,⁷ mabuligan man naton ang iban nga makita ang ila mga kaugalingon pareho sang panulok sa ila sang Dios.⁸ Si Pangulong Henry B. Eyring naghatag importansya sang gahum sini sang nagsiling sia: “Ang pinakaimportante amo ang kon ano ang matun-an sang [iban] halin sa [inyo] parte sa kon sin-o gid sila kag kon mangin ano gid sila. Ang pakot ko amo nga indi nila ini matun-an kaayo sa mga leksyon. Maagom nila ini halin sa mga balatyagon kon sin-o kamo, sin-o sila sa ila pamatyagan, kag kon ano sa banta ninyo nga mangin sila.”⁹ Ang pagbulig sa iban nga mahangpan ang ila matuod-tuod nga pagkatawo kag katuyoan isa sang pinakadako nga regalo nga aton mahatag.¹⁰ Ang makita ang iban kag aton mga kaugalingon pareho sang pagtan-aw sang Dios nagabugkos sang aton mga tagipusuon “sing tingob sa paghiusa kag sa gugma.”¹¹

Sa padayon-nga-nagadugang nga mga pwersa-kalibutanon nga nagabutong sa aton, kinahanglan naton ang kusog nga nagahalin sa mapinalanggaon nga mga kaangtanan. Gani sa pagplano naton sang mga kahiwatan, mga miting, kag iban pa nga mga pagtililipon, dumdumon naton nga ang mayor nga katuyoan sining mga pagtilipon amo ang paghimo sang mga kaangtanan nga nagaisa sa aton, kag nagabulig pahamtang sang ebanghelyo ni Jesucristo sing mas madalom sa aton mga tagipusuon.¹²

Rebelasyon, Pagpili, kag Paghinulsol—”Ikonekta Sila sa Langit”¹³

Siyempre, indi bastante ang mahugpong lang sing tingob. May madamo nga mga grupo kag mga organisasyon nga nagahiusa sa nagkalain-lain nga mga kawsa. Pero ang paghiliusa nga ginapangita naton amo ang mangin isa kay Cristo, ang ikonekta ang aton kaugalingon sa Iya.¹⁴ Agud maangot ang aton mga tagipusuon sa langit, kinahanglan naton sang indibidwal nga espirituhanon nga mga eksperiyensya, pareho sang bag-o lang ginpaathag ni Elder Andersen sa aton sing maayo.¹⁵ Inang mga eksperiyensya nagaabot paagi sa pagdala sang Balaan nga Espiritu sang pulong kag gugma sang Dios sa aton hunahuna kag tagipusuon.¹⁶

Ining rebelasyon nagaabot paagi sa balaan nga mga kasulatan, labi na ang Libro ni Mormon; paagi sa inspirado nga mga pulong sang buhi nga mga propeta kag iban pa nga tampad nga mga disipulo; kag paagi sa malinong, gamay nga tingug.¹⁷ Ining mga pulong labaw pa sa tinta sa isa ka pahina, tunog sa aton mga dulunggan, mga hunahuna sa aton mga kaisipan, ukon mga balatyagon sang aton mga tagipusuon. Ang pulong sang Dios espirituhanon nga gahum.¹⁸ Kamatuoran ini kag kasanag.¹⁹ Ini ang paagi nga mabatian naton Sia! Ginapatubo kag ginadugangan sang pulong ang aton pagtuo kay Cristo kag nagadabok sa sulod naton sang handum nga mangin mas pareho sa Manluluwas—buot silingon, nga maghinulsol kag maglakat sa dalan sang kasugtanan.²⁰

Sang nagligad nga Abril, si Pangulong Russell M. Nelson nagbulig sa aton nga mahangpan ang mayor nga papel sang paghinulsol sa sining pagpanglakaton sang pagbaton sang rebelasyon.²¹ Nagsiling sia: “Kon ginapili naton nga maghinulsol, ginapili naton nga magbag-o! Ginatugotan naton ang Manluluwas nga bag-uhon kita sa pinakamaayo nga bersyon sang aton mga kaugalingon. … Ginapili naton nga mangin mas pareho kay Jesucristo!”²² Ining proseso sang pagbag-o, nga ginagatungan sang pulong sang Dios, ang paagi nga nagakonekta kita sa langit.

Ang basehan sang pangagda ni Pangulong Nelson nga maghinulsol amo ang prinsipyo sang kahilwayan sa pagpili. Kinahanglan naton pilion nga maghinulsol para sa aton mga kaugalingon. Ang ebanghelyo indi mapuwersa pasulod sa aton mga tagipusuon. Si Elder Renlund nagsiling, “Ang katuyoan sang aton Amay nga Langitnon sa pagkaginikanan indi nga agud nga ipahimo sa Iya mga anak ang husto; kundi agud nga papilion ang Iya mga anak nga himuon ang husto.”²³

Sa mga programa nga ginbuslan sang programa nga Kabataan kag Lamharon, may masobra 500 ka lainlain nga mga rekisitos nga dapat kumpletuhon agud makabaton sang lainlain nga mga pagkilala.²⁴ Karon, isa na gid lang. Isa ini ka pangagda nga magpili nga mangin mas pareho sa Manluluwas. Ginahimo naton ini paagi sa pagbaton sang pulong sang Dios paagi sa Balaan nga Espiritu kag pagtugot kay Cristo nga bag-uhon kita sa pinakamaayo nga bersyon sang aton mga kaugalingon.

Labaw pa ini sa paghanas sa pagpahamtang sang lalab-uton ukon pagpauswag sang kaugalingon. Ang mga lalab-uton mga galamiton lang nga nagabulig sa aton nga magkonekta sa langit paagi sa rebelasyon, pagpili, kag paghinulsol—agud magkari kay Cristo kag mabaton ang Iya ebanghelyo sing mas madalom sa aton mga tagipusuon.

Pagpasakop kag Sakripisyo—“Tugoti sila nga Magpanguna”²⁵

Sa katapusan, agud mapahamtang ang ebanghelyo ni Jesucristo sing madalom sa aton mga tagipusuon, kinahanglan naton magpasakop diri— sa paghatag sang aton tion kag mga talento diri, magsakripisyo para diri.²⁶ Luyag naton tanan nga magpangabuhi sing makahulugan, kag labing matuod ini para sa mga ulihing-tubo. Luyag nila sang kawsa.

Ang ebanghelyo ni Jesucristo amo ang pinakadako nga kawsa sa kalibutan. Si Pangulong Ezra Taft Benson nagsiling: “Ginsugo kita sang Dios nga dalhon ining ebanghelyo sa bilog nga kalibutan. Ina ang kawsa nga dapat mag-isa sa aton karon. Ang ebanghelyo gid lang ang makaluwas sa kalibutan halin sa kalamidad sang pagguba-sang-iya-kaugalingon. Ang ebanghelyo gid lang ang makahiusa sang mga lalaki [kag mga babayi] sang tanan nga rasa kag nasyonalidad sa paghidaet. Ang ebanghelyo gid lang ang makadala sang kalipay, kasadya, kag kaluwasan sa tawhanon nga pamilya.”²⁷

Si Elder David A. Bednar nagpromisa, “Sa aton paghatag-gahum sa mga lamharon paagi sa pag-agda kag pagtugot sa ila nga mag-akto, ang Simbahan magaabante sa milagroso nga mga paagi.”²⁸ Sa masami, wala naton gin-agda kag gintugotan ang mga lamharon nga magsakripisyo para sining dako nga kawsa ni Cristo. Si Elder Neal A. Maxwell nagsiling, “Kon diutay lang katama ang ginahimo sang [aton] mga lamharon sa [buluhaton sang Dios] laban-laban nga lumson sila sang kalibutan.”²⁹

Ang programa nga Kabataan kag Lamharon nagatutok sa paghatag-gahum sa mga lamharon. Sila ang nagapili sang ila kaugalingon nga mga lalab-uton. Ang mga pangulo sang korum kag klase ginpahamtang sa ila nagakaigo nga hilikuton. Ang konseho sang mga lamharon sa ward, pareho sa konseho sang ward, nagatutok sa buluhaton sang kaluwasan kag pagkahitaas.³⁰ Kag ang mga korum kag mga klase nagasugod sang ila mga miting paagi sa pagsugilanonay kon paano himuon ang buluhaton nga ginhatag sang Dios sa ila.³¹

Si Pangulong Nelson nagsiling sa mga lamharon sang Simbahan: “Kon pilion ninyo, kon luyag ninyo, … mangin dako kamo nga bahin sang isa ka dako nga butang, isa nga mahimayaon, isa nga dalayawon! … Kabahin kamo sa pinakamaayo nga ginpadala sang Ginuo sang bisan san-o sa sini nga kalibutan. May ikasarang kamo nga mangin mas alisto kag mas maalam kag mas may dako nga epekto sa kalibutan sangsa nagliligad nga mga henerasyon!”³² Sa isa pa gid ka okasyon, ginhambalan ni Pangulong Nelson ang mga lamharon: “May lubos ako nga kompiyansa sa inyo. Palangga ko kamo, kag amo man sang Ginuo. Iya kita katawhan, nga nagapangabudlay sing ululupod sa sining Iya balaan nga buluhaton.”³³ Mga lamharon, mabatyagan bala ninyo ang pagsalig ni Pangulong Nelson sa inyo kag kon ano kamo kaimportante sa sini nga buluhaton?

Mga ginikanan kag hamtong nga mga lider, ginaagda ko kamo nga tulukon ang mga lamharon pareho sang panan-aw ni Pangulong Nelson. Kon mabatyagan sang mga lamharon ang inyo pagpalangga kag pagsalig, kon inyo sila paisugon kag tudloan kon paano magpanguna—kag dayon magpaiway sa ila—kibuton nila kamo sang ila paghangop, mga abilidad, kag katutom sa ebanghelyo.³⁴ Mabatyagan nila ang kalipay sa pagpili nga magpasakop kag magsakripisyo para sa kawsa ni Cristo. Ang Iya ebanghelyo mapahamtang sing mas madalom sa ila mga tagipusuon, kag ang buluhaton magaabante sa milagroso nga mga paagi.

Promisa kag Panaksihon

Nagapromisa ako, nga sa aton pagtutok sining mga prinsipyo—mga kaangtanan, rebelasyon, pagpili, paghinulsol, kag pagsakripisyo para sining dako nga kawsa—ang ebanghelyo ni Jesucristo magatudok sing mas madalom sa aton mga tagipusuon Makita naton ang Pagpanumbalik nga magaidog pasulong sa iya sini pinakamataas nga katuyoan, ang pagtubos sang Israel kag ang pagtukod sang Sion,³⁵ kon sa diin si Cristo magapungko bilang Hari sang mga hari.

Nagapamatuod ako nga ang Dios padayon nga nagahimo sang tanan nga butang nga kinahanglanon agud ihanda ang Iya katawhan para sinang adlaw. Kabay nga makita naton ang iya kamot sa sining buluhaton samtang nagatinguha kita nga “magkari kay Cristo kag magmangin himpit sa iya.”³⁵ Sa ngalan ni Jesucristo, amen.