Paano ang Priesthood Nagabugay sa mga Lamharon
Ginahatagan kita sang oportunidad nga mag-alagad pareho sa mga anghel, nga magwali sang ebanghelyo sa tanan nga mga kontinente sang duta, kag buligan ang mga kalag nga magpalapit kay Cristo.
Mga kauturan, nagapasalamat ako nga makahambal sa inyo sa sining makasaysayan nga gab-i parte sa sagrado nga regalo sang priesthood kag sang dalayawon nga gahum sini sa pagbugay sang mga lamharon sa sining dispensasyon. Nagapangamuyo ako nga sa pihak sang akon mga kakulangan, ang Espiritu magabulig sa akon sa pagtudlo sang kamatuoran.
Ang Unang Pangulohan nagpahanumdum sa mga nagakapot sang Aaronic Priesthood nga “nagakabuhi kamo sa panahon sang dalagko nga mga oportunidad kag mga hangkat—panahon nga diin ginpanumbalik ang priesthood. May awtoridad kamo sa paghikot sang mga ordinansa sang Aaronic Priesthood. Sa inyo paggamit sinang awtoridad sing mainampuon kag nagakaangay, mabugayan ninyo sing dako ang mga kabuhi sinang mga yara sa inyo palibot.”1 Bilang mga lamharon nga lalaki sang Simbahan, ginapahanumdum man kita nga “mga pinalangga kita nga [mga anak nga lalaki] sang Dios, kag may buluhaton Sia nga ipahimo sa [aton]”2 kag nagabulig kita sa Iya buluhaton sa “pagpahanabo sang pagkawala’y kamatayon kag kabuhi nga wala’y katapusan sang tawo” (tan-awa sa Moses 1:39).
Ang priesthood amo ang awtoridad sa paghikot sang mga ordinansa kag mga kasugtanan sang ebanghelyo sang Manluluwas sa sinang mga nagakaangay sa pagbaton sang mga ini. Paagi sining mga ordinansa sang priesthood kag sagrado nga mga kasugtanan maagom ang bug-os nga mga bugay sang Pagbayad-Sala sang Manluluwas, nga nagabulig sa aton nga malab-ot ang aton diosnon nga kapalaran.
Si Joseph Smith isa ka lamharon sang gintawag sia sang Dios agud ipanumbalik ang ebanghelyo ni Jesucristo kag, sa sina nga katuyoan, ginhatagan sang priesthood, nga gingamit niya sa pagbugay sang tanan nga katawhan. Ang Doktrina kag mga Kasugtanan 135 nagasambit sang madamo nga mga bugay nga ginhatag ni Joseph sa mga lamharon sang sining dispensasyon. Mabasa naton: “Si Joseph Smith … nakahimo sing mas labi pa luwas lamang kay Jesus, para sa kaluwasan sang mga tawo sa sining kalibutan sangsa bisan sin-o nga tawo nga nagkabuhi diri. … Ginpaluntad niya ang Libro ni Mormon … ; ginpadala ang kabug-osan sang wala’y katubtuban nga ebanghelyo … sa apat ka pamusod sang duta, ginpahayag ang mga rebelasyon kag mga kasugoan nga nalakip [sa] Doktrina kag mga Kasugtanan … ; gintipon ang madamo nga linibo ka mga Santos sa Ulihing mga Adlaw, … kag nagbilin sang dungog kag ngalan nga indi sarang gub-on.” (Doktrina kag mga Kasugtanan 135:3)
Agud epektibo nga makaalagad pareho kay Joseph, kinahanglan naton nga mangin nagakaangay sa paggamit sang gahum sang priesthood sang Ginuo. Samtang ginalubad ang Libro ni Mormon, gusto ni Joseph kag Oliver Cowdery nga mabunyagan, pero kulang sila sing nagakaigo nga awtoridad. Sang Mayo 15, 1829, nagluhod sila sa pagpangamuyo kag ginbisitahan ni Juan Bautista, nga naghatag sa ila sang mga yabi kag awtoridad sang Aaronic Priesthood, nga nagasiling, “Sa inyo nga kapareho ko nga mga alagad, sa ngalan sang Mesias ginahatag ko ang Pagkapari ni Aaron nga nagakapot sang mga yabi sang pag-alagad sang mga anghel, kag sang ebanghelyo sang paghinulsol, kag sang bunyag paagi sa pagtugmaw para sa kapatawaran sang mga sala” (Doktrina kag mga Kasugtanan 13:1).
Ginahatagan kita sang oportunidad nga mag-alagad pareho sa mga anghel, nga magwali sang ebanghelyo sa tanan nga mga kontinente sang duta, kag buligan ang mga kalag nga magpalapit kay Cristo. Ining pag-alagad nagabutang sa aton sa pagpangabudlay upod nanday Juan Bautista, Moroni, Joseph Smith, Pangulong Russell M. Nelson, kag iban pa nga matutom nga mga alagad sang Ginuo.
Ang aton pag-alagad sa kag upod sang Iya priesthood nagatipon sinang mga dedikado sa pagsunod kag pagpangabuhi sang mga panudlo sang Ginuo sing eksakto gid, nga personal ko nga nahibal-an nga mabudlay samtang nagaatubang kita sang mga hangkat sang pagkalamharon. Apang ang pag-isa upod sining kaupod nga mga alagad sang Ginuo sa paghimo sang Iya buluhaton makabulig pabakod sa aton kontra sa mga tentasyon kag pagpatalang sang kaaway. Sarang kamo nga mangin parola sang kasanag sa tanan nga indi piho sang ila mga kaugalingon. Ang kasanag sa sulod ninyo, magasilak sing tuman kasanag nga ang tanan nga inyo maatubang mabugayan bisan sa pagpakig-upod lang sa inyo. Mahimo nga mabudlay kon kis-a nga batunon ang presensya sang aton espirituhanon nga mga kaupod, apang nagapasalamat ako nga mahibal-an nga miyembro ako sang isa ka matinuohon nga korum sang priesthood nga makaupod ko sa pagtinguha nga mangin mas malapit kay Cristo.
Upod sa aton mga abyan kag pamilya, ang Balaan nga Espiritu isa sang aton pinakatampad kag masaligan nga kaupod. Apang agud maagda ang Iya padayon nga pagpakig-upod, dapat naton ibutang ang aton mga kaugalingon sa mga sitwasyon kag mga lugar nga luyag Niya luntaran. Sarang ini magsugod sa aton kaugalingon nga mga puluy-an samtang aton ginatinguhaan nga himuon ang mga ini nga balaan nga mga lugar paagi sa pagpasakop sa adlaw-adlaw nga pagtuon sang balaan nga kasulatan kag pagpangamuyo bilang pamilya, kag, ilabi sa tanan, samtang personal naton nga ginatun-an ang balaan nga mga kasulatan kag nagapangamuyo nga kita lang.
Sang temprano sini nga tuig, nahatagan ako sing makakulunyag apang makapaubos nga oportunidad nga buligan ang akon manghod nga babayi, nga si Oceane, nga mag-uswag sa banas sang kasugtanan paagi sa pagbaton sang pangagda nga magpabunyag kag tumanon ang isa sang ginapanugyan nga rekisitos sa pagsulod sa selestiyal nga ginharian. Ginpaisol niya sing isa ka bulan ang iya bunyag, hasta nga maordinan ako nga priest, agud hatagan ako sang pribelihiyo nga maghikot sang ordinansa, samtang ang iban namon nga mga utod nga babayi may pribelihiyo man nga maghikot sa idalom sang priesthood nga tulumanon kag magtindog bilang mga saksi. Samtang nagtindog kami sa magtimbang nga bahin sang tulugmawan, kag naghanda sa pagsulod sa tubig, natalupangdan ko ang iya kakunyag, nga gintupungan man ang akon kakunyag. Kag nakabatyag ako sang pag-isa sa iya, sang nakita ko nga nagahimo sia sang husto nga desisyon. Ining oportunidad sa paggamit sang priesthood nagpangayo nga mangin mas mahinalungon ako kag indi pasapayan sa akon pagpangabuhi sang ebanghelyo. Agud maghanda, nagkadto ako sa templo adlaw-adlaw sina nga semana, nga ginsuportahan sang akon iloy, lola, kag utod nga babayi, agud maghikot sang mga bunyag para sa minatay.
Ining eksperiyensya nagtudlo sa akon sing madamo parte sa priesthood kag kon paano ko magamit ini sing kaangay-angay. Nakahibalo ako nga ang tanan nga nagakapot sang priesthood makabatyag sang amo man nga mga butang nga akon nabatyagan kon sundon naton ang ehemplo ni Nefi nga “maglakat kag maghimo” (tan-awa sa 1 Nefi 3:7). Indi kita makapungko nga nagahulat lang kag magpaabot sa Ginuo nga gamiton kita sa Iya dakong buluhaton. Indi kita dapat maghulat sang mga nagakinahanglan sang aton bulig nga magpangita sa aton; obligasyon naton bilang mga nagakapot sang priesthood nga magpakita kag magtindog bilang mga saksi sang Dios. Kon nagahimo kita sang mga desisyon nga nagapugong sa aton wala katapusan nga pag-uswag, dapat kita magbag-o subong. Si Satanas magatinguha sing lubos agud hawiran kita sa lawasnon nga kahimtangan sang pagpangita sang simple nga mga kalingawan. Apang nakahibalo ako nga kon magtinguha kita, magpangita sang mga magsuporta sa aton, kag maghinusol kada adlaw, ang resulta nga mga bugay tumalagsahon kag ang aton mga kabuhi mabag-o sa wala katubtuban samtang nagaabante kita sa banas sang kasugtanan.
Nakahibalo ako nga ini ang matuod nga Simbahan ni Jesucristo, nga aton Manluluwas kag nagtugyan sang mga yabi sang priesthood sa Iya mga Apostoles, nga nagagamit sini sa paggiya sa aton, labi na gid sa sining makahalangkat nga mga adlaw, kag agud ihanda ang kalibutan sa Iya pagbalik.
Nakahibalo ako nga si Joseph Smith propeta sang Pagpanumbalik kag si Pangulong Nelson ang aton buhi nga propeta sa karon. Ginaagda ko kita tanan nga tun-an ang mga kabuhi sining dungganon nga mga nagakapot sang priesthood kag magtinguha nga pauswagon ang aton mga kaugalingon adlaw-adlaw agud nga mangin handa kita sa pag-atubang sa aton Tagtuga. Sa ngalan ni Jesucristo, amen.