Pangbukas nga Mensahe
Dapat naton handumon, kutob sa aton masarangan, nga mabatian si Jesucristo, nga nagahambal sa aton paagi sa gahum kag pag-alagad sang Balaan nga Espiritu.
Pinalangga kong mga kauturan, samtang ginaabi-abi namon kamo sa sining makasaysayan nga Abril 2020 nga pangkabilogan nga komperensya sang Ang Simbahan ni Jesucristo sang mga Santos sa Ulihing mga Adlaw, sa mga rason nga nahibal-an na ninyo, nagatindog ako karon sa bakante nga awditoryum!
Wala gid ako makahibalo, nga sang nagpromisa ako sa inyo sang Oktobre 2019 nga pangkabilogan nga komperensya nga ang ining Abril nga komperensya mangin “halandumon” kag “indi malimtan,” nga ang maghambal sa makita nga tagpalamati nga manubo sangsa 10 ka tawo ang magahimo sining komperensya nga halandumon kag indi malimtan para sa akon! Apang ang ihibalo nga nagapartisipar kamo paagi sa electronic nga transmisyon, kag ang matahum nga pagkanta sang koro sang “It Is Well with My Soul,” nagadala sang dako nga kaumpawan sa akon kalag.
Sa nahibal-an na ninyo, ang pagtambong sa sining pangkabilogan nga komperensya istrikto nga ginlimitahan bilang bahin sang aton pagpaninguha nga mangin maayo nga mga pumuluyo sang kalibutan kag himuon ang tanan nga masarangan agud limitahan ang paglapta sang COVID-19. Ining virus may dako kaayo nga epekto sa bilog nga kalibutan. Ginliwat man sini ang aton mga miting sa Simbahan, pangmisyonaryo nga serbisyo, kag trabaho sa templo sing madugay-dugay.
Bisan pa nga ang mga limitasyon karon may kaangtanan sa makalalaton nga virus, ang personal nga mga pagtilaw sa kabuhi masobra pa sa sini nga pandemic. Ang palaabuton nga mga pagtilaw mahimo nga tuga sang aksidente, natural nga kalamidad, ukon wala ginapaabot nga personal nga kapaslawan.
Paano naton malampuwasan ang amo nga mga pagtilaw? Ang Ginuo nagsiling sa aton nga “kon handa kamo indi kamo mahadlok.”1 Siyempre, pwede kita magtago sang kaugalingon naton nga mga reserba sang pagkaon, tubig, kag kuwarta. Apang pareho kaimportante ang kakinahanglan naton nga pun-on ang aton personal nga espirituhanon nga mga bodega sang pagtuo, kamatuoran, kag testimonya.
Ang aton pinakamataas nga katuyuan sa kabuhi amo ang maghanda sa pag-atubang sa aton Tagtuga. Ginahimo naton ini paagi sa pagtinguha adlaw-adlaw nga mangin mas pareho sa aton Manluluwas, nga si Jesucristo.2 Kag ginahimo naton ina samtang adlaw-adlaw kita nga nagahinulsol kag nagabaton sang Iya nagatinlo, nagapaayo, kag nagapabakod nga gahum. Dayon makabatyag kita sang nagadugay nga paghidaet kag kalipay, bisan pa sa tion sang kinagamo. Amo gid ini ang rason kon ngaa ang Ginuo nagpangabay sa aton nga magtindog sa balaan nga mga lugar kag “indi maisdog.”3
Sini nga tuig, ginadumdom naton ang ika-200 nga anibersaryo sang isa sa pinakamakahulugan nga hitabo sa kasaysayan sang kalibutan—nga amo ang, pagpakita sang Dios nga Amay kag sang Iya Hinigugma nga Anak, nga si Jesucristo, kay Joseph Smith. Sa sinang tumalagsahon nga palanan-awon, ang Dios nga Amay nagtudlo kay Jesucristo kag nagsiling “Ini ang Hinigugma Ko nga Anak. Pamatii Sia!”4
Inang laygay nga ginhatag kay Joseph para man sa kada isa sa aton. Dapat naton handumon, kutob sa aton masarangan, nga mabatian si Jesucristo, nga nagahambal sa aton paagi sa gahum kag pag-alagad sang Balaan nga Espiritu.
Ang katuyuan sini kag sang tagsa ka pangkabilogan nga komperensya amo nga buligan kita nga pamatian Sia. Nagpangamuyo kita, kag ginaagda kamo nga magpangamuyo, nga ang Espiritu sang Ginuo mangin kaupod naton sa subong kabugana nga mabatian ninyo ang mga mensahe nga gintigana gid sang Manluluwas para sa inyo—mga mensahe nga magadala sang paghidaet sa inyo kalag. Mga mensahe nga magaayo sang inyo nagasakit nga balatyagon. Mga mensahe nga magapasanag sang inyo kaisipan. Mga mensahe nga magabulig sa inyo nga mahibal-an kon ano ang himuon sa inyo pag-abante sa tinion sang kinagamo kag pagtilaw.
Kabay nga ining komperensya mangin halandumon kag indi malimtan tungod sang mga mensahe nga inyo mabatian, ang pinasahi nga mga anunsyo nga pagahimuon, kag ang mga eksperiyensya nga pagaimbitahan sa inyo nga magpartisipar.
Halimbawa, sa paghingapos sang Domingo sang aga nga sesyon, magatipon kita sa bilog-kalibutan nga maligdong nga asembliya kon diin pangunahan ko kamo sa sagrado nga Singgit sang Hosana. Kabay nga ini mangin espirituhanon nga tanda para sa inyo samtang aton ginapahayag sa kalibutanon nga paghiliusa ang aton dako nga pagpasalamat sa Dios nga Amay kag sa Iya Hinigugma nga Anak paagi sa pagdayaw sa Ila sa sining pinasahi nga paagi.
Para sa sining sagrado nga eksperiyensya, maggamit kita sang matinlo nga puti nga panyo. Pero kon wala kamo, pwede nga ikaway lang ninyo ang inyo kamot. Sa katapusan sang Singgit sang Hosana, ang kongregasyon magaupod sa koro sa pagkanta sang “The Spirit of God.”5
Pinalangga kong mga kauturan, mangin matahum ining komperensya. Mangin tumalagsahon ining tuig samtang matutom kita nga nagatutok sa Manluluwas kag sa Iya ginpanumbalik nga ebanghelyo. Ang pinakaimportante nga nagadugay nga epekto sining makasaysayan nga komperensya amo ang pagbag-o sang aton mga tagipusuon kag pagsugod naton sang bilog-kabuhi nga pagtinguha nga pamatian Sia.
Pag-abi-abi sa Abril 2020 nga pangkabilogan nga komperensya! Nakahibalo ako nga ang Dios, ang aton Amay nga Langitnon, kag ang Iya Anak, nga si Jesucristo, nagaulikid sa aton. Mangin kaupod naton Sila sa bilog nga kahiwatan sining duha ka mahimayaon nga adlaw samtang nagatinguha kita nga magpalapit sa Ila kag sa pagtahod sa Ila. Sa sagrado nga ngalan ni Jesucristo, amen.