Pagbukas sang mga Langit para sa Bulig
Ibutang naton ang aton pagtuo sa Ginuong Jesucristo sa aksyon!
Daw ano ka pinasahi kag kanami sini nga sesyon! Salamat, mahal nga Laudy kag Enzo. Ginrepresentar gid ninyo sing maayo ang dalayawon nga lamharon nga mga babayi kag mga lalaki sang Simbahan.
Mahal kong mga kauturan, madamo na kita nabatian karon parte sa Pagpanumbalik sang Simbahan—ang mismong Simbahan nga ang aton Manluluwas, nga si Jesucristo, nagpahamtang sa tion sang Iya dutan-on nga pag-alagad. Inang Pagpanumbalik nagsugod 200 katuig na ang nagligad ini nga tigpamulak sang ang Dios nga Amay kag Iya Anak, nga si Jesucristo, nagpakita sa lamharon nga si Joseph Smith.
Napulo ka tuig pagkatapos sining pinasahi nga panan-awon, ang Propetang si Joseph Smith kag lima nga iban pa gintawag bilang una nga mga miyembro sang ginpanumbalik nga Simbahan sang Ginuo.
Gikan sa sinang gamay nga grupo nga gin-organisar sang Abril 6, 1830, nagluntad ang bug-os-kalibutan nga organisasyon sing kapin 16 milyon ka miyembro. Nakilal-an na ang kaayohan nga nahimo sining Simbahan sa bilog nga kalibutan agud mapahaganhagan ang pag-antos sang tawo kag mapabayaw ang katawhan. Apang ang iya sini una nga katuyoan amo nga buligan ang mga lalaki, mga babayi, kag mga kabataan nga magsunod kay Ginuong Jesucristo, magtuman sang Iya mga kasugoan, kag mangin kaangay sa pinakadako sang tanan nga pagpakamaayo—nga amo ang kabuhi nga wala katapusan upod sa Dios kag ila mga pinalangga.1
Sa aton pagsaulog sang hitabo nga nag-umpisa sang 1820, importante nga dumdumon nga bisan pa aton ginatahod si Joseph Smith bilang propeta sang Dios, indi ini simbahan ni Joseph Smith, ukon indi ini simbahan ni Mormon. Ini ang Simbahan ni Jesucristo. Ginmando Niya kon ano gid ang itawag sa Iya Simbahan: “Kay ang akon simbahan dapat pagatawgon sa ulihing mga adlaw nga Ang Simbahan ni Jesucristo sang mga Santos sa Ulihing mga Adlaw.”2
Nakahambal na ako sang nagligad parte sa kinahanglanon nga pagtadlong sa aton pagtawag sa ngalan sang Simbahan.3 Humalin sadto, dako gid ang nahimo agud matuman ining pagtadlong. Nagapasalamat gid ako kay Pangulong M. Russell Ballard kag sa bilog nga Korum sang Dose ka mga Apostoles, nga dako gid ang nahimo agud pangunahan ining mga hilikuton subong man sa sinang may kaangtanan sa isa pa ka inisyatibo nga akon ianunsyo karon nga gab-i.
Ang mga lider kag mga departamento sang Simbahan, naangot nga mga organisasyon, kag minilyon nga mga miyembro—kag iban pa—subong nagagamit na sang husto nga ngalan sang Simbahan. Naliwat na ang opisyal nga logo (style guide) sang Simbahan. Ang mayor nga website sang Simbahan sa karon amo na ang ChurchofJesusChrist.org. Nabag-o na ang mga adres sa email, domain nga mga ngalan, kag social media nga mga channel. Ang aton pinalangga nga koro (choir) sa karon nangin Tabernacle Choir at Temple Square.
Ginhimo naton ining di-kinaandan nga mga hilikuton bangod kon kakason naton ang ngalan sang Ginuo sa ngalan sang Iya Simbahan, di-hungod nga ginakakas naton Sia bilang ang sentro sang aton pagsimba kag sang aton kabuhi. Kon dal-on naton ang ngalan sang Manluluwas sa aton kaugalingon sa tion sang bunyag, nagapangako kita nga magsaksi, paagi sa aton mga pulong, mga hunahuna kag mga buhat, nga si Jesus ang Cristo.4
Sang nagligad, ginpromisa ko sa inyo nga kon “himuon naton ang tanan nga aton masarangan agud ipanumbalik ang husto nga ngalan sang Simbahan sang Ginuo,” Iya “igabubo ang Iya gahum kag mga pagpakamaayo sa mga ulo sang mga Santos sa Ulihing mga Adlaw, sa mga paagi nga wala pa naton maeksperiyensyahan.”5 Ginapabakod ko inang promisa karon nga adlaw.
Agud buligan kita nga madumduman Sia kag makilala Ang Simbahan ni Jesucristo sang mga Santos sa Ulihing mga Adlaw bilang ang Simbahan sang Ginuo, nalipay kami nga ipresentar ang isa ka simbolo nga magapakita sang importante nga nahamtangan ni Jesucristo sa Iya Simbahan.
Ini nga simbolo nagalakip sang ngalan sang Simbahan nga yara sa sulod sang bato sang pamag-ang (cornerstone). Si Jesucristo ang pangulong bato sang pamag-ang.6
Sa tunga sang simbolo amo ang representasyon sang marmol nga estatwa ni Thorvaldsen nga Christus. Ginapakita sini ang nabanhaw, buhi nga Ginuo nga nagauntay sang iya mga kamot agud maghakus sa tanan nga magpalapit sa Iya.
Sa simbolo, si Jesucristo nagatindog sa idalom sang arko. Ang arko nagapahanumdom sa aton sang nabanhaw nga Manluluwas nga naggwa sa lulubngan sa ikatlo nga adlaw pagkatapos sang Iya Paglansang.
Ining simbolo dapat pamilyar na sa madamo, kay dugay na naton gin-angot ang ginpanumbalik nga ebanghelyo sa buhi, nabanhaw nga Cristo.
Ang simbolo sa karon pagagamiton bilang talandaan (visual identifier) para sa opisyal nga literatura, balita, kag mga hitabo sa Simbahan.7 Magapahanumdom ini sa tanan nga ini ang Simbahan sang Manluluwas kag ang tanan nga aton ginahimo bilang mga miyembro sang Iya Simbahan nagasentro kay Jesucristo kag sa Iya ebanghelyo.
Karon, mahal kong mga kauturan, bwas na ang Domingo de Ramon, sa maathag nga gintudlo ni Elder Gong. Dayon magapasulod kita sa espesyal nga semana nga nagatapos sang Paskwa sang Pagkabanhaw (Easter). Bilang mga sumulunod ni Jesucristo, nga nagapangabuhi sa panahon nga sa diin ang COVID-19 nga pandemya nagatublag sang bilog kalibutan, indi lamang kita maghambalanay parte kay Cristo ukon magwali parte kay Cristo ukon maggamit sang simbolo nga nagarepesentar kay Cristo.
Ibutang naton ang aton pagtuo sa Ginuong Jesucristo sa aksyon!
Nahibal-an na ninyo, ang mga miyembro sang Simbahan nagasunod sang layi sang pagpuasa isa ka adlaw kada bulan.
Dumaan na ang doktrina sang pagpuasa. Ginahimo ini sang mga baganihan sa biblia halin pa sadto nga panahon. Sanday Moises, David, Esdras, Nehemias, Ester, Isaias, Daniel, Joel, kag madamo nga iban pa nagpuasa kag nagwali parte sa pagpuasa8 Paagi sa mga sinulat ni Isaias, ang Ginuo nagsiling: “ Indi bala amo ini ang puasa nga ginpili ko? ang paghubad sang mga gapos sang pagkamalaut, ang pagpalos sang mga higot sang gota, ang pagbuhi sang mga ginpigos?”9
Si Apostoles Pablo naglaygay sa mga Santos sa Corinto nga “ipanugyan ninyo ang inyo kaugalingon sa puasa kag pangamuyo.”10 Ang Manluluwas Mismo nagpahayag nga ang pat-od nga mga butang “indi maggwa luwas paagi sa pangamuyo kag puasa.”11
Ginhambal ko sining ulihi lang sa video sa social media nga “bilang doktor kag surgeon, dako ang akon pagdayaw sa mga propesyunal sa medisina, mga siyentipiko, kag sa tanan nga wala untat nga nagabulig sa pagpugong sang paglapta sang COVID-19.”12
Karon, bilang Pangulo sang Ang Simbahan ni Jesucristo sang mga Santos sa Ulihing mga Adlaw kag bilang Apostoles ni Jesucristo, nakahibalo ako nga ang Dios “nagaangkon sang tanan nga gahum, tanan nga kaalam, kag tanan nga paghangop; nahangpan niya ang tanan nga mga butang, kag isa sia ka maluluy-on nga Persona, bisan tubtob sa kaluwasan, sa sadtong mga magahinulsol kag magapati sa iya ngalan.”13
Gani, sa tinion sang dako nga kabudlayan, sang ang balatian nagalab-ot na sa kasangkaron sang pandemya, ang pinakakinaandan naton nga ginahimo amo ang magtawag sa aton Amay nga Langitnon kag Iya Anak—ang Dakong Manugbulong—nga ipakita ang Ila makahalangyag nga gahum agud pakamaayuhon ang katawhan sang duta.
Sa akon mensahe sa video, gin-agda ko ang tanan sa pag-upod sa puasa sang Domingo, Marso 29, 2020. Madamo sa inyo mahimo nga nakakita sang video kag nag-upod sa pagpuasa. Mahimo nga ang iban wala. Karon kinahanglan naton sa gihapon sang bulig halin sa langit.
Gani karon nga gab-i, mahal kong mga kauturan, sa espiritu sang mga anak ni Mosias, nga naghatag sang ila kaugalingon sa tuman nga pagpuasa kag pagpangamuyo,14 kag bilang bahin sang aton Abril 2020 nga pangkabilogan nga komperensya, nagapanawagan ako para sa isa na naman ka bug-os-kalibutan nga puasa. Sa tanan nga makasarang ang lawas, magpuasa kita, magpangamuyo, kag mag-isa sang aton pagtuo sa liwat. Magpakitluoy kita sing mainampuon para sa kaumpawan sa sining kalibutanon nga pandemya.
Ginaagda ko ang tanan, lakip na ang mga indi sa aton pagtuo, nga magpuasa kag magpangamuyo sa Biernes Santo, Abril 10, nga ang pandemya mahimo nga mapunggan, ang mga manug-atipan maproteksyunan, ang ekonomiya mapabakod, kag ang kabuhi mangin normal.
Paano kita magpuasa? Duha ka kalan-an ukon sa sulod sang 24 ka oras amo ang kinaandan. Pero kamo ang magdesisyon kon ano ang kabigon ninyo nga sakripisyo, samtang ginadumdom ninyo ang labing dako nga sakripisyo sang Manluluwas para sa inyo. Mag-isa kita sa pagpakitluoy para sa pagpang-ayo sang bilog nga kalibutan.
Ang Biernes Santo ang mangin perpekto nga adlaw nga ang aton Amay nga Langitnon kag Iya Anak magpamati sa aton!
Mahal kong mga kauturan, ginapabutyag ko ang akon dako nga pagpalangga sa inyo, upod ang akon testimonya sang pagkadiosnon sang buluhaton nga sa diin nagapakigbahin kita. Ini ang Ang Simbahan ni Jesucristo sang mga Santos sa Ulihing mga Adlaw. Nagatindog Sia sa ulohan sini kag nagagiya sang tanan nga aton ginahimo. Nakahibalo ako nga pagasabton Niya ang mga pagpakitluoy sang Iya katawhan. Nagasaksi ako sini sa sagrado nga ngalan ni Jesucristo, amen.