Nagaisa sa Pagtuman sang Buluhaton sang Dios

Ni Jean B. Bingham

Pangkabilogan nga Pangulo sang Relief Society

Ang pinakaepektibo nga paagi sa pagtuman sang aton diosnon nga ikasarang amo ang magtrabaho sing ululupod, nga ginabugayan paagi sa gahum kag awtoridad sang priesthood.

Mahal nga dalayawon nga mga kauturan, isa ka kalipay ang makaupod kamo. Kon sa diin man kamo nagapamati, ginapalab-ot ko ko ang akon mga hakos sa mga sister kag pagkamusta sa mga brother. Nagaisa kita sa buluhaton sang Ginuo.

Kon maghunahuna kita kay Adan kag Eva, sa masami ang aton una nga ginahunahuna amo ang parte sa ila perpekto nga kabuhi sa Hardin sang Eden. Ginahunahuna ko nga ang tiempo pirme manami—indi tanto ka init kag indi tanto katugnaw—kag inang bugana, manamit nga mga prutas kag mga utan nagtubo sa palibot nila agud makakaon sila kon san-o nila luyag. Bangod bag-o ini nga kalibutan para sa ila, madamo pa ang ila matukiban, gani ang tagsa ka adlaw makawiwili samtang nagasimpon sila sa mga kasapatan kag nagausisa sang ila matahom nga palibot. Ginhatagan man sila sang mga kasugoan nga tumanon kag may ara sila sing nagkalain-lain nga paagi sa pagsunod sadtong mga sugo, nga nagtuga sang mga kabalaka kag kagumon sa umpisa.¹ Pero sang naghimo sila sang mga desisyon nga nagbag-o sang ila kabuhi sa katubtuban, nakatuon sila sa paghikot sing ulolupod kag nangin isa sa pagtuman sang mga katuyoan sang Dios para sa ila—kag sa tanan Niya nga mga anak.

Karon hunahunaa ining amo man gihapon nga mag-asawa diri sa kalibutan. Kinahanglan nila mangabudlay para sa ila pagkaon, pila ka mga sapat ang nagkabig sa ila nga pagkaon, kag may mabudlay nga mga hangkat nga malampuwasan lamang kon magsigulanon sila kag mangamuyo sing ulolupod. Ginahunahuna ko may pila ka tinion nga may lain-lain sila nga opinyon kon paano atubangon inang mga hangkat. Apang, paagi sa Pagkalaglag, natun-an nila nga kinahanglanon ang mag-akto nga nagaisa kag nagapalanggaanay. Sa panudlo nga ila nabaton gikan sa diosnon nga bulig, gintudloan sila sang plano sang kaluwasan kag sang mga prinsipyo sang ebanghelyo ni Jesucristo nga nagahimo sa plano nga posible hikuton. Bangod nahangpan nila nga ang ila dutan-on nga katuyoan kag dayon nga lalab-uton pareho lang, nakasalapo sila sang kalipay kag kadalag-an sa pagtuon sa pagpangabudlay nga may pagpalanggaanay kag pagkamatarong sing updanay.

Litrato

Si Adan kag si Eva nga nagatudlo sa ila kabataan

Sang nag-anak sila, sanday Adan kag Eva nagtudlo sa ila pamilya sang ila natun-an gikan sa langitnon nga mga mensahero. Nakatutok sila sa pagbulig sa ila kabataan nga mahangpan man kag mabaton inang mga prinsipyo nga makapalipay sa ila sa sining kabuhi, kag makahanda man sa ila sa pagbalik sa ila langitnon nga mga ginikanan pagkatapos nga madugangan ang ila mga ikasarang kag magpakita sang ila pagkamatinumanon sa Dios. Samtang ginahimo ini, sanday Adan kag Eva nakatuon nga maapresyar ang ila lain-lain nga kusog kag nagsuporta sa isa kag isa sa ila importante nga buluhaton nga dayon.²

Samtang ang mga siglo kag pagkatapos ang milenya nag-abot kag naglipas, ang kaathag sang inspirado kag nagainangot nga mga kontribusyon sang mga lalaki kag mga babayi nangin di-maathag tungod sa sala nga impormasyon kag sala nga paghangop. Sa tunga sinang makahalangyag nga pagsugod sa Hardin sang Eden kag sa karon, ang kaaway nangin madinalag-on kaayo sa iya tuyo nga bungkagon ang mga lalaki kag mga babayi agud tilawan nga daugon ang aton mga kalag. Nakahibalo si Lucifer nga kon sarang niya gub-on ang pag-isa nga nabatyagan sang mga lalaki kag mga babayi, kon sarang niya kita nga gumunon sang aton diosnon nga bili kag mga responsibilidad sa kasugtanan, magamadinalag-on sia sa pagguba sang mga pamilya, nga amo ang importante nga mga yunit sang wala katapusan.

Si Satanas nagaduso sang pagkomparar bilang paagi sa pagtuga sang mga balatyagon nga mas labaw ukon mas manubo, nga ginatago ang wala katapusan nga kamatuoran nga ang duna nga mga kinatuhay sang mga lalaki kag mga babayi ginhatag sang Dios kag pareho ang bili. Ginatilawan niya nga pakanubuon ang mga kontribusyon sang mga babayi sa pamilya kag sa sosyedad, gani ginabuhinan ang ila makapangbayaw nga impluwensya para sa kaayohan. Ang iya tuyo amo nga padasigon ang pagpaindisanay sangsa pagselebrar sang pinasahi nga mga kontribusyon sang mga lalaki kag mga babayi nga nagabuligay kag nagaamot sa pag-isa.

Gani, sa sulod sang tuig kag sa bilog nga kalibutan, nadula na ang bug-os nga paghangop sang diosnon nga pag-alalangot pero lain-lain nga mga kontribusyon kag mga responsibilidad sang mga babayi kag mga lalaki. Ang mga babayi sa madamo nga sosyedad nangin tagsunod na lamang sa mga lalaki imbes nga tuluparay nga mga kaupod, nga nalimitahan ang ila mga giho. Ang espirituhanon nga pag-uswag naghinay kaayo sadtong madulom nga panahon; matuod gid, diutay lamang nga espirituhanon nga kasanag ang makalapos sa mga kaisipan kag mga tagipusuon nga naimpluwensyahan sang mga tradisyon sang pagdominar.

Kag dayon ang kasanag sang ginpanumbalik nga ebanghelyo nagsilak “nga masobra pa sa kasanag sang adlaw”³ sang ang Dios nga Amay kag Iya Anak nga si Jesucristo nagpakita sa bata nga si Joseph Smith sang damlag pa sang tigpamulak sang 1820 sa sinang ginpakabalaan nga kakahuyan sa estado sang New York. Ina nga hitabo nagsugod sang moderno nga pagbubo sang rebelasyon halin sa langit. Isa sang una nga mga elemento sang orihinal nga Simbahan ni Cristo nga ginpanumbalik amo ang awtoridad sang priesthood sang Dios. Samtang ang Pagpanumbalik padayon nga nagakatuman, narealisar liwat sang mga lalaki kag mga babayi ang importansya kag potensyal sang pagpangabudlay bilang mag-ulupdanay, nga gin-awtorisar kag gintudlo Niya sa sining sagrado nga buluhaton.

Litrato

Pag-organisar sang Relief Society

Sang 1842, sang ang mga kababayin-an sang bag-o tukod nga Simbahan gusto magporma sang opisyal nga grupo nga magbulig sa buluhaton, si Pangulong Joseph Smith nainspirar nga organisahon sila “sa idalom sang priesthood suno sa sulundan sang priesthood.”⁴ Siling niya, “Ginahatag ko na karon ang yabi sa inyo sa ngalan sang Dios …—ini ang panugod sang maayong mga adlaw.”⁵ Kag sumugod nga ginhatag inang yabi, ang pang-edukasyon, pang-politika, kag pang-ekonomiya nga mga oportunidad para sa kababayin-an nagsugod nga magsangkad sing amat-amat sa bilog nga kalibutan.⁶

Ining bag-o nga organisasyon sang Simbahan para sa kababayin-an, nga gintawag nga Relief Society, lain sa iban nga mga katilingban sang mga kababayin-an sadtong panahon bangod gintukod ini sang isa ka propeta nga nag-akto gamit ang awtoridad sang priesthood agud mahatagan ang mga babayi sang awtoridad, sagrado nga mga responsibilidad, kag opisyal nga mga posisyon sa sulod sang istruktura sang Simbahan, indi nga napain diri.⁷

Halin sa panahon sang Propetang si Joseph Smith tubtob sa aton karon, ang nagapadayon nga pagpanumbalik sang tanan nga butang nagdala sang kasanag sa kakinahanglanon sang awtoridad kag gahum sang priesthood sa pagbulig sa mga lalaki kag mga babayi nga matuman ang ila diosnon nga mga responsibilidad. Sang sini lang, gintudloan kita nga ang mga babayi nga ginpain sa idalom sang direksyon sang nagakapot sang mga yabi sang priesthood nagahikot nga may awtoridad sang priesthood sa ila mga calling.⁸

Sang Oktubre 2019, si Pangulong Russell M. Nelson nagtudlo nga ang mga babayi nga na-endow sa templo may gahum sang priesthood sa ila kabuhi kag sa ila mga puluy-an kon tipigan nila ang sagrado nga mga kasugtanan nga ginhimo nila sa Dios.⁹ Nagpaathag sia nga “ang mga langit pareho nga bukas sa kababayin-an nga nahatagan sang gahum sang Dios nga resulta sang ila mga kasugtanan sa priesthood sa mga lalaki nga nagakapot sang priesthood.” Kag ginpaisog niya ang tagsa ka sister nga “gamiton pirme ang gahum sang Manluluwas agud buligan ang inyo pamilya kag ang iban nga inyo ginapalangga.”¹⁰

Gani ano ang buot silingon sina sa inyo kag sa akon? Paano ang paghangop sang awtoridad kag gahum sang priesthood nagabag-o sang aton kabuhi? Isa sang mga yabi amo ang intiendihon nga kon ang mga babayi kag mga lalaki ulolupod nga nagatrabaho, makahimo kita sing mas madamo sangsa kon maggiho kita nga separado.¹¹ Ang aton mga papel nagabuligay imbes nga nagapaindisanay. Bisan nga ang mga babayi wala naordin sa palangakuan sang priesthood, sa ginsambit kagina ang mga babayi ginapakamaayo sang gahum sang priesthood kon tipigan nila ang ila mga kasugtanan, kag nagahikot sila nga may awtoridad sang priesthood kon ginapain sila sa ila calling.

Isa ka matahom nga adlaw sang Agosto, nakapribilehiyo ako nga magpungko upod kay Pangulong Russell M. Nelson sa ginkay-o nga balay ni Joseph kag Emma Smith sa Harmony, Pennsylvania, malapit sa kon diin ang Aaronic Priesthood ginpanumbalik sa sining ulihing mga adlaw. Sa amon paghinambalanay, si Pangulong Nelson naghambal parte sa importante nga papel sang kababayin-an sa Pagpanumbalik.

Pangulong Nelson: “Isa sang pinakaimportante nga mga aspeto nga ginapahanumdom sa akon kon magkadto ako diri sa duog sang pagpanumbalik sang priesthood amo ang importante nga papel sang kababayin-an sa Pagpanumbalik.

“Sang si Joseph nagsugod sa paglubad sang Libro ni Mormon, sin-o ang nagsulat? Ti, diutay lang ang iya nasulat, indi gid tama kadamo. Nagbulos si Emma.

“Kag dayon ginapanumdom ko kon paano si Joseph nagkadto sa kakahuyan agud magpangamuyo malapit sa ila puluy-an sa Palmyra, New York. Diin sia nagkadto? Nagkadto sia sa Sagradong Kakahuyan. Ngaa nagkadto sia didto? Tungod didto nagakadto si Nanay kon gusto niya mangamuyo.

“Duha lang ato sang mga babayi nga may importante nga papel sa pagpanumbalik sang priesthood kag sa Pagpanumbalik sang Simbahan. Wala duda, makasiling kita nga ang aton mga asawa amo man kaimportante karon pareho sang una. Siyempre importante sila.”

Pareho kay Emma kag Lucy kag Joseph, labi kita nga epektibo kon handa kita nga magtuon sa isa kag isa kag nagaisa sa aton tuyo nga mangin mga disipulo ni Jesucristo kag buligan ang iban sa sina nga banas.

Ginatudloan kita nga “ang priesthood nagabugay sang kabuhi sang mga anak sang Dios sa madamo nga paagi. … Sa mga calling [sa Simbahan], mga ordinansa sang templo, mga kaangtanan sa pamilya, kag di-matalupangdan, indibidwal nga pag-alagad, ang mga babayi kag mga lalaki nga Santos sa Ulihing mga Adlaw nagahikot nga may gahum kag awtoridad sang priesthood. Ining pagsandiganay sang mga lalaki kag mga babayi sa pagtuman sang buluhaton sang Dios paagi sa Iya gahum ang sentro sa ebanghelyo ni Jesucristo nga ginpanumbalik paagi kay Propetang Joseph Smith.”¹²

Ang pag-isa importante sa diosnon nga buluhaton nga kita may pribilehiyo kag ginatawag sa paghimo, pero wala ini basta lang nga natabo. Nagakinahanglan ini sang pagtinguha kag tion sa paghinambalanay—sa pagpamati sa isa kag isa, sa pag-intiendi sang panan-aw sang iban, kag pagpaambit sang mga eksperiyensya—pero ang proseso nagaresulta sa mas inspirado nga mga desisyon. Bisan sa puluy-an ukon sa aton mga responsibilidad sa Simbahan, ang pinakaepektibo nga paagi sa pagtuman sang aton diosnon nga potensyal amo ang maghikot sing updanay, nga ginabugayan sang gahum kag awtoridad sang priesthood sa aton lain-lain pero nagabuligay nga mga papel.

Ano ang kaayuhan sinang pag-inupdanay sa kabuhi sang mga babayi sang kasugtanan karon nga panahon? Tugoti ako nga magpaambit sang isa ka halimbawa.

Litrato

Magkapareha sa tandem nga bisikleta

Sanday Alison kag John may pinasahi nga pag-inupdanay. Nagabisikleta sila nga pares sa mga palumba nga malip-ot kag malawig. Agud nga magdaog sa palumba, ang duha ka nagasakay dapat nagasantuanay. Kinahanglan sila nga maghilay sa amo man nga direksyon sa eksakto nga tion. Ang isa indi puwede nga magdominar sa isa, pero kinahanglan nila magkomunikar sing maayo kag ang tagsa sa ila maghimo sang iya bahin. Ang kapitan, sa atubang, may kontrol kon san-o magpreno kag san-o magtindog. Ang angkas (stoker), sa likod, kinahanglan magtutok sa nagakatabo kag mangin handa sa paghatag sang dugang nga puwersa kon daw maulihi sila ukon maghinay-hinay kon lapit na sila kaayo sa iban nga siklista. Kinahanglan nila suportahan ang kada isa agud magpanguna kag malab-ot ang ila tuyo.

Si Alison nagpaathag: “Sa umpisa, ang ara sa posisyon sang kapitan masiling ‘Tindog’ kon kinahanglan kami magtindog kag ‘Preno’ kon kinahanglan kami mag-untat sa pagpedal. Pagkadugay-dugay, ang stoker nakahibalo na kon ang kapitan magatindog ukon magapreno, kag indi na kinahanglan ihambal. Natun-an namon nga batyagon ang kada isa kag hibaluon kon ang isa ginabudlayan kag [dayon] ang isa naman mabulig sa iya. Ini tanan parte sa pagsalig kag pagbuligay.”¹³

Sanday John kag Alison nagaisa indi lamang sa pagpedal sang ila bisikleta, kundi nagaisa man sila sa ila pag-asawahay. Ang kada isa naghandum sang kalipayan sang isa nga labaw sangsa iya kaugalingon; ang kada isa nagapangita sang maayo sa kada isa kag nagbuligay sa paglampuwas sang indi-tanto-manami sa iya kaugalingon. Nagbulos-bulos sila sa pagpanguna kag nagbulos-bulos man sa paghatag pa gid kon ang iya upod ginabudlayan. Ginahatagan importansya sang kada isa ang kontribusyon sang iya upod kag nakakita sing mas maayo nga mga sabat sa ila mga hangkat samtang ginatingob nila ang ila mga talento kag mga ikasarang. Tunay sila nga nahugpong sa isa kag isa paagi sa gugma nga pareho kay Cristo.

Ang pagpasibo pa gid sa diosnon nga sulundan nga magbuligay nga nagaisa kritikal sa sining panahon sang “ako anay” nga mga mensahe nga nagapalibot sa aton. Ang mga babayi may pinasahi, diosnon nga mga talento¹⁴ kag ginhatagan sang pinasahi nga mga responsibilidad, pero indi ini labaw—ukon kubos—sa importansya sa mga talento kag responsibilidad sang mga lalaki. Tanan gindisenyo kag kinahanglanon sa pagpahanabo sang diosnon nga plano sang Amay nga Langitnon nga hatagan ang tagsa sang Iya anak sang pinakamaayo nga oportunidad nga tumanon ang iya diosnon nga potensyal.

Karon nga panahon, “kinahanglan naton sang mga babayi nga may kaisog kag panan-awon sang aton Iloy nga si Eva”¹⁵ nga mag-isa sa ila mga kauturan nga lalaki sa pagdala sang mga kalag kay Cristo.¹⁶ Ang mga lalaki kinahanglan nga mangin matuod nga mga kabulig sangsa maghunahuna nga sila lamang ang responsable ukon “magpakuno-kuno” nga mga kabulig samtang ang mga babayi ang nagahimo sang kalabanan sang obra. Ang mga babayi kinahanglan mangin handa sa “pag-abante [kag] paglugar sang [ila] kaugalingon”¹⁷ bilang mga kabulig sangsa maghunahuna nga kinahanglan nila himuon ang tanan nga sila lang ukon maghulat nga hambalon kon ano ang himuon.¹⁸

Ang pagkabig sa mga babayi nga importante nga mga partisipante indi parte sa pag-alalangay kundi parte sa paghangop sang kamatuoran sang doktrina. Imbes nga magpahamtang sang programa nga magpahanabo sina, sarang kita maghikot agud hatagan balor ang kababayin-an pareho sang ginahimo sang Dios: bilang importante nga mga kaupod sa buluhaton sang kaluwasan kag pangkahitaasan.

Handa na bala kita? Magatinguha bala kita nga malampuwasan ang kinaandan nga kultura kag sa baylo batunon ang diosnon nga mga sulundan kag mga gawi nga base sa pundasyon nga doktrina? Si Pangulong Russell M. Nelson nagaagda sa aton nga “maglakat nga nagakaptanay sa sining sagrado nga buluhaton … [agud] makabulig sa paghanda sang kalibutan para sa Ika-duhang Pagkari sang Ginuo.”¹⁹ Kon himuon naton ini, makatuon kita sa paghatag balor sa mga kontribusyon sang tagsa ka indibidwal kag mangin mas epektibo sa diin matuman naton ang aton diosnon nga mga tulumanon. Makabatyag kita sing mas dako nga kalipay nga wala pa naton maeksperiyensyahan.

Kabay nga ang tagsa sa aton magpili nga makig-isa sa inspirado nga paagi sang Ginuo agud makabulig sa pagsulong sang Iya buluhaton. Sa ngalan sang aton pinalangga nga Manluluwas, nga si Jesucristo, amen.