Durante Nubia i Solo, Señor, Permanesé ku mi!
Mi ta testifiká ku “dor di e nubia i lus di solo” Señor lo keda ku nos i nos “aflikshonnan [por wòrdu] kambia den goso di Cristu.”
Un di nos himnonan stima ta ekspresá e súplika “Durante Nubia i Solo, Señor, Permanesé ku mi! !”1 Un biaha mi tabata den un avion ku a yega serka di un tormenta grandi. Mirando pafó di e bentana mi por a mira un grupo diki di nubianan bou di nos. E rayo nan di e solo ku tabata bahando tabata reflehá dor di e nubianan kousando esaki bria ku un brio intenso. Sinembargo e avion a baha dor di e nubia nan sera i diripiente nos a wòrdu kubri dor di un skuridat ku a siega nos di e lus intenso ku un ratu promé nos a presensia.2
Nubianan skur por laga nos lubidá riba Dios Su lus i hasta hiba nos na kuestioná si e lus aki ta eksistí pa nos ainda. Algun di e nubianan aki ta depreshon, ansiedat i otro formanan di aflikshon emoshonal mental. Nan por kambia e manera ku nos ta mira nos mes, otro nan i hasta Dios. Nan ta afektá hende muhé i hòmber di tur edat den tur skina di mundu.
Di e mesun manera e husgamentu por okashoná daño manera e nubianan ku bo no ta sinti òf dúdanan ku ta afektá otronan ku no a eksperensha e reto nan aki. Manera tur parti di e kurpa, e seleber ta suheta na malesa, trouma i kímiko nan no balansá. Ora nos mente ta sufri, e ta un bon momentu pa buska yudansa di Dios, di esnan rondó di nos, di ayudo médiko i profeshonalnan di salú mental.
“Tur ser humano—hòmber i muhé—ta krea den e imágen di Dios. Kada un ta un yu sprititual kerí di mayornan selestial i … kada un tin e naturalesa divino i destino.”3 Manera Nos mayornan den shelu i nos Salbador, nos tin un kurpa físiko4 i ta eksperensia emoshonnan.5
Mi kerido rumannan, ta normal pa sinti tristu òf preokupá debes en kuando. Tristesa, ansiedat ta emoshon nan .6 Sinembargo, si konstantemente bo ta tristu i bo doló ta asina profundo ku e ta blòkia bo abilidat pa sinti e amor di nos Tata ku ta den Shelu i Su Yu i e influensha di e Spiritu Santu, e ora ei nos por ta sufriendo di depreshon, ansiedat òf otro kondishon emoshonal.
Mi yu muhé a skibi un biaha: “Tabata tin un tempu … [ku] mi tabata ekstremadamente tristu tur ora. Mi tabata pensa semper ku tristesa ta algu ku bo mester tin bèrguensa di dje i e tabata un señal di debilidat. Pues mi a keda ku mi tristesa pa mi mes. … Mi a sinti kompletamente sin balor.”7
Un amigu a deskribié di e manera aki: “For di tempran den mi infansia mi mester a konfrontá un bataya ku sintimentunan di desesperashon, skuridat, soledat i miedu i e sensashon ku mi ta kibra òf tin defekto. Mi a hasi tur kos pa skonde mi doló i nunka duna e impreshon ku mi tabata nada sino próspero i fuerte.8
Mi kerido amigunan, e por pasa ku kualkier un di nos - speshalmente ora bo ta un kreyente den e plan di felisidat, nos ta pone karganan innesesario riba nos mes dor di pensa ku nos mester ta perfekto awor aki. Tipo di pensamentu nan ei por ta abrumador. Alkansá perfekshon ta un proseso ku ta tuma lugá durante nos bida mortal i mas despues i solamente pa medio di e grasia di JesuCristu.9
Al kontrario, ora ku nos ta habri tokante nos retonan emoshonal, atmití ku nos no ta perfekto,nos ta duna otro nan e pèrmit pa kompartí nan luchanan. Huntu nos ta realista ku tin speransa i nos no mester sufri nos so.10
Komo disípulonan di JesuKristu nos a sera konvenio ku Dios ku nos “ta dispuesto pa yuda otro nan karga nan karga” i “yora ku esnan ku ta yora.”11 Karga i yora por inkluí yega na wòrdu informá tokante malesa nan mental, buska rekursonan ku por yuda ku e luchanan i finalmente hiba nos mes i otro nan na Kristu, kual ta E Maestro Sanador.12 Hasta ora ku nos no sa kon pa kompará loke otro nan ta pasa aden, komprobando ku nan dolór ta real por ta un promé stap importante den e búskeda pa komprendementu i sanashon.13
Den sierto kaso nan e kousa di depreshon òf ansiedat por wòrdu identifiká, kaminda otro bes e por ta mas duru pa diserní.14 Nos mente por sufri dor di strès15 òf tambaliá dor di kansansio,16 kual tin bes por wòrdu mehorá dor di ahustenan di dieta, drumi i ehersisio. Mayoria biaha terapia òf medikamentu bou di guia di un profeshonal di train tambe por ta nesesario.
E konsekuenshanan di malesanan mental òf emoshonal ku no wòrdu trata por ta devastador, kual por ta oumento di isolashon, mal komprondementu, kiebro den relashon, daño propio i hasta suisido. Mi sa esaki pa mi mes na momentu ku mi tata a muri hopi aña pasa dor di suisido. Su morto tabata spantoso i doloroso pa mi famia i ami. A tuma mi hopi aña pa mi pasa dor di e duelo i ta resientemente mi a siña ku papia tokante suisido na un manera apropiá netamente ta yuda prevení na lugá di enkurashá pa hasi esaki.17 Awor mi a diskutí abiertamente tokante mi tata su morto ku mi yunan i ta testigu di e sanashon ku e Salbador por duna ámbos banda di e velo.18
Lamentablemente, hopi ku ta sufri di depreshon severo ta distansha nan mes for di nan kompatriota nan kual ta e Santunan di delaster dia paso nan ta sinti ku nan no ta pas den nan malchi imaginario. Nos por yuda nan pa sa i sinti ku realmente nan ta permanesé na nos. E ta importante pa rekonosé ku depreshon no ta e resultado di debilidat ni tampoko e resultado di pika.19 E ta “prosperá den sekreto pero ta kremp den empatia.”20 Huntu, nos por pasa den e nubianan di isolashon i stigma e pa asina e karga di bèrgwensa por wòrdu kitá i laga milagernan di sanashon sosodé.
Durante Su ministerio mortal, JesuCrsitu a sana e enfermonan i e afliginan, pero kada persona mester a ehersé fe den DjE i aktua pa risibí Su sanashon. Algun a kana distanshanan hopi largu, otro nan a saka nan man pa mishi ku su garment i otro nan mester a wòrdu karga i hiba serka E pa wòrdu sana.21 Ora ta trata di sanashon kua di nos no mester di E ku desesperashon? “Nos tur no ta limosnero?”22
Laga nos sigui e kaminda di e Salbador i engrandese nos kompashon i disminuí nos tendensha di husga i stòp di ta e inspektornan spiritual di otro nan. Den e momentu nan ei nos mester ta disponibel pa yuda òf karga e nubianan pisa ku ta sofoká nos ser nan kerí i amigunan23 di manera ku pa medio di nos amor un bes mas nan por sinti e Spiritu Santu i persibí e lus ku ta bin for di JesuCristu.
Si konstantemente bo ta rondoná pa nubianan nan di skuridat24 bai bek na bo Tata den Shelu. Nada ku bo a eksperenshá por kambia e eterno bèrdat ku bo ta Su yu i ku E stima bo.23 Kòrda ku Cristu ta bo Salbador i Redentor i ku Dios ta bo Tata. Nan ta komprondé. Imaginá nan serka di bo, skuchando i ofresiendo bo nan apoyo.26 Nan lo konsolá bo den bo aflikshon.”27 Hasi tur loke bo por, i konfia den Señor Su grasia ekspiatorio.
Bo luchanan no ta definí bo pero nan por rafiná bo.28 Dor di e sumpiña den e kueru”29 bo por tin e abilidat di sinti mas kompashon pa ku otro nan. Segun bo wòrdu guia pa e Spiritu Santu, kompartí bo historia asina bo por ousilia esnan debil, hisa e man nan ku ta kologá, i fortalesé e rudianan suak.”30
Pa nos ku ta lucha òf sostené un hende ku ta luchando, laga nos ta disponibel pa sigui Dios su mandamentunan di manera ku nos por tin Su Spiritu semper huntu ku nos.31 Laga nos a hasi e kosnan chikí i simpel”32 ku lo duna nos forsa spiritual. Manera Presidente Russell M. Nelson a bisa: “Nada ta habri e shelunan manera e oumento di puresa, kombiná ku obedensha eksakto, búskeda sinseramente, deleitando nos diario riba e palabranan di Cristu den e Buki di Mormon, i komprometé ku oranan regular dediká na tèmpel i trabou di historia familiar.”33
Laga nos tur rekordá ku nos Salbador JesuKristu, “a tuma riba E nos enfermedat nan. Pa su entrañanan por ta yena ku miserikòrdia, segun e karni, pa e por sa … kon pa yuda (nos) segun (nos) enfermedat nan.”34 E la bin pa “fortalesé e kurasonnan kibra, … pa konsolá tur esnan ku ta yora; … pa duna nan bunitesa na lugá di shinishi, zeta di felisidat pa tristesa, e garment di alabansa pa spiritu di shelu.”35
Mi ta testifiká na bo ku “durante nubianan i solo” Señor lo permanesé ku nos, ku nos aflikshon nan por disparsé den e felisidat di Cristu”36 i ku ta pa medio di miserikòrdia nos ta salba despues di tur kos ku nos por hasi.”37 Mi ta testifiká ku JesuCristu lo regresá na tera “ku sanashon den su alanan.”38 Finalmente E lo kita tur lágrima for di nos wowo nan; i lo no tin mas … doló.”39 Pa tur ku kier bin serka Kristu i wòrdu perfekshoná den dje,”40 e solo lo no baha mas; … paso Señor lo ta nos lus eterno i e dianan di nos pena lo terminá.”41 Den e nòmber di JesuCristu, amèn.