Kontinuamente Vigilante na Orashon
Vigilansia konstante ta nesesario pa aktua kontra di indulgensia i indiferensia.
Mi ta roga honestamente pa e asistensia di e Spiritu santu pa boso i pa ami ora nos ta regosihá i adorá huntu.
Na aprel di 1976, Elder Boyd K. Packer a papia espesífikamente na e hubentut di Iglesia den konferensia general. Den su mensahe klásiko titulá “Krokodelnan Spiritual,” el a deskribí kon durante un asignashon na Afrika el a opservá krokodelnan bon kamuflá sperando pa yag riba víktimanan inosente. El a kompará e krokodelnan ku Satanas, kende ta yag riba hubentut sin kuidou dor di kamuflá e naturalesa mortal di piká.
Mi tabatin 23 aña tempu Elder Packer a duna e diskurso ei, i Susan i ami tabata spera e nasementu di nos promé yu den apenas algun dia. Nos tabata impreshoná ku e kontenido di su mensahe tokante evitá piká i e manera maestral ku el a uza e komportashon normal di animalnan pa siña un lès spiritual importante.
Susan i ami tambe a biaha pa Afrika ku hopi asignashon. I nos tabatin oportunidatnan pa mira e animalnan magnífiko ku ta biba riba e kontinente ei. Rekordando e impakto di Elder Packer su diskurso den nos bida, nos a purba pa opservá i siña lèsnan di e komportashon di animalnan den naturalesa afrikano.
Mi ke deskribí e karakterístikanan i táktikanan di dos cheetah ku Susan i ami a mira yag riba nan víktima i relashoná algun di e kosnan ku nos a opservá na bibamentu diario di e evangelio di JesuCristu.
Cheetah i Topis
Cheetahnan ta e animalnan di tera mas lihé na mundu i ta alkansá un velosidat mes haltu ku 75 mia pa ora](120km/h pa ora]. E animalnan bunita aki por aselerá for di posishon pará ketu pa mes lihé ku 68 mia pa ora (109 kilometer pa ora] den ménos ku tres sekònde. Cheetahnan ta yagdó ku ta slùip nan víktima i ta sprent un distansia kòrtiku pa pèrsigui i ataká.
Susan i ami a pasa kasi dos ora mirando dos cheetah pèrsiguí un grupo grandi di topis, [Esaki ra] Afrika su antilope mas komun i general. E yerba haltu, i seku di e sabana Afrikano tabata [koló] maron oro i kasi skuresé e animalnan feros totalmente segun nan tabata pèrsigui un grupo di topis. E cheetanan tabata separá for di otro pa aproksimadamente 100 yarda(91 meter) pero nan tabata traha huntu.
Miéntras un cheetah tabata pará den e yerba i no tabata move, e otro cheetah tabata gatia abou na suela i poko poko tabata gatia yega serka di e topis ku no tabata sospechá e peliger. Despues e cheetah ku tabata sintá stret a disparsé den e yerba na eksaktamente e mes momentu ku e otro cheetah a sinta stret. E patronchi variá aki di un cheetah gatiando abou i gatiando padilanti miéntras e otro cheetah ta sinta stret den e yerba a sigui pa un tempu largu. E suptilesa sekreto di e strategia tabata intenshoná pa distraí i gaña e topis i asina dividi nan atenshon leu for di e peliger ku tabata serka. Ku pasenshi i firmesa, e dos cheetahnan a traha komo un tim pa sigurá nan siguiente kuminda.
Posishoná meimei den e grupo grandi di topis i e cheetanan ku tabata aserkando tabatin diferente topis bieu i mas fuerte pará komo guardian riba seru di komehein. E bista mehorá di e plano di yerba for di e serunan chikí a pèrmití e topisnan wardadó aki pa wak pa señalnan di peliger.
Despues diripiente, ora e cheetahnan a aparesé pa ta den distansia di atake, henter e grupo di topis a bira i a kore bai. Mi no sa si òf kon e topis wardadó a komuniká ku e grupo mas grandi, pero di un manera öf otro un atvertensia a wòrdu duná, i tur e topisnan a move pa un lugá di seguridat.
I kiko e cheetahnan a hasi despues? Sin ningun tardansa, e dos cheetanan a resumí nan patronchi variá di un cheetah gatiando abou i bayendo dilanti miéntras e otro cheetah a sinta stret den e yerba. A patronchi di persekushon a sigui. Nan no a stòp. Nan no a sosegá òf tuma un pousa. Nan tabata sin kompashon den sigui nan strategia di distraishon i divershon. Susan i ami a mira e cheetanan disparsé den distansia, semper moviendo mas serka i mas serka di e grupo di topis.
E anochi ei Susan i ami tabatin un kombersashon memorabel tokante lokual nos a opservá i siña. Nos a deliberá tambe riba e eksperensia aki ku nos yunan i nietunan i a identifiká hopi lès balioso. Awor lo mi deskribí tres di e lèsnan ei.
Lès #1—Tene Kuidou ku Maldat su Disfrasnan Seduktor
Pa ami, e cheetahnan ta kriaturanan elegante, atraktivo i fasinante. Un cheetah su lana hel te ku shinishi blanku ku manchanan pretu ta fungi komo un disfras ku ta hasi e animalnan aki kasi invisibel miéntras nan ta pèrsigui nan víktima den e planonan di yerba afrikano.
Di mes un manera, ideanan i akshonnan spiritualmente peligroso frekuentemente por parse di ta atraktivo, deseabel, òf agradabel. Pues, den nos mundu kontemporáneo, kada un di nos mester ta konsiente di kos malu seduktor ku ta pretendé di ta bon. Manera Isaias a atvertí, “Ai di esnan ku ta yama bon loke ta malu, i malu loke ta bon; ku ta tuma pretu hasi blanku,i blanku hasi pretu, ku ta laga dushi pasa pa marga i marga pa loke ta dushi!”1
Den un periodo paradoksal na unda violashon di e santidat di bida humano ta elogiá komo un derecho i káos te deskribí komo libertat, esta bendishoná nos ta pa biba den e delaster dispensashon aki ora ku lus di evangelio restourá por bria den nos bida i yuda nos pa distinguí e atversario su engaño i distraishonnan.
“Pasó nan ku ta sabí i a risibí e bèrdat, i a tuma e Spiritu Santu komo nan guia, i no a wòrdu engañá—di berdat Mi ta bisa boso, nan lo no wòrdu kòrtá i bentá den kandela, pero lo sobrebibí e dia.”2
Lès #2—Keda Lantá i Sea Alertá
Pa un topi, un momentu kòrtiku di deskuido òf keda sin paga tinu por invitá un atake rápido di un cheetah. Meskos, satisfakshon i indiferensia spiritual ta hasi nos vulnerabel na e avansenan di e atversario. Aktonan spiritual sin pensa bon ta invitá peliger grandi den nos bida.
iStock.com/Angelika
Nefi a deskribí kon den e delaster dianan Satanas lo purba na pasifiká i zoya e yunan di Dios den un sentido falsu di “seguridat karnal, ku nan lo bisa: tur kos ta bon den Sion; si Sion ta prosperá, tur kos ta bon—i pues e diabel ta engañá nan alma, i ta hiba nan kuidadosamente pa fièrnu.”3
Vigilansia konstante ta nesesario pa aktua kontra di indulgensia i indiferensia. Pa ta alertá ta e estado òf akshon di mantené vigilansia kuidadoso pa posibel peliger i difikultatnan. I pa mantené vigilansia kermen e akto di keda lantá pa vigilá i protehá. Papiando spiritualmente, nos mester keda lantá i ta alerta pa e inspirashonnan di e Spiritu Santu i e siñalnan ku ta bini di Señor su wardadónan riba e torennan.4
“Si, i tambe mi ta amonestá boso, … pa boso ta semper vigilante i no neglishá boso orashonnan, pa boso no wòrdu hibá pa e tentashonnan di diabel, … pasó ata ‘ki, e no ta rekompensá boso nada bon.”5
Enfoká nos bida riba i den e Salbador i Su evangelio pa abilitá nos pa vense e tendensia di e hòmber natural pa ta spiritualmente no alertá i floho. Komo nos ta bendishoná ku wowo pa mira i orea pa tende,6 e Spiritu Santu por oumentá nos kapasidat pa mira i skucha ora ku normalmente nos lo no pensa ku nos mester mira òf skucha òf ora nos no por pensa ku kualke kos por wòrdu mirá òf skuchá.
Nos mester ta alertá, pa asina nos por ta kla.7
Lès#3—Komprondé e Intenshon di e Enemigu
Un cheetah ta un animal yagdó ku pa naturalesa ta yag riba otro animalnan. Henter dia, tur dia, un cheetah ta un animal yagdó.
Satanas “ta e enemigu di rektitut i di esnan ku ta buska pa hasi e boluntat di Dios.”8 Henter dia, tur dia, su úniko intenshon i propósito ta pa hasi e yunan hòmber i yunan muhé di Dios miserabel meskos kuné mes.9
E Tata Su plan di felisidat ta diseñá pa proveé guia pa su yunan, pa yuda nan eksperensiá goso duradero, i pa trese nan sigur kas na Dje ku kurpa resusitá, i eksaltá. E diabel ta traha pa hasi e yunan hòmber i yunan muhé di Dios konfuso i infelis i ta stroba nan progreso eterno. E atversario ta traha sin deskanso pa ataká e elementonan di e Tata su plan ku e ta odia mas tantu.
Satanas no tin un kurpa, i su progreso eterno a wòrdu pará. Di mes manera ku awa ku ta flui den un kama di riu ta wòrdu pará pa un dam, asina e atversario su progreso eterno ta opstruí pasobra e no tin un kurpa físiko. Pa motibu di su rebelion, Lucifer a nenga su mes tur e bendishonnan i eksperensianan mortal ku ta posibel mediante un tabernakel di karni i wesu. Un di e nifikashon potensial den skritura di e palabra maldishonán ta wòrdu ilustrá den su desabilidat pa sigui progresá i bira meskos ku nos Tata Selestial.
Pasó un kurpa físiko ta asina importante den e Tata Su plan di felisidat i nos desaroyo spiritual, Lucifer ta buska pa stroba nos progreso dor di tenta nos pa uza nos kurpa inkorektamente. Presidente Russell M. Nelson a siña ku siguridat spiritual finalmente ta hañá den “nunka tuma e promé paso seduktivo pa bai kaminda bo no tin ku bai i hasi lokual bo no tin ku hasi.’ … Komo sernan humano nos tur tin apetitonan [físiko] pa nos sobrebibensia. ‘E apetitonan aki ta apsolutamente esensial pa durabilidat di bida. Pues, kiko e atversario ta hasi? … E ta ataká nos via di nos apetitonan. E ta tenta nos pa kome kosnan ku nos no mester kome, pa bebe kos ku nos no mester bebe, i pa stima manera ku nos no mester stima’”10
Un di e ironianan di mas grandi di eternidat ta ku e atversario, ku ta miserabel presisamente pasó e no tin un kurpa físiko, ta invitá i ta sedusí nos pa kompartí den su miseria dor i uza nos kurpa inkorektamente. E mesun hèrmènt ku e no tin i no por uza ta pues e ophetivo prinsipal di su intentonan pa atraé nos pa destrukshon físiko i spiritual.
Komprondé e intenshon di un enemigu ta vital pa preparashon efektivo pa posibel atakenan.11 Presisamente pasó Kapitan Moroni tabata konosé e intenshon di e Lamanitanan, e tabata prepará pa topa ku nan na e tempu di nan binida i tabata viktorioso.12 I e mesun prinsipio i promesa aki ta aplikabel pa kada un di nos.
Si nos ta prepará, nos lo no teme.
I nos lo por skapa di e poder di e enemigu.13
Invitashon,Promesa i Testimonio
Meskos ku lèsnan importante por wòrdu siñá dor di opservá e komportashon di e cheetanan i topisnan, asina kada un di nos mester wak pa e lèsnan i atvertensianan hañá den e eventonan simpel di bida diario. Ora nos buska pa un mente i kurason habrí pa risibí guia selestial pa medio di e poder di e Spiritu Santu, e ora ei algun di e instrukshonnan di mas grandi ku nos por risibí i hopi di e atvertensianan poderoso ku por protehé nos lo originá den nos mes eksperensianan komun. Tin parabelnan poderoso den tantu e skrituranan i den nos bida diario.
Mi a resaltá solamente tres di hopi lèsnan ku por wòrdu identifiká den e aventura ku Susan i ami tabatin na Afrika. Mi ta invitá i ta animá boso pa reflehá riba e episodio aki ku e cheetahnan i e topisnan i identifiká mas lès pa boso i boso famia. Por fabor kòrda semper ku boso hogar ta e sentro berdadero di siña i biba e evangelio.
Si boso reakshoná den fe na e invitashon aki, pensamentunan inspirá lo bini na boso mente, sentimentunan spiritual lo hincha den boso kurason, i boso lo rekonosé akshonnan ku lo mester wòrdu tumá òf kontinuá pa asina boso por tuma riba boso henter e armadura di Dios pa boso por ta kapas pa resistí e dia malu, despues di a hasi tur kos, pa boso por ta kapas pa para.”14
Mi ta primintí ku e bendishonnan di preparashon efektivo i protekshon spiritual lo flui den boso bida ora boso ta alertá na orashon vigilante i kontinuamente.
Mi ta testifiká ku pusha padilanti riba e kaminda di kombenio ta proveé seguridat spiritual i ta invitá goso duradero den nos bida. I mi ta testifiká ku e Salbador resusitá i bibu lo sostené i fortalesé nos den tempunan bon i malu. Di e bèrdatnan aki mi ta testifiká den nòmber di JesuCristu, amèn.