Kapasidat Spiritual
Komo disípulonan fiel di JesuCristu,boso por risibí inspirashon i revelashon personal, konsistente ku Su mandamentunan, ku ta espesífiko pa boso.
Saliendo for di un kampamentu di Mujeres Jovenes e verano aki, un hobensita dushi a duna mi un nota. Den dje, el a puntra, “Kon mi por sa ora Dios ta purba na bisa mi algu?” Mi ta gusta su pregunta. Nos alma ta anhelá pa un konekshon ku nos hogar selestial. Nos ke sinti ku nos ta nesesario i útil. Pero tin biaha nos ta lucha pa distinguí entre nos mes pensamentunan i e impreshonnan amabel di e Spiritu. Profetanan, antiguo i moderno, a siña ku “si algu ta invitá i persuadí pa hasi bon, e ta bini di Cristu.”1
Presidente Russell M. Nelson a ekstendé un invitashon simpel i poderoso: “Mi rumannan stimá, mi ta roga boso pa oumentá boso kapasidat spiritual pa risibí revelashon. Skohe pa hasi e trabou spiritual rekerí pa gosa di e don di e Spiritu Santu i skucha e stèm di e Spiritu mas frekuentemente i ku mas klaridat.2
Mi deseo e mainta aki ta pa papia ku boso for di mi kurason tokante kuater manera pa oumentá boso kapasidat spiritual pa risibí revelashon.
1. Sea Intenshonal tokante Krea Tempu i Espasio pa Skucha Dios su Stèm
Segun boso skohe pa plania i dediká tempu kada dia pa yega mas serka Dios su stèm, spesialmente den e Buki di Mormon, despues di tempu Su stèm lo bira mas kla i mas familiar pa boso.
Al kontrario, e distraishonnan i zonido ku ta yena e mundu i nos hogar i bida lo hasié mas difísil pa skucha Su stèm. E distraishonnan aki por okupá nos mente asina tantu ku nos no ta laga lugá pa e inspirashonnan tièrno di e Spiritu Santu.
E Profeta Jose Smith a siña ku mayoria bia Dios ta revelá Su mes “na individuonan den privá, den nan kamber; den desierto òf fèlt, i esei generalmente sin sonido òf konmoshon.3
Satanas ke separá nos for di Dios Su stèm dor di tene nos pafó di e lugánan ketu aki. Si Dios ta papia den un stèm trankil ,i delikado, boso i ami mester yega mas serka pa skuch’é. Djis imaginá kiko lo sosedé si nos tabata ku mes intenshon pa keda konektá ku shelu komo ku nos ta pa keda konektá ku Wi-Fi! Skohe un tempu i lugá, i skucha Dios Su stèm kada dia. I tene e sita sagrado aki ku eksaktitut, pasó masha hopi ta dependé di esaki.
2. Aktua sin Tardansa.
Ora boso haña inspirashon i despues aktua ku intenshon, Señor por usa bo. Mas boso aktua, mas familiar e stèm di e Spiritu ta bira. Boso lo rekonosé Dios su guia mas tantu i ku e ta dispuesto pa revelá Su pensamentu i boluntat.”4 Ku boso tarda, boso por lubidá e inspirashon òf pèrdè e chèns pa yuda un hende pa Dios.
3. Optené Boso Tarea for di Señor
E orashon ku Tata Selestial ta parse di ta ansioso pa kontestá ta nos petishon pa wòrdu guiá na un persona ku tin mester di nos yudansa. Presidente Henry B. Eyring a siña nos pa buska revelashon dor di puntra Dios ken nos por yuda p’e. “Si boso hasi preguntanan manera esei, e Spiritu Santu lo bini i boso lo sinti inspirashon tokante kosnan ku boso por hasi pa otro hende. Ora boso bai i hasi e kosnan ei, boso ta hasi e tarea di Señor, i ora boso ta hasi Señor su tarea, boso ta kualifiká pa e don di e Spiritu Santu.”5
Boso por hasi orashon i puntra Señor pa un tarea. Hasiendo asina, E por uza boso abilidatnan normal pa realisá Su trabou ekstraordinario.
Mi abuelo, Fritz Hjalmar Lundgren, a emigrá for di Suesia tempu e tabatin 19 aña. El a yega Merka su so, ku un maleta i seis aña di edukashon formal. Inkapas pa papia ingles, el a biaha pa Oregon i a traha aya komo un kòrtadó di palu, i a uni na Iglesia ku mi wela i mi mama. Nunka e no a presidí riba un bario, pero komo un maestro orientador fiel, el a trese mas di 50 diferente famia bèk komo miembro aktivo den Iglesia. Kon el a hasi esei?
Despues di morto,di abuelo mi tabata pasando den un kaha ku su papelnan i a haña un karta skibí pa un hòmber ku a regresá na iglesia pa motibu di mi Tawela su amor. E karta tabata bisa, “Mi ta kere ku, sekreto di Hermano Fritz, ta ku semper e ta hasiendo un tarea pa Tata Selestial.”
E karta tabata di Hermano Wayne Simonis. Abuelo tabata bishit’é i a yega na konosé tur miembro di e famia. Despues di un tempu, abuelo a bisa nan ku tabatin mester di nan, i el a invitá nan pa bai iglesia. Pero e djadumingu ei, Hermano Simonis a lanta ku un dilema—e no a kaba di drecha dak di su kas i tabata spera áwaseru e siman ei. El a disidí ku e lo bai iglesia, duna abuelo man, pero sali despues bai kas pa kaba ku e dak. Su famia por tuma parti na reunion sakramental sin dje.
Su plan tabata funshoná hopi bon, te na momentu, ku e ta riba e dak, el a tende un hende ta subi e trapi. Den su palabranan: “Ora mi a hisa kara wak, … pará na e parti ariba di e trapi tabata Hermano Fritz. El a djis duna mi un sonrisa grandi. Promé instante, mi tabatin bèrgwensa i a sinti meskos ku un mucha chikitu gará pa falta skol. Despues … mi a sinti rabia. [Pero Hermano Fritz a djis] kita su bachi i a kolog’é na e trapi. Miéntras e tabata lora su manganan di su kamisa blanku, el a bira i a puntra mi, ‘Hermano Simonis, bo tin un martin mas? E trabou aki mester ta hopi importante sino lo bo no a bai laga bo famia, i si e ta sina importante, mi ke yuda bo.’ Miéntras mi a wak den su wowonan, mi a mira solamente bondat i amor di Cristu. Mi rabia a kita. Mi a pone mi hèrmèntnan abou e djadumingu ei i a sigui mi bon amigu bahando e trapi i a regresá na e kapiya.”
Tawela a haña su tarea for di Señor, i e tabata sa ku e mester a buska e karnénan pèrdí. Meskos ku e kuater hòmbernan ku a karga nan amigu lam riba e dak i a lag’é baha pa wòrdu kurá pa JesuCristu,6 asina tambe Tawela su tarea a hib’é riba e dak. Señor ta manda revelashon na esnan ku ta buska pa yuda otronan.
4. Kere i Konfia
Resientemente, mi a lesa den e skrituranan tokante un otro gran mishonero ku a haña su tarea di Señor. Aaron tabata siña e rei di e Lamanitanan, ku a puntra su mes di kon Aaron su ruman hòmber Ammon tambe no a bini pa siñ’é. Aaron a bisa e rei ku e Spiritu di Señor a yamé pa bai un otro lugá.7
E Spiritu a papia na mi kurason: kada un di nos tin un mishon diferente pa logra, i tin biaha e Spiritu por yama nos na “un otro lugá.” Tin diferente manera pa edifiká e reino di Dios komo disípulonan di JesuCristu ku ta hasi i warda konvenio. Komo Su disípulonan fiel,boso por risibí inspirashon i revelashon personal konsistente ku Su mandamentunan ku ta espesífiko pa boso. Boso tin mishonnan i ròlnan úniko pa realisá den bida i boso lo haña guia úniko pa kumpli ku nan.
Nefi, e ruman di Jared, i hasta Moises tur tabatin ku krusa kantidat grandi di awa—i kada un a hasié na manera diferente. Nefi a traha “palu di obra detayá”8 E ruman di Jared a konstrui bptpnan, ku tabata “manera un tayó”9 I Moises “a kana riba tera seku meimei di e laman.”10
Kada un a risibí guia personalisá, espesífiko pa nan, i kada un a konfia i a aktua. Señor ta konsiente di esnan ku ta obediente i, den e palabranan di Nefi, lo “prepará un kaminda pa [nos por] kumpli ku loke e ta manda.”11 Tuma nota ku Nefi ta bisa, “un kaminda” — no “e kaminda.”
Nos ta pèrdè òf rechasá tareanan personal di Señor pasobra El a prepará un “un manera” diferente ku esun ku nos a spera?
Mi tawela a wòrdu guiá na un lugá inusual— den bachi, riba dak, riba un djadumingu. Konfia Dios pa guia boso, ounke ku e kaminda ei ta mustra diferente ku boso a spera òf ta diferente for di otronan.
Santunan di delaster dia ta bini den hopi fòrma i midí, pero tur ta igual pa Dios — pretu, blanku, katibu i liber, hòmber i muhé, soltero i kasá, riku i pober, yòn i bieu, hopi tempu miembro i resientemente konbertí.12 No ta importante ken boso ta òf kiko boso ta pasando aden, boso ta invitá na mesa di Señor.13
Den buska i hasi e boluntat di e Tata ta bira un kustumber di boso bida diario, boso lo, klaro, wòrdu guiá pa kambia i arepentí.
Iglesia su programa nobo pa muchanan i hubentut ta pa konstruí riba un fundashon di siña pa buska revelashon, deskubrí kiko Señor ke pa nos hasi, i despues aktua segun e guia ei. Kada un di nos, sin importá edat òf sirkunstansia por hasi esfuerso pa buska, risibí, i aktua. Miéntras boso ta sigui e patronchi eterno aki ku ta prepará pa nos tempu, boso lo yega mas serka di JesuCristu—Su amor, Su lus, Su guia, Su pas, i Su poder sanadó i pa kapasitá. I boso lo oumentá boso kapasidat spiritual pa bira un instrumento diario den Su mannan den realisá Su gran obra. Den e nòmber di JesuCristu, amèn.