Fa’a’ohipara’a i tō tātou mau ponapona pae vārua
Mai te tai’ora’a ’e te ha’api’ira’a mai nō ni’a i te mau ponapona ’aita i nava’i nō te fa’atupu i te ponapona, te tai’ora’a ’e te ha’api’ira’a mai nō ni’a i te fa’aro’o ma te ’ore e tu’u mai i te ’ohipara’a ’aita e nava’i nō te patu i te fa’aro’o.
Tē ’oa’oa nei au nō te ha’amaita’ira’a i te fāri’ira’a i te hō’ē tino tāhuti, ’o te hō’ē tao’a fa’ahiahia a tō tātou Metua i te Ao ra. Tō tātou tino, ’ua hau atu e 600 ponapona.1 E rave rahi mau ponapona e tītau ’ia fa’ahautihia ’ia nehenehe e rave i tā tātou mau ’ohipara’a i te mau mahana ato’a. E nehenehe tātou e ha’amāu’a e rave rahi tauto’ora’a o te ferurira’a nō te tai’o ’e nō te ha’api’i mai nō ni’a i tō tātou mau ponapona, mai te mea e mana’o rā tātou ē e ha’apūai rahi mai te reira, e fē’a’a tātou. E rahi mai tō tātou mau ponapona ’ia fa’a’ohipa ana’e tātou ia rātou.
’Ua ’ite mai au ē mai te reira ato’a te mau hōro’a pae vārua. E tītau ato’a te reira ’ia fa’a’ohipahia nō te fa’arahi mai. Te hōro’a pae vārua nō te fa’aro’o, ’ei hi’ora’a, e ’ere noa i te hō’ē mana’o ’aore rā hō’ē huru ; ’o te hō’ē parau tumu ra nō te ’ohipa ’o te ’ite pinepinehia i roto i te mau pāpa’ira’a mo’a e tū’ati i te ihoparau fa’arave.2 Mai te tai’ora’a ’e te ha’api’ira’a mai nō ni’a i te mau ponapona ’aita i nava’i nō te fa’atupu i te ponapona, te tai’ora’a ’e te ha’api’ira’a mai nō ni’a i te fa’aro’o ma te ’ore e tu’u mai i te ’ohipara’a ’aita e nava’i nō te patu i te fa’aro’o.
I te 16ra’a o tō’u matahiti, tō’u taea’e matahiapo, ’o Ivan, e 22 ïa matahiti tōna i te reira taime, ’ua ho’i mai i te fare i te hō’ē mahana ’e ’ua fa’a’ite mai i te parau ’āpī i te ’utuāfare. ’Ua fa’aoti ’oia ’ia bāpetizohia ’oia i roto i te ’Ēkālesia a Iesu Mesia i te Feiā Mo’a i te Mau Mahana Hope’a nei. ’Ua hi’o tō māua nā metua iāna ma te pāpū ’ore, ’e tē ha’amana’o ra vau ’aita vau i hāro’aro’a maita’i e aha te tupu ra. Fātata hō’ē matahiti i muri iho, ’ua parau mai ’oia i te hō’ē parau ’āpī huru māere : ’ua fa’aoti ’oia e haere e tāvini ’ei misiōnare nō te ’Ēkālesia, tē aura’a ra e’ita mātou e ’ite iāna e piti matahiti. ’Aita roa tō’u nā metua i ’oa’oa i teie parau ’āpī ; ’ua ’ite rā vau i roto iāna i te hō’ē hina’aro pāpū tei ha’amara’a i tō’u fa’ahiahia iāna ’e te fa’aotira’a tāna i rave.
Tau ’āva’e i muri mai, ’a tāvini noa ai Ivan i tāna misiōni, ’ua nehenehe iā’u e fa’anaho i te hō’ē taime fa’afa’aeara’a ’e tō’u mau hoa ha’api’ira’a. ’Ua hina’aro mātou e fa’ahanahana i te hopera’a tā mātou matahiti i te fare ha’api’ira’a tuarua ’e e haere i te tahi mahana i tahatai.
’Ua pāpa’i au i te hō’ē rata i tō’u taea’e misiōnare ’e ’ua fa’a’ite atu i tā’u ’ōpuara’a nō te tau fa’afa’aeara’a. ’Ua pāhono mai ’oia iā’u ē te ’oire i reira ’oia i te tāvinira’a tei ni’a ïa i te porōmu o te vāhi tā’u e haere atu. ’Ua fa’aoti au ē e mana’o maita’i nō te haere e fārerei iāna. I muri iho roa tō’u ’itera’a ē e’ita te mau misiōnare e nehenehe ’ia fārereihia e tō rātou ’utuāfare.
’Ua rave au i te mau fa’anahora’a ato’a. Tē ha’amana’o ra vau i te pārahira’a i roto i te pere’o’o fa’auta ta’ata (bus), ma te feruri i te au maita’i tā māua Ivan e fāri’i i te reira mahana maita’i. E tāmā’a maita’i mātou i te po’ipo’i, e tāu’aparau, e hauti i roto i te one, e tāra’i mahana---’auē ! e taime maita’i ïa tō mātou.
I te tāpaera’a te pere’o’o i te vāhi tāpe’ara’a, ’ua ’ite atu vau ia Ivan i piha’i iho i te hō’ē atu taure’are’a, ma te ’ahu tāne ’uo’uo ’e te tā’amu ’arapo’a. ’Ua pou mai au nā ni’a i te pere’o’o, ’ua tauahi ia māua ’e ’ua fa’a’ite mai i tōna hoa (misiōnare). Ma te māu’a ’ore i te hō’ē taime, ’ua fa’a’ite atu vau iāna i tā’u mau fa’anahora’a nō te reira mahana, ’aita roa vau i ’ite e aha rā tā Ivan i fa’anaho. ’Ua hi’o mai ’oia iā’u, ’ua ’ata’ata ’e ’ua parau mai : « ’Oia mau ! Nō reira, e haere tātou nā mua roa e rave te tahi mau ’ohipa. Hina’aro ’oe e haere mai nā muri ia māua ? » ’Ua fāri’i au, ma te mana’o ē e taime ri’i tō mātou nō te fana’o i te tahatai i muri iho.
I te reira mahana, ’ua hau atu i te 10 hora, tō’u haerera’a nā roto i te mau aroā o taua ’oire rā ’e tō’u taea’e ’e tōna hoa. ’Ua ataata vau i te ta’ata i te mahana tā’āto’a. ’Ua aroha vau i te mau ta’ata ’o tā’u i ’ore na i ’ite i roto i tō’u orara’a. ’Ua paraparau mātou i te mau ta’ata ato’a, ’ua pātōtō i ni’a i te mau ’ōpani o te mau ta’ata ’e’ē, ’e ’ua fārerei i te mau ta’ata tā tō’u taea’e ’e tōna hoa i ha’api’i.
I roto i te hō’ē fārereira’a, tē ha’api’i ra tō’u taea’e ’e tōna hoa nō ni’a ia Iesu Mesia ’e te fa’anahora’a nō te fa’aorara’a. Fa’aea iho ra Ivan ’e ’ua hi’o mai iā’u. Ma tō’u māere rahi, ’ua ani mai ’oia iā’u ma te fa’atura i tō’u mana’o nō ni’a i te mea e ha’api’ihia ra. ’Ua māmū te piha ’e tei ni’a iā’u te mau mata ato’a. Ma te fifi ri’i, ’ua ’itehia iā’u te mau ta’o ’e ’ua fa’a’ite i tō’u mau mana’o nō ni’a i te Fa’aora. ’Aita vau i ʼite ē te mea tā’u i parau e mea mau ānei ’aore ra e mea hape. ’Aita roa tō’u taea’e i fa’a’āfaro iā’u, māoti ra, ’ua ha’amāuruuru mai ’oia iā’u i te fa’a’itera’a i tō’u mau mana’o ’e tō’u mau ’āehuehu.
I roto i tera mau hora nā muri ia rāua, ’aita roa tō’u taea’e ’e tōna hoa i te hō’ē noa a’e minuti i hōro’a iā’u i te hō’ē ha’api’ira’a ta’a ’ē, ’ua roa’a rā iā’u i te mau ’ite hau atu nā roto i tā’u mau ’āparaura’a nā mua a’e ’e ōna. ’Ua ’ite au nāhea te mau mata i te tauira’a ’a fāri’i ai te mau ta’ata i te hō’ē māramarama pae vārua i roto i tō rātou orara’a. ’Ua ’ite au nāhea vetahi i roto ia rātou tei ’ite mai i te tīa’ira’a i roto i te mau parau poro’i ’e ’ua ha’api’i mai au i te tāvini ia vetahi ’ē ’e ’ia ha’amo’e i tō’u mau hina’aro. ’Ua rave au i te mea tā te Fa’aora i ha’api’i : « ’O te ta’ata e hina’aro i te pe’e mai iā’u, e fa’aru’e ’oia iāna iho ».3
’Ia hi’ohia i muri, tē ’ite nei au ’ua rahi tō’u fa’aro’o i te reira mahana nō te mea ’ua hōro’a tō’u taea’e iā’u i te rāve’a nō te fa’a’ohipa. ’Ua fa’arave au i te reira i tō mātou tai’ora’a i te mau pāpa’ira’a mo’a, te ’imira’a i te mau ta’ata nō te ha’api’i, te fa’a’itera’a i te ’itera’a pāpū, te tāvinira’a ’ia vetahi ’ē, e te vai atu ra… ’Aita roa tō mātou e taime nō te hopu i te miti i te reira mahana, ’ua ī rā tō’u ’ā’au i te māramarama o te ra’i. ’Aita noa a’e au i ’ite i te hō’ē noa a’e huero one i tātahi, ’ua ’ite rā vau i tō’u fa’aro’o i te rahira’a mai te hō’ē huero sinapi na’ina’i.4 ’Aita vau i fa’arirohia ’ei rātere i te reira mahana maita’i, ’ua fāri’i rā vau i te mau ’itera’a fa’ahiahia ’e ma te ’ite ’ore, ’ua riro vau ’ei misiōnare---e ’ere rā vau i te melo nō te ’Ēkālesia.
Mau rāve’a nō te ha’apāutuutu i te mau ponapona pae vārua.
Nā roto i te fa’aho’i-fa’ahou-ra’a mai o te ’evanelia, e nehenehe tātou e ha’api’i mai nāhea tō tātou Metua i te Ao ra i te tauturu ia tātou ’ia fa’ananea i te mau hōro’a pae vārua. E mea pāpū ē e tu’u mai ’oia ia tātou i te mau rāve’a nō te fa’ananea i teie mau hōro’a, maoti i te pūpū-noa-ra’a mai i te reira ma te tauto’ora’a ore i te pae tino ’e te pae vārua. Mai te peu ’ua tū’ati atu tātou i tōna Vārua, e ha’api’i mai tātou ’ia ’ite mai i teie mau rāve’a ’e ’ia fa’a’ohipa i te reira.
Mai te mea e ’imi rahi tātou i te fa’aoroma’i, e hina’aro paha tātou e fa’a’ohipa i te reira ma te tīa’ira’a i te hō’ē pāhonora’a. Mai te peu e hina’aro tātou e fāri’i rahi i te here nō tō tātou ta’ata tupu, e nehenehe tātou e ha’amaita’i ma te pārahira’a i piha’i iho i te hō’ē ta’ata ’āpī i te fare purera’a. Mai te reira ato’a te fa’aro’o : ’ia tae ana’e mai te fē’a’a i tō tātou vārua, ’ia ti’aturi tātou i te mau fafaura’a a te Fatu nō te haere i mua. Nā roto i teie rāve’a, tē fa’a’ohipa ra tātou i te mau ponapona pae vārua ’e tē ha’apāutuutu ra i te puna nō te pūai i roto i tō tātou orara’a.
E mea pāpū e ’ere i te mea ’ōhie i te ha’amatara’a, e nehenehe e riro ’ei tāmatara’a rahi. Te mau parau a te Fatu, nā roto mai i te peropheta Moroni, e tano nō tātou i teie mahana : « ’E ’ia tae mai te ta’ata iā’u nei, e fa’a’ite atu ai au ia rātou i tō rātou paruparu. Tē hōro’a noa ra vau i te paruparu i te ta’ata, ’ia tupu tō rātou ha’eha’a ; ’e e au maita’i tō’u aroha i te mau ta’ata ato’a i fa’aha’eha’a ia rātou iho i mua iā’u ; ’e ’ia [fa’a’ohipa i te] fa’aro’o iā’u, ’ei reira e fa’ariro vau i te mau mea paruparu ’ei mea ’eta’eta nō rātou ».5
’Ua māuruuru vau i tō’u taea’e Ivan, ’aita noa ’oia i fa’a’ite mai iā’u i te ’evanelia, ’ua ani ato’a rā iā’u ’ia ora ’e ’ia ’ite i tō’u mau paruparu. ’Ua tauturu ’oia iā’u ’ia fāri’i i te anira’a a te Fatu : « ’A haere mai e ’a pe’e mai iā’u »6—’ia haere mai tā te Fa’aora e haere, ’ia ’imi, mai tā te Fa’aora e ’imi ’e ’ia here mai tā te Fa’aora e here ia tātou. Tau ’āva’e i muri mai i tō’u ’itera’a misiōnare, ’ua fa’aoti au ’ia bāpetizohia vau ’e ’ua tāvini i tā’u iho misiōni
Fāri’i ana’e i te anira’a a te peresideni Russell M. Nelson ’e ’ia haere mai ma te hina’aro mau i te Fa’aora7 ma te hi’o i te mau ponapona e hina’aro-rahi-hia te ’ohipara’a pae vārua ’e ’ia ha’amata i te fa’arave i te reira. E horora’a ātea roa teie ’eiaha ra i te horo vitiviti, ’eiaha roa ’ia mo’ehia teie mau ’ohipara’a pae vārua na’ina’i e mea tāmau rā o te ha’apūai i te mau ponapona pae tino faufa’a roa. Mai te mea e hina’aro tātou e ha’amara’a i tō tātou fa’aro’o, rave ana’e i te mea e tītauhia te fa’aro’o.
Tē fa’a’ite pāpū nei au ē e mau tamari’i tātou nā te hō’ē Metua here i te Ao ra. ’Ua here tāna Tamaiti, ’o Iesu Mesia ia tātou. ’Ua haere mai ’oia i te ao nei nō te fa’a’ite ia tātou i te ’ē’a, ’e ’ua hōro’a pipiri ’ore mai i tōna ora nō te hōro’a ia tātou i te tīa’ira’a. Tē ani mai nei te Fa’aora ia tātou ’ia pe’e i tōna hi’ora’a maita’i, ’ia fa’a’ohipa i tō tātou fa’aro’o iāna ’e i tāna tāra’ehara, ’e ’ia ha’aparare i te mau hōro’a pae vārua ato’a tei pūpūhia ia tātou. ʼO ʼoia te ’ēʼa. Teie tō’u ’itera’a pāpū nā roto i te i’oa o Iesu Mesia, ’āmene.