Nasken nga Awaten ti Amin ti Nagan nga Inted ni Ama
Adda maysa ken naidumduma a bileg ti nagan ti Mangisalakan. Daytoy laeng ti nagan a posible a pakaisalakanan.
Manon a lawas ti limmabas, nairamanak a nangbuniag iti sumagmamano a walo ti tawenna nga ubbing. Rinugianda ti nangadal iti ebanghelio ni Jesucristo kadagiti dadakkel ken titserda. Ti bukel ti pammatida Kenkuana nangrugin a rumangpaya ket ita kayatda a suroten iti danum ti panagbuniag tapno agbalin a miembro ti naisubli a Simbaanna. Iti panangsaksik iti namnamada, napanunotko no kasano ti pannakaawatda maipanggep iti napateg a paset ti katulaganda iti panagbuniag: nga umawat iti nagan ni Jesucristo.
Manipud idi punganay, inulit-ulit ti Dios nga impakdaar ti pateg ti nagan ni Jesucristo iti planona kadatayo. Insuro ti anghel ti umuna nga amatayo, a ni Adan: “Aramidem amin ti aramidmo iti nagan ti Anak, ket agbabawika ket awagam ti Dios iti nagan ti Anak nga agnanayon.”1
Iti Libro ni Mormon insuro ni propeta Ari Benjamin dagiti taona, “Awanto ti sabali a nagan a maited wenno ania man a sabali a wagas wenno pamuspusan a pagtaudan ti pannakaisalakan.”2
Impaganetget ti Apo daytoy a kinapudno ken ni Propeta Joseph Smith: “Adtoy, Jesucristo ti nagan nga inted ti Ama, ket awan ti sabali a nagan a maited a pakaisalakanan ti tao.” 3
Ti panawentayo, insuro kadatayo ni Presidente Dallin H. Oaks a “dagiti mamati iti sagrado a nagan ni Jesucristo ket sumrek iti katulagan ken agtungpal kadagiti bilin … makagun-od iti pangsubbot a sakripisio ni Jesucristo.” 4
Kayat ti Nailangitan nga Amatayo nga ilawlawag a ti nagan ti Anakna, ni Jesucristo, saan la a basta nagan kadagiti adu. Naidumduma ken naipangruna ti bileg ti nagan ti Mangisalakan. Dayta laeng ti nagan a mabalin a pakaisalakanan. Babaen ti panangyunay-unay iti daytoy a kinapudno iti amin a panawen, impanamnama ti managayat nga Ama iti amin nga Annakna nga adda dana nga agsubli Kenkuana. Ngem iti kaadda ti manamnama a pagsublian dina kayat a sawen a siguradon ti pannakapagsubli. Imbaga ti Dios no ania pay ti kasapulantayo: “Gapuna, amin a lallaki [ken babbai] nasken nga awatenda kadakuada ti nagan nga inted ti Ama.”5
Tapno magun-od ti bileg ti pannakaisalakan nga aggapu laeng babaen ti nagan ni Cristo, masapul nga “ipakumbaba ti [bagbagitayo} iti sango ti Dios … ken umasideg nga addaan napakumbaba a puso ken sibabawi nga espiritu … ken sitatallugod nga awaten[tayo] ti nagan ni Jesucristo” ket ngarud maikari, kas kadagiti walo ti tawenna a gagayyemko, tapno “maawatda babaen ti panagbuniag iti Simbaanna.”6
Amin a sipupudno a mangawat iti nagan ti Mangisalakan masapul a sumrekda iti danum ken awatenda ti ordinansa ti panagbuniag kas mismo a saksi ti Dios iti pangngeddengda.7. Ngem pangrugian laeng ti panagbuniag.
Natulnog ti balikas nga awaten. Dayta ti paratignay a balikas nga aduan iti kayulogan.8 Ti karitayo a mangawat iti nagan ni Jesucristo kasapulan ti tignay ken aduan iti dimension.
Kas pagarigan, maysa a kayulogan ti balikas nga awaten ket pannakiraman wenno ipauneg iti bagi, kas iti panangawatiti mainum. Iti panangawattayo iti nagan ni Cristo, agkaritayo a mangawat iti panursurona, iti kababalinna, ken kamaudiananna iti ayatna, iti kaunggantayo tapno agbalin a paset ti kinasiasinotayo. Gapuna, ti pateg ti awis ni Presidente Russel M. Nelson kadagiti agtutubo a “sikakararag ken napasnek a mangadal iti tunggal awag ken kaipapanan ti nagan ti Mangisalakan kadakuada a mismo para [kadakuada]”9, ken panagpennek kadagiti balikas ni Cristo iti nasantuan a kasuratan, nangnangruna iti Libro ni Mormon.10
Sabali pay a kayulogan ti balikas nga awaten ket panangawat iti tao iti naipangruna nga akem wenno panangaklon iti kinapudno ti kapanunotan wenno prinsipio. No awatentayo ti nagan ni Jesucristo, awatentayo kas Mangisalakan ket aklonentayo ti pannursurona kas pangiturong iti biagtayo. Iti ania man a napateg a pangngeddengtayo, maawattayo ti ebangheliona a napudno ken sitatallugod nga usarentayo a sipupuso, amin a kabaelan, panunot, ken pigsatayo.
Ti balikas nga awaten ket panangidasig iti bagitayo iti nagan wenno gapu. Kaaduan kadatayo ti adda padasna a mangawat iti pagrebbengan iti trabaho wenno mangaklon iti panggep wenno tignay. No aklonentayo iti bagbagitayo ti nagan ni Cristo, awatentayo ti pagrebbengan ti pudno a disipulo, tungpalentayo ti Panggepna, ken “agtakdertayo a kas saksina iti amin a gundaway ken iti amin a banag, ken iti amin a lugar a yantayo.”11 Inawagan ni Presidente Nelson ti “tunggal agtutubo a babai kentunggal agtutubo a lalaki… nga agpailista iti batalion ti agtutubo ti Apo a mangummong iti Israel.”12 Ket agyamantayo amin a mangawat iti napropetaan nga awag a mangipakdaar iti nagan ti naisubli a Simbaan kas impalgak ti Mangisalakan Mismo: Ti Simbaan ni Jesucristo dagiti Santo iti Ud-udina nga Aldaw.13
Bayat ti panangawattayo iti nagan ti Mangisalakan, maawatantayo a ti panggep ni Cristo ken ti Simbaanna maymaysa ken saan a nagbaliw. Dida mabalin ti agsina. Kasta met, ti kinadisipulotayo iti Mangisalakan ken aktibo a miembro iti Simbaanna saan met a mapagsina. No mapaay ti karitayo iti maysa, maawan ti karitayo iti sabali, kas iti rabii a sumaruno iti aldaw.
Adda dagiti agkedked a mangawat iti nagan ni Jesucristo ken ti panggepna gapu ta ipapanda a saan a napateg, akikid, limitado, ken nailet. Ti kinapudnona, iti panangawattayo iti nagan ni Cristo makawayawaya ken makapalawa. Riingenna ti tarigagay a mariknatayo no awatentayo ti plano ti Dios babaen ti pammati iti Mangisalakan. Iti kaadda ti tarigagay iti puspusotayo, maduktalantayo ti pudno a panggep ti naited a nadiosan a sagut ken talento, padas iti narimbaw nga ayatna, ket agrangpaya kadatayo para kadagiti dadduma. Iti panangawattayo iti nagan ti Mangisalakan, idiayatayo ti kapatgan nga adda kadatayo ket agbalintayo a kas Kenkuana.14
Napateg a laglagipen a ti panangawat iti nagan ti Mangisalakan ket katulagan—mangrugi iti katulagan nga inaramidtayo iti panagbuniag. Insuro ni Presidente Nelson, “Ti karitayo a sumurot iti Mangisalakan babaen kadagiti katulagantayo Kenkuana sa panagtungpal kadagita a katulagan isu ti manglukat iti ridaw iti tunggal naespirituan a bendision ken adda a pribilihio.”15 Maysa kadagiti di magatadan a pribilihio iti panangawattayo iti nagan ti mangisalakan babaen ti panagbuniag nga isu ti ridaw a mangted iti sumaruno nga ordinansa iti dana ti katulagan, ti pannakapatalgedtayo. Idi dinamagko iti maysa kadagiti walo’t tawenna a gagayemko no ania ti kayat a sawen kenkuana ti panangwat iti nagan ni Cristo, gagangay ti sungbsatna, “kayatna a sawen maawatko ti Espiritu Santo.” Saan a nagbiddut.
Ti sagut ti Espiritu Santo maawat babaen ti pannakapatalged kalpasan ti pannakaugastayo babaen ti ordinansa ti panagbuniag. Daytoy a sagut isu ti kalintegan ken gundaway a maaddan iti Espiritu Santo kas kanayon a kadua. No dumngegtayo ken agtungpal iti natinggaw, bassit a timek, iturongnatayo iti natulagan a dana a sinerrektayo babaen ti panagbuniag, ballaagannatayo no masulisogtayo a sumina, ken gutugotennatayo nga agbabawi ken agsubli no kasapulan. Ti imutektekantayo kalpasan ti panagbuniag isu ti panangtaginayontayo iti Espiritu Santo tapno agtultuloy ti panagdur-astayo iti dana ti katulagan. Adda laeng kadatayo ti Espiritu Santo no pagtalinaedentayo a nadalus ti biagtayo ken awanan basol.
Gapu iti daytoy, inikkannatayo ti Apo iti wagas a mangpabaro iti makaugas a bileg ti panagbuniag babaen ti sabali nga ordinansa—ti sakramento. Tunggal lawas mabalintayo ti “agsaksi … a siaayat[tayo] a mangawat iti nagan [ti] Anak”16 manen babaen ti panangidiaya ken panangawattayo iti simbolo ti lasag ken dara ti Apo iti imatayo—ti tinapay ken ti danum—ken pannakiranud kadagitoy iti mismo a kararuatayo. Kas supapakna, aramiden ti Mangisalakan ti rebbengenna iti katulagan babaen ti panangugasna manen ken maikaritayo kenkuana a maaddaan iti agtultuloy nga impluensia ti Espiritu Santo. Saan kadi a daytoy ti pakakitaan ti awan inggana a kaasi a masarakan laeng iti nagan ni Jesucristo? Ti laeng panangawattayo iti naganna kadatayo, Isu ti mangibaklay iti basbasol ken ladingittayo Kenkuana, idinto a “dagiti takiagna sitatanggaya”17 pay laeng a mangyarakup iti ayatna kadatayo.18
Ti sakramento ti linawas a palagip a ti panangawattayo iti nagan ni Jesucristo ket ti agdama ken agtultuloy a panagkumit, saan a mamimpinsan a mapasamak iti aldaw a panagbuniagtayo.19 Agtultuloy ken maulit-ulit a ragsak “dayta sagrado ken nasantuan a daton, a narigat a maawatan ti tao, a maugasan dagiti basoltayo ken umawat iti lasag ken darana.”20 Saan ngarud a nakaskasdaaw a no maawatan dagiti annak ti Dios ti nabileg, naespirituan a bendision nga agtaud iti panangawat iti nagan ni Cristo, kanayon a ragsak ti mariknada ken ti tarigagayda a kanayon a makitulag iti Diosda.21
Iti panangsurottayo itoy nadiosan a dana ti katulagan, ti kari ken reggettayo a mangawat iti nagan ni Jesucristo mangted kadatayo iti kired “a mangtaginayon iti naganna a kanayon a naisurat iti puspusotayo.”22 Ayatentayo ti Dios ken dagiti kaarrubatayo ken agtarigagaytayo a mangiturong kadakuada. Taginayonentayo dagiti bilinna. No agibturtayo a sipupudno, in-inut nga agbalbaliw ti kinataotayo ket ad-adda nga agbalintayo a kas kenkuana. No agkakapsuttayo ken di makaaramid iti tarigagaytayo, agdawattayo iti kired a magun-od laeng babaen ti naganna ket umaynatayo dagus tulongan. Ket iti masakbayan, makitatayo ken kaduatayonto, ket maduktalantayo a kaslatayon kenkuana, a maikari nga agsubli iti sidong ti Ama.
Ta awan duadua ti kari ti Mangisalakan: a dagiti “mamati iti nagan ni Jesucristo, ken agtamed iti Ama babaen ti naganna, ken agibtur iti pammati iti naganna agingga iti inggana”23 maisalakanto iti pagarian ti Dios. Kadakayo, agrag-oak ta dagitoy awan kaaspingna a parabur ken pannakaitan-ok mapasamak gapu iti maysa a nagan nga inted ti Ama, ti nagan ni Jesucristo, kenkuana ken iti naganna ipaneknekko, amen.