Panagtarigagay iti Nasantuan a Banag
Ti panagtarigagay iti nasantuan a banag mapatignaynatayo iti pammati, mapasurot iti awis ti Apo nga agaramid iti naimbag, ket ited Kenkuana ti biagtayo a sipapakumbaba.
Idi ageskuelaak iti elementaria, magnakami nga agawid iti naispalto a riles nga agsikko nga agpababa ken agpangato a bangir ti turod. Adda pay riles, di naispalto, maawagan iti “riles dagiti lallaki.” Ti riles dagiti lallaki ket dalan iti rugit nga agturong iti turod. Ab-ababa daytoy ngem nasangsang-at. Kas maysa nga ubing, ammok a mapagnak ti ania man a riles a mapagna dagiti ubbing a lallaki. Napatpateg, ammok nga agbibiagak iti maudi nga aldaw ket nasken nga aramidek ti naririgat a banag, kas dagiti pioneer—ket agsaganaak. Sagpaminsan, agpapaudiak a magna iti likud dagiti gayyemko iti naispalto a riles, ikkatek ti sapatosko, ket sakasakaak a magna iti riles dagiti lallaki. Padpadasek a patibkeren dagiti sakak.
Kas maysa nga ubing a Primary, dayta ti napanunotko a maaramidko nga agsagana. Itan ammok ti pagdumaan! Imbes a magna a sakasaka iti riles, ammok a maisaganak ti sakak a magna iti dalan ti katulagan babaen ti panangsungbat iti awis ti Espiritu Santo. Ta ti Apo, babaen ti propetana, awaganna ti tunggal maysa kadatayo nga agbiag ken agaywan iti “nangatngato ken nasansantuan a wagas” ken “agaddang iti nangatngato.”1
Dagitoy awag ti propeta nga agtignay, a buyogan ti gagangay a rikna a makaaramidtayo, no dadduma mangparnuay iti unegtayo iti kuna ni Elder Neal A. Maxwell a “panagtarigagay iti naespirituan a banag.”2 Umay ti panagtarigagay iti naespirituan a banag no idiligtayo “aniatayo [iti] no ania ti adda a bilegtayo a pagbalinan.”3 Tunggal maysa kadatayo, no napudnotayo, mariknatayo ti giwang ti nagbaetan ti yan ken no asinotayo, ken sadino ken asino ti kayattayo a pagbalinan. Aggagartayo iti dakdakkel a kabaelan. Kastoy ti riknatayo gapu ta annaknatayo ti Dios, nayanaktayo iti Lawag ni Cristo ngem agnanaed iti natnag a lubong. Inted ti Dios dagitoy a rikna ket agkasapulan iti panagtignay.
Nasken nga awatentayo ti rikna ti panagtarigagay iti naespirituan a banag a mangawag kadatayo iti nangatngato a dalan, bayat ti panangbigbig ken panangliklik iti palso a panagtulad ni Satanas—a makaupay. Daytoy ti napateg a lugar a sigagagar a pangtapuakan pay ni Satanas. Mapilitayo ti magna iti nangatngato a dalan a mangiturong kadatayo a mangsapul iti Dios ken ti kappia ken paraburna, wenno mangngegtayo ni Satanas, a pagkapuyennatayo iti mensahe a ditayto umdas: umdas a nabaknang, nalaing, napintas, ania man a banag. Ti panagtarigagaytayo agbalin a nasantuan—wenno makadadael.
Agtignay iti Pammati
Maysa a wagas a pangisarita iti panagtarigagay iti nasantuan a banag manipud iti palso a panagtulad ni Satanas ket iturongnatayto daytoy iti napudno a tignay. Ti panagtarigagay iti nasantuan a banag saan nga awis nga agtalinaed iti comfort zone, wenno mangiturong iti pannakapaaytayo. Naadalko a no negatibo ti panunotko iti amin a banag a diak, diak dumur-as ket makitak a narigrigat a riknaen ken suroten ti Espiritu.4
Kas agtutubo, naammuan ni Joseph Smith dagiti pagkuranganna ken nagdanag maipapan “ti pagimbagan ti imortal a kararua[na].” Iti balikasna, “Nagbalin a matuokan unay ti panunotko, ta nabaludak iti basbasolko, … ket nagladingitak gapu iti basbasolko ken basbasol ti lubong.”5 Nangiturong kenkuana daytoy iti “panagpanunot iti nauneg ken nalaus a pannakariribuk.”6 Pamiliar kadi daytoy? Mariribukankayo kadi kadagiti pagkuranganyo?
Kinapudnona, adda inaramid ni Joseph. Imburayna, “Masansan a kunak iti bagik: Ania timaaramid?”7 Naggunay ni Joseph iti pammati. Linukibna dagiti nasantuan a kasuratan, binasa ti awis iti Santiago 1:5, ket nagpatulong iti Dios. Ti bunga a parmata ti nangirugi iti Pannakaisubli. Agyamanak a ti panagtarigagay ni Joseph iti nasantuan, ti pannakatikawna, ket nagparegta kenkuana iti napudno a tignay.
Suroten dagiti Pannignay nga Agaramid iti Naimbag
Masansan nga usaren ti lubong ti rikna ti panagtarigagay a kas pambar iti panagpokus iti bagi, panangpanunot iti akin-uneg ken napalabas ken nangruna pay iti no asinoak, no ania’t madi kaniak, no ania ti kayatko. Ti panagtarigagay iti nasatuan a banag ket paregtaennatayo a mangsurot iti pagwadan ti Mangisalakan, a “nagar-aramid iti naimbag.”8 Bayat ti pannagnatayo iti dalan ti kinadisipulo, awatentayo ti naespirituan a pannignay a mangtulong iti dadduma.
Ti estoria a nangngegko adun a tawen ti naglabas ket natulongannak a mangbigbig ken agtignay iti pannignay ti Espiritu Santo. Ni Sister Bonnie Parkin, sigud a Sapasap a Presidente ti Relief Society, imbinglayna ti sumaganad:
“Ni Susan … ket maysa a nalaing a sastre. Agnaed ni President [Spencer W.] Kimball iti ward[na]. Maysa a Domingo, nadlaw ni Susan a nakasuot iti baro nga amerikana. Inggatangan itay nabiit ni tatangna … iti napintas a tela a seda. Napanunot ni Susan a ti tela ti maaramid a napintas a kurbata a katerno ti baro nga amerikana ni President Kimball. Iti Lunes inaraminda ti kurbara. Binungonna daytoy iti papel a tisyu ket impanna iti balay ni President Kimball.
“Iti dalanna a mapan iti sango a ridaw, kellaat a nagsardeng ket napanunotna, ‘Asinoak koma nga agaramid iti kurbata ti propeta? Nalabit nga adu ti kurbatana.’ Impapanna a nagbiddut, isu a nagsublin a pumanaw.
“Naigiddato a linuktan ni Sister Kimball ti ridaw ket kinunana, ‘O, Susan!’
“Nagnerbios ken nabainan, kinuna ni Susan, ‘Nakitak a nakasuot ni President Kimball iti baro nga amerikanana idi Domingo. Inggatangannak ni tatang iti seda idiay New York … ket inyaramidak iti baro a kurbata.’
“Sakbay a maituloy ni Susan, pinagsardeng ni Sister Kimball, iniggamanna ti abagana, ket kunana: ‘Susan, dimo pengdan ti managparabur a panunot.’”9
Magustuak dayta! “Dimo pengdan ti managparabur a panunot.” No dadduma no mariknak ti agaramid iti banag para iti maysa a tao, panunotek no parikna daytoy wenno panunotko laeng. Ngem malagipko, “nadiosan dayta aggapu iti Dios nga awis ken ay-ayo iti kanayon a panagaramid iti nasayaat; ngarud, pagayatan ti Dios ti amin a banag a mangawis ken mangay-ayo nga agaramid iti nasayaat, ken agayat iti Dios, ken agserbi kenkuana.”10
Direktada man a pannignay wenno parikna a tumulong, di masayang ti naimbag nga aramid; gapu ta “ti asi awan pagkamtudanna”11—ken di palso ti sungbat.
Masansan a di nagin-awa ti panagoras, ken manmano nga ammotayo ti epekto ti babassit a tignay ti serbisio. Ngem sagpaminsan, bigbigentayto a nagbalintayo a ramit iti ima ti Dios ket agyamantayto a mangammo a ti Espiritu Santo nga agtrabaho babaen kadatayo ket pangipeksa iti pananganamong ti Dios.
Kakabsat, maidawattayo iti Espiritu Santo nga ipakitana kadatayo “amin a banag a nasken nga aramiden[tayo],”12 nupay napnon ti listaan ti aramidentayo. No matignay, mapanawantayo a di nalpas ti obratayo iti balay wenno itantantayo ti aramid a paileppas ti sabali tapno ibasaantayo ti maysa nga ubing, sarungkaran ti maysa a gayyem, aywanan dagiti annak ti kaarruba, wenno agserbi iti templo. Didak pagbiddutan—agar-aramidak iti listaan; magustuak ti mangkita kadagiti banag. Ngem umay ti talna iti panangammo a tipanagbalin nga ad-adda pay di nasken a maipada iti panagaramid iti ad-adu pay. Ti isusungbat iti panagtarigagay babaen ti panangrisut a mangsurot iti pannignay ket mangbalbaliw iti wagas a panagpanunotko maipapan iti “orasko,” ket makitak ti tao, a di makasinga, ngem ti panggep ti biagko.
Ti Panagtarigagay iti Nasantuan a Banag ket Mangiturong Kadatayo ken Cristo
Ti panagtarigagay iti nasantuan a banag ket mangiturong iti pakumbaba,saan a panangay-ay iti bagi wenno pannakaupay a gapu iti panagikumpara a kanayon a pagkapsutantayo. Umay dagiti natulagan a babbai iti amin a sukat ken sukog; agduduma ti pamiliada, padasda ti biag, ken kasasaadda.
Siempre, agkurangtayo amin iti nadiosan a potensial, ket adda kinapudno iti pannakaamiris a ditayo umdas a datayo laeng. Ngem ti naimbag a damag ti ebanghelio babaen ti parabur ti Dios, nga umdastayo. Iti tulong ti Dios, maaramidtayo ti amin.13 Ikari dagiti nasantuan a kasuratan a “masarakantayto ti parabur a tumulong iti oras ti panagkasapulan.”14
Ti makapasiddaaw a kinapudno a dagiti pagkapsutantayo ket makapagbalinda a bendision no pakumbabaen ken yasidegdatayo ken Cristo.15 Agbalin a nasantuan ti panagtarigagaytayo iti nasantuan a banag no sipapakumbabatayo nga umasideg ken Jesucristo iti kayattayo, imbes nga agkedked gapu iti ay-ay iti bagi.
Kinapudnona, masansan a mangrugi dagiti milagro ni Jesus iti panangbigbig iti kayat, kasapulan, pannakapaay, wenno pagkurangan. Malagipyo dagiti tinapay ken ikan? Saritaen ti tunggal mannurat ti Ebanghelio no kasano a namilagruan a pinakan ni Jesus ti rinibribu a simmurot Kenkuana.16 Ngem mangrugi ti estoria iti panangbigbig dagiti disipulo iti pagkuranganda; naamirisda nga addaanda laeng iti “lima a tinapay a barley, ken dua a babassit nga ikan: ngem ania dagitoy iti kastoy a kaadu ti tattao?”17 Husto dagiti disipulo: awananda iti umdas a taraon, ngem intedda ken Jesus ti adda kadakuada, ket kalpasanna Isu ti nangted iti milagro.
Nariknayo kadin a di umdas dagiti talento ken sagutyo para iti aramid nga agur-uray? Nariknakon. Ngem maitedtayo ti adda kadatayo ken Cristo, ket paaduennanto dagiti aramidtayo. Nasurok nga umdasen ti idatonyo—uray iti kinalupoy ken kinakapsutyo—noagpannuraykayo iti parabur ti Dios.
Kinapudnona tunggal maysa kadatayo ket maysa a henerasion a sumaruno iti Dios— anak ti Dios ti tuggal maysa.18 Ket kas iti inaramidna kadagiti propeta ken kadawyan a lallaki ken babbai iti unos dagiti panawen, panggep ti Ama iti Langit a mangbalbaliw kadatayo.
Inlawlawag ni C. S. Lewis ti pangbalbaliw a bileg iti kastoy a wagas: “Ipapanmo ti bagim a sibibiag a balay. Umay ti Dios a mangbangon manen iti dayta a balay. Iti damo, nalabit, maawatanyo no ania ti ar-aramidenna. Tinarimaanna ti tubo a pagayusan ken pagubuan ti danum iti atep ken dadduma pay; ammoyo a nasken nga aramiden dagita a trabaho ket dikayo masdaaw. Ngem madama a pukpukpokenna iti balay iti wagas a makapasakit unay. … [Kitaenyo,] Isu ket agbangbangon iti balay a maigidiat iti maysa nga impagarupyo. … Napanunotyo a naaramidkayo iti bassit a disente a kalapaw: ngem Isu ket agbangbangon iti palasio. Panggepna ti umay ken agindeg iti daytoy Mismo.”19
Gapu iti pangsubbot a sakripisio ti Apotayo, kabaelantayo nga aramiden dagiti trabaho nga agur-uray. Insuro dagiti propeta bayat ti yuulitayo iti dalan ti kinadisipulo, mapasantotayo babaen ti parabur ni Cristo. Ti panagtarigagay iti nasantuan a banag mapatignaynatayo iti pammati, mapasurot iti awis ti Apo nga agaramid iti naimbag, ket ited Kenkuana ti biagtayo a sipapakumbaba. Iti nagan ni Jesucristo, amen.