Dagiti Babbai ken Panagsursuro iti Ebanghelio iti Pagtaengan
Ti Mangisalakan ti naan-anay a pagwadanyo no kasano nga akmenyonto ti dakkel a paset iti aramidna a mangikabil iti dakdakkel a panangyunay-unay iti panagsursuro iti ebanghelio iti pagtaengan.
Patpatgek a kakabsatko a babbai, nakaskasdaaw a maam-ammokayo. Daytoy ti naragsak a kanito iti Ti Simbaan ni Jesucristo dagiti Santo iti Ud-udina nga Aldaw. Ibukbukbok ti Apo ti pannakaammo iti Simbaanna kas inkarina nga aramidenna.
Malagipyo no ania ti kinunana: “Kasano ti kapaut ti panagtalinaed a narugit ti agay-ayus a danum? Anianto a bileg ti agtalinaed iti langit? Kas iti panangitag-ay ti tao iti nakapsut nga imana a mamagsardeng iti naikudi a pagturongan ti karayan ti Missouri, wenno mamagsubli iti agus, a kas iti panangtubeng ti Mannakabalin a mangibukbok iti pannakaammo manipud iti langit iti ulo dagiti Santo iti Ud-udina nga Aldaw.”1
Paset ti agdama panangibinglay ti Apo iti pannakaammo ket mainaig iti panangpadaras iti panangibukbokna iti agnanayon a kinapudno iti ulo ken puso dagiti taona. Inlawlawagna nga addanto napateg a papel nga akmen dagiti babbai nga annak ti Nailangitan nga Ama iti dayta a namilagruan a a panangpadaras. Maysa a pakakitaan ti milagro ket ti panangiturongna iti sibibiag a propetana nga ad-adda a mangyunay-unay a mangisuro iti ebanghelio iti pagtaengan ken iti ikub ti pamilia.
Masaludsodyo, “Kasano a mapagbalinna dagiti napudno a kakabsat a babbai a napateg a puersa a mangtulong iti Apo a mangibukbok iti pannakaammo kadagiti Santona?” Sungbatan ti Apo iti “Ti Kaamaan: Maysa a Waragawag iti Lubong.” Lagipenyo dagiti balikas, ngem makitayo ti baro a kaipapanan ken mabigbigyo a nasirmata ti Apo dagitoy naragsak a panagbalbaliw, a mapaspasamak itan. Iti waragawag, binilinna dagiti kabsat a babbai nga agbalin kangrunaan a mannursuro iti ebanghelio iti pamilia kadagitoy a balikas: “Dagiti inna ti kangrunaan nga akinrebbeng a mangaywan kadagiti annakda.”2 Iraman daytoy ti panangpatanor iti kinapudno ken pannakaammo iti ebanghelio.
Ituloy ti waragawag: Pagrebbengan dagiti amma ken inna nga agtinnulong iti tunggal maysa a kas agkadua nga agpada.”3 Agkaduada nga agpada, iti potensialda iti naespirituan a panagdur-as ken pananggun-od iti pannakaammo, ket iti kasta agkaykaysada babaen ti panagtinnulongda. Agpadada iti nadiosan a pagtungpalanda a maitan-ok a sangkamaysa. Kinapudnona, saan a maitan-ok dagiti lallaki ken babbai nga agmaymaysa.
Ngarud, apay ti babai nga anak ti Dios iti nagkaykaysa ken agkapada a relasion ket awatenna ti napateg a pagrebbengan a mataraonan iti kapatgan a nutrient a nasken nga awaten ti amin, maysa a pannakaammo iti kinapudno manipud iti langit? Segun iti panagawatko, daytan ti wagas ti Apo manipud pay idi naparsua dagiti pamilia ditoy lubong.
Kas pagarigan, ni Eva ti immawat iti pannakaammo a kinasapulan ni Adan tapno mangan iti bunga ti kayo ti pannakaammo tapno matungpalda ti amin a bilin ti Dios ken mangbukel iti pamilia. Diak ammo no apay nga immuna nga immay ken ni Eva, ngem naan-anay a nagkaykaysan da Adan ken Eva idi maibukbok iti pannakaammo ken ni Adan.
Maysa pay a pagarigan ti panangusar ti Apo iti panangpatanor iti sagut dagiti babbai ket ti wagas a panangpapigsana kadagiti lallaki nga annak ni Helaman. Nasagid ti riknak idi basaek ti pakasaritaan ket nalagipko dagiti naulimek a manginamnama a balikas ti inak idi panawak ti balaymi a mapan iti military service.
Inrekord ni Helaman:
“Insuro ida dagiti innada, a no saanda nga agduadua, isalakan ida ti Dios.
“Ket inulitda kaniak dagiti balikas dagiti innada, a kinunada: Saankami nga agduadua nga ammo dagiti innami daytoy.”4
Idinto a diak ammo ti amin a rason ti Apo iti panangtedna iti napateg a pagrebbengan a panangaywan iti pamilia kadagiti napupudno a kabsat a babbai, patiek nga adda pakainaiganna iti kabaelanyo nga agayat. Kasapulanna ti dakkel nga ayat a mangrikna iti kasapulan ti maysa a tao nga ad-adda ngem iti bukodyo. Dayta ti natarnaw nga ayat ni Cristo para iti tao nga aywananyo. Umay dayta a rikna ti ayat manipud iti tao a napili nga agay-aywan a naikari para kadagiti epekto ti Pannubbot ni Jesucristo. Ti pagsasao ti Relief Society, nga impagwadan ti inak, a kasla naparegta kaniak: “Ti Asi Awan Pagkamtudanna.”
Kas babbai nga annak ti Dios, addaankayo iti gagangay ken dakkel a kabaelan a mangrikna iti kasapulan dagiti dadduma ken agayat. Kas bungana, dayta ti ad-adda a mamagrikna kadakayo kadagiti arasaas ti Espiritu. Maiwanwannakayo ti Espiritu no ania ti panunotenyo, ania ti saoyo, ken ania ti aramidenyo a mangaywan kadagiti tattao tapno maibukbok ti Apo ti pannakaammo, kinapudno, ken tured kadakuada.
Addakayo a kakabsat a babbai a dumdumngeg iti timekko iti naidumduma a lugar iti panagdaliasatyo iti biag. Adda dagiti agtutubo a babbai iti sapasap a sesion ti young women iti umuna a gundaway. Adda dagiti agtutubo a babbai nga agsagsagana nga agbalin nga agay-aywan a kayat ti Dios kadakuada. Adda dagiti apagkallaysa nga awan pay annakda; ken dagiti ubbing nga inna nga addaan iti maysa nga anak wenno ad-adu pay. Adda dagiti inna dagiti agtutubo ken adda dagiti annakda iti mision. Adda dagiti adda annakda a kimmapuyen iti pammati ken adayo iti pagtaengan. Adda dagiti agbibiag nga agmaymaysa nga awan napudno a kaduada. Lelang ti dadduma pay.
Nupay kasta, ania man ti kasasaadyo, pasetkayo—napateg a paset—ti pamilia ti Dios ken ti pamiliayo, iti man masakbayan, ditoy a lubong, wenno iti lubong ti espiritu. Rebbengenyo iti Dios ti mangaywan iti adu a miembro ti pamiliana ken pamiliayo agingga a kabaelanyo babaen iti ayat ken pammatiyo ken ni Apo Jesucristo.
Gagangay a karityo nga ammuen no asino ti aywanan, kasano, ken kaano. Kasapulanyo ti tulong ti Apo. Ammona ti puso dagiti dadduma, ken ammona no nakasaganada nga umawat iti panangaywanyo. Ti kararagyo ti pammati ti tulbekyo iti balligi. Makapagpannuraykayo iti yaawatyo iti pannarabayna.
Intedna daytoy a pammaregta: “Agdawatkayo iti Ama iti naganko iti pammati, a sipapammati nga umawatkayonto, ken magun-odyonto ti Espiritu Santo, a mangipakita iti amin a banag a maikanada.”5
Mainayon iti kararag, ti napasnek a panagadal iti nasantuan a kasuratan ket pasetto ti dumakdakkel a bilegyo a mangaywan. Daytoy ti kari: “Diyo met isaksakbay a panunoten ti sawenyonto; ngem italimengyo iti panunotyo a naynay dagiti balikas ti biag, ket maitedto kadakayo iti umno nga oras dayta bingay a maisangratto iti tunggal tao.”6
Ngarud mangtedkayto iti ad-adu pay nga oras nga agkararag, agusig, ken agutob maipapan iti naespirituan a bambanag. Maaddaankayonto iti pannakaammo iti kinapudno a maibukbok kadakayo ken dumur-as iti bilegyo a mangaywan iti pamiliayo.
Addanto panawen a mariknayo a nabuntog ti panagdur-asyo iti panagadal no kasano ti agaywan a nasaysayaat. Agkasapulanto iti pammati nga agibtur. Inikkannakayo ti Mangisalakan itoy a pammaregta:
“Gapuna, saankayo koma a mabannog nga agaramid iti nasayaat, ta isagsaganayo ti pamuon ti naindaklan nga aramid. Ket agtaud iti babassit a banag dagiti dadakkel a banag.
“Adtoy, kalikaguman ti Apo ti puso ken ti natallugod a panunot; ken ti natallugod ken natulnog manganto iti nasayaat iti daga ti Zion kadagitoy maudi nga aldaw.”7
Ti kaaddayo ita a sardam ket pakakitaan a siaayatkayo nga umawat iti awis ti Apo nga agaywan kadagiti dadduma. Pudno dayta uray iti kaubingan ditoy ita a sardam. Maammuanyo no asino ti aywanan iti pamiliayo. No agkararagkayo a naimpusuan, mapanunotyonto ti maysa a nagan wenno langana. No agkararagkayo a mangammo no ania ti aramiden wenno sawenyo, mariknayonto ti sungbat. Tunggal agtungpalkayo, dumakkelto ti bilegyo nga agaywan. Agsaganakayonto para ti aldaw a panangaywanyo kadagiti bukodyo nga annak.
Makapagkararag dagiti inna dagiti agtutubo tapno ammuen no kasano ti mangaywan iti anak a kasla di kayat a paaywanan. Makapagkararagkayo tapno ammuen no asino ti addaan iti naespirituan nga impluensia a kasapulan ken awaten ti anakyo. Denggen ken sungbatan ti Dios dagiti kasta a naimpusuan a kararag dagiti inna, ket mangted Isuna iti tulong.
Kasta met a marikna ti maysa a lelang ditoy ita ti sakit ti ulo a gapuanan ti rigrigat dagiti annak ken appokona. Makaalakayo ti tured ken panangiturong manipud iti padpadas dagiti pamilia iti nasantuan a kasuratan.
Manipud iti panawen da Eva ken Adan, babaen ti Ama nga Israel, ken iti tunggal pamilia iti Libro ni Mormon, adda maysa a masinunuo nga adalen maipapan no ania ti aramiden maipapan kadagiti ladingit dagiti saan nga agpaaywan nga annak: agtultuloy nga agayat.
Addaantayo iti makaparegta a pagwadan ti Mangisalakan idi taraonanna dagiti nasukir nga espiritu nga annak ti Nailangitan nga Amana. Uray no datayo ti gapu ti saem, nakatanggaya latta ti ima ti Mangisalakan.8 Insaritana iti 3 Nephi maipapan kadagiti naespirituan a kakabsatna, nga inkarigatanna ngem napaay a nangpatanor: “O dakayo a tao … nga adda iti balay ti Israel, no kasano ti panangummongko kenka kas iti panangummong ti pamusian kadagiti piekna iti sirok dagiti payakna, ket tinarakenkayo.”9
Para kadagiti kakabsat a babbai iti tunggal addang iti panagdaliasat ti biag, tunggal situasion ti pamilia, ken tunggal kultura, ti Apo ti naan-anay a pagwadan no kasano nga akmenyo ti kapatgan nga akem iti tignayna a mangyunay-unay nga ad-adda pay iti ebanghelio iti pagtaengan ken pamilia.
Mayegyonto ti nakaisigudan a riknayo iti ayat iti panagbaliw kadagiti aktibidad ken aramiden iti pamiliayo. Daytanto ti mangyeg iti dakdakkel a naespirituan a panagdur-as. No makipagkararagkayo ken ikararaganyo dagiti miembro ti pamilia, mariknayonto ti ayatyo ken ti ayat ti Mangisalakan para kadakuada. Agbalinto dayta nga ad-adda pay a naespirituan a sagutyo no sapulenyo daytoy. Mariknanto dagiti miembro ti pamiliayo daytoy no agkararagkayo nga addaan dakdakkel a pammati.
No aguummong ti pamilia a mangbasa kadagiti nasantuan a kasuratan iti napigsa, nalpasyon a nabasa dagitoy ken inkararaganyon dagitoy a mangisagana iti bagiyo. Makitayon dagiti kanito tapno ikararaganyo ti Espiritu a manglawag iti panunotyo. Kalpasanna, no gundawayyon ti agbasa, marikna dagiti miembro ti pamilia ti ayat iti Dios ken ti balikasna. Isudanto ti aywananna ken ti Espirituna.
Dumteng ti kasta met la a panangibukbok iti ania man a panaguummong ti pamilia no ikararagan ken planuenyo. Agkasapulan iti aramid ken oras, ngem mangyegto daytoy iti milagro. Malagipko ti leksion nga insuro ti inak idi ubingak. Makitak pay laeng iti isipko ti dekolor a mapa nga inaramidna maipapan iti panagdaliasat ni Apostol Pablo. Kasano ngata a naaddaan isuna iti oras ken pigsa a nagaramid iti dayta. Agingga itoy nga aldaw naparaburannak iti ayatna iti dayta napudno nga Apostol.
Makitayonto dagiti wagas a pakatulongan a mangibukbok iti kinapudno iti pamiliayo iti naisubli a Simbaan ti Apo. Agkararag, agadal, ken agutob ti tunggal maysa kadakayo tapno ammuen ti naidumduma a tulongyo. Ngem ammok daytoy: tunggal maysa kadakayo, nga agpapada a naisangol kadagiti lallaki nga annak ti Dios, ket agbalinto a kangrunaan a paset ti maysa a milagro ti panagadal ken panagbiag iti ebanghelio a mangpadarasto iti pannakaummong ti Israel ken mangisagananto iti pamilia ti Dios para ti nadayag a panagsubli ni Apo Jesucristo. Iti sagrado a nagan ni Jesucristo, amen.