Ti Rag-o ti Managparabur a Panagserbi
Inkaritayon iti Amatayo iti Langit nga agserbitayto Kenkuana ken ti dadduma iti ayat ken aramiden ti pagayatanna iti amin a banag.
Kalpasan ti naudi a sapasap a komperensia, adu ti immasideg kaniak a maymaysa ti saludsodda: “Komportable kadi dagita a tugaw?” Maymaysa ti kanayon a sungbatko: “Komportable unay dagita a tugaw no dimo nasken ti agsarita.” Pudno, di kadi? Komportable ti tugawko iti daytoy a komperensia, ngem pudno nga agyamanak iti bendision ken ti dayaw a panagsaritak kadakayo itoy a sardam.
No dadduma, no agserbitayo, agduduma dagiti tugawtayo. Adda nagin-awa ken adda saan ngem inkaritayo iti Amatayo iti Langit nga agserbitayonto Kenkuana ken iti dadduma nga addaan iti ayat ken aramidentayo ti pagayatanna iti amin a banag.
Kalpasan ti sumagmamano a tawen, naadal dagiti agtutubo iti Simbaan a “no ‘sumrek[kayo] nga agserbi iti Dios’ [Doktrina ken Katulagan 4:2], kumappengkayo iti kadakkelan a panagdaliasat. Tultulonganyo ti Dios a mangpadaras iti aramidna, ken naindaklan, narag-o, ken datdatlag a padas daytoy.”1 Daytoy ti panagdaliasat a sidadaan iti amin—ti ania man nga edad—ken panagdaliasat pay a mangiturong iti insao ti patpatgentayo a propeta a “dalan iti katulagan.”2
Nupay kasta, daksanggasat ta agindegtayo iti lubong a pagkunaan a kanayon ti tao, “Ania ti adda ditoy para kaniak?” imbes a a saludsoden ti, “Asino ti matulongak ita?” wenno “Kasano a makapagserbiak a nasaysayaat iti Apo iti pagrebbengak?”
Napintas a pagwadan iti biagko ti managparabur a panagserbi ni Sister Victoria Antonietti. Ni Victoria ti maysa kadagiti Primary teacher iti branchko idi dumakdakkelak iti Argentina. Tunggal malem ti Martes, no agguummongkami iti Primary, itugotannakami iti chocolate cake. Magustuan ti amin ti cake—siempre amin malaksid kaniak. Diak kayat ti chocolate cake! Nupay kayatna nga ibinglayannak iti cake, kanayon a diak inawat ti intedna.
Maysa nga aldaw kalpasan nga imbinglayna ti chocolate cake iti dadduma pay nga ubbing, dinamagko, “Apay a dinak ikkan iti sabali a flavor—kas iti orange wenno vanilla?”
Kalpasan a nagkatawa bassit, dinamagna kaniak, “Apay dimo koma ramanan uray sangkabassit laeng? Naaramid daytoy a cake iti espesial nga ingridiente, ket ikarik a no ramanam daytoy, magustuam la ketdi!”
Kinitak ti aglawlaw, ket iti siddaawko, kasla magustuanda amin ti cake. Pinadasko a ramanan daytoy. Mapugtuanyo kadi ti napasamak? Nagustuak daytoy!” Dayta ti damo a gundaway a nagustuak ti chocolate cake.
Kalpasan ti adu a tawen a natakuatak ti sekreto nga ingridiente iti chocolate cake ni Sister Antonietti. Linawaskami kadagiti annakko a simmarungkar iti inak. Iti maysa kadagitoy nga isasarungkar, mangmangankami ken Nanang iti sangaiwa a chocolate cake, ket insaritak kenkuana no kasano a nagustuak ti cake idi damo. Kalpasanna inlawlawagna kaniak ti nabati pay a paset ti estoria.
“Ammom, Cris,” kuna ti inak, “awan umdas a kinabaknang ni Victoria ken ti pamiliana, ket linawas a nasken a pumili no agbayad iti bus a mangipan kenkuana ken dagiti uppat nga annakna iti Primary wenno aggatang iti ingridiente a pagaramidna iti chocolate cake para iti klasena iti Primary. Kanayon a pilienna ti chocolate cake ngem ti aglugan iti bus, pagnaenda nga aggiina ti nasurok a 3 kilometro a mapan ken agawid, ania man ti tiempo.”
Dayta nga aldaw nabigbigko ti pateg ti chocolate cake-na. Ti napatpateg, naadalko a ti sekreto ti chocolate cake ni Victoria ket ti ayatna kadagiti pagserbianna ken ti managparabur a sakripisiona para kadakami.
Ti pananglagip iti cake ni Victoria ti mangtulong kaniak a manglagip iti managparabur a sakripisio kadagiti agnanayon nga adalen nga insuro ti Apo kadagiti disipulona idi napan iti pagidulinan ti templo. Ammoyo ti estoria. Insuro ni Elder James E. Talmage nga adda 13 a kahon, “ket ditoy nga itinnag dagiti tao ti datonda para iti [sabali] a panggep nga impakita [dagiti] kitikit kadagiti kahon.” Nakita ni Jesus dagiti nakapila nga agidonar, a buklen ti agduduma a kita ti tao. Adda nangted iti sagutda nga addaan iti “napudno a panggep” idinto a nangted dagiti dadduma iti “nawadwad a pirak ken balitok,” a mangnamnama a makita, madlaw, ken madayawda kadagiti abuloyda.
“Maibilang iti adu ti maysa a napanglaw a balo a babai, a nangipisok iti maysa a pagidulinan iti dua a babassit a sensilio a tanso a maawagan iti blancas; agdagup ti datonna iti nakurang a gudua ti sentabo iti kuarta ti Ameirika. Inayaban ti Apo dagiti disipulona, inturongna ti imatangda iti napanglaw a balo a babai ken ti inaramidna, ket kinunana: ‘Pudno kunak kadakayo, a daytoy balo a babai a napanglaw ad-adda ti impisokna ngem iti impisok ti amin a sabsabali: Ta isuda amin nangipisokda iti tiddada; ngem daytoy babai iti kinapanglawna, inkabilna ti amin nga adda kenkuana, ken amin a pagtaraonna’ [Marcos 12:43–44].”3
Awan makita a tengngel ti balo a babai a saadna iti gimong iti panawenna. Tengngelna ti napatpateg a banag: nadalus ti panggepna, ket intedna ti amin a kukuana. Nalabit a nangted isuna iti basbassit ngem dagiti dadduma, naul-ulimek ngem dagiti dadduma, ken naisabsabali ngem dagiti dadduma. Iti imatang ti adu, awan pateg ti intedna, ngem iti imatang ti Mangisalakan, ti “mannakaawat iti panunot ken panggep ti puso,”4 intedna ti aminna.
Kakabsat, it-itedtayo kadi ti amintayo iti Apo nga awan ti kondision? Isakripisiotayo kadi ti oras ken talentotayo tapno masursuro ti tumantanor a kaputotan nga ayatenda ti Apo ken tungpalenda dagiti bilinna? Napasnektayo kadi nga agserbi iti adda iti aglawlawtayo ken naidutok nga aywanantayo—mangisakripisio iti oras ken pigsatayo a mausar kadagiti sabali a wagas? Tungtungpalentayo kadi ti dua a naindaklan a bilin—ayaten ti Dios ken ayaten dagiti annakna?5 Masansan a maipakita dayta ayat kas panagserbi.
Insuro ni President Dallin H. Oaks: “Inted ti Mangisalakan ti Bagina iti managparabur a panagserbi. Insurona a nasken a sumurottayo Kenkuana babaen ti panangtallikud iti bagitayo iti managimbubukod nga interes tapno agserbi iti dadduma.”
Intuloyna:
“Maysa a pagarigan ti panangpukaw iti bagitayo iti serbisio ti dadduma … ti sakripisio dagiti nagannak para kadagiti annakda. Sagabaen dagiti inna ti saem ken pannakapukaw dagiti bukod nga ipangpangruna ken gin-awa tapno agpasngay ken agpadakkel iti tunggal ubing. Ibagay dagiti amma ti biagda ken ipangpangruna a mangsuporta iti maysa a pamlia. …
“… Maragsakantayo met kadagiti agaywan kadagiti adda pagkuranganna a miembro ti pamilia ken baketen wenno lakayen a nagannak. Awan ditoy a serbisio ti agdamag, ania ditoy ti para kaniak? Agkasapulan amin daytoy iti panangipakni iti bukod a pagimbagan para iti managparabur a serbisio. …
“[Ket] ipakita amin daytoy ti agnanayon a prinsipio a naragragsaktayo ken napnapnektayo no agtignay ken agserbitayo no ania ti maitedtayo, saan a no ania ti maalatayo.
“Isuronatayo ti Apo a sumurot Kenkuana babaen ti panagsakripisio a kasapulan iti panangpukaw iti bagitayo iti managparabur a panagserbi iti dadduma.”6
Insuro met ni President Thomas S. Monson a “nalabit nga inton sumangotayo iti Namarsuatayo, saantayto a mapagsaludsodan iti, ‘Mano a saad ti natengngelmo?’ ngem ketdi, ‘Mano a tao ti natulongam?’ Kinapudnona, saanmo a pulos kabaelan nga ayaten ti Apo agingga a dika agserbi Kenkuana babaen ti panangserbim kadagiti tattaona.”7
Iti sabali a sao, kakabsat, di nasken no nagtugawtayo iti komportable a tugaw wenno nangikarigatan a nangileppas iti miting iti aglatlati a folding chair iti likud. Saanto a nasken a datayo, nga agkasapulan, nagaddangtayo a mangliwliwa iti agsangsangit nga ubing. Ti nasken ket immaytayo nga addaan tarigagay nga agserbi, a nakitatayo dagiti tao pagserbiantayo ken nakablaawan ida a siararagsak, ken inyam-ammotayo ti bagitayo kadagiti imbinglayantayo iti folding chair—tumultulong iti pannakigayyem nupay dida naidutok kadatayo a pagserbiantayo. Ket pudno a napateg nga aramidentayo ti amin nga addaan iti espesial nga ingridiente ti serbisio a natibnokan iti ayat ken sakripisio.
Naammuak a saan a nasken nga agaramidtayo iti chocolate cake tapno agbalin a naballigian wenno napasnek a Primary teacher, gapu ta saan a maipanggep iti cake daytoy. Ayat ti adda iti likudan ti tignay.
Paneknekak a naaramid a sagrado ti ayat babaen ti sakripisio—ti sakripisio ti mannursuro babaen ti kangrunaan ken agnanayon a sakripisio ti Anak ti Dios. Paneknekak a Sibibiag Isuna! Ay-ayatek ken kayatko nga ikkaten ti managimbubukod a tarigagay nga agayat ken agserbi a kas inaramidna. Iti nagan ni Jesucristo, amen.