Panglukat a Sarita
Panawenen para iti Simbaan a naisentro iti pagtaengan, a danggayan ti mapaspasamak kadagiti pasdek iti branch, ward, ken stake.
Patpatgek a kakabsatko, pinadpadaananmi daytoy a panagtitipon kadakayo manen ita nga Oktubre ti sapasap a komperensia ti Simbaan. Yawatmi ti naimpusuan a pammasangbaymi kadakayo amin. Agyamankami unay kadagiti mangtultulong a kararagyo. Mariknami ti kinasamay dagitoy. Agyamanak!
Agyamankami kadagiti awan umartap a kinapasnekyo a mangsurot iti balakad a naited ti sapasap a komperensia iti napalabas nga innem a bulan. Inuray dagiti panguluen ti stake iti intero a lubong ti paltiing a napateg a mangbukel kadagiti elders quorum. Agtrabaho a sipapasnek dagiti lallaki iti dayta a korum ken dagiti nagaget kakabsat iti Relief Society nga agminister kadagiti kakabsat iti nangatngato, nasansantuan a wagas. Natignaykami babaen ti kinaimbag ken naisangayan nga aramidyo a mangidanon iti ayat ti Mangisalakan kadagiti pamiliayo, kaarrubayo, ken gagayyem nga agminister kadakuada segun iti pagayatanna.
Manipud iti komperensia idi Abril, sinarungkaranmi ken ni Sister Nelson dagiti miembro iti uppat a kontinente ken dagiti isla ti baybay. Manipud Jerusalem Harare, manipud Winnipeg agingga iti Bangkok, nariknami ti naindaklan a pammatiyo ken tibker ti pammaneknekyo.
Naglapusanan ti ragsakmi iti bilang dagiti agtutuboyo a timmipon iti batalion dagiti agtutubo ti Apo a tumulong a mangummong iti Israel.1 Agyamankami kadakayo! Iti panangitultuloyyo a mangsurot iti awisko a naidiaya iti sangalubongan a debosion dagiti agtutubo, mangipakpakitakayo iti pagbasaran a suroten ti amin kadakami. Ket anian a pannakaiduma ti ar-aramidenyo nga agtutubo! Ket anian a pannakaidumduma ti ar-aramidenyo nga agtutubo!
Kadagiti kallabes a tawen, dakami iti mangimaton a konseho ti Simbaan nagsasaritaanmi ti pangrugian a saludsod: kasano a maidanonmi ti ebanghelio iti kalawagan a katarnawan, ken dagiti ordinansa iti agnanayon a kinasamayda, iti amin nga annak ti Dios?
Kas Santo iti Ud-udina nga Aldaw, nairuamtayo a mangpanunot iti “simbaan” kas maysa a banag a mapasamak kadagiti meetinghousetayo, a danggayan ti mapaspasamak iti pagtaengantayo. Masapul a baliwantayo daytoy a pagtuladan. Panawenen nga aramidentayo a balay ti Simbaan, a danggayan ti mapaspasamak iti pasdek ti branch, ward, ken stake.
Bayat ti agtultuloy a panagsaknap ti Simbaan iti lubong, adu a miembro ti agbibiag iti lugar nga awan ti kapilia—ket mabalin a saan nga agnanayon a kasta. Malagipko ti pamilia, a, gapu iti kasta a parikut, masapul nga agmimitingda iti balayda. Dinamagko iti ina no kasano ti ayatna a mapan iti simbaan iti mismo balayna. Insungbatna, “Magustuak! Nasaysayaaten ti lengguahe ni lakayko ita, ta ammona a beendisionanna ti sakramento iti tunggal Domingo.”
Ti nabayagen a panggep ti Simbaan isu ti itutulong kadagiti amin a miembro a mangpatibker iti pammatida iti Apotayo a Jesucristo ken ti Pannubbotna, a mangtulong kadakuada a mangipatungpal iti katulaganda iti Dios, ken mangpatibker ken manglantip iti pamiliada. Iti kastoy a karikut ti lubong ita, saan a nalaka daytoy. Pumigpigsa ti idadarup ti kabusor iti pammati ken kadatayo ken iti pamiliatayo iti naparpardas ken naparpardas pay. Tapno makalung-aw a naespirituan, masapultayo ti pangbalusingsing ken baro a plano. Gapu itoy, kayatmi itan nga urnosen dagiti panagbalbaliw iti panangbukel nga agtultuloy a mangpatibkerto kadagiti miembrotayo ken ti pamiliada.
Iti adun a tawen, isagsagana dagiti lider ti Simbaan ti napagkaysa a kurikulum a pangpatibker kadagiti pamilia ken tunggal maysa babaen ti plano a maisentro iti pagtaengan ken suporta ti Simbaan a mangadal iti doktrina, mangpatibker iti pammati, ken mangparegta iti dakdakkel a bukod a panagdayaw. Dagiti panagkagumaanmi kadagiti napalabas a tawen a mangpasanto iti Sabbath—a mamagbalin a nakaay-ayat daytoy ken bukod a tanda ti Dios iti ayattayo Kenkuana—mapasayaatto babaen dagiti panagbalbaliw a yam-ammomi ita.
Ita nga agsapa ipakdaarmi ti baro a balanse ken koneksion it nagbaetan ti panangisuro iti ebanghelio iti pagtaengan ken iti Simbaan. Pagrebbengantayo amin para iti naespirituan a panagdur-astayo. Ket nalawag iti nasantuan a kasuratan nga adda kangrunaan a pagrebbengan dagiti nagannak a mangisuro iti doktrina kadagiti annakda.2 Pagrebbengan ti Simbaan a tarabayen ti tunggal miembro iti nadiosan a panggep a tun-oyen a mangpadakkel iti pannakaammona iti ebanghelio.
Ilawlawag ita ni Elder Quentin L. Cook dagitoy napateg a panagbalbaliw. Amin a miembro ti Konseho ti Umuna a Panguluen ken ti Korum dagiti Sangapulo-ket-dua nga Apostol ket nagkaykaysaanda a nanganamong iti daytoy a mensahe. Siyayaman a bigbigenmi ti pammaregta manipud ti Apo a nangimpluensia iti panagdur-as dagiti plano ken pagsurotan nga idatag ni Elder Cook.
Patpatgek a kakabsatko, ammok a sibibiag ti Dios! Ni Jesus ti Cristo. Daytoy ti Simbaanna nga iturongna babaen ti pammadto ken paltiing kadagiti napakumbaba a katulonganna. Paneknekak iti nagan ni Jesucristo, amen.