Ti Temtemtayo iti Pammati
Kadagiti mangsapul, mamalubos, agtungpal, iti panaglawag ti pammati, no dadduma, in-inut nga umay wenno makapagsubli.
Patpatgek a kakabsat, saan kadi a nakaskasdaaw ti panangawat iti agtultuloy a paltiing ti langit babaen ken ni Presidente Russell M. Nelson ken kadagiti lider ti Simbaan a mangawis kadatayo nga agbiag iti baro ken nasansantuan a wagas,1 iti pagtaengan ken iti simbaan, iti amin a puso, panunot, ken pigsatayo?
Naaddaankayo kadin iti gundaway a mangaramid iti ipagarupyo a saankayo a nakasagana wenno addaankayo iti pagkurangan ngem napagasatankayo a nangpadas?
Naaddaanakon. Daytoy ti maysa a pagarigan.
Kalpasan ti sumagmamanon a tawen, siaayat nga inyawis ni Elder Richard G. Scott, miembro ti Korum ti Sangapulo-ket-dua nga Apostol, “Gerrit, kayatmo ti maki-watercolor kaniak?”
Imbaga ni Elder Scott a makatulong kenkuana ti panagpinta nga agpaliiw ken agpartuat. Insuratna: “Padasem ti agpartuat, uray no saan a makaay-ayo ti banagna. … Makaparnuay ti panagpartuat iti rikna a panagyaman iti biag ken no ania ti inyabel ti Apo iti kinataom. … No nasayaat ti pilim, saan a masapul nga adu ti panawenmo.”2
Inladawan ni Presidente Henry B. Eyring ti kabaelanna iti arte a mangriing “iti rikna a mangipateg,” a karaman “ti ayat ti Namarsua a mangnamnama nga agbalin dagiti Annakna a kas Kenkuana—nga agpartuat ken agbangon.”3 Dagiti obra iti panangpartuat ni Presidente Eyring ket mangted iti “naidumduma, naespirituan a pannirigan iti pammaneknek iti pammati.”4
Iladawan dagiti aramid ni Presidente Boyd K. Packer iti arte a pangrugian iti mensahe iti ebanghelio: “Ti Dios ti Namarsua iti langit ken iti daga ken amin a banag a linaonda, nga amin a naparsua addaan pammaneknek iti dayta nadiosan a panagparsua, ken addaan iti naan-anay a panagkaysa ti nakaparsuaan, siensia, ken ti ebanghelio ni Jesucristo.”5
Impaneknek ni Alma, “Ipakita ti amin a banag nga adda Dios.”6 Kantaen dagiti ubbing iti Primary, “Tunggal mangngegko ti kanta ti billit wenno kumita iti asul a langit, … Agyamanak ta agbibiagak ditoy napintas a lubong a pinarsua ti Nailangitan nga Ama para kaniak.”7 Inlawlawag ni awtor a Victor Hugo ti milagro a relasion dagiti nabiag ken banag iti daytoy di makabannog, manipud iti init agingga iti aplat. … Amin a billit nga agtayab addaan linabag ti kinaagnanayon kadagiti kukoda. … ti rissik ti bunton dagiti bituen.”8
Ket dayta ti mangisubli kadatayo iti awis ni Elder Richard G. Scott.
“Elder Scott,” insungbatko, “Kayatko ti agbalin a managpaliiw ken agpartuat. Maayatanak a makasirmata iti impinta ti Nailangitan nga Ama a nabengbeng nga ulep ken ladawan ti langit ken danum. Ngem,” napaulimekak, “Elder Scott,” kinunak, “diak ammo ti agpinta. Maamakak amangan no mapaayka a mangisuro kaniak.”
Immisem ni Elder Scott ket intulagna ti panagkitami. Iti naituding nga aldaw, insaganana ti papel, pinta, ken brutsa. Nangyuged iti linia ken binabasana ti papel para kaniak.
Inusarmi a modelo ti napintas a pintana a napauluan iti Temtem iti Ilelennek ti Init. Bayat ti panagpintami, nagsarsaritaanmi maipapan iti pammati—no kasano bayat ti panangsangomi iti bara ti temtem, dimi inkaskaso ti sipnget ken panagduadua—no kasano, atiddog no dadduma, naliday a rabii, ti temtem ti pammati mangted namnama ken pammatalged. Ket dimteng ti bannawag. Ti temtem ti pammatimi—ti lagipmi, padpadas, ken tawid ti pammati iti kinaimbag ken kinamanangngaasi ti Dios iti biagmi—napatibker bayat ti nagpatnag.
Ti pammaneknekko, kadagiti agsapul, palubosanyo, awatenyo, ti agsapa ti pammati, no dadduma, in-inut, nga umay wenno makapagsubli. Dumteng ti lawag, no tarigagayan ken sapulentayo, no naanustayo ken natulnog iti bilin ti Dios, no sisasaganatayo iti kaasi, bang-ar, ken katulagan ti Dios.
Iti panangrugimi nga agpinta, impatalged ni Elder Scott, “Gerrit, uray no maysa la nga adal ti ipintam, maysa a banag a kayatmo nga agtalinaed ken malaglagipmo.” Agpayso ti kinunana. Impategko ti temtem a pinta ni Elder Scott a nangtulong kaniak nga agpinta. Ti kabaelak kas artista nagtalinaed a limitado, ngem ti pakalaglagipan ti temtem ti pammati maparegtanatayo iti lima a wagas.
Umuna, maparegtanatayo ti temtem ti pammati a mangsapul iti rag-o iti makaay-ayo a panagpartuat
Adda rag-o iti panagarapaap, adal, panagaramid iti napateg a banag. Pudno unay daytoy iti panangpasikentayo iti pammati ken talek iti Nailangitan nga Ama ken ti Anakna, ni Jesucristo. Di umanay nga ipategtayo ti bagitayo tapno maisalakantayo. Ngem ipatpategnatayo unay ti Nailangitan nga Ama ken am-ammonatayo unay ad-adda ngem iti pannakaam-ammotayo iti bagitayo. Matalektayo ti Apo ngem ditay makapagsadag iti bukodtayo a pannakaawat.9
Siksika kadi laeng ti saan a naawis iti maysa a nagkasangay?
Napadasamon ti naudi a napili, wenno saan a napili, idi mabukel ti grupo?
Nagsaganaka kadi iti eksamen iti eskuela, iti mapalutpot para iti trabaho, iti gundaway a talaga a kayatmo—ket nariknam ti pannakapaay?
Inkararagam kadin ti relasion nga, iti ania man a gapu, ket saan a nagballigi?
Naipasangoka kadin iti nakaro a sakit, pinanawan ti asawana, nagrigat para iti pamiliam?
Ammo ti Mangisalakantayo ti parikuttayo. Iti panangaramattayo iti wayawaya nga inted ti Dios ket inusar ti kabaelan nga agpakumbaba ken mamati, iti Mangisalakan, ni Jesucristo, matulongannatayo a sumango kadagiti pannubok ti biag ken rag-o. Mairaman iti pammati ti tarigagay ken pili a patien. Agtaud pay ti pammati iti panagtungpal iti bilin ti Dios, a naited a mangtulong kadatayo, iti panangsurottayo iti katulaganna.
No nariknatayo, wenno makarikna, iti dua, panagmaymaysa, pannakapaay, pannakauppapay, wenno pannakayadayo iti Dios ken iti naisubli a Simbaanna, kasapulan ti naan-anay a pammati nga agsubli iti katulaganna. Ngem mainugot unay! Umasidegkayo koma, wenno manen, ken ni Apo Jesucristo! Nabilbileg ti ayat ti Dios ngem ti kurdon ni patay—temporal wenno espiritual.10 Awan inggana ti Pannubbot ti Mangisalakan. Adda panawen a mayadayo wenno agkurangtayo. Mabalin, no dadduma, a mayaw-awantayo bayat ti panamatitayo. Siaayat ti Dios a mangipanamnama, sadino man ti yantayo wenno naaramidtayo, awan ti rumbeng a pagsublian. Sisasagana nga umarakup kadatayo.11
Maikadua, makaparegta ti temtem ti pammati nga agserbi iti baro, nangatngato ken nasansantuan a napnuan iti Espiritu a wagas.
Dayta a ministering wenno panagserbi ti mangted iti milagro ken bendision ti katulagan iti Dios—no sadino ti pakariknaantayo iti ayat ti Dios ken agserbi iti sabali iti dayta nga espiritu.
Naipasangokami itay nabiit ken ni Sister Gong iti ama ken pamilia a binendisionan ti napudno a kabsat nga addaan priesthood a kimmamang iti bishop ken dimmawat ti kabsat a priesthood no mabalin a kaduana ti ama a sumarungkar. Saan nga aktibo ti ama ken awan essemna nga agsarungkar. Ngem, iti panagbaliw ti puso ti ama, rinugianda iti kabsat a priesthood nga agsarungkar iti pamiliada. Kalpasan ti maysa nga ibibisita, dinamag ti asawana—saan metten daytoy nga agat-atendar iti simbaan—no kasano ti ar-aramiden ti asawana. Inawat ti ama, “Adda banag a marikriknak”—kalpasanna napan iti kusina a nangala iti beer.12
Ngem ti immuna sinaruno ti maysa, napateg a padas, serbisio ti itutulong, panagbaliw ti puso, klase para iti templo, pannakimisa, pannakailantip ti pamilia iti nasantuan a templo. Panunotem no kasano ti panagyaman dagiti annak ken appoko iti ama ken ti inada, ken iti agserserbi a kabsat a lalaki a kadua nga immay kas gayyem ken kadua ti amada a mangipateg ken agserbi iti sabali.
Ti pammaregta a maikatlo a temtem ti pammati: panangpartuat iti rag-o ti ebanghelio ken bendision umay no sapulen nga ayaten ti Apo ken dadduma a naimpusuan.
Awisennatayo ti scripture a mangikamang iti amintayo iti altar ti ayat ken serbisio. Iti Daan a Tulag, Deuteronomio imballaagna a mangayat iti Apo a Dios a sipupuso, ken amin a kabaelan.13 Ipaganetget iti Joshua, “Ayatenyo ti Apo a Diosyo, … surotenyo amin a wagasna, …tungpalenyo dagiti bilinna, ... kumamang kenkuana, ken … agserbikayo a naimpusuan ken sipapammati.”14
ti Baro a Tulag, imbaga ti Mangisalakan ti dua a napateg a bilin: “Ayatenyo ti Apo a Diosyo iti amin a pusoyo, ken iti amin a kararuayo, ken amin a pigsayo; … ken ti kaarrubayo kas iti bagiyo.”15
Iti Libro ni Mormon: Sabali pay a Pammaneknek ni Jesucristo, imbaga ni Ari Benjamin “iti amin a kabaelan ti bagina ken ti espirituna” ken pinagturayna ti kappia iti daga.16 Iti Doktrina ken Katulagan, kas ammo amin a misionario, dinawat ti Apo nga agserbitayo Kenkuana “iti amin a puso, kabaelan, panunot ken pigsa.”17 Idi sumrek dagiti Santo iti Jackson County, binilin ida ti Apo a ngilinenda ti Domingo, babaen ti panagayatda “iti Apo a Diosda iti amin a pusoda, iti amin a kabaelan, panunot, ken pigsada; ken iti nagan ni Jesucristo agserbida Kenkuana.”18
Agrag-otayo iti awis a mangipamaysa iti amintayo a mangtun-oy iti nangatngato ken nasansanto a wagas nga agayat iti Dios ken agayat iti amin nga adda iti aglawlawtayo, ken mangpatibker iti pammatitayo iti Nailangitan nga Ama ken ni Jesucristo a naimpusuan ken iti pagtaengan ken iti simbaantayo.
Maikapat, ti temtemtayo ti pammati ket paregtaennatayo a mangipatakder iti gagangay a pagtuladan iti kinalinteg nga agbiag a pinasiken ti pammati ken kinaespirituan.
Dagitoy nasantuan nga ugali, nalinteg nga aramid, wenno naikararagan a pagtuladan mabalin nga iraman iti kararag, panagadal iti nasantuan a kasuratan, panagayuno, pananglagip iti Mangisalakantayo ken dagiti katulagan babaen ti ordinansa ti sakramento, panangidiaya iti bendision ti ebanghelio babaen ti misionario, templo ken family history, ken dadduma pay a serbisio, panangtaginayon iti bukod a journal, ken dadduma pay.
No agdanggay iti nalinteg a pagtuladan ken naespirituan a tarigagay, agdanggay nga umay ti panawen ken kinaagnanayon. Umay ti naespirituan a lawag ken biag no yasidegnatayo ti panangsurot iti relihion iti Nailangitan nga Ama ken ti Apotayo, ni Jesucristo. No ayatentayo ti espiritu ken balikas ti linteg, agtalinaed kadatayo dagiti banag ti agnanayon iti kararua kas iti linnaaw manipud iti langit.19 Iti inaldaw a panagtungpal ken ti makabang-ar a nabiag a danum, masarakantayo dagiti sungbat, pammati, ken bileg a mangsabat kadagiti inaldaw a pannubok ken gundaway iti panagitured iti ebanghelio, pannirigan, ken rag-o.
Maikalima, pagtalinaedentayo dagiti kasayaatan a nabatad a pagtuladan bayat ti panagsapul iti baro ken nasantuan a wagas nga agayat iti Dios ken tumulong kadatayo ken dadduma, ti temtem ti pammati ket maparegtatayo a manglagip a ti kinaan-anay ket adda ken ni Cristo, saan a kadatayo wenno ti panaginkukuna ti lubong.
Ti awis ti Dios napno iti ayat ken gundaway gapu ta ni Jesucristo ti “dalan, ti kinapudno, ken ti biag.”20 Kadagiti makarikna iti dadagsen, inyawisna, “Umasidegkayo kaniak,” ket kadagiti umasideg Kenkuana, inkarina, “Paginanaenkayo.”21 “Umasidegkayo ken ni Cristo, ket agbalinkayo a naan-anay, … ayatenyo ti Dios iti amin a kabaelan, panunot ken pigsa, ket maited ti kaasina kadakayo, ket babaen ti kaasina naan-anaykayo ken ni Cristo.”22
Daytoy a pammatalged “babaen ti kaasina agbalinkayo a naan-anay ken ni Cristo” ti mangpabang-ar, kappia, ken kari makapagtultuloytayo iti pammati ken pammatalged iti Apo, uray no di mapasamak dagiti banag iti namnamatayo, wenno pannakaikari, a ditayo agbiddut, uray no naaramidtayon ti kabaelantayo.
Iti dadduma a panawen ken wagas, mariknatayo ti panagkurkurang, panagduadua, ken di pannakaikari. Nupay kasta, iti panangikagumaantayo nga agayat iti Dios ken magtulong iti padatayo a tao, mariknatayo ti ayat ti Dios ken pangparegta kadakuada ken ti biagtayo iti baro ken nasansantuan a wagas.
Babaen ti kaasina, paregtaen ken inkari ti Mangisalakantayo a “makapagtuloytayo nga awan duadua ken ni Cristo, addaan iti naan-anay a lawag ti namnama, ken ti ayat ti Dios ken iti amin a tao.”23 Ti doktrina ni Cristo, ti Pannubbot ti Mangisalakan, ken ti naimpusuan nga isusurottayo iti katulaganna makatulong kadatayo a mangammo iti kinapudnona ket mawayawayaantayo.24
Ipaneknekko ti pakabuklan ti ebangheliona ken ti planona iti ragsak, naisubli ken naisuro iti Ti Simbaan ni Jesucristo dagiti Santo iti Ud-udina nga Aldaw, iti nasantuan a kasuratan, ken babaen dagiti propeta manipud ken ni Propeta Joseph Smith agingga ken ni Presidente Russell M. Nelson ita. Paneknekak ti katulaganna a mangiturong iti napatpateg a sagut ti panangipateg ti Nailangitan nga Amatayo, inkarina: “Maaddaankayo iti agnanayon a biag.”25
Maipaay koma kadatayo ti bendisionna ken manayon a ragsak, iti panangpabaratayo iti puspusotayo ken namnama ken naikumit iti temtem ti pammatitayo, ikararagko iti sagrado ken nasantuan a nagan ni Jesucristo, amen.