Saankayo a Mariribukan
Ipapusoyo, kakabsat. Wen, agbibiagtayo iti nariribuk a panawen, ngem no agtalinaedtayo iti dana ti katulagan, saan a rumbeng nga agbutengtayo.
Inayonko ti pammaneknekko iti mensahe da Presidente Russell M. Nelson ken Elder Quentin L. Cook a naited itay maipanggep iti panagkaykaysa ti Konseho ti Umuna a Panguluen ken ti Korum ti Sangapulo-ket-dua nga Apostol. Ammok a daytoy naimpaltiingan a pakaammo ti panunot ken kayat ti Apo ket bendisionan ken patibkerenna dagiti tao, pamilia, ken ti Ti simbaan ni Jesucristo dagiti Santo iti Ud-udina nga Aldaw kadagiti sumaruno a kaputotan.
Manon a tawen ti limmabas, dinamag kadakami ken ni Sister Rasband ti maysa kadagiti naasawaan a balasangmi ken ti asawana ti napateg, makaawis-biag a saludsod: “Natalged ken nasayaat kadi pay ti mangyeg iti ubbing ditoy arigna a nadangkes ken nakaam-amak a lubongtayo?”
Ita, napateg dayta a saludsod a panunoten ti ina ken ti ama para iti patpatgenda a naasawaan nga annakda. Mangngegtayo ti buteng iti timekda ken mariknatayo ti buteng iti kaungganda. Ti sungbatmi kadakuada ket nalawag a “Wen, nalablabes pay ngem WEN,” bayat ti panangibinglaymi iti pannursuro ti ebanghelio ken ti napudno a pannirigan ken padasmi iti biag.
Saan a kabarbaro ti buteng. Nagbuteng dagiti disipulo ni Jesucristo, iti ruar ti Baybay Galiliea, iti “angin, ken dalluyon” iti nasipnget a rabii.1 Kas kadagiti disipulona ita, adda met butengmi. Dagiti di pay naasawaan maamakda met a mangpanunot a mangasawa. Dagiti nabiit pay a naasawaan, kas kadagiti annakmi, maamakda a mangyeg iti ubbing iti kumarkaro a lubong. Adu ti pagamkan dagiti misionario, nangruna ti pannakisaritada kadagiti estranghero. Maamak dagiti balo nga agsulsulo. Maaamak dagiti babbarito iti dida pannakaawat, dagiti agdadamo nga ageskuela maamakda iti umuna nga aldawda iti eskuela; dagiti estudiante iti unibersidad maamakda a matnag iti eksamen. Maamaktayo a mapaay, matallikudan, maim-ima, ken iti di ammo. Maamaktayo iti bagyo, ginggined, ken uray ania a manglamut iti daga ken iti biagtayo. Maamaktayo a di mapili ken, iti sabali a bangir, maamaktayo a mapili. Maamaktayo iti pagkurangantayo; maamaktayo a dinatayo bendisionan ti Apo. Maamaktayo iti panagbalbaliw, ket ti amaktayo agtinnag a pakaisagmakantayo. Naagapadko kadin amin?
Manipud pay idi un-unana, ti buteng ti nanglapped iti panirigan dagiti annak ti Dios. Magustuak unay ti kuna ni Eliseo iti 2 Ar-ari. Nangibaon ti ari ti Syria iti pangen a “nagparang iti rabii a nanglakub iti siudad.”2 Panggepda a tiliwen ken patayen ni propeta Eliseo. Mabasatayo:
“Ket idi nagriing ti katulongan ti tao ti Dios a nasapa, ket pimmanaw, adtoy, linakub dagiti pangen ti siudad a nakakabalio ken nakakaruahe. Ket imbaga kenkuana ti ubing a katulonganna, Ala, maestro! Ania ti aramidenta?”3
Nagturay dita ti buteng.
“Ket insungbat ni [Eliseo], Dika agbuteng: ta ad-adu ti adda kadata ngem ti adda kadakuada.”4
Ngem saan a nagsardeng.
“Nagkararag ni Eliseo, ket kinunana, Apo, ikararagko, luktam ti matana tapno makakita. Ket linuktan ti Apo ti mata ti agtutubo ket nakitana: ket, adtoy, napno ti bantay iti kabalio ken karuahe ti apuy a nanglakub ken ni Eliseo.”5
Mabalin nga addaan wenno awanantayo iti karuahe ti apuy a mangsebseb iti butengtayo ken mangparmek iti demoniotayo, ngem nalawag ti adal. Adda kadatayo ti Apo, malaglagipnatayo ken bendisionannatayo iti wagas nga ammona. Makaalay-ay ti kararag iti pigsa ken ti paltiing a panunotentayo a naipamaysa ken ni Jesucristo ken ti pannubbot a sakripisiona. Ammo ti Apo a no dadduma makariknatayo iti buteng. Napadasak daytan kasta met kadakayo, isu a linaon ti nasantuan a kasuratan ti balakad ti Apo:
“Agragsakkayo, ket saankayo nga agbuteng.”6
“Kitaendak iti tunggal panunot; saankayo nga agduadua, saankayo nga agbuteng.”7
“Dikayo agbuteng, bassit a pangen.”8 Magustuak ti singed ti “bassit a pangen.” Ditoy a Simbaan, mabalin a bassit ti bilangtayo iti pannirigan ti lubong, ngem no luktantayo ti naespirituan a matatayo, “dagiti adda kadatayo ad-aduda ngem ti adda kadakuada.”9 Ti naayat a Pastortayo, a ni Jesucristo, intuloyna, “Bay-anyo nga agtipon ti daga ken ti impierno a mangbusor kadakayo, ta no nabangonkayo iti batok, saanda nga agballigi.”10
Kasano a pukawen ti buteng? Ta ti agtutubo a katulongan, nagtakder iti abay ni Eliseo, ti propeta ti Dios. Kasta met ti naikari kadatayo. No dumngegtayo ken ni Presidente Russell M. Nelson, no denggentayo ti balakadna, agtaktakdertayo iti abay ti propeta ti Dios. Laglagipenyo dagiti balikas ni Joseph Smith: “Ket ita, kalpasan ti adu a pammaneknekna, daytoy ti pammaneknek, kamaudiananna, nga itedtayo kenkuana: A Sibibiag!”11Sibibiag ni Jesucristo. Ti ayattayo para Kenkuana ken iti ebangheliona ti mangparmek iti buteng.
Ti tarigagaytayo a “kanayon nga adda kadatayo ti Espirituna”12 maipaknitayo ti buteng para iti agnanayon a pannirigan iti panagbiagtayo. Imballaag ni Presidente Nelson, “Kadagiti masungad nga aldaw, saanto nga imposible ti maisalakan iti espiritu nga awan ti mangiturong, mangiwanwan, mangliwliwa, ken masansan a pammatalged ti Esiritu Santo.”13
Kinuna ti Apo, maipanggep kadagiti tubeng a mangbungon iti daga ken mamagsukir iti adu: “Agtakderto dagiti disipulok kadagiti nasantuan a lugar, ket didanto maisin.”14
Ket daytoyto nadiosan a balakad: “Saankayo nga agbuteng, ta, kalpasan amin dagitoy a banag, maammuanyonto a matungpalto dagiti kari a naited kadakayo.”15
Agtakderkayo kadagiti nasantuan a lugar—saankayo nga agbuteng—ket matungpalto dagiti kari. Panunotentayo ti tunggal maysa kadagitoy a mainaig iti butengtayo.
Umuna, agtakderkayo kadagiti nasantuan a lugar. No agtakdertrayo kadagiti nasantuan a lugar—dagiti nalinteg a pagtaengantayo, dagiti naidaton a kapiliatayo, dagiti nakonsagraran a templotayo—mariknatayo ti Espiritu ti Apo nga adda kadatayo. Masapulantayo dagiti sungbat dagiti saludsod a mangrirriribuk kadatayo wenno ti talna a mangpaksiat kadakuada. Dayta ti aramid ti Espiritu. Dagitoy sagrado a lugar iti pagarian ti Dios iti daga masapulda ti panagtamed, respeto iti tunggal maysa, ti kabaelantayo nga agtungpal iti ebanghelio, ken ti namnamatayo a mangpaksiat kadagiti butengtayo ken mangsapul iti pangagas a bileg ni Jesucristo babaen ti Pannubbotna.
Awan ti lugar ti buteng kadagitoy nasantuan a lugar ti Dios wenno iti puso dagiti Annakna. Apay? Gapu iti ayat. Ay-ayatennatayo ti Dios—a kanayon—ket ay-ayatentayo met Isuna. Ti ayattayo iti Dios parmekenna amin a buteng, ket nabuslon ti ayatna kadagiti nasantuan a lugar. Panunotenyo dayta. No agduaduatayo kadagiti karitayo iti Apo, no sumiasitayo iti dalanna nga agturong iti biag nga agnanayon, no saludsoden wenno agduaduatayo iti kaipapanan ti nadiosan a planona, no pagturayentayo ti buteng a manglukat iti ridaw ti amin a kaduana—pannakaupay, gura, pannakapaay—panawannatayo ti Espiritu, ket mapukawtayo ti Apo. No ammoyo ti kita dayta, ammoyo a saan a nasayaat a lugar a pagyanan. Iti kasunganina, no agtalinaedtayo kadagiti nasantuan a lugar, mariknatayo ti ayat ti Dios, ken ti “naan-anay nga ayat ti mangpaksiat iti buteng.”16
Ti sumaruno a kari, “Saankayo a mariribukan.”17 Uray kasano ti kinadangkes ken uppapay a mangpunno iti daga, naikari kadatayo babaen ti inaldaw a kinapudnotayo ken ni Jesucristo ti “talna iti Dios, daeganna ti amin a pannakaawat.”18 Ket no umay ni Cristo iti amin a bileg ken dayag, aggibusto ti kinadakes, yaalsa, ken kinaawan hustisia.
Idi nabayagen a panawen ti napalabas impadto ni Apostol Pablo ti panawentayo, a kinunana ken ni ubing a Timoteo:
“Ngem ammuem daytoy, a kadagiti maud-udi nga aldaw umaydanto dagiti aldaw a napeggad.
“Ta dagiti tattao, agayatdanto iti bagbagida, naagumda iti pirak, managpasindayaw, napalangguad, managuy-uyaw, nasukir kadagiti dadakkelda, awan panagyamanda, saanda a nasingpet, …
“… managayat kadagiti ragragsak, a nangnangruna ngem iti panagayatda iti Dios.”19
Laglagipenyo, “dagiti adda kadatayo” iti agsumbangir ti belo, dagiti mangayat iti Apo iti amin a puso, kabaelan, panunot, ken kiredyo, “nabilbileg ngem ti adda kadakuada.” .”20 No kanayon nga agtalektayo iti Apo ken iti wagasna, no aramidentayo ti aramidna, ditay agbuteng iti mapaspasamak iti lubong wenno mariribukan kadagitoy. Idawatko kadakayo nga ipakniyo pay laeng ti nailubongan nga awis ken lang-ay ket sapulenyo ti naespirituan iti inaldaw a panagbiagyo. Ayatenyo dagiti ay-ayaten ti Apo, a mairaman dagiti bilinna, dagiti nasantuan a balayna, dagiti sagrado a katulagantayo Kenkuana, ti sakramento iti aldaw ti Sabbath, ti pannakisaritatayo babaen ti kararag— ket dikayo mariribukan.
Ti maudi a balakadko: agtalek iti Apo ken kadagiti karina. Ammok a matungpalto ti amin a karina. Ammok unay a kas iti kaaddak iti sangoyo ita iti daytoy sagrado a miting.
Impalgak ti Apo: “Ta isuda a masirib ken nangawat iti kinapudno, ken nangala iti Nasantuan nga Espiritu a bagnosda, ken saan a pinaallilaw—pudno kunak kadakayo, saandanto a mapukan ken maipuruak iti apuy, ngem mailusotandanto ti aldaw.”21
Isu a ditayo koma mariribukan gapu iti agdama a riribuk, nga aramid dagiti adda iti dakkel ken nalawa a pasdek, babaen dagiti manguyaw kadagiti napudno ken napasnek nga agserbi ken ni Apo Jesucristo. Mangnamnama, kinatured, uray pay ti kaasi manipud iti puso a di pinatangken dagiti parikut wenno didigra. Impalagip kadatayo ni Presidente Nelson, a “mangnamnama iti masakbayan,” “No addaantayo iti namanama a mangliklilk iti nadumaduma a timek ken pilosopia ti tao a mangdadael iti kinapudno, masapul nga adalentayo ti umawat iti paltiing .”22
Tapno makaawat iti personal a paltiing, masapul nga unaentayo ti panagbiag iti ebanghelio ken panagparegta iti kinapudno ken kinaespirituankadagiti dadduma kasta met iti bagbagitayo.
Maysa ni Spencer W. Kimball kadagiti propeta idi agtutuboak. Kadagitoy napalabas a sumagmamano a tawen, apaman a naawaganak nga Apostol, pinatalnanak ti umuna a mensahena iti sapasap a komperensia idi Oktubre 1943. Pinapakumbaba ti awagna; ammok ti rikna dayta. Kinuna ni Elder Kimball: “Nabayag a pinampanunot ken inkararagko, ken nagayuno ken nagkararagak. Adda dagiti aggigidiat a pampanunot a simmeksek iti panunotko—timek a nagkuna: ‘Dimo kabaelan ti trabaho. Awan ti kabaelam—ket kanayon idi agangay nga immay ti naballigian a panunot: ‘Masapul nga aramidem ti naited a trabahom—masapul nga isaganam ti bagim a makabael, maikari ken kualipikado.’ Ket nangrugi ti kari.”23
Impapusok dayta naimpusuan a pammaneknek daytoy nga Apostol a nagbalin a maika-12 a Presidente daytoy nabileg a Simbaan. Nabigbigna a masapul a lipatenna dagiti butengna “tapno maaramidna ti naited a trabaho” ken nasken nga agtalek iti Apo para iti pigsa tapno agbalin a “makabael, maikari, ken kualipikado.” Kabaelantayo met. Mangrugi ti karit ngem masapul a sanguentayo ida babaen ti Espiritu ti Apo. Ditayo mariribukan” gapu ta no umabaytayo iti Apo ken itakderantayo dagiti prinsipiona ken iti agnanayon a planona, agtaktakdertayo iti nasantuan a daga.”
Ita, kasanon dayta anak ken manugang a nangdamag ti naimpusuan ken personal, madanagan a saludsod iti manon a tawen? Impapusoda ti panagsasaritami iti dayta a rabii; nagkararag ken nagayunoda ket nalawlawagan ti panunotda. Naragsakanda unay kastakami met, dagiti lelang ken lelong, ket naparaburanda itan iti pito a napipintas nga annak gapu iti pammati ken ayat.
Ipapusoyo, kakabsat. Wen, addatayo iti nariribuk a panawen, ngem no itakderantayo ti katulagantayo, nasken a ditayo agbuteng. Bendisionankayo tapno iti panagtungpalyo, dinakayo pagdanagen ti panawen a yantayo wenno dagiti parikut a masagangyo. Bendisionankayo a mangpili nga agtakder kadagiti nasantuan a lugar ken di maisin. Bendisionankayo a mamati ken ni Jesucristo, a sibibiag, sipsiputannatayo, kakaasiannatayo ken tarabayennatayo. Iti nagan ti Apotayo a Mangisalakan, a ni Jesucristo, amen.