« ព្រះវិញ្ញាណអាចជួយខ្ញុំឲ្យដឹងពីរបៀបដើម្បីបម្រើ » ដើម្បីកម្លាំងនៃយុវជន ខែ មីនា ឆ្នាំ ២០២២ ។
បាវចនា និង ខ្ញុំ
យុវវ័យចែកចាយពីរបៀបដែលពួកគេកំពុងរស់នៅតាមពាក្យពេចន៍នៃបាវចនារបស់ក្រុមយុវនារី និងកូរ៉ុមបព្វជិតភាព
ព្រះវិញ្ញាណ អាចជួយខ្ញុំឲ្យដឹងពីរបៀបដើម្បីបម្រើ
« ក្នុងនាមជាសិស្សរបស់ព្រះយេស៊ូវគ្រីស្ទ ខ្ញុំខិតខំប្រែក្លាយដូចជាទ្រង់ ។ ខ្ញុំស្វែងរក និងធ្វើតាមវិវរណៈផ្ទាល់ខ្លួន ហើយផ្ដល់ការងារបម្រើដល់មនុស្សដទៃនៅក្នុងព្រះនាមដ៏បរិសុទ្ធរបស់ទ្រង់ » ។
អំឡុងជំងឺរាតត្បាតសាកលកូវីដ-១៩ មនុស្សជាច្រើនរកបានប្រាក់ចំណូលតិចជាងមុន ឬថែមទាំងបាត់បង់ការងាររបស់ពួកគេទៀតផង ។ ខ្ញុំចង់ជួយសម្រាលបន្ទុករបស់ពួកគេបន្ដិចបន្ដួច ។ ដោយមានការគាំទ្រពីម៉ាក់ និងប៉ារបស់ខ្ញុំ និងដោយប្រើប្រាស់ប្រាក់ផ្ទាល់ខ្លួនរបស់ខ្ញុំ នោះខ្ញុំបានចាប់ផ្ដើមចែកអាហារដល់អ្នកដែលទ័លក្រ ។ ជាធម្មតា ខ្ញុំបានធ្វើដូច្នេះ តាមរយៈការបញ្ជាទិញអាហារសម្រាប់់មនុស្សដទៃទៀតតាមកម្មវិធីម៉ូតូឌុបមួយ ។ ពេលខ្លះ ខ្ញុំយកអាហារទៅកន្លែងដែលរៀបចំសម្រាប់អ្នកដែលកំពុងជួបការលំបាក ។
នៅប្រទេសឥណ្ឌូនេស៊ី មានអ្នករត់ម៉ូតូឌុបជាច្រើន ។ យើងប្រើកម្មវិធីមួយនៅលើទូរសព្ទរបស់យើង ដើម្បីកក់សេវាកម្មរបស់ពួកគេ ។ នៅអំឡុងពេលជំងឺរាតត្បាតនេះ អ្នករត់ម៉ូតូឌុបទាំងនោះពិបាករកម៉ូយជិះណាស់ ។
នៅថ្ងៃមួយ ខ្ញុំបានធ្វើតាមការបំផុសគំនិតមួយមកពីព្រះវិញ្ញាណ ដើម្បីជួយអ្នករត់ម៉ូតូឌុបម្នាក់ដោយចៃដន្យ ។ ខ្ញុំបានបញ្ជាទិញអាហារពីកម្មវិធីម៉ូតូឌុបតាក់ស៊ីនោះ ។ ប៉ុន្ដែ នៅពេលគាត់មកដល់ភោជនីយដ្ឋានដើម្បីយកអាហារនោះ ខ្ញុំបានផ្ញើសារប្រាប់គាត់ថា អាហារនោះគឺសម្រាប់គាត់ប៉ុណ្ណោះ ។ គាត់បានភ្ញាក់ផ្អើល ហើយមិនជឿថា វាគឺសម្រាប់គាត់នោះទេ ។ នៅពេលខ្ញុំបាននិយាយថា វាគឺសម្រាប់គាត់ នោះគាត់បានអរគុណខ្ញុំភ្លាម ហើយបានអធិស្ឋានសម្រាប់ខ្ញុំ ។ គាត់បាននិយាយថា គាត់នឹងយកអាហារនេះទៅផ្ទះឲ្យកូនរបស់គាត់ ។ ស្ដាប់ទៅ គាត់មានចិត្តរីករាយណាស់ ។ វាបានធ្វើឲ្យខ្ញុំមានអារម្មណ៍រីករាយយ៉ាងខ្លាំងផងដែរ !
ទោះបីជាគ្រួសាររបស់ខ្ញុំ និងរូបខ្ញុំផ្ទាល់កំពុងជួបនឹងឧបសគ្គមួយចំនួនក្ដី ក៏ខ្ញុំបានស្ដាប់តាមព្រះវិញ្ញាណ និងបានជ្រើសរើសដើម្បីបម្រើដែរ ។ យើងអាចទទួលបានអំណរ និងសុភមង្គល ដែលបានជួយយើងឲ្យយកឈ្នះលើឧបសគ្គនានារបស់យើង ។
ខ្ញុំមានអំណរគុណណាស់ចំពោះព្រះវិញ្ញាណបរិសុទ្ធ ។ បទពិសោធន៍នេះរំឭកខ្ញុំពីបទគម្ពីរមួយមកពីព្រះគម្ពីរសញ្ញាថ្មី យ៉ូហាន ១៣:៣៤ ៖ « ខ្ញុំឲ្យសេចក្តីបញ្ញត្តិ១ថ្មីដល់អ្នករាល់គ្នា គឺឲ្យអ្នករាល់គ្នាស្រឡាញ់គ្នាទៅវិញទៅមក ត្រូវឲ្យស្រឡាញ់គ្នា ដូចជាខ្ញុំបានស្រឡាញ់អ្នករាល់គ្នាដែរ » ។ ខ្ញុំដឹងថា នៅពេលយើងធ្វើតាមព្រះវិញ្ញាណ នោះយើងនឹងទទួលបានពរជ័យដ៏អស្ចារ្យមកពីព្រះវរបិតាសួគ៌ ។
អ្នកនិពន្ធរស់នៅក្នុងខេត្តចាវ៉ាភាគខាងលិច ប្រទេសឥណ្ឌូនេស៊ី ។