“Founga Ne u Papitaiso Aí,” Ko e Kaumeʻa, ʻAokosi 2023, 12–13.
Founga Ne u Papitaiso Aí
Mālō e Lelei! Ko ʻAlanoalī au. ʻOku ou nofo ʻi Tahiti. ʻOku ou taʻu 11, pea ʻoku ou laukau ʻaki ʻeku pehē ko ha mēmipa au ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Naʻá ke ʻilo fēfē ki he Siasí?
Naʻe fakaafeʻi ʻe ha ngaahi kaungāmeʻa ʻe niʻihi hoku fāmilí ki ha ʻekitivitī ʻa e Siasí. Naʻe fakaafeʻi foki kimautolu ki hono papitaiso ʻo ha kiʻi tamasiʻi. Naʻá ku kole ki heʻeku faʻeé pe ʻe lava ke u feʻiloaki mo e ongo faifekaú koeʻuhí he naʻá ku fuʻu fie ako lahi ange fekauʻaki mo Sīsū Kalaisi.
Naʻe fēfē ʻa e feʻiloaki mo e ongo faifekaú?
Naʻe angalelei ʻaupito ʻa e ongo faifekaú! Naʻá ku fiefia maʻu pē ke maʻu ha ngaahi lēsoni mo kinaua fekauʻaki mo Sīsū Kalaisi mo ʻEne ongoongoleleí. Naʻá ku saiʻia ʻi he ngaahi talanoa naʻa nau fai mai kiate aú mo e ngaahi vaʻinga naʻa mau fakahoko ke tokoni ke u akó.
Naʻe fēfē nai ʻa hoʻo papitaisó?
Naʻe papitaiso au mo ʻeku mamí ʻe heʻeku tetí ʻi hoku taʻu 11. Naʻá ku fiefia lahi! Naʻa mau fakaafeʻi ha kakai tokolahi ʻoku mau ʻofa ai. Naʻe haʻu hoku kaungāakó mo e faiakó ke poupouʻi au.
ʻI heʻeku tuʻu hake mei he vaí, naʻá ku fonu ʻi he fiefia. Naʻá ku malimali ʻo aʻu ki hoku telingá kotoa! Naʻá ku fiefia lahi ʻi heʻeku lava ʻo muimui ki he sīpinga ʻa Sīsū Kalaisí.
Naʻe fēfē ʻa e fuofua taimi ke ke ʻalu ai ki he Palaimelí?
ʻI he fuofua taimí, naʻá ku manavasiʻi naʻe hangehangē teu tangí. Ka naʻá ku ʻalu ki ha ʻekitivitī ʻa e Palaimelí. Naʻe kamata ke u maheni mo e tokotaha kotoa pē, pea naʻe ʻi ai haʻaku ngaahi kaungāmeʻa.
Kapau ʻokú ke foʻou, ko ʻeku faleʻí ke ke haʻu ki hoʻo kalasi Palaimelí, neongo kapau ʻokú ke ilifia ʻi he ʻuluaki taimí. ʻOku mau ʻofa ʻi he kakai foʻoú!
ʻOkú ke muimui fēfē kia Sīsū?
ʻOku ou lotu mo ʻalu ki he lotú he Sāpate kotoa pē. ʻOku ou talanoa mo hoku fāmilí fekauʻaki mo e ongoongolelei ʻo Sīsū Kalaisí.
ʻOku ou feinga ke vakaiʻi e niʻihi kehe ʻoku nau fiemaʻu tokoní. ʻI ʻapí, ʻoku ou tokoni ki heʻeku fineʻeikí ʻi he ngaahi ngāue fakaʻapí. ʻOku ou tokoni ki heʻeku tangataʻeikí ʻi he ngoué, tā fefié, mo e ngaohi ʻo e ngaahi meʻá. ʻI he ngaahi māhina siʻi kuo hilí, naʻe fai ai ha fakaʻaliʻali talēniti ʻi homau uōtí. Ko ha tokotaha mūsika au, ko ia ne u tā e ngaahi nafá he poó kakato!
Faitā ʻa Stéphane Sayeb