មិត្តទៅកាន់មិត្ត
ការជួយដល់កិច្ចការរបស់ព្រះវរបិតាសួគ៌
ដោយស៊ីស្ទើរ ស៊ូសាន អេច ផតធ័រ
ប្រធានអង្គការបឋមសិក្សាទូទៅ
មកពីការសម្ភាសជាមួយ រីឆាត អិម រ៉មនី ។
តើក្មួយៗដឹងទេថា ក្មួយៗត្រូវបានអញ្ជើញឲ្យជួយព្រះវរបិតាសួគ៌ជាមួយនឹងកិច្ចការដ៏សំខាន់របស់ទ្រង់ ? កិច្ចការនោះគឺដើម្បីជួយបុត្រាបុត្រីរបស់ទ្រង់ទាំងអស់ឲ្យត្រឡប់មករស់នៅជាមួយនឹងទ្រង់វិញ ( សូមមើល ម៉ូសេ ១:៣៩ ) ។ ក្មួយៗអាចជួយបាន នៅពេលក្មួយៗធ្វើរឿងទាំងបួននេះ ៖ រស់នៅតាម មើលថែ អញ្ជើញ និង បង្រួបបង្រួម ។
រស់នៅតាម ដំណឹងល្អរបស់ព្រះយេស៊ូវគ្រីស្ទ ។ ក្មួយៗរស់នៅតាមដំណឹងល្អ នៅពេលក្មួយៗធ្វើតាមគំរូរបស់ព្រះយេស៊ូវ ។ ក្មួយៗអាចអធិស្ឋាន អានព្រះគម្ពីរ ឬសៀវភៅដំណើររឿងក្នុងព្រះគម្ពីរ អភ័យទោសឲ្យមនុស្សដទៃ និងទៅព្រះវិហារ ។
មើលថែ ដល់អ្នកដែលត្រូវការជំនួយ ។ ក្មួយៗអាចអង្គុយជិតនរណាម្នាក់ដែលឯកោ ។ ឬក៏ក្មួយៗអាចទូរសព្ទទៅមិត្តម្នាក់ដែលឈឺ ហើយលើកទឹកចិត្តពួកគេ ។
អញ្ជើញ មនុស្សដទៃឲ្យទទួលយកដំណឹងល្អ ។ ក្មួយៗអាចអញ្ជើញមិត្តភក្ដិឲ្យមកព្រះវិហារ ឬសកម្មភាពអង្គការបឋមសិក្សា ។ ក្មួយៗអាចអញ្ជើញមិត្តភក្ដិឲ្យមកចូលរួមពិធីបុណ្យជ្រមុជទឹករបស់ក្មួយ ។
បង្រួបបង្រួម ក្រុមគ្រួសារសម្រាប់ភាពអស់កល្បជានិច្ច ។ ក្មួយៗអាចនិយាយជាមួយលោកតាលោកយាយរបស់ក្មួយៗ ដើម្បីដឹងអំពីជីវិតរបស់ពួកលោក ។ ក្មួយៗអាចធ្វើជាអ្នកបង្កើតសន្តិភាពនៅក្នុងផ្ទះរបស់ក្មួយៗ ។ ក្មួយៗអាចរៀបចំខ្លួនដើម្បីទៅព្រះវិហារបរិសុទ្ធ ។
ខ្ញុំសន្យាថា ក្មួយៗនឹងមានអំណរ នៅពេលក្មួយៗព្យាយាមរស់នៅតាម មើលថែ អញ្ជើញ និងបង្រួបបង្រួមនៅផ្ទះ នៅសាលារៀន និងនៅក្នុងថ្នាក់អង្គការបឋមសិក្សា ។ ព្រះវរបិតាសួគ៌ស្រឡាញ់ក្មួយៗ ! ហើយក្មួយៗអាចជួយដល់កិច្ចការដ៏សំខាន់របស់ទ្រង់បាន ។
រចនារូបភាពដោយ អាកូស្តូ ស្សាមបូណាតូ