បុណ្យគ្រីស្ទម៉ាស់នៅប្រទេសម៉ាលី
អ្នកនិពន្ធរស់នៅរដ្ឋតិចសាស ស.រ.អា. ។
ជូឌិធ អន្ទះសាដើម្បីអបអរចំពោះការប្រសូតរបស់ព្រះយេស៊ូវជាមួយនឹងសាខារបស់នាង ។
« យើងឮទេវតាពីសួគ៌ាច្រៀងនៅទីវាលយ៉ាងរណ្តំ »( ទំនុកតម្កើង ល.រ. ១២៥ ) ។
វាគឺជាថ្ងៃបុណ្យគ្រីស្ទម៉ាស់ ។ ជូឌិធ បានគ្រហឹមពេលនាងដើរទៅអគារព្រះវិហារ ។ នាង និងបងប្អូនរបស់នាងនឹងទៅចូលរួមកម្មវិធីជប់លៀងបុណ្យគ្រីស្ទម៉ាស់របស់សាខាពួកគេ ។
បងស្រីនាងឈ្មោះ អេសធើរ បានញញឹម ។ « តើវាជាបទ ‹ យើងឮទេវតាពីសួគ៌ា › មែនទេ ? »
« ចាស៎ ! វាជាបទដែលខ្ញុំចូលចិត្ត ។ ខ្ញុំសង្ឃឹមថា យើងនឹងច្រៀងបទនេះនៅថ្ងៃនេះ » ។ ជូឌិធ បានញញឹម ។
« ខ្ញុំស្រឡាញ់បទហ្នឹងណាស់ ! » ប្អូនប្រុសនាងឈ្មោះ ដេស៊ីរេ បានបន្ថែម ។ គាត់បានច្រៀងឮៗថា « ហ្គ្លូ-រី-យ៉ា ! »
ពួកគេបានសើច ។ ជូឌិធអន្ទះសាចង់អបអរជាមួយនឹងសាខារបស់ពួកគេ ។ មិនមានមនុស្សច្រើនទេនៅប្រទេសម៉ាលីដែលអបអរពិធីបុណ្យគ្រីស្ទម៉ាស់ ។ នៅទ្វីបអាហ្វ្រិកផ្នែកនេះ មនុស្សភាគច្រើនមិនសូវដឹងច្រើនអំពីព្រះយេស៊ូវទេ ។ ចំពោះពួកគេ បុណ្យគ្រីស្ទម៉ាស់គឺគ្រាន់តែជាថ្ងៃធម្មតាមួយប៉ុណ្ណោះ ។
នៅលើផ្លូវមានមនុស្សកកកុញ ។ ពួកអ្នកលក់ឪឡឹក ។ មនុស្សទាំងក្មេងទាំងចាស់ទូលក្អមទឹក ។ មានក្មេងប្រុសម្នាក់ដឹកសត្វលាអូសរទេះ ។ ជូឌិធ បានមើលទៅប៉មតូចដ៏ខ្ពស់នៃវិហារឥស្លាមមួយ ។ វាគឺជាអគារមួយដ៏ស្រស់ស្អាតដែលមានអ្នកជិតខាងរបស់ពួកគេដែលកាន់សាសនាឥស្លាមបានទៅថ្វាយបង្គំ ។
ជូឌិធ អេសធើរ និងដេស៊ីរេ បានធ្លាប់ទៅព្រះវិហាររបស់ប៉ាពួកគេ ។ ប៉ុន្តែកាលពីរដូវក្ដៅឆ្នាំមុន ពួកគេបានចូលរួមនឹងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ឥឡូវនេះពួកគេទាំងបីនាក់បានដើរទៅព្រះវិហាររួមគ្នារៀងរាល់សប្ដាហ៍ ។ ជូឌិដ ចូលចិត្តរៀនអំពីព្រះយេស៊ូវនៅក្នុងថ្នាក់កុមារ ។
នៅទីបំផុត ពួកគេបានទៅដល់ពិធីជប់លៀងនោះ ។ ក្រុមគ្រួសារភាគច្រើននៅក្នុងសាខាបានទៅដល់ទីនោះរួចហើយ ។ មានការចាក់បញ្ចាំងវីដេអូអំពីបុណ្យគ្រីស្ទម៉ាស់នៅលើជញ្ជាំងសាលាប្រជុំ ។ ជូឌិធ បានមើលយ៉ូសែបបណ្តើរសត្វលាឲ្យម៉ារាជិះនៅលើខ្នងទៅកាន់ភូមិបេថ្លេហិម ។ ផ្លូវដែលមានមនុស្សកកកុញ ហើយសុទ្ធតែធូលីដីនោះបានរំឭកនាងអំពីប្រទេសម៉ាលី !
បន្ទាប់ពីវីដេអូបានបញ្ចប់ មានឡានតាក់ស៊ីមួយបានមកដល់ ។ បងស្រី វ៉ាឡេរី ជាប្រធានសមាគមសង្គ្រោះ បានចេញពីឡាននោះមក ។
គាត់បានប្រាប់ថា « ខ្ញុំបានយកអាហារមកហើយ ! »
មនុស្សគ្រប់គ្នាបានជួយយកចានទៅកាន់រានហាលមុខផ្ទះ ។ វាជាពិធីជប់លៀង ! សាឡាត់ដំឡូង ការ៉ុត សណ្ដែក បាយ សាច់មាន់បំពង … ម្ហូបទាំងអស់ឆ្ងាញ់ណាស់ !
ជូឌិធ បាននិយាយថា « អរគុណខ្លាំងណាស់ បងស្រីវ៉ាឡេរី ! »
បន្ទាប់មក ក្មេងតូចៗម្នាក់ៗបានទទួលបាល់ កូនក្រមុំ ឬកូនឡានមួយ ។ ជូឌិធ មិនបានទទួលអំណោយឡើយដោយសារវាមិនគ្រប់គ្រាន់ ប៉ុន្តែនាងមិនខ្វល់ខ្វាយនោះទេ ។ នាងចូលចិត្តឃើញក្មេងតូចៗញញឹម ។
ពិធីជប់លៀងនោះបានបញ្ចប់ទៅដោយការច្រៀងចម្រៀង ។ ជូឌិធ បានញញឹមនៅពេលពួកគេបានច្រៀងបទ « យើងឮទេវតាពីសួគ៌ា » ។
សាខាទាំងមូលបានច្រៀងរួមគ្នា ។ វាពីរោះខ្លាំងណាស់ ។ ព្រះយេស៊ូវពិតជាបានប្រសូតអស់ជាច្រើនឆ្នាំកន្លងទៅប្រាកដមែន ! ជូឌិធ មានអំណរគុណជាខ្លាំងដែលនាង ដេស៊ីរ៉េ និងអេសធើរ បានដឹងអំពីទ្រង់ ។ ហើយនាងមានចិត្តរីករាយជាខ្លាំងដើម្បីអបអរចំពោះការប្រសូតរបស់ទ្រង់ ។
អេសធើរ ជូឌិធ និងដេស៊ីរ៉េ នៅខាងមុខអគារព្រះវិហាររបស់ពួកគេ ។
រចនារូបភាពដោយ ស្តេប ម៉ាឆល