សំណួរ និងចម្លើយ
« ប្រសិនបើខ្ញុំមានអារម្មណ៍ថា ខ្ញុំកំពុងបាត់បង់សេចក្តីជំនឿ តើខ្ញុំអាចធ្វើអ្វីខ្លះដើម្បីទទួលវាបានមកវិញ ? »
សូមអានព្រះគម្ពីរ
ប្រសិនបើខ្ញុំមានគ្រាលំបាកក្នុងការទទួលអារម្មណ៍ពីព្រះវិញ្ញាណ ចំពោះខ្ញុំវិញ ខ្ញុំអានព្រះគម្ពីរ ហើយស្វែយល់សេចក្តីជំនឿដែលមនុស្សគ្រប់គ្នាមាន ។ វាផ្តល់សេចក្តីជំនឿដល់ខ្ញុំ ។ ប្រហែលការអធិស្ឋានរបស់អ្នកខ្លីពេក ។ សូមព្យាយាមអធិស្ឋានឲ្យកាន់តែស្មោះសរឡើង ហើយព្រះវរបិតាសួគ៌នឹងជួយអ្នកឲ្យទទួលបានសេចក្តីជំនឿរបស់អ្នកវិញ ។
គ្រីស្ទ ប៊ី អាយុ ១៤ ឆ្នាំ អូរីហ្គិន ស.រ.អា.
ចិញ្ចឹមបីបាច់គ្រាប់ពូជនៃសេចក្តីជំនឿ
ខ្ញុំដឹងថា ខ្ញុំអាចអធិស្ឋានទូលទៅព្រះវរបិតា ហើយសូមឲ្យទ្រង់ជួយខ្ញុំរក្សាដើមនៃសេចក្តីជំនឿដែលខ្ញុំបានដាំ ។ ខ្ញុំត្រូវធ្វើកិច្ចការចាំបាច់នានាដើម្បីចិញ្ចឹមបីបាច់វា ដូចជាអានព្រះគម្ពីរ ស្វែងយល់បទពិសោធន៍នានាពីក្នុងគម្ពីរ រាប់ពរជ័យរបស់ខ្ញុំ ហើយសូមជំនួយពីគ្រួសារខ្ញុំ ។ តាមរបៀបនោះ សេចក្តីជំនឿរបស់ខ្ញុំអាចចាប់ផ្តើមរីកចម្រើនម្តងទៀត ។ វានឹងពុំកើតឡើងពីមួយថ្ងៃទៅមួយថ្ងៃឡើយ — វាជាដំណើរការមួយដែលត្រូវការពេលវេលា ។ ខ្ញុំត្រូវមានភាពអត់ធ្មត់ ហើយទុកចិត្តលើព្រះអម្ចាស់ ។
អ៊ីលីយ៉ាស់ ប៊ី អាយុ ១៨ ឆ្នាំ មិនដូស្សា អាហ្សង់ទីន
ស្វែងយល់អំពីវាជាមួយគ្នា
ពេលខ្ញុំមានអារម្មណ៍ថា ខ្ញុំកំពុងបាត់បង់សេចក្តីជំនឿ នោះខ្ញុំនិយាយជាមួយម្តាយ និងឪពុកខ្ញុំ ហើយយើងស្វែងយល់អំពីរឿងនានាជាមួយពួកគាត់ ។ ពេលខ្លះយើងច្រៀងចម្រៀងលើកស្ទួយដួងចិត្ត បន្ទាប់មកយើងអាចមានអារម្មណ៍ពីព្រះវិញ្ញាណ ។
អែមម៉ាលី ស៊ី អាយុ ១៥ ឆ្នាំ ខាឡូរ៉ាដូ ស.រ.អា.
សូមសួរឪពុកម្តាយរបស់អ្នក
ក្រៅពីអធិស្ឋានដោយផ្ទាល់ទៅកាន់ព្រះវរបិតាសួគ៌ហើយ យើងអាចសួរឪពុកម្តាយយើងអំពីរបៀបដែលយើងអាចត្រឡប់ទៅកាន់ទ្រង់វិញ ហើយស្រង់យកសេចក្តីជំនឿរបស់យើងមកវិញ ។
អ៊ីលីយាស់ អេស អាយុ ១២ ឆ្នាំ ផាយសាន់ឌូ អ៊ុយរ៉ាហ្គាយ
អធិស្ឋាន ជួយ និងអាន
ដោយសារខ្ញុំជាមនុស្សម្នាក់ដែលចុះអន់ថយក្នុងសេចក្តីជំនឿ មានរឿងបីយ៉ាងដែលខ្ញុំបានធ្វើដើម្បីទទួលបានវាមកវិញ ។ ទីមួយ ខ្ញុំបានអធិស្ឋាន ។ អធិស្ឋានទូលសូមកម្លាំង ហើយដឹងនូវអ្វីដែលខ្ញុំគួរតែធ្វើដើម្បីដំណើរការយ៉ាងល្អ ។ ទីពីរ ខ្ញុំប្រាប់មិត្តភក្តិស្និទ្ធស្នាលខ្ញុំ ហើយពួកគេបានជួយខ្ញុំយ៉ាងខ្លាំងពេលខ្ញុំត្រូវការ ។ ទីបីខ្ញុំអានព្រះគម្ពីរ ។ ខគម្ពីរជាច្រើនទាក់ទងនឹងសេចក្តីជំនឿ ហើយវាអាចជួយយើងទទួលបានសេចក្តីជំនឿមកវិញ ។
ចាក ជេ អាយុ ១៤ ឆ្នាំ ហ្លូរីណា ស.រ.អា.