1 Txoj kev tshwm sim qhia rau Yauhas, Vajtswv ib tug tub qhe, uas Yexus Khetos tau muab rau nws, los qhia rau Yexus cov tub qhe txog tej yam uas yuav muaj los tsis ntev tom ntej no, uas Yexus tau xa los thiab kom nws tus tim tswv qhia rau nws tus tub qhe Yauhas,

2 Tus uas ua pov thawj rau Vajtswv txoj lus, thiab rau Yexus Khetos cov lus tim khawv, thiab rau txhua yam uas Yauhas pom.

3 Cov uas nyeem tau koob hmoov, thiab cov uas hnov thiab to taub tej lus ntawm zaj uas qhia tej yuav muaj los yav tom ntej no, thiab ceev tej yam uas tau muab sau cia nyob haud, vim twb yuav txog lub sij hawm uas tus Tswv yuav los.

4 Nim no qhov no yog Yauhas cov lus tim khawv mus rau xya tus tub qhe uas kav xya pawg ntseeg hauv Axias. Txoj kev tshav ntuj rau nej, thiab txoj kev thaj yeeb los ntawm tus uas nyob nim no, thiab tus uas ib txwm nyob yav tas los, thiab tus uas yuav los yav tom ntej no; tus uas tau xa nws tus tim tswv ntawm nws lub rooj theej kiab los, los ua tim khawv rau cov uas yog xya tus tub qhe kav xya pawg ntseeg.

5 Yog li ntawd, kuv, Yauhas, uas yog tus tim khawv rau siab ntseeg, ua pov thawj txog tej uas tus tim tswv tau qhia rau kuv, thiab tej uas los ntawm Yexus Khetos, uas yog thawj tug uas sawv rov los, thiab tus Tub Vaj Ntxwv ntawm cov vaj ntxwv hauv lub ntiaj teb.

6 Thiab thov kom tus uas hlub peb, muaj yeeb koob; tus uas ntxuav peb tej kev txhaum mus los ntawm nws tus kheej cov ntshav, thiab tau muab peb ua vaj ntxwv thiab pov thawj rau Vajtswv, nws Txiv. Tsim nyog muab yeeb koob thiab kev kav rau nws, mus ib txhiab thiab ib txhis, Amees.

7 Vim saib seb, nws los hauv cov huab nrog kaum txhiab tug ntawm nws haiv neeg ntseeg nyob hauv lub nceeg vaj, uas coj nws Txiv lub yeeb koob. Thiab txhua lub qhov muag yuav pom nws; thiab lawv cov uas nkaug nws, thiab txhua xeem neeg hauv ntiaj teb yuav quaj nyiav vim nws. Twb yog li ntawd, Amees.

8 Vim nws hais tias, kuv yog Alafas thiab Aumenkas, yog qhov chiv keeb thiab qhov kawg, tus Tswv, tus uas nyob nim no, thiab tus uas ib txwm nyob yav tas los, thiab tus uas yuav los yav tom ntej no, tus Muaj Hwj Chim Tag Nrho.