1 Thiab muaj ib lub cim loj tshwm nyob saum ntuj, zoo li tej yam uas nyob hauv lub ntiaj teb; muaj ib tug poj niam hnav lub hnub, thiab nws tsuj nrees lub hli, thiab nws ntoo lub mom muaj kaum ob lub hnub qub.

2 Thiab tus poj niam ntawd suab ib plab me nyuam, nws quaj quaj, vim nws mob plab yuav yug tus me nyuam, thiab mob mob thaum tab tom daws cev.

3 Thiab nws yug tau ib tug me tub, tus uas yuav los kav txhua haiv neeg nrog ib tug pas hlau; thiab nws tus me nyuam raug coj mus rau ntawm Vajtswv thiab nws lub rooj theej kiab.

4 Thiab muaj dua ib lub cim tshwm nyob saum ntuj; thiab saib seb, muaj ib tug zaj loj loj liab ploog, nws muaj xya lub taub hau thiab kaum tus kub, thiab ntoo xya lub kaus mom rau saum nws taub hau. Thiab nws tus ko tw nplawm cov hnub qub saum ntuj poob tas ib feem peb, thiab tau muab lawv ntiab tawm mus rau hauv ntiaj teb. Thiab tus zaj ntawd sawv ntawm tus poj niam uas yuav yug me nyuam hauv ntej, tos rawv yuav noj nws tus me nyuam tom qab yug los.

5 Thiab tus poj niam ntawd tau khiav mus rau tom roob moj sab qhua, qhov chaw uas Vajtswv npaj tseg rau nws, kom lawv yuav pub nws noj nws haus ib txhiab ob puas thiab rau caum xyoo.

6 Thiab tau muaj kev ua rog nyob saum ntuj ceeb tsheej; Mikhayees thiab nws cov tim tswv tawm tsam tua tus zaj; thiab tus zaj thiab nws cov tim tswv tawm tsam Mikhayees;

7 Thiab tus zaj kov tsis yeej Mikhayees, thiab tus me nyuam, thiab tus poj niam uas yog Vajtswv lub koom txoos, tus uas tau dim nws tej kev mob, thiab tau coj lub nceeg vaj ntawm peb tus Vajtswv thiab nws tus Khetos lub koom txoos tawm los.

8 Thiab tsis muaj chaw saum ntuj ceeb tsheej rau tus zaj loj loj nyob lawm, tus uas raug muab ntiab tawm, niag nab txwj nab laug uas hu ua tus dab phem, thiab kuj hu ua Dab Ntxwg Nyoog, uas dag ntxias tag nrho neeg ntiaj teb; nws raug ntiab tawm los rau hauv ntiaj teb; thiab nws cov tim tswv raug ntiab tawm nrog nws.

9 Thiab kuv hnov ib lub suab hais nrov nrov saum ntuj ceeb tsheej tias, Nim no txoj kev cawm seej, thiab lub zog, thiab peb tus Vajtswv lub nceeg vaj, thiab nws tus Khetos lub hwj chim twb yuav los;

10 Vim tus uas nkaug peb cov kwv tij raug muab pov saum ntuj los lawm, tus uas niaj hnub niaj hmo nkaug lawv rau ntawm peb tus Vajtswv.

11 Vim lawv tau kov yeej nws los ntawm tus Me Nyuam Yaj cov ntshav, thiab los ntawm lawv txoj lus tim khawv; vim lawv tsis khuv xim lawv tus kheej txoj sia, tiam sis tau ceev txoj lus tim khawv mus txog ntua thaum lawv tuag. Yog li ntawd, cia li xyiv fab auj ntuj ceeb tsheej, thiab nej cov uas nyob haud.

12 Thiab tom qab tej yam no kuv tau hnov dua ib lub suab hais tias, Kev txom nyem rau cov neeg nyob hauv lub ntiaj teb, muaj tseeb tiag, thiab cov uas nyob hauv tej koog pov txwv hauv dej hiav txwv! vim tus dab phem twb nqis los rau hauv nej lawm, nws npau taws heev, vim nws paub hais tias nws tsuas muaj lub sij hawm luv luv xwb.

13 Vim thaum tus zaj pom tias nws raug ntiab los rau hauv lub ntiaj teb, nws tsim txom tus poj niam uas tau yug tus me tub.

14 Yog li ntawd, tau muab ob phab tis ntawm tus dav loj loj rau tus poj niam, kom nws ya taus mus rau tom roob moj sab qhua, mus rau nws qhov chaw, uas yuav yug nws ib ntus, thiab sij hawm ntxiv, thiab ib nrab sij hawm, tawm ntawm tus nab lub ntsej muag.

15 Thiab tus zaj txau dej tawm hauv nws lub qhov ncauj los ib yam li ib tug dej nyab ntws raws tus poj niam ntawd qab, kom cov dej nyab yuav kuav tau tus poj niam mus.

16 Thiab lub ntiaj teb pab tus poj niam, thiab lub ntiaj teb rua nws lub qhov ncauj, thiab nqos cov dej nyab uas tus zaj txau tawm hauv nws qhov ncauj los.

17 Yog li ntawd, tus zaj npau taws rau tus poj niam, thiab mus ua rog nrog cov seem tshuav ntawm tus poj niam tej tub ki, uas coj Vajtswv tej lus txib, thiab muaj lo lus tim khawv txog Yexus Khetos.