1 Thaum chiv keeb twb tau tshaj txoj moo zoo los ntawm Leej Tub los. Thiab txoj moo zoo yog txoj lus, thiab txoj lus yeej ib txwm nrog Leej Tub, thiab Leej Tub yeej ib txwm nrog Vajtswv nyob, thiab Leej Tub yog los ntawm Vajtswv.

2 Tus ntawd yeej ib txwm nrog Vajtswv nyob txij puag thaum chiv keeb los.

3 Nws tau tsim txhua yam; thiab tsis muaj ib yam twg uas tau tsim uas tsis yog nws tsim.

4 Nyob hauv nws los muaj txoj moo zoo, thiab txoj moo zoo yog txoj sia, thiab txoj sia yog qhov kaj rau neeg;

5 Thiab qhov kaj ntawd ci rau hauv lub ntiaj teb, thiab neeg ntiaj teb tsis pom qhov kaj ntawd.

6 Vajtswv tau txib ib tug txiv neej los, nws lub npe hu ua Yauhas.

7 Tus ntawd tau los hauv ntiaj teb los ua ib tug tim khawv, los ua tim khawv txog qhov kaj, los ua pov thawj txog txoj moo zoo los ntawm Leej Tub los rau sawv daws, kom los ntawm nws los es tib neeg thiaj yuav ntseeg.

8 Nws tsis yog qhov kaj ntawd, tiam sis tau los ua tim khawv txog qhov kaj ntawd,

9 Uas yog qhov kaj tseeb, uas kaj rau txhua tus neeg uas los rau hauv lub ntiaj teb;

10 Twb yog Vajtswv Leej Tub. Nws yog tus uas nyob hauv lub ntiaj teb, thiab nws tau tsim lub ntiaj teb, thiab neeg ntiaj teb tsis paub nws.

11 Nws tau los rau nws cov neeg kiag, thiab nws cov neeg kiag tsis txais yuav nws.

12 Tiam sis tag nrho cov uas txais yuav nws, nws tau pub hwj chim rau lawv hloov los ua Vajtswv cov tub; tsuas yog rau cov uas ntseeg nws lub npe xwb.

13 Nws tau yug los, tsis yog los ntawm roj ntshav, tsis yog los ntawm cev nqaij daim tawv lub siab nyiam, tsis yog los ntawm neeg lub siab nyiam, tiam sis yog los ntawm Vajtswv.

14 Thiab txoj lus ntawd tau los yug muaj cev nqaij daim tawv, thiab tau los nrog peb nyob, thiab peb tau pom nws lub yeeb koob, lub yeeb koob uas zoo li Leej Txiv Tib Leeg Tub lub yeeb koob, uas muaj txoj kev tshav ntuj thiab kev tseeb nplua mias.

15 Yauhas ua tim khawv txog nws, thiab tshaj tawm, hais tias, Tus no yog tus uas kuv tau hais txog; Tus uas yuav los tom qab kuv, Vajtswv xaiv nws ua kuv ntej; rau qhov nws ib txwm nyob ua kuv ntej.

16 Vim puag thaum chiv keeb twb ib txwm muaj Txoj Lus, uas yog Leej Tub, tus uas tau los yug muaj cev nqaij daim tawv, thiab xa los rau peb los ntawm Leej Txiv lub siab nyiam. Thiab tag nrho cov uas ntseeg nws lub npe ces yuav tau txais tag nrho tej uas nws muaj. Thiab ntawm tag nrho tej uas nws muaj peb sawv daws tau txais, uas yog txoj kev tsis txawj tuag thiab txoj sia nyob mus ib txhis, los ntawm nws txoj kev tshav ntuj.

17 Vim txoj kev cai tau muab los ntawm Mauxes los, tiam sis txoj sia thiab txoj kev tseeb yog los ntawm Yexus Khetos los.

18 Vim txoj kev cai yog raws li lo lus txib ntawm sab nqaij daim tawv, rau txoj kev coj kev tuag los; tiam sis txoj moo zoo yog raws li lub hwj chim ntawm txoj sia uas tsis muaj qhov kawg, los ntawm Yexus Khetos, uas yog Tib Leeg Tub los, tus uas nyob ntawm Leej Txiv xub ntiag.

19 Thiab yeej tsis tau muaj leej twg pom Vajtswv ib zaug twg li, tsuas yog nws tau ua pov thawj txog Leej Tub tso; vim tsuas yog los ntawm nws los xwb, tsis li ces cawm tsis tau ib tug twg dim.

20 Thiab qhov no yog Yauhas zaj lus tim khawv, thaum cov Neeg Yudais tau xa cov pov thawj thiab cov Neeg Levis hauv Yeluxalees tuaj, tuaj nug nws tias; Koj yog leej twg?

21 Thiab nws qhia qhov tseeb, thiab tsis xyeej hais tias nws yog Eli-as; tiam sis tau qhia tseeb, hais tias: Kuv tsis yog tus Khetos.

22 Thiab lawv nug nws, hais tias; Yog li ntawd koj ho yog Eli-as li cas? Thiab nws hais tias, Kuv tsis yog tus Eli-as uas yuav txum tim txhua yam rov qab los. Thiab lawv nug nws, hais tias, Koj puas yog tus yaj saub ntawd? Thiab nws teb tias, Tsis yog.

23 Tom qab ntawd lawv txawm hais rau nws tias, Koj yog leej twg? es peb thiaj coj tau ib lo lus teb mus rau cov uas xa peb tuaj. Koj yuav hais li cas txog koj tus kheej?

24 Nws hais tias, Kuv yog tus uas tsa suab hais nrov nrov tom roob moj sab qhua tuaj hais tias, Kho txoj kev kom ncaj tos tus Tswv, raws li tus yaj saub Exayas tau hais.

25 Thiab cov uas lawv xa tuaj yog cov ntawm pab Falixais.

26 Thiab lawv nug nws, thiab hais rau nws tias; Vim li cas koj ho muab neeg ua kev cai raus dej, yog hais tias koj tsis yog tus Khetos, tsis yog Eli-as tus uas yuav tsum txum tim txhua yam rov qab los, thiab tsis yog tus yaj saub ntawd?

27 Yauhas teb lawv, hais tias; Kuv muab neeg ua kev cai raus dej, tiam sis muaj ib tug nrog nej nyob ntawm no, nej twb tsis paub nws;

28 Nws yog tus uas kuv ua pov thawj txog. Nws yog tus yaj saub uas, yog Eli-as, tus uas, yuav los tom qab kuv, Vajtswv xaiv nws ua kuv ntej, tus uas kuv tsis tsim nyog daws nws txoj nyuag hlua khau, thiab nws qhov chaw kuv pauv tsis tau; vim nws yuav muab neeg ua kev cai raus dej, tsis yog ntawm dej xwb, tiam sis ntawm hluav taws, thiab ntawm tus Vaj Ntsuj Plig Dawb Huv.

29 Hnub tom qab, Yauhas pom Yexus taug kev tuaj rau ntawm nws, thiab hais tias; Saib Vajtswv tus Me Nyuam Yaj, tus uas yuav tshem neeg ntiaj teb tej kev txhaum!

30 Thiab Yauhas ua pov thawj txog nws rau cov neeg, hais tias, Tus no yog tus uas kuv qhia hais tias; Ib tug txiv neej uas lawv kuv qab los nws muaj hwj chim dua kuv; rau qhov nws ib txwm muaj nyob ua ntej yug kuv, thiab kuv paub nws, thiab hais tias nws yuav tshwm sim los rau Ixayees; yog li ntawd kuv thiaj los muab neeg ua kev cai raus dej.

31 Thiab Yauhas ua pov thawj, hais tias; Thaum kuv muab nws ua kev cai raus dej tas, kuv pom tus Ntsuj Plig los saum ntuj los zoo li tus nquab, thiab los nyob rau saum nws.

32 Thiab kuv paub nws; vim tus uas xa kuv los muab neeg ua kev cai raus dej, nws tau hais rau kuv tias; Tus uas koj pom tus Ntsuj Plig nqis los rau, thiab nyob twj ywm saum nws, tus ntawd yog tus uas muab neeg ua kev cai raus dej nrog tus Vaj Ntsuj Plig Dawb Huv.

33 Thiab kuv tau pom, thiab ua pov thawj hais tias tus no yog Vajtswv Leej Tub.

34 Tau muaj tej yam no nyob hauv Npethanpalas, ntawm ntug dej Yauladees sab tid, ntawm qhov chaw uas Yauhas muab neeg ua kev cai raus dej.

42 Thiab Atalis coj Petus mus cuag Yexus. Thiab thaum Yexus pom Petus, nws hais tias, Koj yog Ximoos, yog Yaunas tus tub, yuav muab koj hu ua Kefas, uas yog, los ntawm kev txhais lus, tus pom tau, los yog pob zeb. Thiab lawv yog neeg cuab ntses. Thiab lawv ncaj nraim tso txhua yam tseg, thiab nrog Yexus mus.