1 Kev txom nyem yuav raug Ali-ees, raug Ali-ees, lub nroog uas Daviv nyob! Ntxiv ib xyoos dhau ib xyoos; cia lawv muab tsiaj tua txi.

2 Txawm li cas los kuv yuav ua rau Ali-ees ntxhov siab thiab yuav muaj kev nyuaj siab thiab kev tu siab; vim tus Tswv tau hais li no rau kuv, Yuav muaj li no rau Ali-ees;

3 Hais tias kuv uas yog tus Tswv yuav tsuam yeej tawm tsam nws, thiab yuav tsub av nce mus tawm tsam nws, thiab kuv yuav tsa ntsa loog tawm tsam nws.

4 Thiab yuav ua kom nws poob qis, thiab nws yuav hais lus tawm hauv av tuaj, thiab nws tej lus yuav tawm puag hauv plua av tuaj, thiab nws lub suab yuav zoo li tus uas txawj ua dab, tawm hauv av tuaj, thiab nws tej lus yuav ntxhi tawm hauv plua av tuaj.

5 Tsis tas li ntawd cov neeg coob coob ntawm nws cov neeg txawv teb chaws yuav zoo li plua av me me, thiab cov neeg coob coob txaus ntshai yuav zoo li tej npluag nplej uas raug cua ntsawj ya mus; muaj tseeb tiag, yeej yuav muaj li no sai sai tib pliag xwb.

6 Vim Ib Tsoom Tub Rog tus Tswv yuav ua xob nroo los xyuas lawv, thiab ua av qeeg, thiab lub suab nrov, thiab khaub zeeg cua thiab cua daj cua dub, thiab ua tej nplaim taws uas hlawv kom kub du lug.

7 Thiab cov neeg coob coob ntawm txhua haiv neeg uas tawm tsam Ali-ees, twb yog tag nrho cov uas tawm tsam nws thiab nws tej cuab yeej ua rog, thiab ua rau nws muaj kev ntxhov siab, yuav zoo li ib zaj npau suav ntawm kev ua yog toog thaum tsaus ntuj.

8 Muaj tseeb tiag, yuav muaj li no rau lawv zoo li rau ib tug neeg tshaib plab uas npau suav, thiab saib seb, nws noj, tiam sis nws tsim los thiab nws plab khoob lug; los sis zoo li ib tug neeg nqhis dej uas npau suav, thiab saib seb, nws haus dej, tiam sis nws tsim los, thiab saib seb, nws qaug zog, thiab nws tshaib nqhis. Muaj tseeb tiag, twb yuav muaj li ntawd rau cov neeg coob coob ntawm txhua haiv neeg uas tawm tsam lub roob Xi-oos.