Entrevistanan pa Rekomendashon di Tèmpel

1. Bo tin fe den i tin un testimonio di Dios, e Tata Eterno; Su Yu, Hesu-Kristu; i e Spiritu Santu?

2. Bo tin un testimonio di e Ekspiashon di Hesu-Kristu i di Su ròl komo bo Salbador i Redentor?

3. Bo tin un testimonio di e Restourashon di e evangelio di Hesu-Kristu?

4. Bo ta sostené e Presidente di E Iglesia di Hesu-Kristu di e Santunan di e Delaster Dianan komo e profeta, vidente, i reveladó i komo e úniko persona riba tera outorisá pa ehersé tur yabi di saserdosio?

   Bo ta sostené e miembronan di e Promé Presidensia i e Quorum di e Diesdos Apòstelnan komo profeta, vidente i reveladónan?

   Bo ta sostené e otro Outoridatnan General i lidernan lokal di Iglesia?

5. Señor a bisa ku tur kos mester wòrdu “hasí den puresa” dilanti di djE (Doktrina i Kombenionan 42:41).

   Bo ta hasi esfuerso pa puresa moral den bo pensamentunan i komportashon?

   Bo ta obedesé e lei di kastidat?

6. Bo ta sigui e enseñansanan di e Iglesia di Hesu-Kristu den bo komportashon privá i públiko ku miembronan di bo famia i otronan?

7. Bo ta sostené òf promové kualke enseñansa, práktika, òf doktrina kontrali na esnan di E Iglesia di Hesu-Kristu di e Santunan di e Delaster Dianan?

8. Bo ta hasi esfuerso pa tene e dia di Sabat santu, tantu na kas komo na iglesia; asistí na bo reunionnan; prepará pa i partisipá dignamente di e sakramento; i hiba bo bida den harmonia ku e leinan i mandamentunan di e evangelio?

9. Bo ta hasi esfuerso pa ta honesto den tur loke bo ta hasi?

10. Bo ta un pagadó di diesmo íntegro?

    Pa miembronan nobo ku ta buskando un rekomendashon pa efektuá boutismo i konfirmashonnan vikario: Bo ta dispuesto pa obedesé e mandamentu di paga diesmo?

11. Bo ta komprondé i obedesé e Palabra di Sabiduria?

12. (E pregunta aki ta wòrdu omití ora ta entrevistá un mucha òf hóben.) Bo tin kualke obligashon finansiero òf otro obligashonnan pa ku un èks kasá òf pa ku yunan?

    Si ta asina, bo ta kumpliendo ku e obligashonnan aki?

13. (E pregunta aki ta wòrdu omití ora di entrevistá un miembro ku no ta investí.) Bo ta warda e kombenionan ku bo a hasi den tèmpel?

14. (E pregunta aki ta wòrdu omití ora di entrevistá un miembro ku no ta investí.) Bo ta honra bo privilegio sagrado pa bisti e garment manera instruí den e ordenansanan inisiatorio? (Lesa e deklarashon “Bisti e Garment di Tèmpel”, inkluí abou, na kada miembro.)

15. Tin pikánan serio den bo bida ku mester wòrdu resolvé ku outoridatnan di saserdosio komo parti di bo arepentimentu?

16. Bo ta konsiderá bo mes digno pa drenta e kas di Señor i partisipá den ordenansanan di tèmpel?

E Promé Presidensia a proveé e siguiente guia pa bisti e garment:

“E garment di e santu saserdosio ta rekordá nos di e velo den tèmpel, i e velo ei ta símbolo di Hesu-Kristu. Ora bo bisti e garment, bo ta bisti un símbolo sagrado di Hesu-Kristu. Bisti esaki ta un ekspreshon eksterno di bo kompromiso interno pa siguiE. E garment tambe ta un rekordatorio di bo kombenionan di tèmpel. Bo mester bisti e garment di dia i anochi durante bo bida. Ora mester kit’é pa aktividatnan ku no por wòrdu hasí na un manera rasonabel ku e garment bistí, buska pa bistié bèk mas lihé posibel. Segun bo ta warda bo kombenionan, inkluyendo e privilegio sagrado di bisti e garment manera instruí den e ordenansanan inisiatorio, lo bo tin mayor akseso na e Salbador su mizerikòrdia, protekshon, fortalesa i poder.”

E lider di saserdosio ta enfatisá na e miembro e nesesidat pa salbaguardiá su rekomendashon. No mester fia esaki nunka i mester raportá mesora na e persona ku a emitié si e pèrdè òf wòrdu hòrta.