An Sakramento

An mga miyembro kan Simbahan nagtitipon sa Aldaw nin Kapahingaloan para sambahon an Dios asin mag-ako kan sakramento. Sa panahon kan ordinansang ini, aakuon ninda an tinapay asin tubig tanganing girumdumon an sakripisyo kan Parasalbar kan saiyang hawak asin dugo asin sa pagpanibago kan saindang sagradong kasunduan.

• An mga Padi asin an mga may kapot kan Pagkapading Melquisedec puwedeng magbendisyon kan sakramento.

• An mga Diakono, mga Maestro sa Pagkapading Aaron, mga Padi, asin an mga may kapot kan Pagkapading Melquisedec puwedeng magpasa kan sakramento.

1. An mabendisyon kan tinapay maluhod asin sasambiton an pangsakramentong pangadyi para sa tinapay (hilingon sa Doktrina asin mga Kasunduan 20:77).

   O Dios, an Amang Daing Kasagkuran, hinahagad po niamo saimo sa pangaran kan saimong Aki na si Jesu Cristo, na bendisyunan asin pabanalon an tinapay na ini para sa mga kalag kan gabos na makinabang kaini, tanganing magkakan sinda sa pag girumdom kan hawak kan saimong Aki, asin magtestigo saimo, O Dios, an Amang Daing Kasagkuran, na boot nindang akoon an pangaran kan saimong Aki, asin danay na girumdomon siya asin sunodon an saiyang mga togon na itinao niya sa sainda; tanganing danay na mapasainda an saiyang Espiritu na makaibahan ninda. Amen.

2. An mabendisyon kan tubig maluhod asin sambiton an pangsakramentong pangadyi para sa tubig (hilingon sa Doktrina asin mga Kasunduan 20:79).

   O Dios, an Amang Daing Kasagkuran, hinahagad po niamo saimo sa pangaran kan saimong Aki na si Jesu Cristo, na bendisyunan asin pabanalon an tubig na ini para sa mga kalag kan gabos na mainom kaini, tanganing ini magibo ninda sa pag girumdom kan dugo kan saimong Aki, na nagbulos para sainda; tanganing sinda magtestigo sa saimo, O Dios, an Amang Daing Kasagkuran, na danay nindang girumdomon siya, tanganing mapasainda an saiyang Espiritu na makaibahan ninda. Amen.