Boutoka n te Kamatebwai

Tamnei n Rongorongon te Ekaretia

Kanoana
Kabwarabwarana
Kabwarabwarana
1. Buakonikai ae Tabu
2. Tabuki are Kumora ao Aonon Palmyra-Manchester
3. Ana Auti te Kai Joseph Smith te Ikawai
4. Ana Beeba ni Kaongora ao ana Titoa ni Boreti Grandin
5. Karaanga are Susquehanna
6. Nnen Mwengan Peter Whitmer te Ikawai
7. Titoa ana Kambwana Newel K. Whitney
8. Mwengan John Johnson
9. Kirtland Tembora
10. Atam-ontaai-Aman
11. Nnen te Tembora i Far West
12. Umwa ni Kaikain i Liberty
13. Auti ni Maeka i Nauvoo
14. Ana Titoa ae Uraura Burikina Iotebwa Timiti te Ataei
15. Nauvoo Tembora
16. Umwa ni Kaikain i Carthage
17. Te Mwananga Nako Maeao
18. Salt Lake Tembora

Tamnei n Rongorongon te Ekaretia

Tamnei n Rongorongon te Ekaretia

Kabwarabwarana
Tamnein tabo aika kakawaki aikai n rongorongon te Ekaretia a kaoti aba ake a nakonako i aona Aomata aika Itiaki ngkoa, tabo are a maeka ao n anga reirei iai burabeti ni boong aikai, ao tabo are a riki iai bwai ni koroboki aika tabu.
Kabwarabwarana
Te mabe ae inano e kaoti tabo ibukin tamnei n te mwakoro aei. Ni iteraba ake i mwin, tamnei ake a nambwanaki n tatabeua nako a irianaki ma te kabwarabwara ae kimototo ibukin te tabo. Bwai aika riki n te aono aei aika kakawaki ni koroboki aika tabu a karinanaki, ni ikotaki ma nnen koroboki aika tabu bwa ko aonga n ata te tabo are ko na wareka ae mwaiti riki i aon bwai aika riki akanne.
1. Buakonikai ae Tabu
Te Buakonikai ae Tabu e mena i Palmyra ao Kaawa ae Manchester, New York. Te buakonikai aei e tei i maeaon raoi te tabo are tei iai aia auti te kai te utu ae te Smith n te 1820.
2. Tabuki are Kumora ao Aonon Palmyra-Manchester
Te tamnei aei e kaitara meang ni kaota te Tabuki are Kumora i Manchester, New York. Te tabuki e oti n angaatain te tamnei ni mwkorona mai nano ao e kaan buta iteran te tamnei nakon tabona mai eta. Te kanuringa ae mainaina ae kona n nooraki n te tabuki nako tabona are mai meang bon karinean te anera are Moronaai ao rokon Ana Boki Moomon. Te Tabuki are Kumora e mena tao 5 te kiromita i maiaki-mainikun te Buakonikai ae Tabu. Ni uakaan ma eta n te tamnei bon Palmyra, are onoua ao te iterana te kiromita raroana. Aia tabo ni man tenaan Smith ao te Buakonikai ae Tabu a mena ni iteran te tamnei are mai eta n te angamaing.
3. Ana Auti te Kai Joseph Smith te Ikawai
Katotongan mwengan Joseph Smith te Ikawai, are e kateaki ni nen te auti te kai are te moan i rarikin Palmyra, New York. Te utu ae te Smith a katea te moan auti ae 1½ te borauatao man kaai aika koreaki n te tai ae aki maan i mwin rokoia i Palmyra. A maeka ikai te utu aei man 1819 ni karokoa 1825.
4. Ana Beeba ni Kaongora ao ana Titoa ni Boreti Grandin
Ana titoa Egbert B. Grandin ni boreti ae manga kateaki I Palmyra, New York, ike e boretiaki iai moan bokin Ana Boki Moomon n te 1830. Martin Harris e kakabwakaki boon ana tabo ni man ao e kabonakoa mwakorona ni kabwaka boon boretiakin 5,000 katoton Ana Boki Moomon. E moanaki katean manin te boreti n Aokati 1829, ao katotona ake a tia a tauraoi n Maati 26, 1830.
5. Karaanga are Susquehanna
Te tamnei aei e kaota te Karaanga are Susquehanna i Harmony Township, Pennsylvania.
6. Nnen Mwengan Peter Whitmer te Ikawai
Te auti te kai aei e tei bwa onean mwin moan mwengan Peter Whitmer te Ikawai i Fayette, New York.
7. Titoa ana Kambwana Newel K. Whitney
Ana titoa Newel K. Whitney e korakora ana mwakuri n rongorongon te Ekaretia i Kirtland. Iotebwa ao Emma Timiti a maeka ikai n te tai ae aki maan. A mwaiti kaotioti aika kakawaki ake a karekeaki ikai. Aia Reirei Burabeti e teweaki n te titoa man Tianuare 24, 1833, ni karokoa tabe bong n Eberi 1833.
8. Mwengan John Johnson
Mwengan John ao Alice Johnson e tei i Hiram, Ohio. Te ru aei e mena ni kauouan borauataona.
9. Kirtland Tembora
Te Kirtland Tembora e tei i Kirtland, Ohio.
10. Atam-ontaai-Aman
Ni kaitara maiaki n te mwarua ae Atam-ontaai-Aman, te mwarua ae rau, ae tikiraoi ae mena i meang-maeaon Missouri i rarikin te botanaomata ae Gallatin.
11. Nnen te Tembora i Far West
Te tabo ni maeka ae Far West, Missouri, e riki bwa mwengaia Aomata aika Itiaki aika 3,000 nakon 5,000 ake a ukora kamanoaia man te bwainikirinaki n aono aika Jackson ao Clay. N te 1838 e tua te Uea nakoia Aomata aika Itiaki bwa a na katea te tembora ikai (taraa R&B 115:7–8). Te bwainikirinaki irouia taan iowawa e totokoia man karaoan aio. N Okitobwa 31 n te ririki anne, te Burabeti ae Iotebwa Timiti ao taan kairiri tabeman n te Ekaretia a kabureaki ao, i mwin bairean taekaia n te kabowi i Richmond, a kabureaki n te Umwa ni Kaikain ae Liberty. N tain te kamwaitoro n 1838–1839, Aomata aika Itiaki a kakionakoaki man te Far West ao taabo riki tabeua i Missouri ao a manga maeka i Illinois.
12. Umwa ni Kaikain i Liberty
Te umwa ni kaikain i Liberty, i Missouri, tao n te 1878. Iotebwa Timiti ao niman riki taari a kabureaki n akea riaina i nanon ona ae 1.2 matenna te mita man Ritembwa 1, 1838 ni karokoa Eberi 6, 1839. (Sidney Rigdon e kabwaraki n tokin Beberuare.) A kainaki n runa are i nano ke ni mwakorona are te tabo ni kaikain n te kateitei, a matu i aon te bwa ae mwaitoro, ae rabunaki n uteute ae mau ao ti teutana te ota iai ao e karako kamanoaia man mwaitoron tain te kamwaitoro.
13. Auti ni Maeka i Nauvoo
Iotebwa Timiti te Ataei ao ana utu a mwaing nakon te Auti ni Maeka i Nauvoo n Aokati 1843. I mwina e kateaki reitana nakon iteran te kateitei are mai mainiku ibukin mwaitin te ruu ae 22. Ni moa man Tianuare 1844, Ebenezer Robinson e kawaka te auti bwa te auti ni irua, ao te Burabeti e taui onoua ruuna ibukin ana utu. Te auti e riki bwa kanga boton te tabo ni bobotaki irouia te botanaomata i Nauvoo. Aomata aika kakannato a butimwaeaki ikai iroun te Burabeti.
14. Ana Titoa ae Uraura Burikina Iotebwa Timiti te Ataei
Manga katean ana titoa ao ana aobiti aei Iotebwa Timiti te Ataei ae e tei i Nauvoo, Illinois. Bon teuana mai buakon kateitei aika moan te kakawaki n te Ekaretia ni bongin Nauvoo. E aki ti riki bwa te titoa ae bane bwaai iai, ma e riki naba bwa boton waaki ibukin iokinibwai, tautaeka ao te aro. Iotebwa Timiti e katea ana aobiti ni borauataona.
15. Nauvoo Tembora
Te moan Nauvoo Tembora e kateaki man te bwa te raim ae kurei ni mainaina ae reke n te tabo arei. Anaun te kateitei bon 39 te mita anauna ao 27 te mita rababana. Taubukin te taua e tei 48 te mita rietana mai i aontano. E korakora aia anganano kaain te Ekaretia ni katean te tembora ae tikiraoi aei, ao a moana te mwakuri n 1841. Tabeman a mwakuri i nanon namwakaina aika bati i aon te kateitei; tabeman a kareani aia mwane. E ngae ngke e aki tia raoi, te tembora e bon onrake raoi irouia kaain te Ekaretia ake a roko ibukin otenanti i nanon namwakaina i mwain birinakoia nako Maeao. E ngae ngke a mwaiti Aomata aika Itiaki ake a kitana Nauvoo ni moan tain bwebweraken aroka n te 1846 ibukin kakamakun mwakuri ni iowawa irouia taan iowawa, a tiku i mwia taan mwakuri aika onoti ibukin katiaan te tembora. N Eberi 30, 1846, Unimwaane Orson Hyde ao Wilford Woodruff man te Koram n te Tengaun ma Uoman ao e kaania 20 riki aomata ae a katabua umwan te Uea aei. Te tembora e kitanaki n Tebetembwa ngke a kakionakoaki mai Nauvoo kaain te Ekaretia ake a tiku; ngkanne aia taanga taan iowawa a kabuakaka ao a kammairaa te kateitei ae tabu. E uruaki nanona n te ai n Okitobwa 1848. Te tembora are e manga kateaki (oti tamneina ikai), bon katotongan raoi are te moan, e katabuaki iroun Beretitenti Gordon B. Hinckley n Tuun 27–30, 2002.
16. Umwa ni Kaikain i Carthage
Te auti ni kaikain n te kaawa ae Carthage, Illinois.
17. Te Mwananga Nako Maeao
Moanakin kitanan Nauvoo, Illinois, e bon baireaki ibukin Maati–Eberi, ma ibukin aia kakamaku taan iowawa Beretitenti Brigham Young e tuatua bwa mwanangaia Aomata aika Itiaki ri aon te Karaanga are Mississippi e na moanaki n Beberuare 4, 1846. Beretitenti Young e tiku i mwiia ni karaoi entaumente nakoia Aomata aika Itiaki ao e aki kitana Nauvoo ni karokoa nukan Beberuare.
18. Salt Lake Tembora
Taraakin te Salt Lake Tembora mai meangmainiku. Tabebong i mwin rinia te moan koraki ni bwaeonia aika Aomata aika Itiaki n te Mwarua ae Salt Lake, Beretitenti Brigham Young e orea aontano n okona ao e taekina, “Ikai are ti na katea iai ana tembora Atuara.” E katabwenaki aontano n Beberuare 14, 1853. N Eberi 6, 1853, a kaweneaki atibun maninganinga. E tia te tembora ao e katabuaki 40 te ririki i mwina n Eberi 6, 1893. Te Moan Beretitentii ao te Koram n Abotoro n te Tengaun ma Uoman a kaitibo ikai ni katoa wiiki bwa a na babaire ao n ukoukora ana kairiri te Uea ibukin kawaakan ao katean uean te Atua.