5. Karaanga are Susquehanna
Te tamnei aei e kaota te Karaanga are Susquehanna i Harmony Township, Pennsylvania.
Bwaai aika Riki aika Kakawaki: Iotebwa Timiti te Ataei e moan roko i Harmony n te 1825 ni kakaea ana mwakuri. Ngaia ma tamana a maeka i rarikin te tabo aei ni mwengan Isaac Hale, ike e moan kaitibo iai Iotebwa ma Emma Hale, buuna nakon taai aika a na roko (IT—R 1:56–57). A mareaki Iotebwa ao Emma n Tianuare 18, 1827. E karekei bwaatua aika koora te Burabeti n Tebetembwa 22, 1827, i Manchester, New York, ao n te tai ae aki maan i mwina e mwaing ma Emma nako Harmony, ike e moana iai rairan taian bwaatua. N tain rairan Ana Boki Moomon, Iotebwa ao Oliver Cowdery a tangiria ni kan ataa ae bati riki i aon te bwabetito ao a nakonako nakon te tabo teuana n te buakonikai ae kaan ma ikai bwa a na tataro nakon te Uea ni kaineti ma te bwabetito. Ni kaeka te tataro aei, e kaoti Ioane te Tia Bwabetito ni Meei 15, 1829 (IT—R 1:66–74; R&B 13). E anga te Nakoanibonga ae te Aaron nakon Iotebwa ao Oliver. I mwina a nakon te karaanga ao a bwabetitoia i marenaia ibukin kamaunaan bure. I mwina Iotebwa ao Oliver a kairaki iroun Ioane te Tia Bwabetito bwa a na katabuiia i marenaia nakon te Nakoanibonga ae te Aaron. N te tai ae aki maan i mwina, Betero, Iakobo, ao Ioane a kaoti i marenan Harmony ao Colesville ao a angan Iotebwa ao Oliver te Nakoanibonga ae te Merekitereka (R&B 27:12–13; 128:20).