17. Te Mwananga Nako Maeao
Moanakin kitanan Nauvoo, Illinois, e bon baireaki ibukin Maati–Eberi, ma ibukin aia kakamaku taan iowawa Beretitenti Brigham Young e tuatua bwa mwanangaia Aomata aika Itiaki ri aon te Karaanga are Mississippi e na moanaki n Beberuare 4, 1846. Beretitenti Young e tiku i mwiia ni karaoi entaumente nakoia Aomata aika Itiaki ao e aki kitana Nauvoo ni karokoa nukan Beberuare.
Bwaai aika Riki aika Kakawaki: I mwain matena ao te Burabeti ae Iotebwa e taetae ni burabeti, “Tabeman i buakomi a na maiu ao a na nako ni buoka karaoan taian maeka ao ni katei kaawa aika bubura ao n nooria Aomata aika Itiaki n riki bwa te botanaomata ae korakora i buakon te Rocky Maountains.” E kaniia 12,000 Aomata aika Itiaki ake a kitana Nauvoo man Beberuare ni karokoa Tebetembwa 1846. I mwin are a kitana Winter Quarters ao taabo ni maeka ake i mwina, Aomata aika Itiaki, a baireaki nakon taian koraki aika kaka tengaun, nimangaun, ao bubua, i aan ana kaben te tiim (R&B 136:3). N Tebetembwa 1846 taan iowawa ae kaania 800 mwaane ae iai aia bwaura a buakana Nauvoo. I mwin tabebong ni buaka, nikiraia Aomata aika Itiaki a kairoroaki bwa a na taenikai bwa aonga ni kamanoa maiuia ao n reke aia tai n riaon te karaanga. Nimabubua nakon onobubua mwaane, aine, ao ataei a riaon te karaanga ao a maeka i mataniwin te karaanga. Beretitenti Brigham Young e kanakoia koraki ni kamaiu ma bwaai aika kainnanoaki bwa a na anaia “Aomata aika Itiaki aika kananoanga” aikai.