11. Nnen te Tembora i Far West
Te tabo ni maeka ae Far West, Missouri, e riki bwa mwengaia Aomata aika Itiaki aika 3,000 nakon 5,000 ake a ukora kamanoaia man te bwainikirinaki n aono aika Jackson ao Clay. N te 1838 e tua te Uea nakoia Aomata aika Itiaki bwa a na katea te tembora ikai (taraa R&B 115:7–8). Te bwainikirinaki irouia taan iowawa e totokoia man karaoan aio. N Okitobwa 31 n te ririki anne, te Burabeti ae Iotebwa Timiti ao taan kairiri tabeman n te Ekaretia a kabureaki ao, i mwin bairean taekaia n te kabowi i Richmond, a kabureaki n te Umwa ni Kaikain ae Liberty. N tain te kamwaitoro n 1838–1839, Aomata aika Itiaki a kakionakoaki man te Far West ao taabo riki tabeua i Missouri ao a manga maeka i Illinois.
Bwaai aika Riki aika Kakawaki: E katabuaki nen te tembora ao a kaweneaki atibun maninganinga. A karekeaki itiua kaotioti ake a boretiaki n Reirei ao Berita aika Tabu (mwakoro 113–115; 117–120). Joseph F. Smith, te ka-itiman ni Beretitenti n te Ekaretia, e bungiaki n Nobembwa 13, 1838, n te Far West. E riki Far West bwa kautun te Ekaretia n te tai ae uarereke i aan te Burabeti ae Iotebwa Timiti.