18. Salt Lake Tembora
Taraakin te Salt Lake Tembora mai meangmainiku. Tabebong i mwin rinia te moan koraki ni bwaeonia aika Aomata aika Itiaki n te Mwarua ae Salt Lake, Beretitenti Brigham Young e orea aontano n okona ao e taekina, “Ikai are ti na katea iai ana tembora Atuara.” E katabwenaki aontano n Beberuare 14, 1853. N Eberi 6, 1853, a kaweneaki atibun maninganinga. E tia te tembora ao e katabuaki 40 te ririki i mwina n Eberi 6, 1893. Te Moan Beretitentii ao te Koram n Abotoro n te Tengaun ma Uoman a kaitibo ikai ni katoa wiiki bwa a na babaire ao n ukoukora ana kairiri te Uea ibukin kawaakan ao katean uean te Atua.
Bwaai aika Riki aika Kakawaki: Te Uea e a tia n anganiia Beretitenti n te Ekaretia ao Mataniwi ni Kabuta ake tabeman nurakinan tamnein te kaotioti ikai, ni ikotaki ma te Katanoata ae Kariaiakaki 2. N te tai ae aki maan n nako, te Moan Beretitentii ao te Kauntira n Abotoro n te Tengaun ma Uoman a katiteuanaki ni kariaia ao ni boretiia “Te Utu: Te Katanoata nakon te Aonaba.” Otenanti n te Tembora aika karaoaki ibukiia aika maiu ao aika mate naba a tia ni kakabwaia maiuia mirion ma mirion.