Scriptures
Mosiah 7


Tekap 7

Si Ammon nalmo to so dalin na Lehi-Nephi, a diman si Limhi so ari—Saray totoo nen Limhi so wala ed inkaaripen na saray Lamanite—Si Limhi tinungtong to so awaran da—Sakey a profeta (si Abinadi) so nampaneknek a si Cristo so Dios tan Ama na amin a beñgatla—Saraman so mantanem na karutakan anien da so alimbosabos, tan saraman so iyan da so talek da ed Katawan sikara so nilaban. Ñgalñgali 121 S.C.

1 Tan natan, agawa a kayari a si ari Mosiah so awalaan na nampatuloy a kareenan ed loob na talora a taon, pilalek to a nakabatan so nipaakar ed saray totoo a linma a manayam ed dalin na Lehi-Nephi, odino dia ed ciudad na Lehi-Nephi; lapu ed saray totoo to angapo so balita ra ed sikara nanlapu ed saman a panaon ya intaynan da ed Zarahemla; dia ed ontan, sikato so apagaan ed sikara lapu ed saray lurey da.

2 Tan agawa a si ari Mosiah inabuloyan to so labinanem ed saray mabiskeg a lalaki so onla ed dalin na Lehi-Nephi, a mibalita nipaakar ed saray kaagian da.

3 Tan agawa a dia ed kaimbuasan sinmipot ira, a kaiba ra so sakey a manñgaran na Ammon, sikato so mabiskeg tan makapanyari a too, tan sakey a kailalakan nen Zarahemla, tan sikato met so pañgulo ra.

4 Tan natan, ag da amta so dalan a pambaroyan da ed kalawakan ya onarap ed dalin na Lehi-Nephi, dia ed ontan sikara so nanakar-akar ed dakel ya agew ed loob na kalawakan, angan apataplo ya agew a sikara so nanakar-akar.

5 Tan dia ed impanakar-akar da ed apataplo ya agew akasabi ra ed sakey a pukdol, a saya so wala ed baybay na dalin na Shilom, tan diman da impaalagey so saray abong-abong da ya abel.

6 Tan si Ammon intaruk to so talora ed saray kaagian to, tan say kañgaranan da so Amaleki, Helem, tan Hem, tan sikara so linmeksab ed dalin na Nephi.

7 Tan nia, naabet da so ari na saray totoo a manaayam ed dalin na Nephi, tan dalin na Shilom; tan sikara so niliktob na saray bantay na ari, tan sikara so inala ra, tan binalor da ra, tan impisok da ra ed pañgawan.

8 Tan agawa a sanen sikara so nipañgaw ed loob na duara ya agew sikara lamet so inawit da ed arap na ari, tan inukbaran da so saray balor da; tan sikara so tinmalindeg ed arap na ari, tan sikara so naabuloyan, odino sikara so nigangan, ya ebatan da so saray tepet ya itepet to ed sikara.

9 Tan inkuan to ed sikara: Nengneng yo, siak si Limhi, say laki ya anak nen Noah, a sikato so laki ya anak nen Zeniff, a pinmaway ed dalin na Zarahemla pian tawiren to so saya a dalin, a saya so dalin na kaamaan da, a sikato so ginawa ra ya ari ed panamegley na voces na saray totoo.

10 Tan natan, pilalek ko a nakabatan so señgegan na ontan la a sebeg yo ya inmasinger ed saray padir na ciudad, sanen siak, a dili, kaibak so saray bantay ko so wala ed paway na puerta?

11 Tan natan, lapu ed saya a señgegan sikayo so iniagel ko, pian natepeten takayo, odino ingangan ko la ed saray bantay ko a sikayo so pateyen da. Sikayo so abuloyan ko a mansalita.

12 Tan natan, sanen si Ammon anengneng to a sikato so naabuloyan a mansalita, sikato so linma tan inyoku to so ulo to ed arap na ari; tan inmalagey lamet a nankuan: O ari, misalamat ak na baleg ed Dios ed saya ya agew lapu ed siak ni so mabilay, tan siak so naabuloyan a mansalita; tan salsalien ko so mansalita a sisesekder;

13 Lapu ed amtak a peteg no nakabat mo ak ag mo nitepel ya isulong ko so saraya a balor. Lapu ed siak si Ammon, a kailalakan nen Zarahemla, tan pinmaway ak ed dalin na Zarahemla, pian balitaen ko so nipaakar ed saray kaagian tayo, a sikara so intarok nen Zeniff a pinmaway ed saman a dalin.

14 Tan natan, agawa kayari a nadñgel nen Limhi so saray salita nen Ammon, mapalalo so liket to, tan kuan to: Natan, kabat ko la a petepeteg a saray kaagian ko a wala ed dalin na Zarahemla so mabilay ni ra. Tan natan, siak so mangayaga; tan dia ed kaimbuasan igangan ko a saray totook so mangayaga met.

15 Tan nengneng yo, sikami so wala ed inkaaripen na saray Lamanite, tan sikami so pambubuisen da na buis a makapaermen a sakbaten. Tan natan, nia, saray kaagian mi iagel da kami dia ed inkaaripen, odino manlapu ed lima na saray Lamanite, tan sikami so manmaliw ya aripen da; lapu ed magmaong ni a sikami so aripen na saray Nephite nen say mambayar kami na buis ed ari na saray Lamanite.

16 Tan natan, si ari Limhi ingangan to ed saray bantay to ya ag da la baloren si Ammon odino saray kaagian to, balet ingangan to a sikara so onla ed pukdol a wala ed baybay na Shilom, tan itaruk da so saray kaagian to ed ciudad, pian sikara so makapañgan, tan makainom, tan ipainawa ra so inkasikara ed saray kesaw na impambaroy da; lapu ed nantepel ira na dakel a beñgatla; nantepel ira na eras, inkapgaan, tan banal.

17 Tan natan, agawa dia ed kaimbuasan si ari Limhi so añgiter na palapag ed limog na amin a totoo to, pian sikara so mantitipon ed templo, ya ondeñgel ed saray salita ya ibaga to ed sikara.

18 Tan agawa sanen akapantitipon la ra sikato so nansalita ed sikara na onia, a kuan to: O sikayo, a totook, itangwa yo so saray ulo yo tan sikayo so naligliwa; tan nia, say panaon asinger la, odino ag la arawi, sano sikatayo so nabulosan la ed panaglingkor ed saray kabusol tayo, manwari ya ontan a dakel la so sagpot tayo, saraya so naandian na kakanaan; iñgen matalek ak a wala ni nakdaan a sakey a makana a sagpot a gawaen.

19 Dia ed ontan, itangwa yo so saray ulo yo, tan mangayaga kayo, tan manmatalek kayo ed Dios, ed saman so Dios a Dios nen Abraham, tan si Isaac, tan si Jacob; tan ontan met, ed saman so Dios ya añgipaway ed saray anak na Israel ed dalin na Egipto, tan ingangan to a manakar ira ed Ambalañga a Dayat ed amaga a dalin, tan sikara so pinakan to na mana pian ag ira ompatey ed kalawakan; tan dakel ni so arum a beñgatla a ginawa to ya onkana ed sikara.

20 Tan lamet, saman lamlamang a Dios so añgipaway ed kaamaan tayo manlapu ed dalin na Jerusalem, tan kinomisan tan iniagel to so saray totoo to ya anga ni ed natan; tan nengneng yo, lapu ed saray karelmeñgan tan karumsisan tayo kanian sikatayo so naawit ed inkaaripen.

21 Tan sikayo ya amin so tasi ed saya ya agew, a si Zeniff, a sikato so agawa ya ari na saya a totoo, lapu ed wala ed sikato so ag-nasabsabaan a pilalek a manawir ed dalin na kaamaan to, kanian sikato so apalikdo ed silib tan inkatuso nen ari Laman, lapu ed sikato so linmoob ed sakey a paknaan ed si ari Zeniff, tan iniabuloy to ya ikbanan so kabiañgan na dalin, odino angan say ciudad na Lehi-Nephi, tan say ciudad na Shilom; tan saray dalin ed kaliber-liber to—

22 Tan saraya ya amin so ginawa to, ed saksakey a gagala ya awiten to so saya a totoo a naoleyan na arum odino dia ed inkaaripen. Tan nia, sikatayo ed saya a panaon so mambabayar na buis ed ari na saray Lamanite, ed apag a paldua ed saray mais tayo, tan saray bokakew tayo, tan angan amin a dawa tayo ed nanduroma a nengneng, tan kapaldua na amin ya onsasapot ed saray karnero tan saray baka tayo; tan angan kapaldua na amin a wala ed sikatayo odino kayarian tayo say ari na saray Lamanite so ingetar to ed sikatayo, odino saray bilay tayo.

23 Tan natan, ag kasi saya so makapaermen a sakbaten? Tan ag kasi saya, say liliknaen tayo, so peteg a baleg? Natan nengneng yo, saya so baleg a señgegan a sikatayo so onermen.

24 On, ikuan ko ed sikayo; baleg so señgegan a sikatayo so onermen; tan nia pigara la so saray kaagian tayo so pinatey da, tan saray dala ra so tinmerter ya andi-kana, tan saraya ya amin so makaseñgeg ed karelmeñgan.

25 Tan no saya a totoo so ag napelag ed kasalanan say Katawan ag to nitepel so saya a baleg a kaugsan ya onsabi ed sikara. Balet nia, ag ira ondeñgel ed saray salita to; no ag iñgen linmetaw so baliñgaan ed limog da, angan tua ya ambelat kanian tinmerter so dala ed limog da a dili.

26 Tan sakey a profeta na Katawan so pinatey da; on, sakey a too a pinili na Dios, a sikato so añgibaga ed saray karelmeñgan tan karumsisan da, tan improfesiya to so dakel a beñgatla ya onsabi, on, angan say isabi nen Cristo.

27 Tan lapu ed inkuan to ed sikara a si Cristo sikato so Dios, say Ama na amin a beñgatla, tan inkuan to ya alaen to so indeñgan na too, tan ed saya ya indeñgan say too so pinalsa nen gapo; odino dia ed sananey a salita, inkuan to a say too so pinalsa ed indeñgan na Dios, tan say Dios onakseb ed limog na saray anak na totoo, tan ikawes to so laman tan dala, tan sikato so onla ed tapew na dalin—

28 Tan natan, lapu ed inkuan to so saya, sikato so pinatey da; tan dakel ni a beñgatla so ginawa ra a señgegan na inleksab na sanok na Dios ed sikara. Dia ed ontan, siopa so onkelaw a sikara so niakar ed inkaaripen, tan sikara so abakbak na ansakit a liknaen?

29 Tan nia, say Katawan inkuan to: Ag ko ampayaen so saray totook ed agew na pankasalanan; balet alaren ko so saray dalan da pian ag ira onaliguas; tan saray kagagawa ra so sakey a kagapolan ed arap da.

30 Tan lamet, inkuan to: No saray totook so mañgitanem na karutakan anien da so taep to nia ed alimbosabos; tan say pansumpalan to nia so sakey a samal.

31 Tan lamet inkuan to: No saray totook so mañgitanem na karutakan anien da so dagem a manlapu ed bokig, a saya so mañgawit na tampol a kadederal.

32 Tan natan, nengneng yo, say sipan na Katawan so asumpal la, tan sikayo so abakbak tan apairap.

33 Balet no ompawil kayo ed Katawan a katekep so sigpot a gagala ed saray puso yo, tan iter yo so talek yo ed sikato, tan sikato so panlingkoran yo ed amin a seet na nunot, no saya so gawaen yo, igangan to, unong ed linawa to a dili tan kaliktan to, ya ilaban to kayo ed inkaaripen.