Scriptures
Mosiah 25


Tekap 25

Saray kapolian nen Mulek ed Zarahemla so nanmaliw ira a Nephite—Akabatan da so saray totoo nen Alma tan nen Zeniff—Si Alma bininiagan to si Limhi tan amin a totoo to—Si Mosiah initer to so pakaoley ed si Alma pian tugyopen to so Simbaan na Dios. Ñgalñgali 120 S.C.

1 Tan natan si ari Mosiah ingangan to ya amin a totoo sikara so mantitipon.

2 Natan aliwa a dakel so saray anak nen Nephi, odino ag mapalalo so kinarakel na saray kapolian nen Nephi, a siñga saray totoo na Zarahemla, a kapolian nen Mulek, tan saray akila ed sikato dia ed kalawakan.

3 Tan aliwa a dakel so saray totoo nen Nephi tan saray totoo na Zarahemla a siñga kadakel na saray Lamanite; on, sikara so kulang a kapaldua ed bilang.

4 Tan natan amin a totoo nen Nephi sikara so nantitipon, tan ontan met ed saray totoo na Zarahemla, tan sikara so atipon ed nankadua ya olop.

5 Tan agawa a si Mosiah binasa to, tan ingangan to a basaen da, so saray kasulatan nen Zeniff ed saray totoo to; on, binasa to so saray kasulatan na saray totoo nen Zeniff, manlapu ed panaon na intaynan da ed dalin na Zarahemla ya anga ed impawil da lamet.

6 Tan imbasa to met so saray agawa ed si Alma tan saray kaagian to, tan amin na saray irap da, manlapu ed panaon na intaynan da ed dalin na Zarahemla ya anga ed impawil da lamet.

7 Tan natan, sanen asumpal nen Mosiah a binasa so saray kasulatan, saray totoo to a tinmilak ed saman a dalin so asabian na pankelaw tan inkabigla.

8 Lapu ed ag da kabat no anto so nunoten da; tan sanen anengneng da so saray nilaban ed inkaaripen sikara so napno na agay la a kabaleg a gayaga.

9 Tan lamet, sanen anunotan da so saray kaagian da a pinatey na saray Lamanite, sikara so napno na kaermenan, tan angan inmagos so lua ra lapu ed kaermenan.

10 Tan lamet, sanen anunotan da so dili a kaabigan na Dios, tan say pakapanyari to ed impañgilaban to ed si Alma tan saray kaagian to ed lima na saray Lamanite tan dia ed inkaaripen, inkelyaw da so saray voces da tan añgiter ira na pisasalamat ed Dios.

11 Tan lamet, sanen anunotan da so saray Lamanite, a kaagian da, ed makasalanan tan marutak a kipapasen da, sikara so napno na sulit tan iñgel onkana ed pankaabigan na saray kamarerua ra.

12 Tan agawa a saraman so anak nen Amulon tan saray kaagian to, ya inala ra ya inasawa so saray bibii ya anak na saray Lamanite, ag da apaknaan so kagagawa na saray ama ra, tan ag da la labay so patawag ed ñgaran na ama ra, dia ed ontan inala ra ed inkasikara so ñgaran a Nephi, pian sikara so natawag ya anak nen Nephi tan sikara so nibilang ed saraman so tatawagen a Nephite.

13 Tan natan amin a totoo ed Zarahemla so nibilang ed saray Nephite, tan saya so onia lapu ed say panarian angapo so añgiteran no ag saray kapolian nen Nephi.

14 Tan natan agawa a sanen sinampotan la nen Mosiah so pansasalita to tan impambabasa to ed saray totoo, kinaliktan to a mansalita met si Alma ed saray totoo.

15 Tan si Alma sikato so nansalita ed sikara, sanen sikara so atipon ed baleg ya olop, tan sikato so linma ed balang sakey ya olop ya anga ed sananey, ya impulong to ed saray totoo so pambabawi tan pananisia ed Katawan.

16 Tan binilin to so saray totoo nen Limhi tan saray kaagian to, amin da a nilaban ed inkaaripen, a nepeg da a nunoten a say Katawan so añgilaban ed sikara.

17 Tan agawa a kayari nen Alma ya imbañgat ira so totoo na amayamay a beñgatla, tan sinampotan to la so pansasalita to ed sikara, a si ari Limhi so nampilalek a nabiniagan; tan amin a totoo to so pilalek da met so nabiniagan.

18 Dia ed ontan, si Alma linma ed kawalaan na danum tan sikara so bininiagan to; on, sikara so bininiagan to onong ed ginawa to ed saray kaagian to ed saray danum na Mormon; on, tan no kaonoñgan so kinarakel na saray bininiagan to sikara met la so miembro na Simbaan na Dios; tan saya lapu ed saray pananisia ra ed saray salita nen Alma.

19 Tan agawa a si ari Mosiah initer to ed si Alma so pañgiletneg ed saray simbaan ed amin a lapag na dalin na Zarahemla; tan initer to ed sikato so pakapanyari a manordin na saray sacerdote tan saray managbañgat ed balang sakey a simbaan.

20 Natan saya so agawa lapu ed dakerakel so totoo ya ag naoleyan na saksakey a managbañgat; ni say sikara ya amin so makareñgel ed salita na Dios ed sakey a tipon;

21 Dia ed ontan sikara so nantitipon ed inkasikara ed nanduroma ya olop, a saraya so tatawagen a simbaan; a balang sakey a simbaan wala so sacerdote ra tan saray managbañgat da, tan say balang sakey a sacerdote so mampulong na salita onong ed niawat ed sikato ed panamegley na sañgi nen Alma.

22 Tan dia ed onia, manwari ya ontan a dakel so saray simbaan sikara so saksakey a Simbaan, on, angan say simbaan na Dios; tan angapo so nipulong ed amin a simbaan no ag say nipaakar ed pambabawi tan pananisia ed Dios.

23 Tan natan wala so pitora a simbaan ed dalin na Zarahemla. Tan agawa a siopaman so mampilalek a mañgako ed inkasikara na ñgaran nen Cristo, odino say Dios, sikara so akitipon ed Simbaan na Dios;

24 Tan sikara so tatawagen a totoo na Dios. Tan say Katawan inkalbo to so Espiritu to ed sikara, tan sikara so abendicionan, tan inmaliguas ed saman a dalin.