1 Tan natan sanen say ari nadñgel to so saraya a salita, inkuan to ed saray sacerdote to: Iarawi yo so saya a too, tan patey yo; tan anto so gawaen tayo ed sikato, lapu ed sikato so sakey ya ambagel.

2 Tan sikara so inmalagey tan sikato so sinali ra a limaan, balet atalindegan to ra, tan inkuan to ed sikara:

3 Ag yo ak didiwiten, lapu ed say Dios bakbaken to kayo no siak so limaan yo, lapu ed ag ko ni nipasabi ed sikayo so balita ya añgibakian na Katawan ed siak ya ipasabik; ni say nibagak la ed sikayo so saray kekerewen yo ya ibagak; dia ed ontan, say Dios ag to abuloyan a siak so deralen yo ed saya a panaon.

4 Balet nakaukolan ko ni a sumpalen so saray gangan no iner say Dios ingangan to ed siak; tan lapu ed imbagak ed sikayo so katuaan mamapasnok kayo ed siak. Tan lamet, lapu ed sinalitak so salita na Dios, tinutolan yo ak a siak so ambagel.

5 Natan agawa a kayari ya imbalikas nen Abinadi so saraya a salita saray totoo nen ari Noah so talawan da a limaan, lapu ed say Espiritu na Katawan so wala ed sikato; tan say lupa to sinminag na mapalalo a sileng, a siñga si Moses nen wala ed palandey na Sinai, legan a sikato so misasalita ed Katawan.

6 Tan sikato so nansalita katekep na pakapanyari tan pakaoley a nanlapu ed Dios; tan impatuloy to so saray salita to, a nankuan:

7 Anengneng yo ya angapo so pakapanyari yo a mamatey ed siak, dia ed ontan lausen ko so saray ibalitak. On, tan apatnagan ko a saya so anugat ed saray puso yo lapu ed imbagak ed sikayo so katuaan nipaakar ed saray kaugsan yo.

8 On, tan saray salitak pinano to kayo na pakelaw tan ag pakatebek, tan pasnok.

9 Balet ilaus ko so ibabalitak; tan dia ed ontan ag la makana no iner so laen ko, no bilang siak so nilaban.

10 Balet saya so ibagak ed sikayo, no anto so gawaen yo ed siak, kayari to nia, so sakey a kanengneñgan tan sakey ya anino na saray beñgatla ya onsabi.

11 Tan natan basaen ko so saray nakekeraan ni ed saray gangan na Dios, lapu ed apatnagan ko a saraya so ag nisulat ed saray puso yo; apatnagan ko ya inaral yo tan imbañgat yo so kaugsan ed karaklan a kabiañgan na bilay yo.

12 Tan natan, anunotan yo so saray inkuan ko ed sikayo: Ag kayo mangagawa ed inkasikayo na antokaman a talintao, odino antokaman ya kapadpara na antokaman a wala ed tagey na tawen, odino saray beñgatla a wala ed dalem na dalin, odino saray wala ed danum ed silong na dalin.

13 Tan lamet: Ag kayo ontetewek ed sikara, odino manlingkor ed sikara, lapu ed siak a Katawan a Dios mo sakey ak a maimon a Dios, ya ondalaw ed kaugsan na saray ama ed saray anak, ya anga ed komatlo tan komapat a kailalakan na saraman so mambusol ed siak;

14 Tan mañgipanengneng ak na panañgasi ed saraman so nilibo a mañgaaro ed siak tan manusumpal ed saray gangan ko.

15 Ag mo ikakana so ñgaran na Katawan a Dios mo ed andi-kakanaan; lapu ed say Katawan ag to ipasen ya angapo so kasalanan na saray mañgikana ed ñgaran to ya andi-kakanaan.

16 Nunot mo so agew na ñgilin, a saya so pasantosen mo.

17 Anem agew a mankimey ka, tan gawam la ya amin so saray nepeg mo a kimeyan;

18 Balet say komapito ya agew, a saya so ñgilin na Katawan a Dios mo, ag ka mangawa na antokaman a kimey, sikayo, ni say laki ya anak yo, ni say bii ya anak mo, say igagangan mo a laki, odino say igagangan mo a bii, ni saray bakam, ni saray sankailim a wala ed loob na puerta yo;

19 Tan dia ed loob na anem agew say Katawan ginawa to so tawen tan dalin, tan say dayat, tan amin a lugan to nia; dia ed ontan say Katawan binendicionan to so agew na ñgilin, tan saya so pinasanto to.

20 Igalang mo so amam tan say inam, pian andukey so saray agew mo ed dalin ya initer na Katawan a Dios yo ed sika.

21 Ag kayo mamatey.

22 Ag kayo mangagawa na pikakaloguran. Ag kayo mantatakew.

23 Ag kayo mantatasi na aliwa a tua sumpa ed kaabay yo.

24 Ag yo iibegan so abong na kaabay yo, ag yo iibegan so asawa na kaabay yo, ni say igagangan to a laki, ni say igagangan to a bii, ni say baka to, ni say asno to, ni say antokaman a beñgatla a kayarian na kaabay yo.

25 Tan agawa a kayari nen Abinadi a sinampotan so saraya ya ibabaga to inkuan to ed sikara: Imbañgat yo kasi ed saya a totoo ya agamilen da a gawaen so saraya ya amin a beñgatla ed panumpal da ed saraya a gangan?

26 Ibagak ed sikayo, Andi; tan no ginawa yo, say Katawan ag to ak la imbaki tan mamprofesiya na mauges a beñgatla nipaakar ed saya a totoo.

27 Tan natan imbaga yo a say kilalaban so onsabi manlapu ed gangan nen Moises. Ikuan ko ed sikayo a manepeg a sumpalen yo ni so gangan nen Moises; balet ikuan ko ed sikayo, onsabi so panaon ya ag la nakaukolan a sumpalen so gangan nen Moises.

28 Tan arum ni, ikuan ko ed sikayo, a say kilalaban ag onsabi ed panamegley na gangan lambeñgat; tan no ag dia ed bagat a pamaandi na kasalanan, a say Dios a dili gawaen to lapu ed kasalanan tan karelmeñgan na saray totoo to, no andi sikara so andi-saew a nabalang, angaman wala so gangan nen Moises.

29 Tan natan ikuan ko ed sikayo a nakaukolan wala so gangan a niiter ed saray anak na Israel, on, angan sakey a mapeget a gangan lapu ed sikara so totoo a matalker so teñger da, maples a mangawa na kaugsan, tan matantan a makanunot ed Katawan a Dios da;

30 Dia ed ontan wala nen saman so gangan a niiter ed sikara, on, sakey a gangan na saray susumpalen tan tutuntonen, sakey a gangan a saya so mapeget a sumpalen da ed inagew-agew, pian sikara so sinonunot ed Dios tan saray susumpalen da ed sikato.

31 Balet nia, ikuan ko ed sikayo, a saraya a beñgatla so kanengneñgan na saray beñgatla ya onsabi.

32 Tan natan, atalusan da kasi so gangan? Ikuan ko ed sikayo, Andi, ag da atalusan so gangan; tan saya so makaseñgeg ed awet na saray puso ra; lapu ed ag da atalusan ya angapo so too a nilaban likud no ag dia ed panamegley na pananundon na Dios.

33 Tan nia, ag kasi si Moises namprofesiya ed sikara nipaakar ed isabi na Mesias, tan say Dios so dundonen to so saray totoo to? On, tan angan amin a profeta a namprofesiya manlapu la ed inletneg na mundo—ag kasi sikara so nansalita na ag onsulok odino kulang nipaakar ed saraya a beñgatla?

34 Ag da kasi inkuan a say Dios a dili so onla dia ya onlasur ed limog na saray anak na totoo, tan alaen to so indeñgan na sakey a too, tan onla a walaan na baleg a pakapanyari ed tapew na saya a dalin?

35 On, tan ag da kasi met imbaga a gawaen to so kioli ed bilay na saray inaatey, tan sikato, a dili, so duksaen da tan manlikna na kasegsegañgan?