1 Tan natan agawa a si Ammon tan si ari Limhi ginapoan da ya ikuno ed saray totoo no panon da ya ilaban so inkasikara manlapu ed inkaaripen; tan angan kinaukolan da ya amin a totoo so mantitipon; tan saya so ginawa ra pian wala so voces na saray totoo nipaakar ed saya a getma.

2 Tan agawa ya angapo so narumog da a pamaakaran pian nilaban da so inkasikara manlapu ed inkaaripen, likud no say pañgala ra ed saray bibii, tan saray anak da, tan saray ayayep da, tan saray baka ra, tan saray abong-abong da ya abel, tan onsipot ira ya onla ed kalawakan; lapu ed saray Lamanite so dakerakel, ag nayari a saray totoo nen Limhi so misaluñgatan ed sikara, no nunoten da bilang ya ilaban so inkasikara ed inkaaripen ed panamegley na espada.

3 Natan agawa a si Gideon so linma tan tinmalindeg ed arap na ari, tan inkuan to ed sikato: Natan O ari, sika so dinmeñgel ed saray salitak ed dakel la ya ulit sanen sikatayo so milalaban ed saray kaagian tayo, saray Lamanite.

4 Tan natan O ari, no siak so ag mo arumog a sakey ya andi-kakanaan ya igagangan, odino natan dineñgel mo so saray salitak ed antokaman a kinamelag, tan no saraya so akatulong ed sika, angan ontan la so pilalek ko a deñgelen mo so saray salitak ed saya a panaon, tan siak so manmaliw ya igagangan mo tan ilaban mo so saya a totoo ed inkaaripen.

5 Tan say ari inabuloyan to a sikato so mansalita. Tan si Gideon inkuan to ed sikato:

6 Nengneng mo so dalan, a wala ed beneg na padir, dia ed beneg na ciudad. Saray Lamanite, odino saray taga-bantay na saray Lamanite, no labi sikara so abuek; dia ed ontan mañgipaakseb itayo na pakabat ed limog na amin a saya a totoo pian tiponen da so saray karnero tan baka ra, pian saraya so sunsonen da ed kalawakan ed labi.

7 Tan onla ak onong ed igangan mo tan mambayar ak na kaunoran a buis ya alak ed saray Lamanite, tan sikara so nabuek; tan sikatayo so onlabas ed maamot ed dalan a nikawigi na kampo ra sano sikara la so abuek tan naugip.

8 Dia ed onia sikatayo la so onsipot a kaiba tayo ra so saray bibii tan saray anak tayo, saray karnero tayo, tan saray baka tayo ya onla ed kalawakan; tan mambaroy tayo ya onsaliberber ed dalin na Shilom.

9 Tan agawa a say ari so dinmeñgel ed saray salita nen Gideon.

10 Tan si ari Limhi ingangan to ed saray totoo a tiponen da so saray ayayep da a pankakasakeyen; tan añgibaki na añgiter na buis ya alak ed saray Lamanite; tan sikato met so añgiter ni na dakerakel ya alak a panañgaro to ed sikara; tan sikara so naninum ya andi-sebel ed saman ya alak ya impaitulor nen ari Limhi.

11 Tan agawa a saray totoo nen ari Limhi so inmalis ed labi ya amaarap ed kalawakan a kaolop da so saray karnero tan saray baka ra, tan sikara so sinmaliberber ya amaarap ed dalin na Shilom dia ed kalawakan, tan inliko ra so basbas da a mamaarap ed dalin na Zarahemla, dia ed impañgiwanwan nen Ammon tan saray kaagian to.

12 Tan intaruk da so amin a balitok da, tan pilak, tan saray ankabli a beñgatla, a sarag da ya awiten, tan ontan met ed saray tagano ya awit da, a linma ed kalawakan; tan impatuloy da so impambaroy da.

13 Tan kayari na dakel ya agew ed kalawakan asabi da so dalin na Zarahemla, tan akitipon ira ed saray totoo nen Mosiah, tan sikara so nanmaliw ya inoleyan to.

14 Tan agawa a si Mosiah inawat to ra a sigagayaga; tan inawat to met so saray kasulatan da, tan ontan met ed saray kasulatan ya arumog na saray totoo nen Limhi.

15 Tan natan agawa a sanen saray Lamanite asukayan da a saray totoo nen Limhi so tinmaynan a pinmaway ed saman a dalin nen labi, añgibaki ra na sakey ya olop na ñgayew ed kalawakan a mañgosil ed sikara;

16 Tan kayari a sikara so inmosil ed duara ya agew, ag da la narumog so saray bakat da; dia ed ontan sikara so abalang ed kalawakan.