1 Tan natan agawa a si Zeniff iniawat to so panarian ed kinen Noah, sakey ed saray lalaki ya anak to; dia ed ontan si Noah ginapoan to so manoley ed pasen to; tan sikato so ag nankurang ed dalan nen ama to.

2 Tan nia, ag to inonor so saray gangan na Dios, balet sikato so nankurang unong ed saray pilalek na dili a puso to. Tan sikato so awalaan na dakel ya asawa tan kamalala. Tan pinaulianan to so saray totoo to a mangawa na kasalanan, tan mangawa na antokaman a marumsis ed imaton na Katawan. On, tan sikara so nangawa na inkabalangkantis tan amin a nengneng na karelmeñgan.

3 Tan sikato so añgipasakbat na buis a kakalima ed amin a kayarian da, kakalima ed saray balitok tan pilak da, tan kakalima ed saray ankabli a metal da, tan tanso ra, tan gansa ra, tan balatyang da; tan kakalima ed saray pinataba a kilaw na ayayep da; tan kakalima met ed amin a dawa ra.

4 Tan saraya ya amin so inala to a pambilay to, tan saray asawa to tan saray kamalala to; tan ontan met ed saray sacerdote to, tan saray kaasawaan da tan kamalala ra; dia ed onia inuman to so kipapasen na panarian.

5 Lapu ed inekal to so amin a sacerdote a pinasanto nen ama to, tan nampasanto na saray balo ya insublay to ed sikara, a siñga saraman so nitanduro ed kinon na saray puso ra.

6 On, tan dia ed onia sikara so nambilay ed saray ñgiras da, tan panaglingkor da ed saray talintao, tan dia ed inkabalangkantis da, dia ed saray buis a siniñgil nen ari Noah ed saray totoo to; dia ed onia saray totoo so nansagpot a mapalalo pian natuloñgan da so karelmeñgan.

7 On, tan sikara so nanmaliw met a managlingkor ed saray talintao, lapu ed sikara so apalikdo na andi-kakanaan tan mapasirayew a panagsalita na ari tan saray sacerdote to; lapu ed sikara so nansalita na saray mapasirayew a beñgatla ed sikara.

8 Tan agawa a si ari Noah so nampaalagey na dakel a makapaibeg tan maaawang a paalagey; tan saraya so inarkosan to na mararakep a kimey ed kiew, tan ed amin a nengneng na ankabli a beñgatla, na balitok, tan pilak, tan balatyang, tan gansa, tan ankabli a metal, tan tanso;

9 Tan sikato so añgipaalagey met na maawang a palacio, tan sakey a trono ed pegley to nia, ya amin ya inkana to so mararakep a kiew tan saya so inarkosan to na balitok tan pilak tan ankabli a beñgatla.

10 Tan ingangan to ed saray managkimey to a mangawa ra na amin a pino a kimey ed loob na dingding na templo, saray mararakep a kiew, tan tanso, tan gansa.

11 Tan saray yuroñgan so nibiig ya onkana ed atagey a sacerdote, a saraya so atagtagey nen saray arum a yuroñgan, saraya so inarkosan to na tua a balitok; tan kinaukolan to a nawalaan na tapewan dia ed arapan da, pian nipainawa ra so saray laman da tan saray taklay da ed saraya legan a sikara so mambalikas na saray tila tan andi-kana a salita ed saray totoo to.

12 Tan agawa a nampaalagey na sakey a tori ya asinger ed templo; on, sakey ya atagtagey a tori, ya ontan la a kinaatagey a nayarian to so onalagey ed tuktok tan natandagan to so dalin na Shilom, tan ontan met ed dalin na Shemlon, a saya so kayarian na saray Lamanite; tan angan nayarian to met a tandagan so amin a dalin a wala ed kaliber-liber.

13 Tan agawa ya ingangan to so pañgipaalagey na dakel a paalagey ed dalin na Shilom; tan ingangan to so pañgipaalagey na baleg a tori ed pukdol a banda ed baybay na dalin na Shilom, a saya so galawan na saray anak nen Nephi ed panaon nen sikara so pinmaway ed saman a dalin; tan saya so ginawa to ed saray kayamanan ya inala to dia ed panamegley na buis na saray totoo to.

14 Tan agawa ya impasen to so puso to ed saray kayamanan to, tan pinalabas to so panaon to ed magulo a panagbilay ed saray asawa to tan saray kamalala to; tan ontan met ed saray sacerdote to pinalabas da so panaon da ed saray balangkantis.

15 Tan agawa a pinataneman to na kaubasan so kaliber-liber na saman a dalin; tan nampagawa na pespesan na ubas, tan nangawa na sawaan ya alak; tan dia ed ontan sikato so nanmaliw a managinom na alak, tan ontan met ed saray totoo to.

16 Tan agawa a saray Lamanite ginapoan da so onla ed saray totoo to, a sandaraiset, tan sikara so pinapatey da ed saray kaalugan da, tan legan ya aasikasoen da so saray ayep da.

17 Tan si ari Noah so añgibaki na saray bantay ed kaliber-liber na saman a dalin a mansebel ed sikara; balet ag to añgibaki na magenap a bilang, tan saray Lamanite so linma ed sikara tan pinapatey da ra, tan sinunson da so dakel ed saray ayayep da ed paway na dalin; dia ed onia saray Lamanite ginapoan da ra a deralen, a pañgipangletan da na busol da ed sikara.

18 Tan agawa a si ari Noah imbaki to so saray ñgayew to sumpa ed sikara, tan sikara so asunson da, odino sikara so apasener da ed antikey a panaon; dia ed ontan, sikara so pinmawil a magagayaga ed saray naala ra ed impansamsam da.

19 Tan natan, makaseñgeg ed saya a baleg ya impantaluna ra sikara so nipaatagey ed kinon na saray puso ra; sikara so nampasirayew ed dili a biskeg da, ya ikankantiaw da a say limamplo ed sikara nayarian da a sumpaen so nilibo a Lamanite; tan dia ed onia sikara so nampasirayew, tan nanliket ed dala, tan say impamaterter da na dala na saray kaagian da, tan saya so makaseñgeg ed inkarelmeng na ari tan saray sacerdote ra.

20 Tan agawa a wala so sakey a too ed limog da a say ñgaran to Abinadi; tan sikato so linma ed limog da, tan ginapoan to so namprofesiya, a kuan to: Nia, onia so inkuan na Katawan, tan onia so ingangan to ed siak, a nankuan, Onla ka, tan ibagam ed saya a totoo, onia so inkuan na Katawan—Abagey so saraya a totoo, lapu ed anengneng ko so karumsisan da, tan karelmeñgan da, tan say inkabalangkantis da; tan likud no sikara so mambabawi dalawen ko ra ed dili a pasnok ko.

21 Tan likud no sikara so mambabawi tan ompawil ed Katawan a Dios da, nengneng yo, sikara so iawat ko ed lima na saray kabusol da; on, tan sikara so naawit ed inkaaripen; tan sikara so napasegsegang ed lima na saray kabusol da.

22 Tan nagawa a nakabatan da a siak so Katawan a Dios da, tan siak so sakey a maimon a Dios, ya ondadalaw ed kaugsan na saray totook.

23 Tan nagawa a likud no saya a totoo so mambabawi tan ompawil ed Katawan a Dios da, sikara so naawit ed inkaaripen; tan angapo so mañgilaban ed sikara, no ag say Katawan a Makapanyari ed Amin a Dios.

24 On, tan nagawa sano sikara so onnañgis ed siak manmaliw ak a mantantan ya ondeñgel ed nañgis da; on, tan itepel ko a sikara so bakbaken na saray kabusol da.

25 Tan likud no sikara so mambabawi ed panamegley na langotsi tan dapol, tan onnañgis ira a madaleyet ed Katawan tan Dios da, ag ko deñgelen so saray pikakasi ra, ni say ilaban ko ra ed saray segsegang da; tan onia so inkuan na Katawan, tan onia so ingangan to ed siak.

26 Natan agawa sanen imbalikas nen Abinadi so saraya a salita ed sikara agay la so sanok da ed sikato, tan nampilalekan da ya ekalen so bilay to; balet sikato so inlaban na Katawan ed saray lima da.

27 Natan sanen si ari Noah nadñgel to so saray salita nen Abinadi ed saray totoo, sikato met so sinmanok; tan inkuan to: Siopa si Abinadi, pian siak tan saray totook so okomen to, odino siopa so Katawan, a mañgawit na ontan la a kabaleg a segsegang ed saray totook?

28 Igangan ko ed sikayo ya awiten yo dia si Abinadi, pian sikato so pateyen ko, lapu ed imbesñgaw to so saraya a beñgatla pian pagalawen to so saray totook a mampasnok ed sakey tan sakey, tan pawalaen to so baliñgaan ed limog na saray totook; dia ed ontan sikato so pateyen ko.

29 Natan saray mata na totoo so apereñgan; dia ed ontan pinaawet da so saray puso ra sumpa ed saray salita nen Abinadi, tan nanseetan da nanlapu ed saman a panaon a sikato so alaen da. Tan si ari Noah pinaawet to so puso to sumpa ed salita na Katawan, tan sikato so ag nambabawi ed saray mauges a kagagawa to.