1 Natan kayari a ginawa na saray lalaki ya anak nen Mosiah so saraya ya amin a beñgatla, sikara so añgala na pigara a bilang ed saray kaiba ra tan sikara so pinmawil ed kinen ama ra, ya ari, tan kinerew da ed sikato ya abuloyan to ra ya onla, a kaiba ra so saray pinili ra, pian sikara so mampulong ed dalin na Nephi na saray beñgatla a nadñgel da, tan pian ibañgat da so salita na Dios ed saray kaagian da a Lamanite—

2 Ag la piga sikara so naawit da ed pikakabat ed Katawan a Dios da, tan ipamuria ra so saray kaugsan na kaamaan da; tan ag la piga no sikara so natambal da ed saray pambusol da ed saray Nephite, pian sikara met so naawit a migayaga ed Katawan a Dios da, pian sikara so mikaaro ed balang sinansakey, tan pian angapo la so baliñgaan ed amin a dalin ya initer na Katawan a Dios da ed sikara.

3 Natan sikara so mampilalek a say kilalaban so nibawag ed balang sakey a pinalsa, lapu ed ag da natepelan ya angan saksakey a kamarerua na too so nabalang; on, angan say pakanunot da a say sakey a kamarerua so mantepel ed andi-angaan a kairapan so makaseñgeg na kayegyeg tan pangiwgiw da.

4 Tan dia ed onia say Espiritu na Katawan so nankimey ed sikara, lapu ed sikara so sankaugesan ed saray managkasalanan. Tan say Katawan anengneng to a manepeg ed andi-angaan a panañgasi to so pañgiligyas to ed sikara; manwari ya ontan sikara so nantepel na dakel a sulit na kamarerua lapu ed saray kaugesan da, a sikara so nantepel na ambelat tan sikara so tinmakot ompan sikara so nibantak ya ando la ya ando.

5 Tan agawa a sikara so akikasi ed si ama ra ed loob na dakel ya agew pian sikara so onla ed dalin na Nephi.

6 Tan si ari Mosiah so linma tan intepet to ed Katawan no abuloyan to so saray lalaki ya anak to ya onla ed limog na saray Lamanite a mampulong na salita.

7 Tan say Katawan inkuan to ed si Mosiah: Abuloyan mo ra ya onla, lapu ed dakel so manisia ed saray salita ra, tan sikara so nawalaan na andi-angaan a bilay; tan siak so mañgilaban ed saray anak mo ed lima na saray Lamanite.

8 Tan agawa a si Mosiah inabuloyan to ra pian sikara so onla tan gawaen da so unong ed kerew da.

9 Tan sikara so nambaroy ed kalawakan ya onla a mampulong na salita ed limog na saray Lamanite; tan iter ko so kasulatan na saray ginagawa ra kayari to nia.

10 Natan si ari Mosiah angapo so napañgiteran to na panarian, lapu ed angapo so angan sakey ed saray lalaki ya anak to so mañgawat na panarian.

11 Dia ed ontan inala to so saray kasulatan a nitatak ed saray piligo a gansa, tan ontan met ed saray piligo nen Nephi, tan amin a beñgatla ya insinop tan inagel to pian ag naderal unong ed gangan na Dios, kayari to ya impatalus tan ingangan to a nisulat so saray kasulatan a wala ed saray piligo a balitok ya arumog na saray totoo nen Limhi, a saraya so niawat ed sikato ed panamegley na lima nen Limhi;

12 Tan saya so ginawa to lapu ed baleg a sesga na saray totoo to; lapu ed ag-nasuksukat so pilalek da a nakabatan so nipaakar ed saray totoo ya aderal.

13 Tan natan impatalus to so saraya ed panamegley na saraman so duara a bato ya akapeket ed duara a gilig na basikaw.

14 Natan saraya a beñgatla so niparaan a nanlapu la ed gapo, tan saraya so nipalima manlapu ed sakey a kailalakan ya anga ed sananey a kailalakan, ed gagala a pañgipatalus ed saray salita;

15 Tan saraya so nisinop tan niagel ed panamegley na lima na Katawan, pian nipakabat to ed balang sakey a pinalsa a mankayarian ed dalin so saray kaugsan tan karumsisan na saray totoo to;

16 Tan siopaman ya awalaan na saraya a beñgatla so natawag a too a makapikabat ed linawa na Dios, unong ed kanengneñgan na kadaanan a panaon.

17 Natan kayari nen Mosiah ya impatalus so saraya a kasulatan, nia, saya so añgiter ed saray agawgawa ed saray totoo ya aderal, manlapu ed panaon a sikara so aderal a papawil ed impañgipaalagey na baleg a tori, ed panaon a say Katawan kinewkew to so salita na saray totoo tan sikara so nitayak ed tapew na amin a dalin, on, tan angan nanlapu ed panaon ya anga ed inkapalsa nen Adan.

18 Natan saya ya inkagawa so gapo no akin saray totoo nen Mosiah so nanermen a mapalalo, on, sikara so napno na ermen; manwari ya ontan saya so añgiter ed sikara na dakel a pikakabat, lapu ed saya sikara so nangayaga.

19 Tan saya ya inkagawa so nisulat kayari to nia; tan nia, nakaukolan ya amin a totoo nakabatan da so saraya a beñgatla a nisulat ed saya a kasulatan.

20 Tan natan, unong ed asalita la ed sikayo, a kayari nen ari Mosiah a nangawa ed saraya a beñgatla, inala to so saray piligo a gansa, tan amin a beñgatla ya insinop to, tan saraya so iniawat to ed kinen Alma, ya anak nen Alma; on, amin a kasulatan, tan ontan met ed saray panañgipatalus, tan saraya so iniawat to ed sikato, tan ingangan to ed sikato a saraya so isinop to tan iagel to, tan ontan met isinop to so sakey a kasulatan na saray totoo, tan iawat to ed sakey a kapolian ya anga ed sananey, angan siñga unong a saraya so niawat nanlapu a saray panaon ya intaynan nen Lehi ed Jerusalem.