Pukfel
Mosaia 7


Sopun 7

Ammon a kuna ewe fonuen Liai-Nifai, ikewe Limai a king ie—Noun Limai kewe aramas ra nom non fotek ngeni ekkewe chon Leiman—Limai a aporousa uruor—Emon soufos (Apinatai) a pwarata pwe Kraist i ewe Kot me Semenapen mettoch meinisin—Ekkewe ra fotuki nimengaw repwe kini ewuniar, me ekkewe ir ra wanong ar apinukunuk non ewe Samon repwe ngaseno. Arap ngeni 121 Ier Mwen Kraist.

1 Iwe iei, non ewe fansoun mwirin king Mosaia a wor an soposoponon kinamwe ren ukukun unungat ier, a fokkun mochen epwe sinei usun ekkewe aramas ra feita repwe nonnom non ewe fonuen Liai-Nifai, are non ewe teninimwen Liai-Nifai; pun noun kewe aramas resamo rongorong seni ir seni ewe fansoun ra su seni ewe fonuen Saraemla; iei minne, ra aosukosuka i ren ar kewe kapaseis.

2 Iwe non ewe fansoun king Mosaia a mutata pwe engon me wonomen me nein nour kewe mwan mi pochokun repwe tongeni feita ngeni ewe fonuen Liai-Nifai, pwe repwe eis usun pwir kewe.

3 Iwe non ewe fansoun non ewe soran ra poputa ne feita, iwe ra wei emon Ammon, i a emon mwan mi pochokun me napanap, me emon mwirimwirin Saraemla; iwe i pwan nour sou emmwen.

4 Iwe iei, rese sinei ewe aan repwe sai won non ewe fonu pon ar repwe feita ngeni ewe fonuen Liai-Nifai; iei minne ra mwanech fetan chommong ran non ewe fonu pon, pwan mwo faik ran ra mwanech fetan.

5 Iwe nupwen ra fen mwanech fetan faik ran ra feito ngeni ew chukuchukuta, minne a nom ennefenin ewe fonuen Sailum, iwe ikewe ra aueta imwer kewe imw mangaku.

6 Iwe Ammon a angei unumon me nein pwin kewe, iwe ikkei iter Amalekai, Ilem, me Hem, iwe ra feitiw ngeni ewe fonuen Nifai.

7 Iwe nengeni, ra churi ewe kingen ekkewe aramas ekkewe ra nom non ewe fonuen Nifai, me non ewe fonuen Sailum; iwe ra rokopwanino me ren noun ewe king kewe chon mas, iwe ra ono, me ra fofo, me ra wareno ngeni nenien kanapus.

8 Iwe non ewe fansoun nupwen ra nonnom non kanapus non ru ran ra uweiareno me mwen ewe king, iwe fofor kewe a pichino; iwe ra uta me mwen ewe king, iwe ra mumuta, are fen annuk, pwe repwe ponueni ekkewe kapaseis minne i epwe eisini ir.

9 Iwe a apasa ngeni ir: Nengeni, Ngang Limai, ewe noun Noah, i ewe noun Sinef, ewe a feita seni ewe fonuen Saraemla pwe epwe fonueni ei fonu, ewe fonuen semer kewe, ewe a finita epwe emon king me ren mongungun ekkewe aramas.

10 Iwe iei, ua mochen pwe upwe sinei ewe popun ren minne oua fen fokkun pwaracho ren ami feito unukun ekkewe tittin ewe teninimw, nupwen ngang, won inisi, ua fen nom ren nei kewe chon mas nukun ewe tit?

11 Iwe iei, ren ei popun ua fen mutata pwe oupwe tumun, pwe upwe tongeni eisini kemi, are esap iei iwe ua fen fori pwe nei kewe chon mas repwe fen niikemino. Oua mumuta oupwe kapas.

12 Iwe iei, nupwen Ammon a kuna pwe a mumuta epwe kapas, a feino me pwisin chappetiw me mwen ewe king; me uta sefan a apasa: O king, ua kinisou me mwen Kot non ei ran pwe ngang mi chiwen manau, me ua mumuta upwe kapas; iwe upwe sotuni ne kapas fiti pwaracho;

13 Pun ngang mi ennetin sinei pwe ika oua fen sineiei ousap fen mutata pwe upwe fofo ren ekkei san. Pun ngang Ammon, me ngang emon mwirimwirin Saraemla, me ua fen feita seni ewe fonuen Saraemla pwe upwe eis usun pwim kewe, ekkewe Sinef a fen uweireta seni ena fonu.

14 Iwe iei, non ewe fansoun mwirin Limai a rongorong ekkewe kapas an Ammon, i a fokkun pwapwa, iwe a apasa: Iei, ua fokkun ennetin sinei pwe pwi kewe ekkewe ir mi nom non ewe fonuen Saraemla ir mi chiwen manau. Iwe iei, upwe pwapwa; iwe non ewe soran upwe fori pwe nei kewe aramas repwe pwan pwapwa.

15 Pun nengeni, am aua nom non fotek ngeni ekkewe chon Leiman, me am aua echimw am aupwe moni takises minne mi weires ne engino ngeni. Iwe iei, nengeni, pwim kewe repwe angasakicheno seni fotek, are seni ne poun ekkewe chon Leiman, iwe am aupwe nour slave; pun mi murino pwe am aupwe slave ngeni ekkewe chon Nifai nap seni am aupwe moni takises ngeni ewe kingen ekkewe chon Leiman.

16 Iwe iei, king Limai a annuku noun kewe chon mas pwe resap chiwen foti Ammon me pwan pwin kewe, nge repwe fori pwe repwe feino ngeni ewe chukuchukuta minne a nom ennefenin Sailum, me uweiato pwir kewe ngeni ewe teninimw, ren ewe popun pwe repwe tongeni mwongo, me ka, me asosoi inisir seni angangen ar we sai; pun ra fen riaffouni chommong mettoch; ra riaffouni echik, kaka, me apwangapwang.

17 Iwe iei, non ewe fansoun non ewe soran king Limai a tinano ew porous me nein noun kewe aramas meinisin, ren ewe popun pwe repwe tongeni pwisin ioifengen ngeni ewe tempel, pwe repwe rongorong ekkewe kapas minne i epwe apasa ngeni ir.

18 Iwe non ewe fansoun nupwen ra pwisin ioifengen pwe i epwe kapas ngeni ir non ei napanap, a apasa: O ami, nei aramas, sachetai mokuremi me oupwe kinamwe; pun nengeni, ewe fansoun a arapeto, are ese towaw, nupwen sisap chiwen nom fan nemenien ekkewe chon koum ngenikich, iwe me nukun ach kewe chommong osukosuk, minne mi namotongaw; nge inamo ua apinukunuku pwe mi chok wor ew osukosuk mi öch epwe fis.

19 Iei minne, sachetai mokuremi, me oupwe pwapwa, me wanong ami apinukunuk non Kot, non ena Kot ewe Koten Abraham, me Isaac, me Jacob; me pwan, ena Kot ewe a uweiau ekkewe aramasen Israel seni ewe fonuen Egypt, me fori pwe repwe fetaneu seni ewe Setipar won puun mi pwas, me amwongoni ir ren manna pwe resap tongeni mano non ewe fonu pon; me pwan chommong mettoch i a fori fan iter.

20 Iwe pwan, ena pwan chok Kot ewe a uweiau semach kewe seni ewe fonuen Jerusalem, me a fen isoni me tumunu noun kewe aramas pwan mwo tori iei; iwe nengeni, iwe pokiten ach kewe fofforungaw me angang mi anieput i a uweiakichinong non fotek.

21 Iwe ami meinisin oua chon pwarata non ei ran, pwe Sinef, ewe a kefinita epwe king ngeni ekkei aramas, i a wesewesen mochen epwe fonueni ewe fonuen seman kewe, iei minne i a tupuno me ren ewe nikatupotup me tipachem sona an king Leiman, ewe a fen tonong non ew pung ngeni king Sinef, me a fen fangenong non poun ekkewe pisekisekin ew kinikinin ewe fonu, are fen ewe teninimwen Liai-Nifai, me ewe teninimwen Sailum; me ewe fonu unukur—

22 Iwe meinisin ei a fori, ren ew popun epwe wanong ekkei aramas fan nemenem are non fotek. Iwe nengeni, am non ei fansoun am aua moni takises ngeni ewe kingen ekkewe chon Leiman, tori ukukun esopun am kewe corn, me am kewe barley, me pwan am kewe grain meinisin seni ew me ew sokkun nikinik, me esopun napenon nöum kewe penen man me nöum kewe pwiin man; me pwan esopun meinisin met mi wor rem are pisekini ewe kingen ekkewe chon Leiman a echimwa senikem, are a pwan echimwa senikem manauem.

23 Iwe iei, met ei ese weires ne engino ngeni? Iwe met ei, ach riaffou, ese napanap? Iei nengeni, ifa usun watten popun ach sipwe netipeta.

24 Ewer, ua apasa ngenikemi, mi napanap ekkewe popun minne sipwe netipeta ren; pun nengeni fitemon me nein pwich kewe ra fen ninnino, me char kewe ra fen sur non namotmwan, iwe meinisin pokiten angangangaw.

25 Pun ika ekkei aramas rese turunong non atai annuk ewe Samon esap fen mutata pwe ei ennetin ngaw esap feito wor. Nge nengeni, rese ausening ngeni an kewe kapas; nge a fisita anini fengen neir, a fokkun napanap iwe a efisi repwe assuku cha me neir pwisin.

26 Iwe emon soufosun ewe Samon ra fen nieno; ewer, emon mwan mi kefinita seni Kot, ewe a ereni ir usun ar fofforungaw me angang mi anieput, me osini usun chommong mettoch minne repwe feito, ewer, pwan mwo ewe wareton Kraist.

27 Iwe pokiten i a apasa ngeni ir pwe Kraist i ewe Kot, ewe Semenapen mettoch meinisin, me apasa pwe i epwe wata won i ewe napanapen aramas, iwe epwe ina ewe napanap epwe nonno ngeni minne aramas a for seni non ewe nepoputan; are non ekkoch kapas, a apasa pwe aramas a for non ewe napanapen Kot, me pwan Kot epwe feitiw nein ekkewe noun aramas, me wata won i aion me cha, me feino won unusen ewe fonufan—

28 Iwe iei, pokiten a apasa ei, ra nieno i; iwe pwan chommong mettoch ra fori minne a uweiatiw ewe ningeringerin Kot wor. Iei minne, ion a mairu ren ar ra nom non fotek, iwe ra pwan ninni ren riaffou mi anetipechou?

29 Pun nengeni, ewe Samon a fen apasa: Usap anisi nei kewe aramas non ewe ranin ar atai annuk; nge upwe eppeti aaner kewe pwe resap feioch; iwe ar angang repwe winiti foun chepetek me mwer.

30 Iwe pwan, i apasa: Ika nei kewe aramas repwe fotuki nimengaw repwe pwan kini uwan namotongawan we non ewe ewuniar; me pungunon we epwe poison.

31 Iwe a pwan apasa: Ika nei kewe aramas repwe fotuki nimengaw repwe kini uwan ewe asepwanin otiw, minne a uweiato kiteter mi mwitir.

32 Iwe iei, nengeni, ewe pwonen ewe Samon a pwonueta, iwe oua ninni me riaffou.

33 Nge ika oupwe kun ngeni ewe Samon ren unusen mochenin netipemi, me wanong ami apinukunuk non i, me angang ngeni i ren unusen ami ekiek, ika oupwe fori ei, i epwe, anongonong won met a fich ngeni netipan me an mochen, angasakemino seni fotek.