Pukfel
Mosaia 22


Sopun 22

Kokkot ra foruno fan iten ekkewe aramas ar repwe tiweno seni ewe fotek ngeni ekkewe chon Leiman—Ekkewe chon Leiman ra sakaweno me ren ekkewe chon Nifai—Ekkewe aramas ra tiweno, niwin ngeni Saraemla, me ra nom fan nemenien King Mosaia. Arap ngeni 121–120 Ier Mwen Kraist.

1 Iwe iei non ewe fansoun Ammon me king Limai ra poputa ne apungupung ngeni ekkewe aramas ifa usun ar repwe pwisin angasereno seni fotek; iwe ra pwan mwo fori pwe ekkewe aramas meinisin repwe ioifengenir; iwe ei ra fori pwe repwe tongeni angei mongungun ekkewe aramas.

2 Iwe non ewe fansoun rese tongeni kuna ew aan ar repwe pwisin angasereno seni fotek, tiwenon chok ika pwe repwe angei punuwer kewe me nour kewe, me nour kewe penen man, me pwin man, me imwer kewe imw mangaku, me feino ngeni ewe fonu pon; pun ekkewe chon Leiman ra fokkun chommong, ese tufich an ekkewe aramasen Limai repwe fiu ngeni ir, ar ekiekin repwe pwisin angasereno seni fotek me ren ewe ketinas.

3 Iei non ewe fansoun Gideon a feino me uta me mwen ewe king, me apasa ngeni i: Iei O king, ka fen ausening ngeni ai kapas akkom non chommong fansoun nupwen sia fiu ngeni pwich kewe, ekkewe chon Leiman.

4 Iwe iei O king, ika pwe kesamo sineiei pwe upwe emon chon angang mi namotongaw, are ika pwe ka fen rongorong ngeni och ukukun ai kapas akkom, me ika ra fen aninisoch ngonuk, ina usun ua fokkun mochen pwe kopwe rongorong ngeni ai kapas non ei fansoun, iwe upwe noum chon angang me angasano ekkei aramas seni fotek.

5 Iwe ewe king a mut ngeni i pwe epwe tongeni kapas. Iwe Gideon a apasa ngeni i:

6 Nengeni ewe kukkun aan nukanapan ei neni, me non ewe tit nukunupan ei neni, ren nukunupan nepekin ewe teninimw. Ekkewe chon Leiman, are ekkewe chon masen noun ekkewe chon Leiman, fansoun nepwin ra sakaweno; iei minne sipwe tinano ew porous me nein ekkei aramas meinisin pwe repwe ionfengeni nour kewe penen man me pwin man, pwe repwe tongeni tinareno non ewe fonu pon fansoun nepwin.

7 Iwe upwe feino anongonong won om annuk me moni ewe amuchunon takisesin wain ngeni ekkewe chon Leiman, iwe repwe sakaweno; iwe sipwe feino me non ewe kukkun aan mi monomon won peniefefinin ar we nenien asoso non ewe masies nupwen ra sakaweno me mour.

8 Iei sipwe feino fiti pwan punuwach kewe me nouch kewe, nouch kewe penen man, me nouch pwin man non ewe fonu pon; iwe sipwe sai unukun ewe fonuen Sailum.

9 Iwe non ewe fansoun ewe king a ausening ngeni ekkewe kapas an Gideon.

10 Iwe king Limai a annuku noun kewe aramas repwe ionfengeni nour kewe penen man; iwe a tinano ewe takisesin wain ngeni ekkewe chon Leiman; iwe a pwan tinano chommong wain, pwe ew niffang ngeni ir; iwe ra un watte seni ewe wain minne king Limai a tinano ngeni ir.

11 Iwe non ewe fansoun pwe ekkewe aramasen king Limai ra feino fansoun nepwin non ewe fonu pon fiti nour kewe penen man me nour kewe pwin man, iwe ra feino rokopwani ewe fonuen Sailum non ewe fonu pon, iwe ra kun ngeni ewe fonuen Saraemla, ra emmwen me ren Ammon me pwin kewe.

12 Iwe ra uwei nour kewe gold meinisin, me silver, me ar mettoch mi auchea, minne ra tongeni uwei, me ra pwan uwei ngeni ir pisekir kewe, non ewe fonu pon; iwe ra sopweno ar we sai.

13 Iwe mwirin chommong ran non ewe fonu pon ra tori ewe fonuen Saraemla, me choni noun Mosaia kewe aramas, me ra nom fan nemenian.

14 Iwe non ewe fansoun Mosaia a etiwer fiti pwapwa; iwe a pwan angei ar kewe uruo, me pwan ekkewe uruo minne ra pwá me ren ekkewe aramasen Limai.

15 Iwe iei non ewe fansoun nupwen ekkewe chon Leiman ra kuna pwe ekkewe aramasen Limai ra feino tou seni ewe fonu fansoun nepwin, ra tinano ew mwichen sounfiu ngeni non ewe fonu pon pwe repwe tapweno mwirir;

16 Iwe mwirin ar tapwer non ru ran, rese chiwen tongeni tapwei raser kewe; iei minne ra monucheno non ewe fonu pon.