Pukfel
Mosaia 3


Sopun 3

King Benjamin a sopweno an afanafan—Ewe Samon mi Uren Manaman epwe angang fetan nein aramas non ew inisin puun—Cha epwe suk seni mononan meinisin nupwen A achasefan fan iten tipisin fonufan—Itan we ina chok ewe it seni minne amanau epwe feito seni—Aramas ra tongeni poutano ekkewe mochenin inis me winiti Souneng me ren ewe Achasefan—Ewe riaffoun ekkewe aramas mi ngaw epwene usun ew noomun ekkei me brimstone. Arap ngeni 124 Ier Mwen Kraist

1 Iwe pwan ami pwi, ua mochen upwe tingor ami oupwe ausening, pun a wor ekis met upwe apasa ngenikemi; pun nengeni, mi wor och mettoch upwe erenikemi usun ekkewe mettoch repwe feito.

2 Iwe ekkewe mettoch minne upwe erenikemi ra fen pwato ngeniei me ren emon chon nang seni Kot. Iwe i a apasa ngeniei: Neno; iwe ua neno, iwe nengeni a uta me mwei.

3 Iwe a apasa ngeniei: Neno, me rongorong ekkewe kapas minne upwe erenuk; pun nengeni, ua feito pwe upwe affata ngonuk ekkewe kapas allim usun pwapwa wachemuk.

4 Pun ewe Samon a rongorong om iotek, me a apungu om wenechar, iwe a tinieito pwe upwe affata ngonuk pwe kopwe tongeni pwapwa; me kopwe tongeni affata ngeni noum kewe aramas, pwe repwe pwan tongeni uren pwapwa.

5 Pun nengeni, ewe fansoun a feito, iwe ese towaw, pwe ren manaman, ewe Samon mi Uren Manaman ewe a nemenem, ewe mi fen manau, me a chiwen manau seni unusen fansoun esemuch ngeni unusen fansoun esemuch, epwe feitiw seni nang nein ekkewe noun aramas, me epwe nonnom non ew inisin puun, me epwe feino nein aramas, epwe fori manaman mi napanap, awewe usun an echikera ekkewe mi semwen, amanaua ekkewe mi mano, fori ekkewe mi pechema ar repwe fetan, ekkewe mi chun repwe angei ar tufichin kuna, ekkewe mi pung seninger ar repwe rongorong, me apwaki meinisin sokopaten samau.

6 Iwe epwe aturau ekkewe tefin, are ekkewe ngun mi ngaw minne ra nonnom non netipen ekkewe noun aramas.

7 Iwe nengeni, i epwe engino ngeni sossot, me metekin inis, echik, kaka, me apwangapwang, pwan mwo nap seni met aramas repwe tongeni engino ngeni, tiwenon chok repwe mano ren; pun nengeni, cha a suk seni mononan meinisin, epwe fokkun napanap an riaffou fan iten ekkewe fofforungaw me ekkewe angang mi anieput an noun kewe aramas.

8 Iwe epwe iteni Jises Kraist, ewe Noun Kot, ewe Semen nang me fonufan, ewe Chon Fori mettoch meinisin seni nepoputan; iwe inan we epwe iteni Mary.

9 Iwe nengeni, a feito ngeni pwisin fonuan, pwe amanau epwe tongeni fis ngeni ekkewe noun aramas pwan mwo seni nuku non itan we; iwe mwirin mwo ekkei mettoch meinisin repwe chok ekieki pwe i emon mwan, me repwe apasa pwe a wor ren emon tefin, me repwe ninni i, me repwe irapengesi i.

10 Iwe i epwe manausefan won ewe aunungatin ran seni mano; iwe nengeni, a nom ne apungu ewe fonufan; iwe nengeni, ekkei mettoch meinisin ra fis pwe ew kapung mi tupwon epwe tongeni feito won ekkewe noun aramas.

11 Pun nengeni, me chan a pwan achasefan fan iten tipisin ekkewe ra turutiw pokiten ewe atai annuk an Adam, ekkewe ra mano nge rese sinei ewe mochenin Kot usur, are ekkewe ra tipis non ar rese weweiti.

12 Nge riaffou, riaffou ngeni i ewe a sinei pwe a ungeni Kot! Pun amanau esap feito ngeni ekkena sokun tiwenon chok epwe seni aier me nuku non ewe Samon Jises Kraist.

13 Iwe ewe Samon Kot a fen tinano noun kewe soufos mi fel nein ekkewe noun aramas meinisin, ar repwe affata ekkei mettoch ngeni einang, muu, me sokopaten kapas meinisin, pwe ren ewe popun pwe ion epwe nuku pwe Kraist epwe feito, ir repwe pwan tongeni angei omusomusen ar kewe tipis, me repwe tongeni pwapwa ren ewe pwapwa mi fokkun napanap, usun ita i a fen feito neir.

14 Nge ewe Samon Kot a kuna pwe noun kewe aramas ir aramas nukumach, iwe i a ngeni ir ew annuk, pwan ina ewe annukun Moses.

15 Iwe chommong esisin, me amwarar, me anapanap, me ununun i a pwar ngeni ir, usun an we wareto; me ekkewe soufos mi fel ra pwan kapas ngeni ir usun an we wareto; iwe inamo ra apochokunano netiper, me rese weweiti pwe ewe annukun Moses esap fich ngeni emon tiwenon chok ika epwe seni ewe achasefanin chan we.

16 Iwe ika mwo pwe epwe tufich pwe kukkun semirit repwe tongeni tipis resap tongeni manau; nge ua apasa ngenikemi ra feioch; pun nengeni, usun ren Adam, are pungun mettoch mi wor rech seni uputiw, ra turutiw, pwe mwo ewe chan Kraist a achasefan fan iten tipisir.

17 Iwe soposopono, ua apasa ngenikemi, pwe esap wor pwan ew it epwe kawor are pwan ew aan are napanap ren minne amanau epwe tongeni feito ngeni ekkewe noun aramas, me nukun chok non me seni iten Kraist, ewe Samon mi Uren Manaman.

18 Pun nengeni i a apungu, me an kapung mi pung; me ewe monukon a mano ne monukonun esap mano non pekin ngun; nge aramas repwe unumi riaffoun poutmwanino esemuch ngeni pwisin ngunur tiwenon chok ika repwe atipetekisoner me winiti usun kukkun semirit, me nuku pwe amanau a fen fis, me mi fis, me epwe feito, non me seni ewe achasefanin chan Kraist, ewe Samon mi Uren Manaman.

19 Pun ewe inisin aramas i ewe chon koum ngeni Kot, me a fen ina usun seni ewe turutiwen Adam, me epwe chok fis, feinfeino me esemuch, tiwenon chok ika a fang ngeni ekkewe pesepesen ewe Ngun mi Fel, me poutano ewe inisin aramas me winiti emon souneng seni ewe achasefanin Kraist ewe Samon, me winiti usun emon semirit, fangoch, mosonoson, tipetekison, songomang, uren tong, tipemecheres ne fang ngeni mettoch meinisin minne ewe Samon a ekieki pwe mi öch epwe efisi wor, pwan mwo usun emon semirit a fang ngeni seman we.

20 Iwe soposopono, ua apasa ngenikemi, pwe ewe fansoun epwe feito nupwen ewe miritin emon Chon Amanau epwe mereseno won unusen ekkewe muu, einang, sokopaten kapas, me aramas meinisin.

21 Iwe nengeni, nupwen ewe fansoun a feito, esap wor emon epwe nom non pekin nimenimoch me mwen Kot, tiwenon chok kukkun semirit, epwe chok seni aier me nuku non iten ewe Samon Kot mi Uren Manaman.

22 Iwe pwan mwo atun ei fansoun, nupwen kopwene fen aiti noum kewe aramas ekkewe mettoch minne ewe Samon om Kot a fen annuku ngonuk, pwan mwo ena atun resap chiwen nom non kinikinin nimenimoch ne mesen Kot, tiwenon chok ika epwe anongonong won ekkewe kapas minne ua fen apasa ngonuk.

23 Iwe iei ua fen apasa ekkewe kapas minne ewe Samon Kot a annuku ngeniei.

24 Iwe iei anon ewe Samon: Repwe nonnom pwe repwe usun ew kapasen pwarata mi fatafatoch ngeni ekkei aramas, atun ewe ranin kapung; ina minne repwe kapung, emon me emon aramas anongonong won an kewe angang, ika repwe öch, are repwe ngaw.

25 Iwe ika repwe ngaw repwe pwisin angei ew anoninenin ekiekin ar kewe niemam me angang mi anieput, minne a forir pwe repwe nurusefan seni me mwen ewe Samon ngeni ewe nikinik mi ariaffou me weires esemuch, seni ikewe rese chiwen tongeni niwin; iei minne ra fen unumi poutmwanino ngeni pwisin ngunur.

26 Iei minne, ra fen unumi seni ewe kapen ewe ningeringerin Kot, minne pungoch ese chiwen tongeni amam ngeni ir nap seni a tongeni amam pwe Adam epwe turutiw pokiten an ochoch seni ewe foun ira mi annuk; iei minne, umoumoch ese chiwen tongeni wor an nemenem wor feinfeino chok.

27 Iwe ar riaffou a usun ew noomun ekkei me brimstone, ngetengetin kewe rese tongeni kununo, me otuotun a feita feinfeino me esemuch. Iei ewe Samon a annuku ngeniei. Amen.