1 Iwe non ewe fansoun pwe Amulon a ketiw me mwen mesen ewe kingen ekkewe chon Leiman; iei minne, ewe kingen ekkewe chon Leiman a mut ngeni i me pwin kewe pwe repwe angei wisen sense won ekkei aramas, ewer, pwan mwo won ekkewe aramas ekkewe ir mi nom non ewe fonuen Semlan me non ewe fonuen Sailum, me non ewe fonuen Amulon.

2 Pun ekkewe chon Leiman ra angei nemenem won meinisin ekkewe fonu; iei minne, ewe kingen ekkewe chon Leiman a finata ekkoch king won ekkei fonu meinisin.

3 Iwe iei iten ewe kingen ekkewe chon Leiman itan Leiman, iwe a eiteit mwirin itan seman we; iwe iei minne a iteni king Leiman. Iwe i a king won ew chommongun aramas.

4 Iwe a finata ekkoch sensen pwin Amulon kewe non ew me ew fonu minne a nemenemeno me ren noun kewe aramas; iwe ewe kapasen fonuen Nifai a poputa ne afanafan me nein ekkewe aramasen ekkewe chon Leiman meinisin.

5 Iwe ra ew aramas mi chiechioch nefiner; nge inamo rese sinei Kot; ekkewe pwin Amulon rese pwan aitir och mettoch usun ewe Samon ar Kot, rese pwan aitir ewe annukun Moses; rese pwan aitir ekkewe kapas an Apinatai;

6 Nge ra aitir pwe repwe soposopono ne makkei ar uruo, me pwe repwe tongeni mak emon ngeni pwan emon.

7 Iwe iei ekkewe chon Leiman ra poputa ne napeno non pisekisek, me poputa ne ekkesiwin nefiner me ra pisekisekino, me poputa ne winiti ew aramas mi nikatuputup me ew aramas mi tipachem sona, usun ren nikatuputupen fonufan, ewer, ew fokkun aramas mi nikatuputup, ra pwapwa non sokopaten fofforungaw me sona meinisin, tiwenon chok ika epwe pwisin me nein pwir kewe.

8 Iwe iei non ewe fansoun pwe Amulon a poputa ne aea ewe mumutan pochokun won Alma me pwin kewe, me poputa ne ariaffou i, me fori pwe noun kewe repwe ariaffou nour kewe.

9 Pun Amulon mi sisinei Alma, pwe i a fen emon noun ewe king kewe pris akkom, me pwan i ewe a nuku ekkewe kapas an Apinatai me a kasuno me mwen ewe king, iwe iei minne i a song ren; pun i a nom fan nemenien king Leiman, nge inamo i a aea ewe mumutan pochokun wor, me wata ekkoch angang wor, me awora ekkoch chon nemenem wor.

10 Iwe non ewe fansoun pwe a fokkun pochokun ar kewe riaffou iwe ra poputa ne sio napanap ngeni Kot.

11 Iwe Amulon a annuku ngeni ir pwe repwe akkouno ar kewe sio; iwe a awora ekkoch chon mas wor pwe repwe nenengeni ir, pwe ion chok epwe pwá pwe a kokkori Kot epwe ninnino.

12 Iwe Alma me noun kewe aramas rese anoumwongata neuwer ngeni ewe Samon ar Kot, nge ra wau unusen netiper ngeni i; iwe i mi sinei ekiekin netiper.

13 Iwe non ewe fansoun ewe mongungun ewe Samon a feito ngeni ir non ar kewe riaffou, a apasa: Sachetai mokuremi me oupwe kinamwe, pun ngang mi sinei usun ewe pwon mi pin minne oua fen fori ngeniei; iwe upwe fori ew pwon mi pin ngeni nei aramas me angasereno seni fotek.

14 Iwe upwe pwan ekisano ekkewe achou minne ra wata won afaremi, pwe ousap tongeni mefir me won nukunupemi, pwan mwo nupwen oua nom non fotek; iwe ei upwe fori pwe oupwe uta pwe oupwe chon pwarata ngeniei mwirin, me pwe oupwe tongeni ennetin sinei pwe ngang, ewe Samon Kot, ua churi nei aramas non ar riaffou.

15 Iwe iei non ewe fansoun pwe ekkewe achou minne ra nom won Alma me pwin kewe ra paneno; ewer, ewe Samon a apochokunareno pwe repwe tongeni engino ngeni achour kewe ren mecheres, iwe ra fangeta fiti pwapwa me fiti tipepos ngeni mochenin ewe Samon meinisin.

16 Iwe non ewe fansoun a fokkun pochokun ar nuku me ar tipepos iwe ewe mongungun ewe Samon a feito sefan ngeni ir, a apasa: Oupwe kinamwe, pun non ewe soran upwe angasakemino seni fotek.

17 Iwe a apasa ngeni Alma: Kopwe feino me mwen ekkei aramas, iwe upwe fituk me angasano ekkei aramas seni fotek.

18 Iwe non ewe fansoun pwe Alma me noun kewe aramas non fansoun nepwin ra ionfengeni nour kewe penen man, me pwan ar kewe grain; ewer, pwan mwo unusen ewe fansoun nepwin ra ionfengeni nour kewe penen man.

19 Iwe non ewe nesesor ewe Samon a fori ew mouruchou epwe feito won ekkewe chon Leiman, ewer, me pwan nour kewe chon nemenem meinisin ra nom non ew anonnonun mour.

20 Iwe Alma me noun kewe aramas ra feino ngeni ewe fonu pon; iwe nupwen ra sai unusen ewe ran ra aueta imwer kewe imw mangaku non ew nemonun chuk, iwe ra eita ngeni ewe nemonun chuk Alma, pokiten i a emmweni aaner we me non ewe fonu pon.

21 Ewer, iwe non ewe nemonun chukun Alma ra ennetin wau ar kinisou ngeni Kot pokiten i a fen umoumoch ngeni ir, me ekisano achour kewe, me a fen angasereno seni fotek; pun ra fen nom non fotek, iwe ese wor emon a tongeni angasereno tiwenon chok ewe Samon ar Kot.

22 Iwe ra kinisou ngeni Kot, ewer, nour kewe mwan meinisin me nour kewe fefin meinisin me nour kewe semirit meinisin ekkewe ra tongeni kapas me ne anoumwongata neuwer non ar mwareiti ar Kot.

23 Iwe iei ewe Samon a apasa ngeni Alma: Emwitiruk me atouuk me noum kewe aramas seni ei fonu, pun ekkewe chon Leiman ra neno me ra tapweikemi; iei minne tou seni ei fonu, iwe upwe akkouno ekkewe chon Leiman non ei nemonun chuk pwe resap soposopono ne kutta ekkei aramas.

24 Iwe non ewe fansoun pwe ra feino seni ewe nemonun chuk, iwe ra sai non ewe fonu pon.

25 Iwe mwirin ar ra nom non ewe fonu pon non engon me ru ran ra tori ewe fonuen Saraemla; iwe king Mosaia a pwan etiwer fiti pwapwa.