1 Anajwan kik’ulman naq chirix naq eb’ li ^aralal laj Mosiah ke’xb’aanu chixjunil li k’a’aq re ru a’in, ke’xk’am b’ab’ay xk’ihal chirixeb’ ut ke’sutq’i rik’in xyuwa’eb’, a’ li rey, ut ke’xtz’aama chiru naq a’an tixk’e reheb’ naq te’xik, rochb’eeneb’ li sik’b’ileb’ ru xb’aaneb’, taqe’q sa’ li ch’och’ ^bNefi re naq te’ruuq chixjultikankil li k’a’aq re ru ke’rab’i, ut re te’ruuq chixk’eeb’al li raatin li Dios reheb’ laj Lamanita, li ras riitz’ineb’—

2 Re naq maare te’xk’ameb’ chixnawb’al chirix li Qaawa’ lix Dios, ut te’xq’unb’esiheb’ xch’ool chirix xmaa’usilaleb’ lix yuwa’eb’; ut re naq maare te’xk’irtesi lix ^akaqaleb’ xch’ool choq’ reheb’ laj Nefita, re naq eb’ a’an te’k’ame’q ajwi’ chi saho’k sa’ xch’ool rik’in li Qaawa’ lix Dios, re naq te’ruuq chi wank sa’ xyaalal chirib’ileb’ rib’, ut re naq maak’a’aq chik li wech’ok-ib’ sa’ chixjunil li ch’och’ li kixk’e chaq reheb’ li Qaawa’ lix Dios.

3 Anajwan eb’ a’an ke’raj raj naq taach’olob’amanq li kolb’a-ib’ chiru li junjunq li yo’ob’tesinb’il, xb’aan naq ink’a’ ke’ru ^achixkuyb’al naq taa’oso’q ^braam ani junaq chi winq; relik chi yaal, yal xk’oxlankil naq junaq aamej tixnumsi li rahilal ^cmaak’a’ roso’jik naxk’eheb’ chi siksotk ut chi chenchotk.

4 Ut chi jo’kan lix Musiq’ li Qaawa’ kik’anjelak sa’ xb’eeneb’, xb’aan naq a’aneb’ chaq laj maak li ^aq’axal yib’eb’ ru. Ut li Qaawa’ kixk’oxla sa’ li ^bruxtaan maak’a’ roso’jik, naq us xkolb’al lix yu’ameb’; a’b’anan ke’xnumsi naab’al xyot’ikeb’ li raam sa’ xk’ab’a’ lix maa’usilaleb’, ut naab’al li rahilal ke’xk’ul ut ke’xxuwa chaq naq te’tz’eqe’q chi junelik.

5 Ut kik’ulman naq k’iila kutan ke’xtz’aama chiru lix yuwa’ naq te’ruuq chi taqe’k sa’ li ch’och’ Nefi.

6 Ut li rey aj Mosiah xko’o ut kixpatz’ re li Qaawa’ ma us naq tixkanab’eb’ li ralal chi taqe’k sa’ xyanqeb’ laj Lamanita re xjultikankil li aatin.

7 Ut li Qaawa’ kixye re laj Mosiah: Kanab’eb’ chi taqe’k, xb’aan naq naab’aleb’ li te’paab’anq re li raatineb’, ut te’wanq xyu’am chi junelik; ut laa’in ^ateb’inkol chaq laa walal sa’ ruq’eb’ laj Lamanita.

8 Ut kik’ulman naq laj Mosiah kixkanab’ naq te’xik ut te’xb’aanu jo’ chanru ke’xtz’aama.

9 Ut ^ake’xchap xb’e chiru li yamyookil ch’och’ re toxe’taqe’q chixjultikankil li aatin sa’ xyanqeb’ laj Lamanita; ut moqon ^btink’e resil lix b’aanuhomeb’.

10 Anajwan li rey aj Mosiah maa’ani chik wan tixq’axtesi wi’ li awa’b’ejihom, xb’aan naq maajun reheb’ li ralal wan li taak’uluq ta re li awa’b’ejihom.

11 Jo’kan naq kixchap li tz’iib’anb’il esil li wan chi tz’iib’anb’il chiruheb’ li ^aperel ch’iich’ bronce, ut jo’kan ajwi’ eb’ lix perel ch’iich’ laj Nefi, ut chixjunil li k’a’aq re ru kixk’uula chaq ut kixkol chaq rix jo’ chanru lix taqlahom li Dios, chirix naq kixjaltesi chaq ru ut kixtaqla xtz’iib’ankil li esil li tz’iib’anb’il chiruheb’ li ^bperel ch’iich’ oor li ke’tawe’ xb’aaneb’ lix tenamit laj Limhi, li ke’q’axtesiik chaq re xb’aan ruq’ laj Limhi;

12 Ut a’in kixb’aanu xb’aan xnimal xk’a’uxl lix tenamit; xb’aan naq ke’raj chi numtajenaq xnawb’al chirixeb’ li tenamit a’an li sachb’ileb’ chaq.

13 Anajwan ut, kixjaltesi ru a’an rik’in li wiib’ chi ^apek a’an li k’eeb’ileb’ sa’ xkab’ichal xmaril jun li k’onk’ookil ch’iich’.

14 Anajwan kikawresiman li k’a’aq re ru a’in chalen chaq sa’ xtiklajik, ut kinumsiik chiru li junjunq tasal tenamit, choq’ re xk’utb’al xyaalalil li jalanil aatinob’aal;

15 Ut k’uulanb’il ut kolb’il rix xb’aan ruq’ li Qaawa’, re naq a’an tixk’e chi k’ute’k chiru li junjunq chi yo’ob’tesihom li taa’eechaninq re li ch’och’, lix maa’usilal ut lix tz’eqb’eetalil lix tenamit;

16 Ut ani wan rik’in li k’a’aq re ru a’in, aj ^ailol na’leb’ nayehe’ re, jo’ chanru sa’ najter q’e kutan.

17 Anajwan chirix naq laj Mosiah kixchoy xjaltesinkil ru li tz’iib’anb’il esil a’in, k’ehomaq reetal, naxye resil li tenamit li ^ake’sachman, rub’elaj chaq xq’ehil lix sachikeb’ toj naq sa’ xkab’lajik li ^bnimla najt xteramil kab’l, sa’ xq’ehil naq li Qaawa’ ^ckixsachi raatinob’aaleb’ li tenamit, ut ke’jek’iman chi najt chiru lix b’een chixjunil li ruchich’och’; relik chi yaal, ut rub’elaj ajwi’ chaq a’an toj naq yo’ob’tesinb’il chaq laj Adan.

18 Anajwan li esil a’in kixk’e chi numtajenaq xrahileb’ xch’ool lix tenamit laj Mosiah, relik chi yaal, ke’nujak rik’in rahil ch’oolejil; a’b’anan kixk’e naab’al li na’leb’ reheb’, li ke’saho’ wi’ xch’ool.

19 Ut li esil a’in moqon taatz’iib’amanq; xb’aan naq k’ehomaq reetal, aajel ru naq chixjunil reheb’ li tenamit te’xnaw chirix li k’a’aq re ru tz’iib’anb’il sa’ li esil a’in.

20 Ut anajwan, jo’ xinye eere, naq chirix naq li rey aj Mosiah kixb’aanu chixjunil li k’a’aq re ru a’in, kixchapeb’ li perel ch’iich’ ^abronce, ut chixjunil li k’a’aq re ru kixk’uula chaq, ut kixq’axtesi re laj Alma, a’an ralal laj Alma; relik chi yaal, chixjunil li tz’iib’anb’il esil, ut jo’kan ajwi’ li ^bk’utleb’aal aatin, ut kixq’axtesi re a’an, ut kixtaqla naq tixk’uula ut ^ctixkol rix, ut jo’kan ajwi’ tixtz’iib’a jun esil chirix li tenamit, ut taanumsiiq chaq a’an xb’aan li jun tasal tenamit re li jun tasal chik, jo’ chanru ajwi’ kinumsiik chaq chalen chaq xq’ehil naq ki’el chaq laj Lehi Jerusalen.