1 Io e sega li ni kaya ko Aisea: Ko cei sa vakabauta na neitou itukutuku, Ia sa vakatakilai vei cei na liga ni Turaga?

2 Ia ena tubu cake ko koya me vaka na coke e matana, ka vaka na waka ni kau mai na qele mamaca; sa sega ni vinaka na matana ka sa sega ni vatukai vinaka na yagona; ia ni da raici koya, sa sega ni mata vinaka ko koya me da gadrevi koya kina.

3 Sa beci koya ka cati koya ko ira na tamata; sa tamata e daurarawa na lomana, ka sa dau kila ka rarawa; ka eda sa tabonaka na matada mai vei koya; sa beci, ka da a sega ni dokai koya.

4 E dina sa ^acolata ko koya na noda ^brarawa, ka sa kauta voli na rarawa ni lomada; ia eda a vakalewai koya ni sa yaviti ka cudruvi mai vua na Kalou, ka vakararawataki.

5 Ia sa vakamavoataki ko koya ena vuku ni noda ^atalaidredre, ka sa drakusi ena vuku ni noda caka cala; sa tau vua na cudru ni noda vakacegu tale; ia ena we ni kena kuita eda sa ^bvakabulai kina.

6 Koi keda kece, eda sa sese ga me vaka na ^asipi; eda sa dui lesu ki na noda sala koi keda yadua; ia na Turaga sa vakatauca vei koya na noda caka cala kecega.

7 A sa vakasaurarataki, ka vakararawataki ko koya, ia ^asa sega ga ni vosa; sa tuberi me vaka na ^blami sa vakarau me vakamatei, ka vaka na sipi sa galu ena matai koya sa kotiva, sa galu vakakina ko koya.

8 Sa kau tani mai vale ni veivesu kei na vanua ni veilewai; ia ko cei me vosa ena vukudra na nona tabatamata? Ia sa muduki tani ko koya mai na vanua ni bula; ka sa yaviti ena vuku ni nodra talaidredre na noqu tamata.

9 A ra sa buluti koya vata kei ira na tamata ca, kei ira na ^avutuniyau ni sa mate; baleta ni sa sega ni ^bivalavala ca ko koya, ka sa sega ni veivakaisini na gusuna.

10 Ia sa vinaka vua na Turaga me vakamavoataki koya; ka sa vakararawataki koya; ni sa cakava ko koya na yalona me isoro ena vuku ni ivalavala ca, ena qai kunea na nona ^akawa, ena vakabalavutaka na nona gauna, ia na ka e marautaka na Turaga ena vakayacori ga e ligana.

11 Ena raica ko koya na vakararawataki ni yalona ka na vakacegu kina; ena nona kila ka ena vakadonui ira e lewe levu na noqu dauveiqaravi yalododonu; ni na ^acolata ko koya na nodra caka cala.

12 O koya oqo ka’u na votai koya kina kei ira na qaqa, ia ena votai koya vata kei ira na kaukauwa; ka ni sa sovaraka oti na yalona ki na mate; ka sa wili vata kei ira sa dau talaidredre; ka sa colata ko koya na nodra ivalavala ca na lewevuqa, ia ena vukudra na dau talaidredre sa ia kina na ^avakamamasu.