Balaan ng mga Kasulatan
Moroni 8


Kapitulo 8

Ang pagbunyag sang magagmay nga kabataan isa ka malain nga kangil-aran—Ang magagmay nga kabataan buhi kay Cristo tungod sang Pagbayad-sala—Ang pagtuo, paghinulsol, pagkalulo kag pagkakubos sang tagipusuon, pagbaton sang Balaan nga Espiritu, kag pagpadayon tubtob sa katapusan nagapadulong sa kaluwasan. Mga A.D. 401–421.

1 Ang sulat sang akon amay nga si Mormon, nga ginsulat sa akon, si Moroni; kag ginsulat ini sa akon wala madugay pagkatapos sang pagtawag sa akon sa pag-alagad. Kag sa amo nga paagi nagsulat sia sa akon nga nagasiling:

2 Pinalangga kong anak, Moroni, nagakasadya ako sing tuman nga ang imo Ginuong Jesucristo nangin madinumdumon sa imo, kag nagtawag sa imo sa pag-alagad sa iya, kag sa iya balaan nga buluhaton.

3 Ginadumdum ko ikaw sing dalayon sa akon mga pangamuyo, dalayon nga nagapangamuyo sa Dios nga Amay sa ngalan sang iya Balaan nga Anak nga si Jesus, nga sia, paagi sa iya wala’y dulonan nga kaayo kag grasya, magatipig sa imo paagi sa nagapadayon nga pagtuo sa iya ngalan tubtob sa katapusan.

4 Kag karon, anak ko, nagahambal ako sa imo parte sinang nagapasubo sa akon sing tuman; kay ginakasubo ko nga may magatuhaw nga mga pagbinaisay sa tunga ninyo.

5 Kay, kon matuod ang akon nabalitaan, may mga pagbinaisay sa tunga ninyo parte sa pagbunyag sang inyo magagmay nga kabataan.

6 Kag karon, anak ko, luyag ko nga magpangabudlay kamo sing matutum nga ining grabe nga kasaypanan madula halin sa inyo; kay, sa sini nga tinutuyo naghimo ako sining sulat.

7 Kay gilayon pagkatapos nga nahibal-an ko ining mga butang halin sa imo nagpamangkot ako sa Ginuo parte sini nga bagay. Kag ang pulong sang Ginuo nag-abot sa akon paagi sa gahum sang Balaan nga Espiritu nga nagasiling:

8 Pamatii ang mga pulong ni Cristo, ang inyo Manunubos, ang inyo Ginuo kag ang inyo Dios. Tan-awa, nagkari ako sa kalibutan indi agud tawgon ang mga matarong kundi ang mga makasasala sa paghinulsol; ang mga maayo wala nagakinahanglan sang manugbulong, kundi sila nga mga masakiton; gani, ang magagmay nga kabataan putli, kay indi sila makasarang maghimo sang sala; gani ang sumpa kay Adan ginkuha sa ila tungod sa akon, nga wala ini sing gahum sa ila; kag ang layi sang sirkumsisyon gin-untat na sa akon.

9 Kag sa sini nga paagi ginpahayag sang Balaan nga Espiritu ang pulong sang Dios sa akon; gani, pinalangga ko nga anak, nakahibalo ako nga isa ini ka dako nga pagyaguta sa atubang sang Dios nga bunyagan ninyo ang magagmay nga kabataan.

10 Tan-awa ginasiling ko sa inyo nga ining butang inyo itudlo—paghinulsol kag bunyag sa sinang mga may salabton kag makasarang sa paghimo sang sala; huo, tudloi ang mga ginikanan nga kinahanglan gid sila nga maghinulsol kag magpabunyag, kag magpaubos sang ila mga kaugalingon pareho sang ila magagmay nga kabataan, kag sila tanan maluwas upod ang ila magagmay nga kabataan.

11 Kag ang ila magagmay nga kabataan wala nagakinahanglan sang paghinulsol, kag wala man nagakinahanglan sang bunyag. Tan-awa, ang bunyag nagasunod sa paghinulsol agud tumanon ang mga kasugoan para sa kapatawaran sang mga sala.

12 Apang ang magagmay nga kabataan buhi kay Cristo, bisan halin pa sa pagtuga sang kalibutan; kon indi, ang Dios isa ka may pinilian nga Dios, kag isa man ka paliwat-liwat nga Dios, kag isa nga may ginapasulabi sa mga tawo; kay daw ano kadamo ang magagmay nga kabataan nga nagkalamatay nga wala’y bunyag!

13 Gani, kon ang magagmay nga kabataan indi maluwas kon wala’y bunyag, ang mga ini pat-od gid nga magakadto sa isa ka nagapadayon nga impiyerno.

14 Tan-awa, ginasiling ko sa inyo, nga sia nga nagahunahuna nga ang magagmay nga kabataan nagakinahanglan sang bunyag yara sa apdo sang kapaitan kag sa mga gapos sang kalainan; kay wala sia bisan pagtuo, paglaum, ukon putli nga paghigugma; gani, kon mapatay sia samtang sa amo nga panghunahuna, pat-od gid sia nga magpanaog sa impiyerno.

15 Kay makahaladlok nga kalainan ang maghunahuna nga ginaluwas sang Dios ang isa ka bata tungod sang bunyag, kag ang isa pat-od gid nga madula tungod wala sia sing bunyag.

16 Kalisud sa ila nga magapatiko sang dalanon sang Ginuo suno sa amo nga paagi kay madula sila luwas lang kon maghinulsol sila. Tan-awa, nagahambal ako nga may kaisog, nga may awtoridad halin sa Dios; kag wala ako nahadlok kon ano ang mahimo sang tawo; kay ang perpekto nga gugma nagatabog sang tanan nga kahadlok.

17 Kag napuno ako sang putli nga paghigugma, nga amo ang wala’y katubtuban nga gugma; gani, ang tanan nga kabataan palareho sa akon; gani, palangga ko ang magagmay nga kabataan sing may perpekto nga pagpalangga; kag palareho sila tanan kag mga umalambit sang kaluwasan.

18 Kay nakahibalo ako nga ang Dios indi isa ka may pinilian nga Dios, ukon isa ka paliwat-liwat nga persona; kundi sia wala nagaliwat halin sa bug-os nga wala’y katapusan tubtob sa bug-os nga wala’y katapusan.

19 Ang magagmay nga kabataan indi makahinulsol; gani, isa ka makahaladlok nga kalainan nga ipanghiwala ang putli nga mga kaluoy sang Dios sa ila, kay buhi sila tanan sa iya tungod sang iya kaluoy.

20 Kag sia nga nagasiling nga ang magagmay nga kabataan nagakinahanglan sang bunyag nagapanghiwala sang mga kaluoy ni Cristo, kag nagapakawala’y-pulos sang pagbayad-sala niya kag sang gahum sang iya pagtubos.

21 Kalisud sa mga amo sina kay yara sila sa peligro sang kamatayon, impiyerno, kag nagapadayon nga pagpaantos. Maisog ko nga ginapahayag ini; ang Dios ang nagsugo sa akon. Pamatii ang mga ini kag tumanon, ukon magatindog ang mga ini batok sa inyo sa hukom-lingkuranan ni Cristo.

22 Kay tan-awa nga ang tanan nga magagmay nga kabataan buhi kay Cristo, kag amo man nga sila tanan wala sang layi. Kay ang gahum sang pagtubos nagaabot man sa tanan sa ila nga wala sing layi; gani, sia nga wala ginakondenar, ukon sia nga wala sa idalom sang pagkondenar, indi makahinulsol; kag sa mga amo sina ang bunyag wala sing kapuslanan—

23 Apang isa ini ka pagyaguta sa atubang sang Dios, kag pagpanghiwala sang mga kaluoy ni Cristo, kag sang gahum sang iya Balaan nga Espiritu, kag pagbutang sang pagsalig sa patay nga mga buhat.

24 Tan-awa, anak ko, ini nga butang indi dapat nga matabo; kay ang paghinulsol para sa ila nga yara sa idalom sang pagkondenar kag sa idalom sang sumpa sang ginlapas nga layi.

25 Kag ang una nga mga bunga sang paghinulsol amo ang bunyag; kag ang bunyag ginahikot paagi sa pagtuo padulong sa pagtuman sang mga kasugoan; kag ang pagtuman sang mga kasugoan nagadala sang kapatawaran sang mga sala;

26 Kag ang kapatawaran sang mga sala nagadala sang pagkalulo, kag pagkakubos sang tagipusuon, kag tungod sang pagkalulo kag pagkakubos sang tagipusuon nagaabot ang pagbisita sang Balaan nga Espiritu, nga ang amo nga Manugpasulhay nagapuno sang paglaum kag perpekto nga gugma, nga ang amo nga gugma nagapadayon paagi sa katutum sa pangamuyo, tubtob nga mag-abot ang katapusan, kon san-o ang tanan nga santos magapuyo upod sa Dios.

27 Tan-awa, anak ko, masulat ako liwat sa imo kon indi ako gilayon maggwa batok sa mga Lamanhon. Tan-awa, ang bugal sini nga nasyon, ukon sang katawhan sang mga Nefinhon nagapamatuod sang ila kalaglagan luwas lang kon maghinulsol sila.

28 Ipangamuyo sila, anak ko, nga ang paghinulsol mag-abot sa ila. Apang tan-awa, nagaduhaduha ako nga basi ang Espiritu nag-untat na sa pag-impluwensya sa ila; kag sa sini nga bahin sang kadutaan ginatinguha man nila ang pagpierde sang tanan nga gahum kag awtoridad nga nagahalin sa Dios; kag ginapanghiwala nila ang Balaan nga Espiritu.

29 Kag pagkatapos nga isikway ang amo kadako nga ihibalo, anak ko, makalamatay gid sila sa indi madugay tubtob nga matuman ang mga propesiya nga ginpahayag sang mga propeta, kag ang mga pulong sang aton Manluluwas mismo.

30 Paalam, anak ko, tubtob sa akon madason nga pagsulat sa imo, ukon sa aton pagkitaay liwat. Amen.