1 Na afei emi, Moroni, merekyerɛw m’egya Mormon ne nsɛm no mu kakraabi, dza ɔkãa a ɔfa gyedzi, enyidado, na ayamuyie ho no; na dɛm kwan yi na ɔfaa do kasaa kyerɛɛ nkorɔfo no, wɔ ber a ɔrekyerɛkyerɛ hɔn wɔ nhyiamudan no a woesi dze ayɛ bea a wɔsom wɔ mu no.

2 Na afei emi, Mormon, mekasa kyerɛ hom, mo nuanom adɔfo; na ɔnam Egya Nyankopɔn n’adom, nye hɛn Ewuradze Jesus Christ nye ne pɛ krɔnkrɔn do, osian akyɛdze a ɔyɛ ne frɛ a ɔdze afrɛ me ntsi na ɔama me kwan dɛ menkasa nkyerɛ hom wɔ dɛm aber yi.

3 Dɛm ntsi, mebɛkasa akyerɛ hom a hom yɛ asɔr ne mba, hom a hom kã Christ do asomdwee mu, na dɛ hom enya enyidado a odzi mu a hom nam do dze botum ahɛn Ewuradze n’ahomgye mu, fitsi dɛm aber yi dze kesi dɛ hom nye no bɔhom wɔ sor.

4 Na afei mo nuanom, mubu hom dɛm ndzɛmba yinom ho atsɛn osian hom asomdwee mu nantsew a hom nye adasamba nam no ntsi.

5 Osiandɛ mekaa Nyankopɔn n’asɛm no a ɔkãa dɛ wɔnam hɔn ndwuma do bohu hɔn no; na sɛ hɔn ndwuma ye a, nna hɔn so woye.

6 Na hwɛ, Nyankopɔn akã dɛ nyimpa bɔn biara runntum nnyɛ dza oye; na sɛ ɔdze akyɛdze ma, anaadɛ ɔbɔ mpaa ma Nyankopɔn, na sɛ ɔammpra n’akoma mu annyɛ a, orinnya mfaso biara mmfi mu.

7 Na hwɛ, wɔremmfa no dɛ ɔayɛ ndzeyɛtsenenee.

8 Na hwɛ, sɛ nyimpa bɔn rekyɛ adze a, ohwinhwin ho wɔ no mu; dɛm ntsi wɔfa no dɛ nankasa ɔafa n’adze; dɛm ntsi, wɔfa no dɛ ɔyɛ bɔn wɔ Nyame enyim.

9 Na dɛmara so na sɛ nyimpa ammpra n’akoma mu ammbɔ mpaa a wɔfa no dɛ ɔyɛ bɔn ma no; nyew onnya ho mfaso biara, osiandɛ Nyankopɔn nntsie dɛm mpaabɔ no.

10 Dɛm ntsi nyimpa bɔn runntum nnyɛ dza oye; anaadɛ orunntum mmfa akyɛdze pa mma.

11 Na hwɛ, nsunyiwa a no mu nsu yɛ wen runntum mma nsu pa; dɛmara na nsunyiwa a no mu nsu yɛ dɛw runntum mma nsu a ɔyɛ wen; dɛm ntsi nyimpa a ɔyɛ abɔnsam n’akowaa no runntum nnkã Christ do; na sɛ ɔkã Christ do a orunntum nnyɛ abɔnsam n’akowaa.

12 Dɛm ntsi adze biara a oye no fi Nyankopɔn hɔ ba; na dza omuo so fi abɔnsam; osiandɛ abɔnsam yɛ Nyankopɔn ne tamfo, na ɔkõ tsia no aber nyinara, na ɔtwetwe nyimpa na ɔdaadaa hɔn dze hɔn kɔ bɔn mu, ama wɔaayɛ dza omuo aber biara.

13 Mbom hwɛ, dza ofir Nyankopɔn no twetwe nyimpa ma wɔkɔ do yɛ papa; ma wɔyɛ dza oye, na dɛ nyimpa botum adɔ Nyankopɔn na wɔasom no no, Nyankopɔn na okenyan.

14 Dɛm ntsi, hom nhwɛ, m’enuanom adɔfo, mma hom mmbu dza omuo no dɛ ofir Nyame, anaadɛ dza oye na ofir Nyankopɔn no dɛ ofir abɔnsam.

15 Na hwɛ, m’enuanom, wɔama hom kwan dɛ hom mbu atsɛn ama hom eetum ehu dza ɔyɛ papa na dza ɔyɛ bɔn; na kwan a wodua do bu atsɛn no da hɔ pefee, ama hom dze nyimdzee a odzi mu eehu tse dɛ anapa kan nye anafua sum mu nsonsonee tse.

16 Na hwɛ, wɔdze Christ no Sunsum ama ɔdasanyi biara, ama oeehu papa fi bɔn ho; dɛm ntsi, merekyerɛ hom kwan a wɔfa do bu atsɛn; adze biara a ɔtwetwe hom ma hom yɛ papa, na ɔkã hom ma hom gye Christ dzi no odua Christ no tum nye n’akyɛdze do; dɛm ntsi hom dze nyimdzee a odzi mu bohu dɛ ofi Nyankopɔn.

17 Mbom adze biara a onunu adasamba ma wɔyɛ bɔn, na wɔnngye Christ nndzi, na wɔpow no, na wɔnnsom Nyankopɔn no, hom dze nyimdzee a odzi mu bohu dɛ ofi abɔnsam; na dɛm kwan yi na abɔnsam fa do dze dzi dwuma, osiandɛ ɔmma nyimpa biara nnyɛ adze papa; oho, nnyɛ hɔn mu kor mpo, anaa n’abɔfoe, anaa hɔn a wɔdze hɔnho ahyɛ n’ase no.

18 Na afei, mo nuanom, ber a hom ehu kan a hom bodua do dze ebu atsɛn yi, dɛm kan no a ɔyɛ Christ ne kan no, hom nhwɛ yie amma hom emmbu atsɛnkyew; na atsɛmbu a hom dze bu obi no, dɛm atsɛmbu noara na wɔdze bobu hom so.

19 Dɛm ntsi, meserɛ hom, m’enuanom, dɛ hom nhwehwɛ Christ ne kan no mu yie ama hom eetum ehu papa efi bɔn no; na sɛ hom suo adze papa biara mu yie, na hom emmbu no egyangyandze a, nna ɔbɛma hom abɛyɛ Christ ne ba ampa.

20 Na afei, m’enuanom, obesi dɛn bɛyɛ ma hom etum esuo adze papa biara mu yie?

21 Na afei maba dɛm gyedzi no do, dza mekãa dɛ mebɛkã ho asɛm no; na mebɛkã kwan a hom bɛfa do dze esuo adze papa biara mu yie.

22 Na hwɛ, Nyankopɔn onyim adze nyina, fi daapem kesi daapem, hwɛ, ɔsomaa sor abɔfo dɛ wɔmbɔsom adasamba, na wɔnda ndzɛmba a ɔfa Christ ne mbaa no ho edzi nkyerɛ; na Christ no mu na adzepa biara befi aba.

23 Na Nyankopɔn noara so dze n’ano daa no edzi kyerɛɛ nkɔnhyɛfo no dɛ Christ bɛba.

24 Na hwɛ, ɔnam akwan horow do daa ndzɛmba a oye edzi kyerɛɛ adasamba; na ndzɛmba a oye nyina fi Christ hɔ ba; sɛ ɔnntse dɛm a nkyɛ adasamba ahwe ase, na ndzepa biara remmba hɔn hɔ.

25 Dɛm ntsi, ɔnam sor abɔfo hɔn som nye asɛm biara a ofi Nyankopɔn n’ano kãe do na ɔmaa nyimpa hyɛɛ ase dɛ worinya gyedzi wɔ Christ mu; na ɔnam gyedzi do na wonyaa adze papa biara; na dɛm na ɔtse dze kesi Christ ne mbaa.

26 Na ne mbaa ekyir no, wɔnam gyedzi a ɔwɔ ne dzin mu so do na wɔdze gyee adasa nkwa; na wɔnam gyedzi do bɛyɛ Nyankopɔn ne mba. Na susuampaara dɛ Christ tse ase yi, ɔkãa dɛm nsɛm yi kyerɛɛ hɛn egyanom: Biribiara a hom bebisa Egya no wɔ me dzin mu wɔ gyedzi mu, a oye na hom gye dzi dɛ hom nsa bɛkã no, hwɛ, wɔbɛyɛ ama hom.

27 Dɛm ntsi, m’enuanom adɔfo, ana anwanwadze ne yɛ etwa osiandɛ Christ afow kɔ sor, na ɔakɛtsena Nyankopɔn n’abanyimfa, dɛ ɔregye ehumbɔbɔr ne kyɛfa efi Egya no hɔ ama adasamba ntsi?

28 Na ɔama mbra no n’ewiei ho mbuae, na ɔregye hɔn a wɔwɔ gyedzi wɔ no mu no nyinara; na hɔn a wɔwɔ gyedzi wɔ no mu no ntakyer dza oye biara ho; dɛm ntsi odzi ma adasamba; na ɔtsena ɔsorsor hɔ onnyiewiei mu.

29 Na osiandɛ ɔayɛ iyi ntsi, m’enuanom adɔfo, ana anwanwadze ne yɛ etwa? Hwɛ mese hom dɛ, Oho; na eso sor abɔfo nngyaa dɛ wosom adasamba.

30 Na hwɛ, wɔbrɛ hɔnho adze ma no, na wɔsom dɛ mbrɛ ne mbrasɛm no se hɔn, na woyi hɔn ho kyerɛ hɔn a hɔn gyedzi yɛ dzen na hɔn adwen si pi wɔ biribiara a no ho tsew mu.

31 Na hɔn somdwuma mu ɔfrɛ nye dɛ wɔtwe nyimpa kɔ nnuho mu, na wɔhyɛ Egya n’ahyɛmu na no ndwuma no mã, dza ɔnye adasamba edzi, dze esiesie kwan wɔ adasamba mu ma woedua do dze ada Christ n’asɛm edzi akyerɛ hɔn a wɔasan mu eyi hɔn ama Ewuradze no, ama wɔaagye noho dase.

32 Na iyi do na Ewuradze Nyankopɔn dua siesie kwan to hɔ, ama nyimpa hɔn asefo eenya gyedzi wɔ Christ mu, ma Sunsum Krɔnkrɔn no enya hɔn akoma mu kwan, dɛ mbrɛ tum a ɔwɔ hɔ no tse; na ɔnam iyi do na Egya no bɛma ahyɛmu a ɔnye adasamba edzi no aba mu.

33 Na Christ akã dɛ: Sɛ hom nya gyedzi wɔ mo mu a, hom benya tum dze ayɛ biribiara a ohia wɔ mo mu.

34 Na ɔakã dɛ: Hom nnu homho, hom a hom wɔ asaase n’ano n’ano nyina, na hom mbra mo hɔ ma wonnuma hom wɔ me dzin mu, na hom nya gyedzi wɔ mo mu, ama wɔaagye hom nkwa.

35 Na afei, m’enuanom adɔfo, sɛ ɔwɔ mu dɛ dɛm ndzɛmba yi a makã akyerɛ hom yi yɛ nokwar, na Nyankopɔn dze tum nye enyimnyam kɛse beyi akyerɛ wo wɔ da a odzi ewiei no mu, dɛ ɔyɛ nokwar, na sɛ ɔyɛ nokwar a, nna anwanwadze ne yɛ etwa?

36 Anaadɛ sor abɔfo egyaa dɛ woyi hɔnho kyerɛ adasamba? Anaadɛ woeyi no Sunsum Krɔnkrɔn no no tum no efi hɔn do? Anaadɛ ɔbɛyɛ dɛm ara kodu dɛ mber bɔkɔ n’ewiei, anaadɛ asaase bɛda ho atsena hɔ, anaadɛ ɔbɛka nyimpa kor wɔ asaase yi do a wɔbɛgye no nkwa?

37 Hwɛ mese hom dɛ, Oho; osiandɛ ɔnam gyedzi do na wɔyɛ anwanwadze; na ɔnam gyedzi do na sor abɔfo ba bɔsom nyimpa; dɛm ntsi, sɛ dɛm ndzɛmba yi etwa a, nna adasamba ndue, osiandɛ iyi gyina ekyingye do na ne nyinara yɛ egyangyandze.

38 Na wonnkotum agye nyimpa nkwa, dɛ mbrɛ Christ ne nsɛm se, gyedɛ wonya gyedzi wɔ ne dzin mu; dɛm ntsi, sɛ dɛm ndzɛmba yi etwa a nna gyedzi so etwa; na nyimpa ne gyinabew ayɛ hu, osiandɛ nna ɔabɛyɛ dɛ gyama wɔannyɛ ɔpon ho nhyehyɛɛ biara ama hɔn.

39 Mbom hwɛ, m’enuanom adɔfo, mususu dza oye ma hom, na mususu ma hom dɛ hom wɔ gyedzi wɔ Christ mu osian hom ɔdwe ntsi; na sɛ hom nnyi gyedzi wɔ no mu a nna ɔnnsɛ dɛ wɔkan hom fora n’asɔr no ne mba.

40 Na bio, m’enuanom adɔfo, mebɛkã dza ɔfa enyidado ho asɛm akyerɛ hom. Obesi dɛn bɛyɛ ma hom enya gyedzi gyedɛ hom enya enyidado?

41 Na ɔyɛ ebɛnadze na hom benya enyidado wɔ mu? Hwɛ mese hom dɛ hom benya enyidado efi Christ no werdambɔ nye no wusoɛr tum no mu, dɛ hom bɔsoɛr akɔ onnyiewiei nkwa mu, osian hom gyedzi a ɔwɔ no mu wɔ anohoba a ɔdze abɔ hom no ntsi.

42 Dɛm ntsi, sɛ obi wɔ gyedzi a otwar dɛ onya enyidado; na sɛ gyedzi nnyi hɔ a enyidado so nnyi hɔ.

43 Na hwɛ bio, mekã kyerɛ hom bio dɛ orunntum nnya gyedzi nye enyidado, gyedɛ ɔdwe na onya botooyɛ akoma.

44 Sɛ ɔtse dɛm dze a, nna ne gyedzi nye n’enyidado no yɛ egyangyandze, osiandɛ obiara nndzi mu wɔ Nyankopɔn enyim, gyedɛ hɔn a wɔdwe na wɔwɔ botooyɛ akoma; na sɛ obi ɔdwe na ɔwɔ botooyɛ akoma, na ɔnam Sunsum Krɔnkrɔn no tum do kã dɛ Jesus nye Christ no a, nna ɔwɔ ayamuyie; na sɛ onnyi ayamuyie a nna ɔnnsɛ hwee; dɛm ntsi ohia dɛ onya ayamuyie.

45 Na ayamuyie wɔ penkyɛr, ne yamu ye, na ɔnnyɛ ahoɔyaw, ɔnnhyehyɛ noho ɔnnhwehwɛ nonko nedze, no bo nnhaw no, ommbu emumuyɛ ho akontaa, onndzi dɛw wɔ dza ɔnntsen ho, na mbom odzi dɛw wɔ nokwar ho, ɔsoa adze nyina, ɔgye adze nyina dzi, ɔwɔ adze nyina mu enyidado, ɔsɔw adze nyina.

46 Dɛm ntsi, m’enuanom adɔfo, sɛ hom nnyi ayamuyie a, hom nnsɛ hwee, osiandɛ ayamuyie nntwa abrɔdɔ. Dɛm ntsi, hom ntetar ayamuyie, ɔno na ɔsõ kyɛn adze nyina, osiandɛ ndzɛmba nyina bɔbɔ adze.

47 Mbom ayamuyie nye Christ no dɔ mapã no, na otsim hɔ afebɔɔ; na nyia wobohu dɛ ɔwɔ bi wɔ da a odzi ewiei no mu no, obesi no yie.

48 Dɛm ntsi, m’enuanom adɔfo, hom mfa hom akoma mu ahoɔdzen nyina mbɔ mpaa mma Egya no, ama ɔdze dɛm ɔdɔ yi aahyɛ hom mã, dza ɔdze egu hɔn a wɔyɛ ne Ba Jesus Christ n’akãdofo nokwafo do no; ama hom aabɛyɛ Nyankopɔn ne mba ama ber a obopue no, yɛabɛyɛ dɛ ɔno, osiandɛ yebohu no dɛ mbrɛ ɔtse; ama yeenya dɛm enyidado yi; ama ɔaatsew hɛnho dɛ mbrɛ noho tsew no. Amen.