Balaan ng mga Kasulatan
Moroni 7


Kapitulo 7

Isa ka pangagda ang ginahatag sa pagsulod sa palahuwayan sang Ginuo—Magpangamuyo nga may matuod-tuod nga tinutuyo—Ang Espiritu ni Cristo nagatugot sa mga tawo nga mahibal-an ang maayo sa malain—Ginakumbinse ni Satanas ang mga tawo nga ipanghiwala si Cristo kag maghimo sang malain—Ang mga propeta nagapahayag sang pagkari ni Cristo—Paagi sa pagtuo, ang mga milagro ginahimo kag ang mga anghel nagaalagad—Ang mga tawo dapat maglaum sa kabuhi nga wala’y katapusan kag magkapyot sa putli nga paghigugma. Mga A.D. 401–421.

1 Kag karon ako, si Moroni, nagasulat sang pila ka mga pulong sang akon amay nga si Mormon, nga iya ginhambal parte sa pagtuo, paglaum, kag putli nga paghigugma; kay suno sa sini nga paagi sia naghambal sa katawhan, samtang nagatudlo sia sa ila sa sinagoga nga ila ginpatindog para sa lugar sang pagsimba.

2 Kag karon ako, si Mormon, nagahambal sa inyo, pinalangga kong mga kauturan; kag paagi ini sa grasya sang Dios nga Amay, kag sang aton Ginuong Jesucristo, kag sang iya balaan nga kabubut-on, tungod sang dulot sang iya pagtawag sa akon, nga ginatugotan ako sa paghambal sa inyo sa sini nga tion.

3 Gani, magahambal ako sa inyo nga iya sang simbahan, nga mga mahidaeton nga mga sumulunod ni Cristo, kag nakaangkon sing nagakaigo nga paglaum nga paagi sa sini makasulod kamo sa kapahuwayan sang Ginuo, halin sa sini nga tion tubtob nga magapahuway kamo upod sa iya sa langit.

4 Kag karon mga kauturan ko, ginahukman ko kamo sining mga butang tungod sang inyo mahidaeton nga paglakat upod sa mga anak sang katawhan.

5 Kay nadumduman ko ang pulong sang Dios nga nagasiling nga paagi sa ila mga buhat inyo sila makilala; kay kon ang ila mga buhat maayo, gani mga maayo man sila.

6 Kay tan-awa, ang Dios nagsiling nga ang isa ka tawo nga malain indi makahimo sinang maayo; kay kon nagatanyag sia sang halad, ukon nagapangamuyo sa Dios, luwas lang kon himuon niya ini nga may matuod-tuod nga tinutuyo wala ini sing kapuslanan sa iya.

7 Kay tan-awa, wala ini ginaisip bilang pagkamatarong para sa iya.

8 Kay tan-awa, kon ang isa ka tawo nga malain nagahatag sing halad, ginahimo niya ini nga may aligutgot; gani ginakabig ini sa iya nga pareho lang nga daw wala sia sing ginhatag nga halad; gani ginaisip sia nga malain sa atubang sang Dios.

9 Kag sa amo man nga paagi ginaisip ini nga malain sa isa ka tawo kon magpangamuyo sia kag wala sing matuod-tuod nga tinutuyo sang tagipusuon; huo, wala ini sing kapuslanan sa iya kay ang Dios wala sing ginabaton nga amo sina.

10 Gani, ang isa ka tawo nga malain indi makahimo sinang maayo; kag indi man sia maghatag sing maayo nga halad.

11 Kay tan-awa, ang mapait nga tuburan indi makahatag sang maayo nga tubig; kag ang maayo nga tuburan indi man makahatag sang mapait nga tubig; gani, ang isa ka tawo nga alagad sang yawa indi makasunod kay Cristo; kag kon sundon niya si Cristo indi sia mangin alagad sang yawa.

12 Gani, ang tanan nga butang nga maayo nagahalin sa Dios; kag inang malain nagahalin sa yawa; kay ang yawa kaaway sang Dios, kag nagapakig-away sa iya sing dalayon, kag nagapangagda kag nagapangganyat sa pagpakasala, kag sa paghimo sinang malain sing dalayon.

13 Apang tan-awa, inang iya sang Dios nagapangagda kag nagapangganyat sa paghimo sang maayo sing dalayon; gani, ang tagsa ka butang nga nagapangagda kag nagapangganyat sa paghimo sang maayo, kag sa pagpalangga sa Dios, kag sa pag-alagad sa iya, may pagtuytuy sang Dios.

14 Gani, mag-andam, pinalangga kong mga kauturan, nga indi ninyo mahukman inang malain nga iya sang Dios, ukon inang maayo kag iya sang Dios nga iya sang yawa.

15 Kay tan-awa, mga kauturan ko, ginahatag sa inyo ang paghukom, agud mahibal-an ninyo ang maayo sa malain; kag ang paagi sa paghukom amo man kaathag, agud mahibal-an ninyo sing may perpekto nga ihibalo, ang kinalain sang masanag nga adlaw sa madulom nga gab-i.

16 Kay tan-awa, ang Espiritu ni Cristo ginahatag sa tagsa ka tawo, agud mahibal-an niya ang maayo sa malain; gani, ginapakita ko sa inyo ang paagi sa paghukom; kay ang tagsa ka butang nga nagapangagda sa paghimo sang maayo, kag sa pagkumbinse sa pagpati kay Cristo, ginapadala paagi sa gahum kag dulot ni Cristo; gani mahibal-an ninyo sa perpekto nga ihibalo nga iya ini sang Dios.

17 Apang kon ano man nga butang ang nagakumbinse sa mga tawo sa paghimo sang malain, kag indi magpati kay Cristo, kag magpanghiwala sa iya, kag indi mag-alagad sa Dios, gani mahibal-an ninyo sa perpekto nga ihibalo nga iya ini sang yawa; kay suno sa amo nga paagi ang yawa nagahikot, kay wala sia nagakumbinse sa bisan sin-o nga tawo sa paghimo sang maayo, wala, wala bisan isa; kag wala man ang iya mga anghel; kag wala man sila nga nagapaidalom sang ila mga kaugalingon sa iya.

18 Kag karon, mga kauturan ko, kay nahibal-an ninyo ang kasanag nga sa amo nga paagi kamo makahukom, nga ang amo nga kasanag kasanag ni Cristo, siguraduha nga indi kamo magsala sa paghukom; kay sa amo man nga paghukom nga kamo nagahukom kamo man pagahukman.

19 Gani, nagapakitluoy ako sa inyo, mga kauturan, nga magtutum kamo sa pagpangita paagi sa kapawa ni Cristo agud mahibal-an ninyo ang maayo sa malain; kag kon magkapyot kamo sa tagsa ka maayo nga butang, kag indi ini pagpakalainon, pat-od gid nga mangin mga anak kamo ni Cristo.

20 Kag karon, mga kauturan ko, paano ini mahimo nga makakapyot kamo sa tagsa ka maayo nga butang?

21 Kag karon mahambal ako parte sinang pagtuo nga siling ko akon ihambal; kag sugiran ko kamo sang paagi nga sa diin mahimo kamo nga makakapyot sa tagsa ka maayo nga butang.

22 Kay tan-awa, ang Dios nga nakahibalo sang tanan nga butang, nga halin sa wala’y katubtuban tubtob sa wala’y katubtuban, tan-awa, nagpadala sia sang mga anghel agud mag-alagad sa mga anak sang katawhan, agud ipahayag ang parte sa pagkari ni Cristo; kag kay Cristo magahalin ang tagsa ka maayo nga butang.

23 Kag ang Dios nagpahayag man sa mga propeta, paagi sa iya kaugalingon nga baba, nga si Cristo magakari.

24 Kag tan-awa, may nagkalain-lain nga mga paagi nga ginpahayag niya ang mga butang sa mga anak sang katawhan, nga mga maayo; kag ang tanan nga butang nga maayo naghalin kay Cristo; kay kon indi, ang mga tawo nahulog, kag wala sing maayo nga butang nga magaabot sa ila.

25 Gani, paagi sa pag-alagad sang mga anghel, kag paagi sa tagsa ka pulong nga nagahalin sa baba sang Dios, ang mga tawo nagsugod sa paggamit sang pagtuo kay Cristo; kag gani paagi sa pagtuo, nagkapyot sila sa tagsa ka maayo nga butang; kag gani nangin amo sini tubtob sa pagkari ni Cristo.

26 Kag pagkatapos nga nagkari sia ang mga tawo naluwas man paagi sa pagtuo sa iya ngalan; kag paagi sa pagtuo, nangin mga anak sila sang Dios. Kag pareho kapat-od nga buhi si Cristo ginhambal niya ining mga pulong sa aton mga amay nga nagasiling: Kon ano man nga butang ang inyo pangayuon sa Amay sa akon ngalan, nga maayo, sa pagtuo nga nagapati nga makabaton kamo, tan-awa, himuon ini sa inyo.

27 Gani, pinalangga kong mga kauturan, nag-untat bala ang mga milagro tungod si Cristo nagkayab sa langit, kag nagpungko sa tuo nayon nga kamot sang Dios, agud magsukot halin sa Amay sang iya mga kinamatarong sang kaluoy nga may yara sia sa mga anak sang katawhan?

28 Kay ginsabat niya ang mga katuyoan sang layi, kag gin-angkon ang tanan nga may pagtuo sa iya; kag sila nga may pagtuo sa iya magakapyot sa tagsa ka maayo nga butang; gani ginaapinan niya ang kawsa sang mga anak sang katawhan; kag nagapuyo sia sing wala’y katapusan sa mga langit.

29 Kag tungod ginhimo niya ini, pinalangga kong mga kauturan, nag-untat bala ang mga milagro? Tan-awa ginasiling ko sa inyo, Wala; kag wala man ang mga anghel nag-untat sa pag-alagad sa mga anak sang katawhan.

30 Kay tan-awa, sakop sila sa iya, agud mag-alagad suno sa pulong sang iya sugo, nga nagapakita sang ila mga kaugalingon sa ila nga may mabakod nga pagtuo kag malig-on nga kaisipan sa tagsa ka dagway sang pagkadiosnon.

31 Kag ang palangakoan sang ila pag-alagad amo ang pagtawag sang mga tawo sa paghinulsol, kag sa pagtuman kag sa paghimo sang buluhaton sang mga kasugtanan sang Amay, nga iya ginhimo sa mga anak sang katawhan, sa paghanda sang dalan sa mga anak sang katawhan, paagi sa pagpahayag sang pulong ni Cristo sa pinili nga mga galamiton sang Ginuo, agud magpahayag sila sing testimonya parte sa iya.

32 Kag sa paghimo sini, ang Ginuong Dios nagahanda sang paagi agud ang nabilin sang mga tawo makaangkon sing pagtuo kay Cristo, agud ang Balaan nga Espiritu makaangkon sing lugar sa ila mga tagipusuon, suno sa gahum sini; kag sa amo nga paagi ginapahanabo sang Amay, ang mga kasugtanan nga iya ginhimo sa mga anak sang katawhan.

33 Kag si Cristo nagsiling: Kon makaangkon kamo sing pagtuo sa akon makaangkon kamo sing gahum sa paghimo sang bisan ano nga butang nga nagakaigo sa akon.

34 Kag nagsiling sia: Maghinulsol kamo tanan nga yara sa mga punta sang kalibutan, kag magpalapit sa akon, kag magpabunyag sa akon ngalan, kag mag-angkon sing pagtuo sa akon agud maluwas kamo.

35 Kag karon, pinalangga kong mga kauturan, kon amo sini ang matabo nga ining mga butang nga ginhambal ko sa inyo matuod, kag ipakita ini sang Dios sa inyo, upod ang gahum kag dako nga himaya sa katapusan nga adlaw, nga matuod ang mga ini, kag kon matuod ang mga ini nag-untat bala ang adlaw sang mga milagro?

36 Ukon nag-untat bala ang mga anghel sa pagpakita sa mga anak sang katawhan? Ukon gindumili bala niya ang gahum sang Balaan nga Espiritu sa ila? Ukon idumili bala niya, samtang magalawig ang panahon, ukon ang duta magapadayon, ukon may isa pa ka tawo sa ibabaw sini nga kinahanglan luwason?

37 Tan-awa ginasiling ko sa inyo, Indi; kay paagi sa pagtuo nga ang mga milagro ginahimo; kag paagi sa pagtuo nga ang mga anghel nagapakita kag nagaalagad sa mga tawo; gani, kon ining mga butang nag-untat kalisud sa mga anak sang katawhan, kay tungod ini sang pagkawala’y pagtuo, kag ang tanan wala’y kapuslanan.

38 Kay wala sing tawo nga maluwas, suno sa mga pulong ni Cristo, luwas lang kon may pagtuo sila sa iya ngalan; gani, kon ining mga butang nag-untat na, kon amo ang pagtuo nag-untat man; kag makahaladlok ang kahimtangan sang tawo, kay pareho lang nga wala sing pagtubos nga ginhimo sa ila.

39 Apang tan-awa, pinalangga kong mga kauturan, ginahukman ko ang mas maayo nga mga butang parte sa inyo, kay ginahukman ko nga may pagtuo kamo kay Cristo tungod sang inyo pagkalulo; kay kon wala kamo sing pagtuo sa iya gani indi kamo nagakaangay nga maisip sa katawhan sang iya simbahan.

40 Kag sa liwat, pinalangga kong mga kauturan, magahambal ako sa inyo parte sa paglaum. Paano nga makaabot kamo sa pagtuo luwas lang kon makaangkon kamo sing paglaum?

41 Kag ano ini nga inyo pagalauman? Tan-awa ginasiling ko sa inyo nga makaangkon kamo sing paglaum paagi sa pagbayad-sala ni Cristo kag sa gahum sang iya pagkabanhaw, nga pagabangonon sa wala’y katapusan nga kabuhi, kag ini tungod sang inyo pagtuo sa iya suno sa promisa.

42 Gani, kon ang isa ka tawo may pagtuo dapat gid sia nga may paglaum; kay kon wala sing pagtuo mangin wala gid sing bisan ano nga paglaum.

43 Kag sa liwat, tan-awa ginasiling ko sa inyo nga indi sia makaangkon sing pagtuo kag paglaum, luwas lang kon mangin malulo sia, kag mapainubuson sa tagipusuon.

44 Kon amo sini, ang iya pagtuo kag paglaum wala’y kapuslanan, kay wala sing isa nga mabaton sa atubang sang Dios, luwas lang ang malulo kag mapainubuson sa tagipusuon; kag kon ang isa ka tawo malulo kag mapainubuson sa tagipusuon, kag magkumpisar paagi sa gahum sang Balaan nga Espiritu nga si Jesus amo ang Cristo, kinahanglan gid sia nga may putli nga paghigugma; kay kon wala sia sing putli nga paghigugma wala-wala gid sia; gani, kinahanglan gid nga may putli sia nga paghigugma.

45 Kag ang putli nga paghigugma mapasensyahon, kag maluluy-on, kag wala nagakahisa, kag wala nagahinambog, wala nagahandum sing para sa iya kaugalingon, indi madali mapaakig, wala nagapanghunahuna sing malain, kag wala nagakasadya sa kalainan kundi nagakasadya sa kamatuoran, nagabatas sang tanan nga butang, nagapati sang tanan nga butang, nagalaum sang tanan nga butang, nagapadayon sa tanan nga butang.

46 Gani, pinalangga kong mga kauturan, kon kamo wala sing putli nga paghigugma, wala-wala gid kamo kay ang putli nga paghigugma wala gid nagakulang. Gani, magkapyot sa putli nga paghigugma, nga amo ang labaw sa tanan, kay ang tanan nga butang nagakulang—

47 Apang ang putli nga paghigugma amo ang putli nga pagpalangga ni Cristo, kag nagapadayon ini sa wala’y katapusan; kag kon sin-o man ang makita nga may yara sini sa katapusan nga adlaw, mangin maayo ini sa iya.

48 Gani, pinalangga kong mga kauturan, magpangamuyo sa Amay sa bug-os nga ikasarang sang tagipusuon, agud mapuno kamo sang sining gugma, nga iya ginhatag sa tanan nga matuod nga mga sumulunod sang iya Anak nga si Jesucristo; agud kamo mangin mga anak sang Dios; agud kon sia magpakita mangin pareho kita sa iya, kay makita naton sia pareho nga sia gid; agud maangkon naton ini nga paglaum; agud matinloan kita pareho nga sia matinlo. Amen.