1 Ma o lenei, o a’u, o Moronae, ou te tusia nai upu itiiti a lo’u tamā, o Mamona, ia na ia tautala i ai e uiga i le faatuatua, faamoemoe, ma le alofa mamā; ona sa faapenei le ala sa ia tautala atu ai i le nuu, a o ia a’oa’o atu ia te i latou i le sunako lea na latou fausia mo se nofoaga e tapuai ai.

2 Ma o lenei, o a’u, o Mamona, ou te tautala atu ia te outou, o’u uso pele e; ma ona o le alofa tunoa o le Atua, le Tamā, ma lo tatou Alii o Iesu Keriso, ma lona finagalo paia, ona o le meaalofa o lana valaauga ia te a’u, lea ua faatagaina ai a’u ou te tautala atu ia te outou i lenei taimi.

3 O le mea lea, ou te fia tautala atu ia te outou o ē o le ekalesia, outou o soo fifilemu o Keriso, ma outou ua outou maua se faamoemoe ua lava e mafai ai ona outou ulu atu ai i le malologa o le Alii, mai le taimi nei ma le agai i luma seia oo ina outou malolo faatasi ma ia i le lagi.

4 Ma o lenei o’u uso e, ua ou matauina nei mea ia te outou ona o lo outou savavali ma le filemu faatasi ma le fanauga a tagata.

5 Auā ou te manatua le afioga a le Atua ua fetalai mai o a latou galuega tou te iloa ai i latou; auā afai ua lelei a latou galuega, ua lelei foi i latou.

6 Auā faauta, na fetalai mai le Atua o se tagata ua leaga e le mafai ona fai e ia se mea ua lelei; auā afai na te ofo atu se meaalofa, pe tatalo atu i le Atua, vagana ai e faia e ia ma le loto faamaoni ua le aogā lea ia te ia.

7 Auā faauta, e le faitauina ia te ia lena mea mo le amiotonu.

8 Auā faauta, afai e avatu e se tagata ua leaga se meaalofa, e fai toa’i e ia lea mea; o le mea lea e faitau tutusa ai ia te ia e pei lava na ia taofia le meaalofa; o le mea lea e ta’uleagaina ai o ia i luma o le Atua.

9 Ma e faapea foi ona ta’uleagaina se tagata, pe afai e tatalo atu o ia ae ua le i ai ma le faamaoni o le loto; ioe, ma ua le aogā lea ia te ia, ona e le talia e le Atua se ua faapena.

10 O le mea lea, e le mafai e se tagata ua leaga ona faia le mea ua lelei; pe avatu foi e ia se meaalofa lelei.

11 Auā faauta, e le mafai e se puna oona ona puna mai i vai lelei; pe mafai foi e se puna lelei ona puna mai i vai oona; o le mea lea, o se tagata ua avea o se auauna a le tiapolo e le mafai ona mulimuli ia Keriso; ma afai e mulimuli o ia ia Keriso e le mafai ona avea o ia o se auauna a le tiapolo.

12 O le mea lea, o mea uma ua lelei e mai le Atua; ma o le mea ua leaga e mai le tiapolo; ona o le tiapolo o se fili i le Atua, ma ua faasagatau pea ia te ia, ma ua valaau ma faatosina tagata i le agasala, ma ia latou faia pea le mea leaga.

13 Ae faauta, o le mea ua mai le Atua e valaau ma faatosina mai ia faia mea lelei e le aunoa; o le mea lea, o mea uma e valaau mai ma faatosina mai ia faia mea lelei, ma alofa i le Atua, ma auauna atu ia te ia, ua musuia e le Atua.

14 O le mea lea, ia outou faaeteete, o’u uso pele e, ina ia outou le faamasino le mea ua leaga o se mea mai le Atua, po o le mea ua lelei ma mai le Atua o se mea mai le tiapolo.

15 Auā faauta, o’u uso e, ua tuu mai ia te outou ia outou faamasino, ina ia outou iloa le lelei mai le leaga; ma o le ala e faamasino ai ua manino, ina ia mafai ona outou iloa ma se malamalama atoatoa, e pei o le malamalama o le ao mai le pouliuli o le po.

16 Auā faauta, ua tuuina mai i tagata taitoatasi le Agaga o Keriso, ina ia mafai ona iloa e ia le lelei mai le leaga; o le mea lea, ou te faaali atu ai ia te outou le ala e faamasino ai; ona o mea uma e valaau mai ia fai le lelei, ma faatauanau mai ia talitonu ia Keriso, ua auina mai i le mana ma le meaalofa a Keriso; o le mea lea e mafai ai ona outou iloa ma le malamalama atoatoa ua mai le Atua.

17 Ae o soo se mea e faatauanauina tagata ia latou faia le leaga, ma ia le talitonu ia Keriso, ma faafitia o ia, ma ia le auauna i le Atua, ona outou iloa lea ma le malamalama atoatoa ua mai le tiapolo; ona o le ala lea e galue ai le tiapolo, auā e le faatauanauina e ia se tagata ia faia le lelei, e leai, e leai lava se tasi; pe faia foi e ana agelu; pe faia foi e i latou o ē latou te tuu atu i latou lava ia te ia.

18 Ma o lenei, o’u uso e, ina ua vaai ua outou iloa le malamalama tou te faamasino ai, o le malamalama lea o Keriso, vaai ia outou le faamasino sese; auā o le faamasinoga lava lea tou te faamasino atu ai o le a faamasino ai foi outou.

19 O le mea lea, ou te aioi atu ia te outou, uso e, ia outou sailiili ma le filiga i le malamalama o Keriso ina ia outou iloa le lelei mai le leaga; ma afai tou te taofi mau i mea lelei uma, ma lē ta’uleagaina ia mea, o le a avea moni outou ma ni fanau a Keriso.

20 Ma o lenei, o’u uso e, e mafai faapefea ona outou taofi mau i mea lelei uma?

21 Ma o lenei ua ou oo mai nei i lena faatuatua, lea na ou fai atu o le a ou tautala atu ai; ma o le a ou ta’u atu ia te outou le auala e mafai ai ona outou taofi mau i mea lelei uma.

22 Auā faauta, ona ua silafia e le Atua mea uma, ona ua mai le vavau i le faavavau, faauta, sa ia auina mai agelu e auauna mai i le fanauga a tagata, e faaali mai e uiga i le afio mai o Keriso; ma o Keriso o le a ala mai ai mea lelei uma.

23 Ma sa tautino mai foi e le Atua i perofeta, i lona lava fofoga, o le a afio mai Keriso.

24 Faauta foi, e tele auala sa i ai na ia faaali mai ai mea i le fanauga a tagata, o ni mea sa lelei; ma o mea uma ua lelei ua mai ia Keriso; a na lē o lea po ua pa’u’ū tagata, ma ua leai se mea lelei e mafai ona oo mai ia te i latou.

25 O le mea lea, e ala i le auaunaga a agelu, ma afioga uma na tulei mai i le fofoga o le Atua, sa amata ona faatino e tagata le faatuatua ia Keriso; ma sa faapea, e ala i le faatuatua, ona latou taofi mau i mea lelei uma; ma sa faapea ona i ai seia oo i le afio mai o Keriso.

26 Ma ina ua mavae ona afio mai o ia sa faaolaina foi tagata i le faatuatua i lona suafa; ma e ala i le faatuatua, na avea ai i latou ma atalii o le Atua. Ma e pei ona mautinoa o loo soifua Keriso, sa ia fetalai mai upu nei i o tatou tamā, ua faapea mai: Soo se mea tou te ole atu ai i le Tamā i lo’u igoa, ua lelei, i le faatuatua e talitonu o le a outou maua, faauta, o le a faia lava ia te outou.

27 O le mea lea, o’u uso pele e, pe ua taofia ea vavega ona ua toe afio a’e Keriso i le lagi, ma ua afio i le itu aao taumatau o le Atua, e maua mai i le Tamā ana aiā tatau o le alofa mutimutivale lea ua ia tuuina atu i luga o le fanauga a tagata?

28 Ona ua uma ona faamalieina e ia tuutuuga o le tulafono, ma ua ā ia i latou uma o ē ua faatuatua ia te ia; ma o i latou o ē ua faatuatua ia te ia o le a latou piimau i mea lelei uma; o le mea lea ua fautuaina ai e ia le faamoemoe o le fanauga a tagata; ma ua afio o ia e faavavau i le lagi.

29 Ma ona ua faia e ia lenei mea, o’u uso pele e, pe ua taofia ai ea vavega? Faauta ou te fai atu ia te outou, E leai; pe ua taofia foi le auauna mai o agelu i le fanauga a tagata.

30 Aua faauta, ua i ai i latou i lana pule, e auauna mai e tusa ma upu e poloai ai o ia, e faaali mai i latou lava ia te i latou ua i ai le faatuatua malosi ma le mafaufau mausalī i uiga uma o le amioatua.

31 Ma o le tiute o la latou auaunaga o le valaau atu lea i tagata ia salamo, ma faataunuu ma faia le galuega o feagaiga a le Tamā, ia na ia faia i le fanauga a tagata, e saunia le ala i totonu o le fanauga a tagata, e ala i le folafola atu o le afioga a Keriso i ipu filifilia a le Alii, ina ia latou molimau atu ia te ia.

32 Ma o le faia o lea mea, ua saunia ai e le Alii le Atua le ala e mafai ai e le vaega o totoe o tagata ona latou maua o le faatuatua ia Keriso, ina ia maua e le Agaga Paia se nofoaga i o latou loto, e tusa ma lona mana; ma o le ala lenei o le a faataunuu ai e le Tamā, feagaiga na ia faia i le fanauga a tagata.

33 Ma ua fetalai mai Keriso: Afai tou te faatuatua mai ia te a’u o le a outou maua le mana e fai ai soo se mea e tatau ai ia te a’u.

34 Ma ua fetalai mai o ia: Ia outou salamo outou tuluiga uma o le lalolagi, ma o mai ia te a’u, ma ia papatisoina i lo’u igoa, ma faatuatua mai ia te a’u, ina ia faaolaina outou.

35 Ma o lenei, o’u uso pele e, afai o le tulaga lea e faapea ua moni nei mea ua ou tautala atu ai ia te outou, ma o le a faaali mai e le Atua ia te outou, i le mana ma le mamalu tele i le aso gataaga, ua moni i latou, ma afai ua moni i latou, pe ua uma ai ea le aso o vavega?

36 Pe ua taofia ea le afifio mai o agelu i le fanauga a tagata? Pe ua taofia e ia le mana o le Agaga Paia mai ia te i latou? Pe e taofia ea e ia, a’o tumau pea le taimi, pe a’o i ai pea le lalolagi, pe a’o i ai se tagata e toatasi i le lalolagi e faaolaina?

37 Faauta ou te fai atu ia te outou, E leai; ona o le faatuatua e faia ai vavega; ma o le faatuatua e afifio mai ai agelu ma auauna mai i tagata; o le mea lea, afai ua taofia nei mea oi talofa i le fanauga a tagata, ona o le lē talitonu ua taofia ai, ma ua lē aogā ai mea uma.

38 Ona e le mafai ona faaolaina o se tagata, e tusa ma fetalaiga a Keriso, vagana ai ua latou faatuatua i lona suafa; o le mea lea, afai ua le toe i ai nei mea, ua le toe i ai foi se faatuatua; ma ua matuā leaga lava le tulaga o tagata, ona o le a pei i latou e peiseai e leai se togiola ua faia.

39 Ae faauta, o’u uso pele e, ua ou matauina ni mea lelei mai ia te outou, ona ua ou matauina ua outou faatuatua ia Keriso ona o lo outou agamalu; auā a na fai tou te le faatuatua ia te ia po ua outou le agavaa e faitaulia i totonu o tagata o lana ekalesia.

40 O lenei foi, o’u uso pele e, ou te fia tautala atu ia te outou e uiga i le faamoemoe. E mafai faapefea ona outou maua o le faatuatua, vagana ai ua ia te outou le faamoemoe?

41 Ma o le a le mea tou te faamoemoe i ai? Faauta ou te fai atu ia te outou, tou te faamoemoe, e ala i le togiola a Keriso ma le mana o lona toetu, ia faatutū mai outou i le ola faavavau, ma o le pogai ona o lo outou faatuatua ia te ia e tusa ma le folafolaga.

42 O le mea lea, afai ua i ai i se tagata le faatuatua e tatau ona i ai ia te ia le faamoemoe; auā a aunoa ma le faatuatua e le mafai ona i ai se faamoemoe.

43 O lenei foi, faauta ou te fai atu ia te outou e le mafai ona i ai ia te ia le faatuatua ma le faamoemoe, vagana ai ua agamalu, ma maualalo o ia i le loto.

44 Afai e faapea, ua lē aogā lona faatuatua ma le faamoemoe, ona e leai se tasi e ono talia i luma o le Atua, vagana ai i latou o ē ua agamalu ma maualalo i le loto; ma afai e agamalu ma maualalo se tagata i le loto, ma tautino atu i le mana o le Agaga Paia o Iesu o le Keriso, e ao ina i ai ia te ia le alofa mamā; auā afai e le i ai ia te ia le alofa mamā, o se mea noa o ia; o le mea lea e ao ai ina i ai ia te ia le alofa mamā.

45 Ma o le alofa mamā e loa ona tali-tiga, ma e agalelei, ma e le losilosivale, ma e le faafefeteina, e le sailia e ia ana lava mea, e le faaitaitagofie, e le mafaufau i se mea leaga, ma e le olioli i le amioletonu ae olioli i le upu moni, e onosai i mea uma, e talitonu i mea uma, e faamoemoe i mea uma, e tumau i mea uma.

46 O le mea lea, o’u uso pele e, afai e le ia te outou le alofa mamā o ni mea noa outou, ona e le uma le alofa mamā. O le mea lea, ia outou pipiimau ai i le alofa mamā, le mea ua silisili i mea uma, ona e i’u mea uma—

47 Ae o le alofa mamā o le alofa le pona lea o Keriso, ma e tumau e faavavau; ma o soo se tasi e maua ua i ai ia te ia i le aso gataaga, o le a lelei ia te ia.

48 O le mea lea, o’u uso pele e, ia outou tatalo atu i le Tamā ma le malosi atoa o le loto, ina ia faatumulia outou i lenei alofa, lea ua ia faae’e mai i luga o i latou uma o e o soo moni o lona Alo, o Iesu Keriso; ina ia mafai ona avea o outou ma atalii o le Atua; a oo ai ina afio mai o ia o le a tatou faapei o ia, ona o le a tatou vaai ia te ia e pei ona i ai o ia; tau ina ia tatou maua lenei faamoemoe; tau ina ia mafai ona faamamāina i tatou e pei lava ona mamā o ia. Amene.